[تخ تش]

قبل لا تقراا الموضوع..اقطع الاتصال لأن هرجي كثير ..وانصحك..تروح هرفي..وتشتري ملك شيك((الله يرحم عسكريم ابو نص))

مسااء التنورات جميعن(قصدي النور)

قبل تسم من يوم..طنَت في بالي فكرة إن مشرفين المنتدى يكشتون معاي البر...

تخبرون هالأياااام حرر موت وكسل.. بس الدعوه سعة صدر ..!!

عاد أنا دقيت على العالم الزقرت...وشبينا على أعمارنا وجمعت القطة ومشينا...

وكان المشاركين في هالرحلة:-

buraydah,مالكوم اكس,الامبراطور,فتى العشه,الصارم.نبع الحنان,ومدحت شوقي بريده,ابو ساري ,المستشار,عربجي فاهم,ابو قلبين,والميدان,, ولا تنسون تخ تش <-احم احم:D وعاشقه الجهاد <----عشات تغسل المواعين
أضف الى ذلك حسبنا حساب النشبات واللي يلزقون اعمارهم مع اللي طاقين خيام امثال :-

سعفه:D( هذا يجي يتعشّا وبعدين يروح ينام مع انه ما قط)...
الذهبي (الجيزاني هذا واحد يقدر الخطوط يعني ما يقر يوم تلقاه في بريــده ومن باتسر تلقاه في الرياض يعني زمزمية الشاهي والموية عاد ما يندرى وش فيها...

ومن بعد…اممممممم مدري بس إذا جانا أحد علمتكم...

بعد مناوشات طويلة...قررنا إننا نروح لقبه
المهم.. مصرقع666 هو اكبرنا (جسما) وهو الوحيد اللي معه ددتسن غمارتين, طبعا هو مستغل الوضع ولا دفع الا نص القطه , لانه بيمن علينا بموتره …

الخيمة سارقها .. الحليل يقول انه ماخذها من جنب مسجد كان مسوي مشروع تفطير صائم... ويوم خلّص رمضان ما ضفّوا الخيمه...عاد أخذها هالحبيب إعتباراً منه أنها لقطة
((الله من زين العذر)).. :D...

الملثم كان أحسن واحد يطبخ في الشلة..كان يسوي في البر مكرونة بالباشاميل تاخذ العقل ( مكرونة بالباشاميل في البر ؟؟؟؟ وين أصرفها فيه ذي؟؟؟) ...أما على الفطور يحكر لنا ذا الأومليت اللي يقول (إللي هو أنت يالأومليت) لبوفية فندق السللمان إنقلعععععععععع....لكن على الغدا يصلح لنا كبسة..عليه القيمه انا ما ادري هو زين والا لا؟!!؟ بس العلم الصحيح ان حنّا نقوم من الصحن وهو نضيف... اشواء:D

أنا (طبعاً لازم أمدح نفسي) احسن واحد في الرحلة...أعجز مخلوق..أنا وبطل العالم ما غيرنهاوش وبس..لكن الشيء الوحيد اللي مصبرهم علينا ان حنّا مصدر سعة الصدر والهواش…

طقينا الخيمه وكان كل شيء تمام اول يومين شيء معروف لحد يعلم عن مكان الخيمه ,عشان النشبات ما يجون, لكن من كثر الطلعات والجيات دروا عن الخيمه ونشبوا فينا زي العاده…….

في هذي الفتره مرينا باشياء طريفه جدا ,ان منيب قايلها كلها ابقول موقف او موقفين منها…

--------الموقف الأول-------

انا داري انه زي خشتي بس عادي …
طول الله اعماركم قمت من النوم بدري (اول مره اقوم بدري) لانكم خابرين ان الواحد في البر يشبع من النوم قمت على صلاة الفجر تقريبا… وقعدت احتري طباخنا الملثم يقوم عشان يصلح لي فطور...صحيته وقلت له: يالله سو لي فطور... قال:تونا بدري على الصلاة...قلت: أي صلاة يا مال الصَل اللي يعرشك مع خشمك... الساعة 9 الحين...قال: افففففف..يالله باقوم الحين...وش تبي بيض..؟؟؟ قلت: أي بيض الله يحوم كبدك ...تراني بأبيض من فطورك ذا...قال: أجل وش تبي.؟؟؟ قلت: أبي فطور كونتيننتال وجبه لي في الخيمة...((أنا بصراحة ما أذكر وش صار ..بس اللي أذكره إني صحيت بعد نص ساعة وإذني اليمين تطن وخدي يحكني))

