[مدري وش السالفة]

هل تسأل عن دينه أو خلقه؟؟

أهم شي الدين لأن اللي مايخاف الله خف منه ،، مهب شرط يكون مطوع معفي لحيته ومقصّر ثوبه ( بس يكون محافظ على الفروض ولايتتن ولاهوب راعي سفريات وخربطة ! )
بعد ترى بعض المطاوعة معقدين بالحيل ولاعبة بروسهم الشكوك والبلاوي !

هل تنظر إليه من الناحية المادية؟؟ ودخله الشهري؟؟

لازم يكون مستقر وظيفياً وله دخل ثابت ( حتى لوكانت وظيفة بسيطة ) وياما شفت بنات منكسرة خواطرهن عند قريباتهن ( من نواحي كثيرة ) لأن رجالهن ( ضعيفين ومابيدهم وظايف )

هل تنظر إلى قبيلته وأين ينتمي؟؟

شي اساسي إنه يكون فيه تكافؤ بالنسب بين الحمايل ( كلـن ياخذ من مواخيذه ) أما إني بأزوج بنتي لفلان علشان عائلته المشهورة وإلاقبيلته وإلا منهو ولده ( وحنا مانعرفهم بالحيل ) - فذي جدعة تسلب لبنتي - وعلى قولة المثل الدنماركي ( روّح زمان القبايل يازمان الدراويش ) هذا زمان كل من إيده إله ( الزم ماعلي الولد وشهو من لحية )

هل تريد ان تحظى بشيء من المهر فقط؟؟

وش نحظى ذي ؟ ياحليلك بلاك ماتدري !
إلا نبي ندفع نص تكاليف العرس ( شكلك ماتعرف بنيات هالوقت الله يصلحهن ) يالله يسدهن دبل المهر مرتين والتعبة على ظهور اهلهن !

هل ترى أن الأقارب هم من يستحق اختك أو ابنتك أحق من غيرهم؟؟

من ناحيتي أفضل أزوج بنتي ولد من عيالنا نعرفه من يومنـّه صغير ( باخصينه وعارفين اللي وراه ودونه ) وجه تعرفه ولاوجه تنكره ، لأن الناس مدافن شوك ، لو رضيت دينه ممكن تكون أخلاقه دمار ولسانه اقشر ( ومثل ماقال مدحت يمكن يبلاك الله بواحد نفسية وتقعد تصاليه هو وبنتك كل عمرك )

هل ترى إلى وسامته وهل هيأته تأهله للزواج؟؟؟

وراه قط بأفتح معه مشروع ( نسل رامي عياش السعودية ! )
عجييييييييب من متى الرجل ينحكم عليه بشكله ؟
خابرتن البنت هي اللي يشترط لها الزين مهب الولد ؟ ( وراه انقلبت الموازين ؟ )
عاد مانقول إنه يصير شين ( خير الأمور الوسط ! )

مع إنه فيه ناس مهبّل ممكن يشترطون الزين للولد ( بس اشوا مابعد قابلتهم للحين وإلا تسان يمديني حثوت بخششهم التراب :D )

وعلى قولة جدتي هيا ( الرجل زينه بمخباته ) >> الله يسامحتس ياجديدتي أثره صادز جدي يوم يقول إنتس داخلة على طمع يوم تاخذينه :D