[آسر]

28 يــــــــــومـــــــــــــــــاً فقط ...




تفصلنا عن حمى كأس العالم 2006 بألمانيا ..




<< أدوخ على هيك سقافة كرويي .. >>




حيث التشجيع .. والحماس .. والأعصاب .. والترقب .. ومطاردة ( بيضة إبليس ) ..





العالم يترقب .. من سيأخذ كأس العالم .. ونحن نترقب .. الثــ8ــمانية ..




هل ستصبح ستة عشر ..




المنطق يقول ذلك ..



لأننا في 94 انهزمنا (2) من هولندا .. بأمريكا
وفي 98 انهزمنا (4) من فرنسا .. بفرنسا
وفي 2002 انهزمنا (8) من ألمانيا بكوريا
وفي 2006 قد ننهزم (16) من أوكــ ...... !! أقول يمكن .. اغدينا نعزّل كورة .. :D


لكن صاروا مشجعين الكرة السعوديين من أفضل الناس حساباً ..


لكن وش رايكم بالتواريخ والتدقيق .. أشوى إني حفرت google تحفير .. وأبشر يا r3d بيستانس إني كاتب عن الأخضر .. خخخخ
تحياتي لهذا الكاتب الكبير رعــودي ..


المواقع بدأت .. تتحرك .. لاستقطاب لاعبين منتدى بريدة سيتي .. وحتى تشوش عليهم أدائهم في كأس العالم المقبلة .. خصوصاً الجناح الطائر مدحت شوقي .. ومحور الارتكاز الذي يعول عليه المنتخب كثيراً .. أبو فهد المنخررررررررررش .. !!



لن أطيل بالمقدمات .. فإلى الموضوع ..


ايه .. احتراف الأعضاء .. بالضبط .. هذا اللي أعنيه ..




ليش لا ..




خلونا نفتح المجال لعقولنا تفكر باحتراف الأعضاء ..




بيجي اليوم اللي يحترفون .. فيه ..



عاد تلقى مدحت مرسل لـ(Buraydah) بالرسائل الخاصة ..



جاني عرض من ساحة الإقلاع .. أنتقل لصفوفهم مقابل 5 ملايين مقدم عقد .. وسكن وسيارة .. والراتب الشهري بالسقف الأعلى 12000 ريال ..

<< آوالله اللي ما طار طيره >>


عاد يبلش به Buraydah يابن الحلال .. اغديك .. منا ولا منا ..



<< ما به منا ولا منا .. ذي مب أي دراهم ؟؟ خخخخخخ >>


ويدق Buraydah على هيئة أعضاء الشرف حقين المنتدى ..


( المستشار – ريشة – المتحرك )


<< بعدي يا عيال الوليد >>


وش نسوي يا ولد .. عزّ الله اللي بلشنا ..


المستشار يقول : خل هالصعيدي يفارق واقفة عليه ؟؟

<< شاينة النفس ، وهو أحق بدراهمه >>

يقول المتحرك : اعنبو دارك شف مشاركاته .. طاقات للعشر آلاف باصبع ..


هذا مب أي واحد ..



ريشة يقول : عطيناه الاشراف نبيه يلهى واثره ماش ....

<< على باله ذيب >>

طيب كم يبي .. يا Buraydah .؟؟؟



Buraydah يقول : يقول العرض العرض اللي جانا 5 ملايين ..



المستشار : واااااااو 5 ملايين إقلاع ذا ..

<< 5 ملايين يا حمود >>

Buraydah يقول : إنه من الإقلاع .. ساحة الإقلاع اللي عارضين عليه هالمبلغ .. لا وزود سكن وسيارة .. والراتب 12000 ريال ..

<< وسيارة يا حمود .. >> ههههههههههههه


المتحرك : آوالله بلشه .. خل نجيبه منا ولا منا .. اغديه يلين ..



< درررررن .. دررررررن .. > جوال Buraydah يدق ..



Buraydah يقول : اللهم اجعله خير من اللي داق بها الوقت .. طبعاً الوقت 2.45 ليلاً ..



