|
بقلم احمد عفيفي
استقالة حمار---------
حمار وجاله مزاجه يستقيل م الشغل
نهق بحرقه وقال
ملعون أبو ده زل
من طلعة الشمس للمغرب على ده الحال
وقلة الأكل يا عربجى جابتلى داء السل
مش ماشى
مش ماشى وأضرب بقى ميت سنه لقدام
لا الضرب حيهمنى
ولا حتى شد لجام
ونام ومدد على الاسفلت ف الشارع وقال
يا عربجى حتى ولا الأعدام
مش ماشى
وان كان على شغلتك
أنا مستقيل منها
وأن كان على لقمتك
الله الغنى عنها
وأن كان على البردعه ولا الجام
خدهم وأدينى حريتى
جه وقت أعلانها
مش ماشى
طول عمرى بجرى على مراتك وست عيال
لا يوم عصيتك ولا قولت أنى مش شغال
بجرى عليهم وعامل حضرتك راجل
وأنت أصيل ف الدناوه
ما تبطل أستغلال
أيه شغلتك حضرتك ممكن تفهمنى
غير بس قولة شى حا وأنك بتشتمنى
وكل خطوه تفرقع كربجين قدام
دنا لحم يا عربجى والضرب يألمنى
مش ماشى
مش ماشى
م السوق للوكاله بسحب على شرنوب
وتنام تشخر حضرتك وانا صبرى غلب أيوب
واليل وبرد الشتا وشخيرك
خلونى حاسس كأنى ماشى بالمقلوب
مش ماشى
مش ماشى
تيجى تحاسبنىوأحسبك يا ضلالى يا دون
وأقطع دراعى وأرهنك حتلاقيك مديون
جدك شرانى بنص جنيه سنة عشرين
وأبوك ورثنى وكان راجل فظيع مجنون
أبوك هرى ضهرى بالضرب بالنبوت
ومن عرق جتتى بنالكو ست بيوت
جيت أنته ورثتنى وطلعت أيمانى
وأديك حتسبنى لأبنك بعد أنت ما تموت
مش ماشى
مش ماشى
أنا عايز ألف وأزوم وأرقص بحريه
لا حاه ولا شى
وأكلب مزاجى واللى نفسى فيه
وأرمى اللجام واقطعه دنا متولدتش بيه
صدقنى يا عربجى
لو يوم بقيت أنا عربجى وأنت أتقلبت حمار
حتعيش معايه معيشه بحبحه وهزار
ونقسم الشغل والمعلوم
بينى وبينك بالحق والمعلوم
مشوار تجر أنته وأنا مشوار
مش ماشى يا عرجى
مش ماشى والله العظيم منا ماشى
أنا من شغلتك دى مستقيل
أنا من شغلتك دى مستقيل
__________________
اللهم ارحمنا فوق الارض وتحت الارض ويوم العرض
وَالَّذِينَ إِذَا فَعَلُوا فَاحِشَةً أَوْ ظَلَمُوا أَنْفُسَهُمْ ذَكَرُوا اللَّهَ فَاسْتَغْفَرُوا لِذُنُوبِهِمْ وَمَنْ يَغْفِرُ الذُّنُوبَ إِلاَّ اللَّهُ وَلَمْ يُصِرُّوا عَلَى مَا فَعَلُوا وَهُمْ يَعْلَمُونَ * أُوْلَئِكَ جَزَاؤُهُمْ مَغْفِرَةٌ مِنْ رَبِّهِمْ وَجَنَّاتٌ تَجْرِي مِنْ تَحْتِهَا الأَنْهَارُ خَالِدِينَ فِيهَا وَنِعْمَ أَجْرُ الْعَامِلِينَ
آل عمران
|