[مولاي]

نكمل المشوار((أود التنبيه إلى أن كلامي لا يشمل جميع شباب بريدة وإنما بعض العينات التي قابلتها في حياتي))



ثانيا : الســلــبــيــــات

1- العصبية الغريبة بين أهل بريد ة :

فأذكر أنني أول ما جيت للمتوسطة (طبعا تعرفون إجتماعي شبكت مع أغلب الفصل تقريبا) سألني واحد (ينزع) وقالي وش أصلكم ؟ الصراحة يا أخوان بدون مبالغة السؤال هذا أول مرة يمر علي بحياتي طبعا

( قلت في نفسي الله يهاديك يبه ليش ما علمتني الأمور هذي ) سحبت أنفاسي وقلت لصاحبي ما أدري ،وأنا من جد ما أدري يا أخوان ، صاحبي ما صدق خبر وقال ما تدري؟ أجل أكيد انتم عبيد

، والله ياجماعة ما تصدقون هالكلمة أثرت فيني كيف ،كنت أظن أول أن كلمة عبيد تطلق على اللي لونهم أسود بس، تمنيت أنه تجي الطلعة بسرعة عشان أروح أسأل أبوي ها السؤال اللي سألني صاحبي واللي أحرجني فيه،لما رجعت للبيت سألت أبوي ها السؤال ،ورأيت ابوي تنتفخ أوداجه ويقول من وين جبت ها السؤال؟

طبعا انا ما أقدر أخبي عن أبوي شي وإلا كان يلعن كلافاتي علمته السالفة كلها قالي ابوي آيه عظيمه(إن أكرمكم عند الله أتقاكم) تمنيت أنه يجي بكره بسرعة عشان أعلم رفيقي بهذي الآية ،لكن أتسائل وش ذنب اللي مالهم أصل إنه تهان كرامتهم ويقال لهم عبيد، حتى سمعت من أحد زملائي كلمة أوجعت راسي ،يتكلم عن احد العوائل المعروفة ببريد ة ويقول( لايهمونك عبيد ).



2- هذي لها قصة بعد وهي أني جاي من الشرقية على وجهي ما طلعت على الدنياء وطبعا كنت أشبك مع طلاب الفصل بدون تفريق عندي إن كل الناس مثلي إحم إحم مالهم مقاصد خبيثة وفي أحد المرات وعندما كنت أمشي في ممر المدرسة سمعت أثنين من طلاب ثالث متوسط وأشكالهم كبيرة يقول واحد للصديقه

شف هذا والله ياهو موووووووووت والله ياهو يقشط إلتفت لصوبهم أثرهم يقصدوني الصراحة حسييت بقشعريرة في جلدي وخفت من هالوحوش عقب هاالموقف هذا بديت أتحاشى أتعرض لمثل ها الحيونات المفترسة ودريت أن فيه شي أسمه (لواط) الله يكرمكم



وصرت ماأطلع من البيت إلا مع إخواني الكبار،وصار في راسي إستفهامات وين بريدة اللي كنت أفتخر فيها بين زملائي يصير فيها كذا؟!..



3-الفجوة العميقة بين الشباب الملتزم وغير الملتزم:

نرى للأسف الشباب الملتزم تقريبا لهم عالم خاص بهم وللأسف ما فيه دعوه منهم للشباب العاديين أنا با النسبة لي عندما كنت في الثانوية وصارت ملامحي لا تدل على الإلتزام رأيت عزوف كثير من زملائي الملتزمين عني لا أدري لماذا مع العلم أني ولله الحمد مواظب على الصلوات الخمس (ما ادري وش صار) هل لابد إني أحط لحية عشان أصاحب الشباب الملتزم ؟؟

للأسف رأيت من( بعض )زملائي الملتزمين الغيبة والنميمة .



3- التكبر و(شوفة النفس):

ياجماعة لك حق انك تفتخر ببريدة لك حق أنك تحبها لكن لايكون ذلك على حساب إحتقار الآخرين ، وما أحداث مكة والشغب اللي صار فيها منا ببعيد،فشلونا قدام الله وخلقه وش قالوا فزعة نبي نأدب الحجز اللي ما يعرفون وشي بريدة)

حتى للأسف من بعض اللي يشرهه عليهم تلقاهم( يدعدون) ولايرون المدن الثانية شيء، حتى سمعت من أحد اللي يحسبون من العقال يقول (المفروض مايحطون إلا من بريدة القضاة ) وش ها الكلام اللي ما يدخل العقل.



((أود التنبيه مرة أخرى أن هذا الكلام لاأعمم به شباب بريدة وإنما من عاشرتهم))





5-الإقصائية والتصنيف:

على طاري التصنيف لي زميل هوايته التصنيف فدائما يقول لي: فلان إخواني وفلان جامي وفلان عقلاني....إلأخ (أذكر حصلي معه موقف مضحك وهو أنه في أحد الجلسات وهو متحمس يتكلم في عرض أحد المشايخ ويقول أنه إلجامي والشباب اللي جالسين جايزلهم سب رفيقنا للشيخ وهو يسب دخلت عليه دخله يحبه قلبك بحركة الموت قلت: (فلان الشيخ اللي تحدث عنه يظل مسلم وما يحق لك تغتابه يا رح كلمه وإلا إلفقه)توقعون وش قال طبعا الرجل حار و جاهز للتصنيف قالي: ( وأنت إلجامي مثله بعد).. حتى هو وخشته المشايخ ماسلموا منه الناس تشتغل وهو جالس يغتاب .

و أما الإقصائية فحدث ولاحرج فا الوقت لايسعني عن التحدث في هذا الموضوع.





6- مشهور عنا للأسف أننا مزعجين ونحب المكاسر و دايم لاصرت مسافر ودخلت مطعم رز بخاري وشفت ناس لابسين قمصان ...وطواقي وأصواتهم مرتفعة فإعرف إنهم ربعنا.



((أخيرا يا أحبابي أرجو المعذرة إن طال لساني وتجرأت على أحبابي فإن بريدة يسري حبها في أحشائي ........وأتمنى ألا أكون ثقيل الظل عليكم ....والسلام عليكم ورحمة الله وبركاته))