Buraydah يرد : السلام عليكم .

المتصل : وعليكم السلام ، هلا أبو وليد ..

Buraydah : هلا ، من معي ..

المتصل : أحد الأعضاء ..

Buraydah متفاعلاً : مدحت ؟؟
< < اركــــد > >

المتصل : وش مدحته ؟؟

Buraydah : أجل من ؟؟

المتصل : معك المنخرش ..

<< كمـــــــلــــــــــت >> :D :D

Buraydah : هلا هلا والله .. أبو فهد .. علومك أخبارك .. عساك طيب ..


المنخرش .. : الحمد لله على ما تحب .. أولاً يابو وليد أعتذر عن الاتصال بهذا الوقت المتأخر من الليل ..

ولكن لوضع النقاط على الحروف .. شف هاللي عندي ذا يبيك ..

<< لوضع النقاط على الحروف مدري من وين جابه >>
Buraydah : عطنا اياه ..

الرجل : السلام عليكم ورحمة الله ..


Buraydah : وعليكم السلام ورحمة الله وبركاته .. يا هلا ومسهلا ..


الرجل : يقول حبيبنا .. أبو فهد إن .. عقده معاكم بينتهي بتاريخ 1 / 2 / 2007


واحنا نبغى نشتريه منكم .. خصوصاً إن الأمر بيدكم لأنه ما كمل 28 سنة ..

Buraydah : مين معي ؟؟

الرجل : معاك مدير موقع قات للأولاد والبنات .. محسوبك / قايد علي فايز .. من اليمن الشقيق .. :o :o

<< اقعـــــــــــــد >> مهب علومك يابو وليد ..


Buraydah : هلا هلا .. لكن المنخرش ما نستغني عنه ..


الرجل : شوف .. احنا عرضنا 3 ملايين .. مع حقل قات له لحاله .. ما يخاشره فيه أحد .. :D

علاوة على 500 ريال .. يستلمها مع كل موضوع .. وأبو فهد يقول ..إذا عندكم عرض أفضل وإلا أنا يا واحد أبأمن مستقبلي .. ؟؟


Buraydah يعض على شفتيه : طيب .. يصير خير .. أنت يا بو فهد تعال .. للمبنى الخاص بالموقع .. ونتشاور ..


أبو فهد : يصير خير .. باكر . < طووط .. طوط .. طوط .. طوط ......> أقفل الخط ..


Buraydah ( يضرب برأسه الطاولة اللي قدامه )


المتحرك : خير إن شاء الله .. وش السالفة ..


Buraydah : هذا المنخرش يبي دراهم ..


المستشار : ماهنا إلا تصك منتدى الطرائف وتسرحهم .. كم يبي ذا بعد .. آوالله العلل ..


Buraydah : يبي ثلاثة مليون ..


ريشه : خلونا بس ندق على رئيس هيئة أعضاء الشرف والا لا .. يا بو وليد ..


Buraydah : صدقــــــــت .. أنا وين راحت ذي عن بالي .. ( الإعــصــــار ) قدها وقدود ..

<< إذا كان رب البيت ........... >>

بس قبل لانجيبه أنتم بتجدعون شيء ....

<< قالوا لك شبك دجاج >>

المستشار : أنا 500.000 ريال .. نص مليون ..


ريـــشــــة : أنا 1000.000 ريال .. هذي مليون ..


Buraydah : كفو .. شكلنا ما حنب داقين عليه ..


<< لا عاد ما تاصل ؟؟ >>


وانت يا المتحرك ..؟؟


المتحـــرك : 1000.000 ريال .. هذي مليون ..

Buraydah : تمام .. تمام .. الآن مجموعهن 2.500.000ريال ( مليونين ونص ) ..


هذولي نص حقات مدحت ..


باقي مثلهن .. نتدبرهن ..ونضمنه ..

<< لاه .. عز الله اللي قضن ما بقى شيء >>
:D
المستشار : طيب شف كم فيه بالصندوق ؟؟ مع إني داري ضاع نصهن بأسهم الجبس .. ياخي أنت تبزع برأيك وتخسرنا ..


