[أبو مشعل]

بسم الله الرحمن الرحيم

مشاركة لشيخ طاعن في السن بهذا الوقت يقول :

يوم حنا أصغارين في زمن أول يمكن مضى عليه ستين سنه تقريباً واللي يفوته شيء من الصلاة يأخذون شماغه عقوبة مع ما يجيه من اللخ والصخ يقوم بها المطوع و النواب مثل ( الهيئة في زمننا الحاظر ) وهم بحمد الله في كل قرية و بصلاة الفجر يؤكدون على كل واحد بالعد ( أفلان موجود ) واللي ما يسمعون صوته يسألون عنه ويهاوش ويأدب والأب يتلفت يدور عياله وكل هالسوات وحنا جهل ما نعرف من الدين شيء أبد بس اللي يقولنا المطوع أو النايب ( الهيئة ) من أمور الدين نسمعه ونطيعه ونحرص إننا ننفذه لأننا ندري أنهم درسوا على يد مشايخ وعندهم علم مهب عندنا فهم اعلم منا ومع جهلنا وانشغالنا في تدوير لقمة العيش ما تلقى اللي ما يصلي أو يقصر بشي من العبادات وتشوف بالمسيد اللي يعتكفون واللي يقرون واللي يسبّل تمر أو عيش للمطوع أو المؤذن لن ذاك اليوم ما لهم خرجيه من الحكومة ونفوسهم طيبة وصدورهم رحبه والكل يعاون جاره فزعه بلاش ما يمنعون شيء يبيه جارهم واليوم وش تبين أقول يوم تعلمت الناس وكثرة قروشهم قدّر الله بقلوبهم وصاروا يسمعون ولا يطيعون وتّلفت وأدورهم بالمسيد ما تلقى أحد والله المستعان ، وقت المدرسة و بالسوق ما تقوى تمشي من مواترهم .
وتراي ما ودي أطول عليكم بس اللي يبـي الراحة يدوره تراها بالمسيد وبالفزعة مع الفقراء والمساكين .
و نصيحتي لعيالي لا تغركم الدنيا واحذروا عقوبة الله وصلوا بالمسيد ترى ما بنيت إلا لكم و ومروا عيالكم بالصلاة وربوهم واصبروا على ذلك .
والله يصلح أحوالكم ويردكم للمسيد تايبـين عابدين لربكم شاكرين

أبو مــــشعل الخـبــيـــبــيـة