[مدحت شوقي بريده]

السلام عليكم ..

يالله يارب ياكريم انك تنصر اهل غزة وتحفظهم ..
يارب انك تحميهم من النار والدمار وتحقن دمائهم ..
يالله إنك تعلم انهم ضعفاء فأنصرهم .. وعراة فأكسهم .. وجياع فاـطعمهم وعطشا فأسقهم ..

**********

لااله الا الله ..
هاللحين ياوليدي ماقلت لي وشي هاللي يقولون .. حملة ( خلوه تصدي )
كل ماجلست مع هالحريم سمعتهن يقولون خلوه تصدي ..
ياوليدي وشي هالحملة ..



هذي ياجدتي حملة ( خلوها تصدي ) يقصدون السيارات الجديدة ..
اللي عند الوكلاء .. واللي بالمعارض ..
لأن اسعار السيارات بالعالم كله .. وبالشركات المصنعة نزلت اسعاره ..
وحنا عندنا الوكلاااااااااااااء رفضوا ينزلون السعر ..
وطلعت هالحملة علشان مايشترون الناس السيارات الين تصدي عندهم ..



ايه .. يعني مثل قولة ( خلوه تصنق )


طيب .. بعدين كل هالسنين وهم ماغير ياكلون ويكسبون ..
وماكبر كروشهم وخدوهم الا حنا يالمواطنين ..
كل بيت بوه اكثر من ثلاث سيارات .. وكل سياره مكسبة كم ..
يعني ماشبعوا عساهم ( للمر )



اللي مصنعيين السيارات نزلوا سعرهن .. وحنا وش حزنهم ماينزلون الاسعار ..
يعني ماراح يخسرون لأن الشركة المصنعة هي اللي منزلة السعر ..
وش هالحسد اعوذ بالله ..



حتى لو فرضنا ان الشركة المصنعة مانزلت السعر ..
وش يبي يضرهم لو نزلوا السعر من عندهم وتحملوا هالمرة خساير..
( لاعااااااد ) ان لهم كم سنة وهم ( يزعبون ) من تسبودنا ..


هاللحين عندك هذا حق التايوتا ..
من حيننا وحنا معاملينه .. ولا نعرف الا سيارااااااااااااااااااااته ..



رجلي الاول ابو حمود .. شاري منهم كامري .. وماهنا عاير الا توسده ووقع عليه ..
وكل اسبوع وهو ينقل منهم قطع غيار .. رفارف وشمعات ..
تصدق يوم انه مات انهم صكوا فرع قطع الغيار اللي بحارتنا ..




ورجلي الثاني ابو سليمان .. معه هيلوكس .. اللي خبرك قلبنا بوه يوم عرسنا ..
وطلقن بسبته .. يقول هذا اوله ينعاف تاليه ..




ورجلي الثالث .. ابو لؤي الشامي .. معه كورلا قديمة بس كله ملح .. احسن من الجديدات ..
معلقن به على المراية ( دب ) .. ومعلقن ورى سطل فاكهة تفاح وموز وبردقان ..
وريحته وش زينه .. وماعمري ركبت به ولقيت بيالة والا جريدة والا فاتورة ..
مالقى الا وردة حمراء والا قارورة عطر .. مير ياسفابوه .. مابطيت معه ..
دحا بطني من هالحمص .. زااااااااد اقول وراه شوشهم وشعورهم شقر .. اثره من زرط هالحمص ..




وهذا ابونا الله يرحمه معه جيب من التاليات .. شاريه قبل لايموت بسنة ..
وكل يوم وهو رايحن لهالوكالة .. مير يوم تعبوا منه .. قالوا لوه انت كل يوم عندنا ..
قاموا وعينوه حارس لمركز الصيانة ..




انا اقول .. لو ياقفون عيالنا مايشترون منهم ..
والله ياهالعبداللطيف جميل انه مايلقى ولاريالين يشري بهن موس يلحط شنبه ..

***********

ياتجار ووكلاء السيارات ..
وطنكم ومواطنيه قدموا لكم الكثير .. وجعلو منكم اصحاب رؤوس اموال ..
ولولا تيسير الله لكم ومن ثم جيوب المواطنيين .. لم استطعتم تكوين هذة الثروة ..
اين رد الجميل .. لهذة البلاااااااااااد ومواطنيها ..
لقد خسئتم وسقطتم في اول امتحان لكم في وطنيتكم ..
فلقد اصبحت المادة عندكم اهم من الموطن ..
وانكشفت اقنعتكم .. والتي تريد الخير ان يصب في مصلحة ( حسابات الشركات المصنعة )
ونكرتم جميل وعرفان .. عملاااااااااااائكم المواطنين ..
وكذلك قادة هذة الدولة التي هيئت لكم كل سبل النجاح ..





اخيراً ..
ياناكرين المعروف.. تذكروا أننا نستحقركم ونزدريكم ..
فكروشكم وخدودكم كبرت من قروشنا ..




سي يو ..