<< خرمانين جبس .. خخخخ>>



Buraydah : لا المتحرك قايل لي : الجبس زين ..


المتحرك : قايل لك قبل لا يرتفع .. بس أنت .. شريته يوم انه مرتفع والحين تبيع بط !!


Buraydah يفتح الصندوق .. ويلقى فيه .. 2.500.000 ريال ..


Buraydah يقول : ما لقيت إلا مليونين ونص .. وشلون نعطيهن مدحت ونقعد على الحديدة .. ؟؟؟


.......................................( انتــــــــهـــــــــــــــى القســـــــــــــــم الأول ) ........................................


في الجزء الثاني :

# ماذا فعل مدحت عندما علم بتوفير المبلغ ؟؟

# كيف تصرف رئيس هيئة أعضاء الشرف ( الإعصــــــار ) ؟؟ مع الموقف ؟؟؟

# ما هي حقيقة ذلك اللقاء مع ذلك العضو ؟؟

# والكثير تجدونه في الجزء الثاني ...............

ترقــــــــبــــــــــــــوا ....


====================




# الجــــــــــــــزء الثاني #


الجزء الثاني من ( احتراف الأعضاء ) 2 – 2





Buraydah يتصل على رئيس هيئة أعضاء الشرف ( الإعــصــــار ) ..





Buraydah : السلام عليكم





الإعصــار : وعليكم السلام والرحمة ..




Buraydah : ودنا نجتمع فيه أمر طارئ .. من الدرجة ( أ ) ويستوجب حضورك ..




الإعــصـــار : وين أنا بالمزرعة حقتي وياليتك تجي أنتم هناك .. أول ما توصل دقو عليّ .. تدلّ المزرعة ؟؟





Buraydah : الله الله .. هي اللي أكاليوم استضفنا فيها رئيس موقع .. لكم لحالكم دوت كوم





الإعــصـــار : ايه الله يغثّه ..




Buraydah : الله يغثه ؟؟ ليه صار شيء بعد ..






الإعــصــــار : تعشى معي البارح ويتكلم عن المقايضة .. يبي يقايض سباك مصري عنده بالمنتدى ويبي ياخذ منا مدحت .. قلت له : امهنه .. تمهن الظالم .. وابلشنا .. :suu :suu





<< فكرة لو فيه سباك للمنتدى ويركب سيفون للمواضيع الغثة خخخخخ بس أخاف موضوعي أول واحد ينبلع خخخخخخخ >> !!




Buraydah : اوووه .. حول القصة اللي بقول لك اياه ..





الإعــصــــار : هنا احد يبي مدحت بعد ..






<< والله يالصعيدي مرغوب .. شكله يشوت بكل الرجلين >>


:D :D :D




Buraydah : الله الله .. مدحت اتصل علي وقال إنهم عارضين عليه عقد احتراف بـ5ملايين مقدم عقد .. والراتب من السقف الأعلى 12.000 ريال شهري إضافة للسكن والسيارة ..





الإعــصــــار : من هم ذولا اللي عارضين عليه .. بيّن إنهم مرتكين ..






Buraydah : الإقلاع .. هم اللي عرضوا عليه ..






الإعــصـــار : يالله بانتظارك بسرعة .. ما وصلت .. أنا متحمس أعرف التفاصيل






Buraydah : هه .. حولك .. أنا مسكت الزراعي الحين ..





( وبعد فترة ليست بالطويلة .. ربما تكون دقائق .. )
طاااط .. طط .. طاااااااط .. طط ط ط ط ..






Buraydah : وينه ما احد جاء .؟؟؟ ايه صح يقول دق عليّ . .؟؟




( دررررن .. درررررن )





الإعــصـــار : هلا أبو وليد .. ادخل بجناح الضيافة .. انا هناك ...







