[O X Y G E N]

اقتباس انا اليوم اكتشفت إن أكبر همنا بطوننا ووش بناكل .. راح أقولكم وجهة نظري بشكل محايد بما إني 0 عنيزاوية وطالبة جامعية ببريده يعني يومياً اجيكم أولاً : ماكدونلدز قبل كل شي لحد يقارن ماك عنيزة ببريده لأن .. 1- فرع عنيزة صغير جداً ومساحته لا تقارن بمساحة ماك بريده 2- عدد الطاولات قليل وكل طاولة أضوق من الثانية والممرات ضيقه 3- ماك بريده واسع جداً جداً والطاولات كثيره ومتنوعه فيها الحجم الكبير والصغير 4- فرع بريده زبائنه غالباً من بريده أما فرع عنيزة فهو الأقرب لغالبية مدن القصيم 5- رغبات السكان في كل مدينة يختلف عن الأخرى من تجربتي .. بشكل إسبوعي لازم أمر على ماك بريده مرتين بالاسبوع تقريباً بحياتي ماجلست أنتظر طاولة تفضى أو حتى طاولة تنظف ودائماً السواق يوقف بالمواقف الضيقه ويدخل ويطلع بكل سهولة يعني مافيه ضيق أو زحمه حتى طلبات السيارات ماتزيد عن 5 سيارات للمعلومية أنا رحتله بأوقات منوعه الصبح الظهر الليل بكل وقت مازال على الطعم القديم نجي لماك عنيزة أروح الظهر وإلا أروح بالليل ما أشوف مواقف بنده من كثر زحمة السيارات الي على ماك يوصل صف السيارات للساعة من كثرته أدخل لقسم العوائل ما أقدر أمشي من كثر الناس وكثر الي واقفين انتظار وكثر الي يطلبون حتى السواق يرفض يروح لماك عشان يجيبلنا طلبات نتصل عليهم عشان يوصلون يقولون زحمه مايصيرون فاضين إلا المغرب الطعم تغير ماعاد مثل أول .. بالنسبة لي لما اشتهي ماك أقول امشو نروح لبريده وإلا أتغدى منه إذا طلعت من الكلية ثانياً: عنيزة أحلى ومدري ايش !! لاتضحكون على أنفسكم صحيح عنيزة أحلى من ناحية الشوارع والطرق وغيرها لكن عندنا وعندكم خير بعد أنتم تعلموا تسوقون قبل عشان يضبطون ششوارعكم أما من ناحية كل شي عندنا لاتقعدون تتخيلون شوفوا كم مطعم هندي عندكم .. دام تفكيركم بالمطاعم !! وشوفوا كم مطعم صيني .. إيطالي .. وغيرهم الطازج فرعين .. الداجن فرع كبير وحنا ماعندنا ولا واحد منهم وإذا بتحسدوننا على بيتزا هت وع مانبيه تعالوا خوذوه تراه مقرف ووصخ وعمال يعصبون عليك ويطردونك من المطعم من قلة أدبهم وماعندهم كل الوجبات وينظفون بأدوات وصخه يعني تقعد على الطاولة تشم ريحة شي ( مدود ومقرف ) نرجع ... كم كوفي وكم مشغل وكم مكان نسائي !! حنّا لا يجون يفتحون شي يخص النسائ تصير بلاوي الدنيا بعنيزة وكل شي حرام وكل شي ممنوع مستشفى الحبيب عندكم فندق الموفنبيك عندكم .. يعني حنآ حتى فندق راقي وعلى سنع مافيه كل المكتبات الي توفر كتب الجامعات وغيرها عندكم نوادي صحية نسائية برضوا عندكم حنا كل شي تابع لعيادات ويجيب الهم وش بعد !! ايه أهم شي والي أعاني منه .. انا ليش يومياً ببريده ؟ لأني أدرس بقسم مو موجود إلا ببريده طيب ليش ببريده مع إن ثلاث أرباع الطالبات من عنيزة والرس والبدايع والمذنب ؟ ليش مايكون بعنيزة بما إنها متوسطة بين مدن القصيم ؟ بنات الرس المساكين يمشون 40 كيلوا لعنيزة بعدين 30 كيلوا لبريده يعني 60 كيلوا كل صبح وكل ظهر مو بس قسم القانون .. قانون + رياض أطفال + علم نفس وأفضل المعاهد التعليمية والتدريبية ببريده الجامعات الأهلية كلها ببريده حتى المستشفيات عندكم اكبر من عندنا المستشفى التخصصي .. ومستشفى الولاده والأطفال تعالوا لعنيزة شوفوا مستشفى الملك سعود قسم الولاده والاطفال بملحق كبير برا المستشفى وجميع الأقسام بمبنى واحد مع غرف المرضى وأنتم فاصلين الاقسام مع إن مبانيكم كبر مستشفى الملك سعود بأضعاف مضاعفة يعني إذا بتقارنون .. قارنوا بالعقل رجاءً مشكلتكم تشوفون الي ماعندكم ونحتاجه حنا .. وماتشوفون الي عندكم ونحتاجه أكثر منكم .. الي فاتح الموضوع وغيره من المؤيدين تعالوا عيشوا شهر عندنا وادرسوا ببريده وراح تحسون بالفرق والنعمه الي عياشين فيها - بالنسبة لمقاطعتكم قاطعوهم يمكن يحسون إنه محد يجيهم ببريده ويسحبونه عندنا ويصير ثلاث فروع بعنيزة بالنهاية اقولكم لاتصيرون بزران أجدادنا فرقوا بيننا وحنا بنفرق بزراننا ونعلمهم الحقد والبغض والحسد والله عيب يعني أجدادنا كانوا جاهلين بعض الشيء حنا نصير مثلهم ؟ تفكير قديم ومتحجر ومتخلف ؟ المفروض نسعى إن محافظاتنا تكون مدينة وحده تسمى القصيم مو كل واحد لما نسأله من وين يقول من عنيزة من بريده من الرس ..؟ واذا قال ايه القصيم تقول لا من عنيزة ونستمر بالتفكير والسؤال والمناقشة والجدال مين يمط .. عنيزة وإلا بريده ؟!

