|
يعطيك العافيه أخوي سعفه
رحت اليوم الخميس مع طلوع النور أنا والعييل وأمهم الله يحفظنا وياهم والمسلمين من كل شر ومرينا على شعيب الطرفيه ولقيناه مابه ولا نقطه
زعلنا وأخذنا بعضنا حتى وصلنا بعد بترومين(( الله يعوضنا عنه خير )) نزلنا المعاميل وشبينا الضويه وأفطرنا وعينا من الله خير ونحرنا الأسياح وشفنا السد ماشاء الله مليان يالله من فضلك وقلنا وراء يوم قربنا ماناصل عروق قبه
وشاورت أم العيال اللي ماصدقت إلا وتقول يالله تجزم ماهقيتك(( تدري أني ماعندك أحد ))المهم توكلنا على الله
وياقربك ياقبه يوم وصلنا قبه قلت لهم ماودكم نشوف طريق ساموده ماصدقوا خبر فاضين ولا يعطون وجه الشكوى لله رحت بهم ويوم مسكنا أول طريق ساموده وقفنا وتظللنا بالطلاح اللي هواه يرد الروح على أول الطريق بعد قبه ومشينا بطريق ساموده لمين وصلنا هاك النفد اللي يحبه قلبك ويوم دخلنا للنفود وشغلنا الدبل وقفت السياره وأثر الأرض ماجاها مطر قلنا نرجع للعروق أحسن رجعنا ويوم وصلنا العرق السابع من جهه قبه رقينا هاك العرق وجلسنا وشبينا ضويتنا ونزلنا معاميلنا وفلوا العييل الحجاج الله يونسنا وياكم وكل مسلم والسلام
|