<< والله فلة هالمزرعة >>






Buraydah (ينزل متجهاً لقصر الضيافة وهو غير آبه بالمظاهر والزخارف التي زينت البناء الشامخ لأنه دخل هنا غير مرة )







الإعــصــار : حيّ الله أبو وليد .. اجلس وعطنا القصة تكفى .. الموضوع مهب اللي حنا نبي ..











Buraydah : لا والله مهب اللي أنت تبي ..




بالنسبة لمدحت فكان هذا عرضه .. واتصل بعده علينا المنخرش .. وعطانا عرض جاي له بعد ..





الإعــصـــار : لا حول ولا قوة إلا بالله .. حنا نلقى للناس وهم ياخذون ؟؟ وش بعد عرض المنخرش ..








Buraydah : اتصل واحد يمني يقول أنا صاحب موقع قات للأولاد والبنات ..
وعرض على المنخرش مقدم عقد 3000.000 ثلاث ملايين ريال سعودي .. + حقل قات له لحاله ما يخاشره فيه أحد ..






الإعــصــــار : تمزح انت يابو وليد ..







Buraydah : لا .. وش دعوة اعرفك أنا عشان أمزح معك !!؟؟




<< Buraydah جايبه من حسن نية يسمعه وقاله مايدري إنه بغت تسبب مشاكل >>




الإعــصــــار : ايه عاد اليمن والقات .. ما يحتاج ..

يعني صارت فوق روسنا ثمانية مليووون .. واجد مالقيتو شيء بالصندوق ..





Buraydah : إلا حصلنا مليونين ونصف ..ومليونين ونصف من أعضاء الشرف .. وانتهت مشكلة مدحت .. لكن البلية المنخرش ..





الإعــصـــار : يعني ما بقى إلا ثلاثة مليون الحين .. ؟؟





Buraydah : ايه نعم .. طال عمرك ..





الإعــصـــار : والسكن والسيارة اللي لمدحت ..؟؟




Buraydah : لا يقول عرفاناً للموقع اللي أشهرني .. وترعرعت فيه .. أجدع عنهم السكن والسيارة .. والراتب كما هو يبقى على 10.000 شهرياً ..






الإعــصـــار : والله الخمسة مليون لحاله ذي كارثة .. يعني الحين ما بقى إلا ثلاثة المنخرش ؟





Buraydah : الله الله طال عمرك ..






الإعــصـــار : من عندي 4000.000 مليون .. ثلاثة عطه المنخرش ..






Buraydah : ( فرحااان ) ما قصرت الله يطول بعمرك .. الله يخليك لنا ذخر .. أنت وجه السعد للموقع .. ما أخطأ من جعلك سيداً ( والله ياهي ماله دخل:D ) .. كل الناس كواكب وأنت القمر فوق النهر وسط الشهر .. لله درك ما أكرمك .. ما أروعك ( وييين إربط !! ) خلاص خلاص ..





الإعــصــــار : لكن طلعوها بالجريدة الفلانية إني دعمتكم .. وإلا والله ما تلصّونه ..
وخلو شعراء المنتدى يكتبون عن بصفحة كاملة بالجريدة .. يمدحونن .. وأنا ترى ما أبي المدح بس خبرك هذولا الناس يبي يرقون على أكتاف التجار أمثالي .. وحنا لا نبي المدح نحب نعمل في الخفاء وإلا كان ما دفعتهن لك بالمزرعة كان أدفعهن لك عقب صلاة الجمعة بالجامع .. بس خبرك حنا لا نبي الشهرة .. ولا التفاخر والمديح .. :suu





Buraydah : ما قــصـــرت .. وأبــشــــر .. باللــــي يـســـــرك .. وبنحصد جميع الألقاب المحلية والقارية والعربية والعالمية ..

<< أقول ترككككككد >>





(Buraydah يودع الإعــصـــار ) معه شيك مصدق بقيمة أربعة ملايين ريال ) ..

ومن الغد الخبر يتصدر الصحافة المحلية ..

وقد كتب بالمانشيت العريض .. ( الإعــصــــار يتكفل بقيمة أغلى أعضاء منتديات النت ) ..