المهم...قعدت أدور على أحد أسولف معاه...مين يا ربي ميييييييييين..؟؟؟؟؟
الحليل انس يقوم خيشة نوم لو تكب عليه وايت من الوايتات اللي تشفط ال…؟؟؟؟؟؟ ما قام…

والذهبــــي ما ينتحارش بيقوم ويمردغني.. :D





قلت يا ولد مالك الا المستشاار ((مهب هيفااء))
...وشوله ينام.؟؟؟ ؟ واقعد اتبيثر عليه كل شوي ناغزه او ادخّل أنتل الجوال في خشمه ابيه يقوم يا اتهاوش انا واياه والا يخاويني نتمشى بالبر… من كثر ما انغزه قام وزعق علي …من قوي الزعقه قام buraydh من النوم... الحمد لله يا ربي…؟ شعره منتفش(كأنه أفرو مان) بغى ينشب في عمود الخيمة من فوق والغمص مالي عيونه, ويلتفت علي انا و المستشار والا جنبه زبيريه يحبه قلبك ما دريت الا وهو معلّم في وجه المستشار هو اصلا ناويهذي الزبيريه بي بس من كثر الغمص ما ضبطت الوزنيه زين… انا يوم شفت ان الدعوه تسذا محد عطاني خشه…. قلت اوريكم…واشلّح مفتاح ددسن مصرقع666

واروح للديره واجيب من البيت ثلاث دستات فحم على دستتين صواريخ مع كرتون واجيب معي مسيل دموع………. واروح لهم في الخيمه وانا ابتسم ابتسامة خبيثه

اول شيء نطلت مسيل الدموع,لكن ماله تأثير يذكر اللهم دخنه وبس ,شفت ان ذا السلاح ما نفع واجيب دستات الفحم واشبه كامله واوزه بنص الخيمه والحقها بكم صاروخ على كم فحم واقفل باب الخيمه واطلع

كانت غلطتي الوحيده اني طلعت…ما تدرون ليش..؟؟؟؟؟







لأن فاتني نص عمري ...

الحليل … ججاب العيد بصاروخ في جبهته طيّر النوم من عيونه مع انه مشهور بعدم تاثير العوامل الخارجيه على نومه...

الذهبي طاحت جنبه دستة الشروخه قام وهو ما يشوف الدرب..من الروعة يحسب انه في افغانستان .. ! !

بطل العالم من كبر روعته إنهبل وقام يزاعق الغووووووووووث الغووووووووووث...

مالكوم اكس دخل صاروخ في خشمه وقام يون الصاروخ الين ما انفجر في خشته.....

المستشار لقيناه زابن تحت الفرشه يحسبها قبو؟؟؟؟ <---------دلخ :D

الامبراطور .. طاح الفحم بشوشه واحترق نص شعره…((طلع كأنه مستر بن..))

عربجي فاهم يدعي ربه وتقول انه عرج بنا…….؟؟؟؟

buraydh هذا مسكين دخل صاروخين بخشمه وواحد في اذنه..

انا متلحط برا ما ادري وش اللي صار…….
بعد لحظات انفتح باب الخيمه ما شفت الا الدخنه……. طلعوا كلهم قابلن الذهبي معه مفتاح ناوي يدخله في خشمي والله ويثبتوني ويربطونّي وخذ كم كف على كم رجفه ..

<---- كل هذا في إنتظار المحاكمة اللي بتصير بعد شوي...

اجتمعوا وقاموا يتوشوشون……(يعني يقولون كلام بشويش انا ما اقدر اسمعه)
ويجي الحليل ويقرا ذا البيان قدّامي….:

.
.
.
.
قال تعالى( يا أيها الذين آمنوا كتب عليكم القصاص في القتلى الحر بالحر والعبد بالعبدوالانثى بالانثى)
وقال تعالى( ولكم في القصاص حياة يا أولي الألباب ….) صدق الله العظيم.
اقدم المدعو تخ تش بالسطو المسلح على خيمة المنتدى … وذلك بمحاولة إيقاظ الراقدين فيها واغتصاب خنفسانه كانت تدور حول خيمتهم …مما اسفر عن ذلك اصابة الذهبي بطلق صاروخي مما ادى الى طيران النوم من عينيه وقد اصدرت المحكمه العليا بيانا بمحاكمته…. وصدر الحكم عليه باسره وان يلقى عليه اشد انواع العقاب وذلك بتغسيله للمواعين لمدة يومين متتاليين ولا تاخذكم فيه رحمه او شفقه….

صادق على الحكم
الحليل-المستشار

----------------------

وبعد هذه العمليه المشؤمه انتهت رحلتنا البريه .
عساها اعجبتكم بس.
ما أدري ليش كأن ودكم تقولون انها ما أعجبتكم….؟؟؟