السلام عليكم ورحمة الله وبركاته
مانيب مكثراً الهمق .. شكرا للأخوة الاعزاء على الاهتمام والبحث والتحري لما هو الاصلح
لحالنا مدمي القلب .
السالفه ومافيها أني البارحة مسيّراً لي على حفنةُ من الرجال شروا من يقرا
أومير يجيك وينفتح موضوع المساهمات وما أدراك ماهن كائنات .
ولاه فيه واحداً لابساً كبكات ومشخص أول مره أشوفه بحياتي ..<--- رسمي تقول وزير الأثل
عاد والسالفه لك ياوزير الاثل أومير يتطرق لـ غدون وسولف عنها و جاب طاري عن الكتابات
بالانترنت ويقول انهم مقومين الدنيا ومهوب مقعدينها .... وكيت كيت كيت ..
الزبدة يقول ابو كبك انهم المساكين مايدرون انه
محجوز عليه منذ مبطي .. من قِبل الدولة .!!
لأن نشاطاته غير واضحه وتجارتة مشبوهه والحكومة تمنع مثل هالمساهمات الغير مشروعة .
الحاصل يقول أن الجهات اللي حجزت أرصدته تثبتت وتأكد لها بعد التحري أنه سليم ..
ولا عندة اي توجهات مخالفة للقوانين .. وأن الحكومه قريباً تبي ترد المبالغ للمساهمين ..
بعد أخذ التعهد على صاحب المؤسسة !!!!!
طبعاً أنا ماعلقت على كلامه ولا حرف بحكم اني ماحد يدري بمساهمتي وخجلي من الزملاء
اللي كانوا يستهترون في هالمساهمة قبل يمسط الفاس على الراس... يعني مقزز
السؤال اللي هو مربط الحصان :-
مامدى صحة كلامه .....؟؟؟؟؟؟
وش توقعات الأخوان ....؟؟؟؟؟
وشلون نتأكد من الموضوع ...؟؟؟؟
هذا ماورد على مسامع الفقير الى ربه ( ســراج ) وصلى الله وسلم ...
ولكم فائق تحياتي وتقديري ،،،،