|
ياويل تسبدي بس
انا دائما اكتفي بالقراءة بالمنتدى .. بس موضوعك اجبرني اسجل دخول
اتوقع بيجيني ضغط .. والسبب الهمج اللي بشوارعنا
دائما امنية تجي على البال .. اتمنى اكون رجل مرور فجأة .. اذا شفت الهمج اللي بالشوارع
يااخي شي يغبن ويقهر ويذبح .. تهور وسرعة و عدم التزام
يسرع و ينشب صدامه بصدامك الا غصب تفتح الطريق له
مع انك تمشي بسرعة الشارع و يمكن اسرع بعد .. يحط صدامه بصدامك حتى لو المسار الأوسط فيه سيارة وماتقدر تفتح له الخط
والا اللي يمشي بالطريق وسط الزحمة تقل يخيط .. من اقصى اليمين الى اقصى اليسار تقل يخيط من بين السيارات وعز الزحمة
والا اللي يقفل اليمين .. يفور دمك ماتحرك .. الناس ملتزمة و السيارات ورا بعض بكل ادب
واخينا يجي اخر الناس و بكل بلادة يقفل اليمين يبي يصير اول من يمشي
ويعطل كل اللي يبون يلفون يمين .. ومن المواقف اللي اشوفها .. واحد يقفل اليمين الصبح .. والناس سرا يضربون بواري له .. وهو ولا يتحرك ولا ملي .. واشوف اللي وراه معهم بزرانهم يودونهم المدارس بيلحقون على دواماتهم
وهالخنزير موقف ولا همه شي
اما قطع الاشارات .. منتشر و اللي يقطع الاشارة يحسبه قوة .. واللي كل ما شفت احد يقطع الاشارة .. قلت الله يهلكك و يفك الناس من شرك
والمرور نايم ناااااااااااااااايم .. همه يحط تفاتيش مخالفات
يااخي انت دورك تضبط المرور .. وش الفايدة تعطي مخالفة لواحد ما ربط حزام الامان .. وهو بالشارع الثاني قاطع اشارة و مسرع وموذي خلق الله ؟
متى تفك الناس من شره ؟ مخالفة الحزام مجرد دراهم بتروح لوزارة الداخلية .. لكن ضبطك له متى ينفعني انا كمواطن ملتزم ؟ انا ملتزم و اعرف حقوقي و اعرف واجباتي .. متى تعطيني ابسط حقوقي بالشارع ؟ ابي اسوق وانا ملتزم ومتطمن اني بسلم بإذن الله .. لكن اني التزم .. وواحد ينشب صدامه بصدامي كأنه يقول وخر والا بصدمك .. والا التزم وواحد بيقطع الاشارة ويعدمن ويعدم اللي معي .. او التزم وبيجي واحد من يميني ومن يساري ويغير المسار تقل يخيط .. بهالحالة صارت السواقة رعب .. حتى لو تلتزم يبي لك تركب مليون عين تتابع هالهمج اللي من حولك
وهالمبزرة .. اللي كل من طلع من بيضته شرا له ابوه سيارة بدون ادنى متابعة .. وهو بكل عاير مطلع الشيب بروس العالم من همجيته بالقيادة .. هنا اقول .. الله يهديك ويهدي ابوك .. والا الله يهلككم ويفك الناس شركم !
المعذرة على الإطالة
|