المقارنة بماك عنيزة وبريدة واضحة جداً .. وضوح الشمس .. افتتاح فرعين بمحافظة عدد سكانها قليل والبقاء على واحد ببريدة هذا يدل على أنه يوجد خلل واضح وصريح من الشركة المستثمرة لاسيما وأنه العمى يدري لما نسئله ونقول : أيهم أفضل لبناء مطعم إستثماري هل لمدينة عدد سكانها كمثــــال : 600 ألف نسمة ولا محافظة 60 ألف نسمة فإكيد الاجابة بتكون الست مية ألف ..

مسئلة أن الكراسي ببريدة أربع وعنيزة ثلاث أو الطاولة هناك ثنتين وهنا خمس هذي اشياء بروتينية وممكن توسعتها مع الوقت ولكن الطوابير والزباين وخصوصا طلبات السيارة والي عليها ضغط والي ينطق الواحد ساعة ساعتين ..

الشي الثأني أن بريدة يتوفر فيها قطاعات حكومية كبيرة ومدارس وشباب عزاب واضفي على ذلك دخلاء المناطق الأخرى الي استقرو ببريدة والي متعودين على مطاعم ماك .. والجماهير وقت المباريات خصوصا اذا كانت مبارة قوية والله ماك يوقف السرى وعندنا محافظات مثل عيون الجواء والبكيرية والبصر و و و و .. أما انتم يجونكم البدايع والمذنب ..

أما المطاعم الثانية فجرت العادة وجود المطاعم الرئيسية بالعاصمة وبعدين تفتح فروع بالمحافظات .. ولما نجي للمطاعم الهندية فهي موجودة وهذا مبناه موجود بالفاخرية وعلى فكرة مبنى رئيسي مو مثلنا مستأجر ..

ومسئلة تقولين تعالو عيشو عندنا وشوفو المقارنة بالعكس .. أنا أشوف انكم مرتاحين من ناحية الأسعار والمحافظة الصغيرة ممكن السيطرة عليها .. وايضا الزحمة .. واما المستشفيات فعليها ضغط ولاتعتبر خدماتها خمس نجوم حتى لو توفرت .. نرجع ونقول المقارنة بين بريدة وعنيزة فيها فوارق كبيرة وهذا الي أنا اقوله .. بريدة اكبر وعاصمة وعنيزة أصغر من بريدة ومحافظة .. وتجي المطاعم الي همها الإستثمار تفتح أكثر من فرع بمباني رئيسية وحنا فرع واحد .. شي يفتح ألف علامة 1ستفهام ........!!

والمقاطعة راح تتم مع الوقت ويكفي أن الموضوع يصل إلى المسؤولين بقسم الاستثمار بماكدونالدز عشان يشوفون أن أهالي بريدة ليسو همجيين ونايمين ، ولعلى وعسى أن الموضوع يفتح أعين الكثيرين والمسؤولين عن ماذا يحدث كي لايتفاجئو بالمستقبل وجود الشركات العالمية والكبرى بالمحافظة والفروع بالمدينة ..

اقتباس اا حبيابتي العنزاويات الي داخلين عررض بالعافيه عليكم فرعكم الثانيه وهذا مووب سالفتنا .. واخررر همومنا وش فتح عندكم وش مافتح .. اقري الموضوع زين انتي وياها نتكلم عن بلديتنا الداجه وكيف تطيٌر المشاريع من بريدتنا .. عتبي على بلدية بريده .. ؛( موب بس عشان ماك عشان اشياء واجد

ماك يعتبر نقطة من بحر من الاشياء الثانية .. ماراح اتكلم عن طرق وشوارع مالت اتجاهاتها وماراح نتكلم عن شركات كبرى ومؤثرة مثل موبايلي والبلاد وبخلي المطاعم ماني قايل وين برجر كنق والبيك ابذكر فقط ماك لأنه انتهى من مبناه عشان نكون على بينه .. والله يستر من الجاي لابكرى بعد بيوتنا تصير هناك ..