وفي صحيفة أخرى .. 4 ملايين تحول مسار المنخرش من جبال اليمن إلى تلال بريدة ..

وفي صحيفة ثالثة : 4 تجرّ الويلات .. على صاحب موقع قات ..




( في هذه الأثناء توجه مدحت + المنخرش إلى مقر الموقع لاستلام المبلغ .. وتم التوقيع على فترة احترافية ثانية تصل إلى 5 سنوات قادمة .. وبالرفاء والـ(ح)ـنين .. يا منتدانا الغالي ..)




من جهـــــــــــــة أخرى .. نجد ( تهاويل ) .. العضو الرائع .. يقرأ الصحيفة وهو يحتسي كوباً من الشاي ..
( يحتسي ذي جبته من فلم سالي يوم تغط الشابورة أول ما يسافر أبوها :D ) خخخخخخخ

فما كان من تهاويل إلا أن قدحت أعينه شرراً .. كيف ثمانية ملايين تمرّ من أمامنا وحنا لا طلنا عنب اليمن ولا بلح الشام .. ؟؟

واتصل على الجريدة ...

أنا تهاويل أحد أعضاء ذلكم المنتدى الظالم الطاغي .. المتحيز إلى فئة !!
< أحححح على هونك ياوليدي >

الصحفي قام بترتيب زيارة عاجلة حتى يكون لهم السبق .. في النشر .. كون الموضوع ما زال ساااخناً .. في الساحة ..




ولاختصار اللقاء .. هذا بعض ما دار فيه ..

# أنا أفضل من مدحت والمنخرش بكثير .. ولن أطلب من النادي كما طلبوا ..

# تهميشي يعني نهاية بريدة سيتي للأبد !!

# عقدي منته عام 1425هـ بشهر 6 .. ولم أجدد .. وبيننا المحاكمة .. وعقدي ليس بأقل من مجموع عقود هؤلاء .. وبعد اللقاء .. استدعت إدارة النادي .. العضو تهاويل

وأتاهم وقد فرغ محتوى محفظة نقوده .. وطيبها كي ينعم شيك مقدم العقد بمزيد من الراحة داخل بوكه المتهالك .. ولما دخل .. وجد Buraydah أمامه وهو ممسك بالجريدة .. ويقول على رسلك يا تهاويل .. فأنت وقعت على عــقـــــد ينتهي في شهر ستة فعلاً ولكن بعام 1452 هـ .. يعني بعد 26 سنة .. وهذا توقيعك ..

<< تعيش وتاكل غيرها لعبوا علييييك >>

آآآآآآآآآآآآآآآآآآه آآآه آآآآآآآآه .. وانتهت القصة نهاية مؤلمة وحزينة كعادة المسلسلات الخليجية .. خخخخخخخخخخخخخخخخخخخخخخخخخخخخخخخخ

ماعندنا إلا البكاوي ..
::D :D

أخوكم / آسر
تلميذ الحياة ،، ينتهي عقدي مع المنتدى قريب وأبجدد بغالي ...

[خبير النفوس]

أقول يا كثر قرقك بعد

خلك في اطراء على السكيتي وجاي

[آسر]

اقتباس المشاركة الأساسية كتبها خبير النفوس أقول يا كثر قرقك بعد خلك في اطراء على السكيتي وجاي

ســـــــــم ..... ولا تســــم :D :D

[alhaoy]

ههههههههه

الله يغربل ابليسك يا آسر ...




وحنا يا ويلي مالنا الا الفتات

[آسر]

اقتباس المشاركة الأساسية كتبها alhaoy ههههههههه الله يغربل ابليسك يا آسر ... وحنا يا ويلي مالنا الا الفتات

هههههه .. عاد وش اسوي لك .. أنت مسمي نفسك الهاوي .. يعني احتراف ما فيه ..

والهواة دايم .. نعرف إنهم مخلصين للشعار .. إذا عزّلت من المنتدى .. علمنا نعطيك شهادة شكر .. ولا هيب مختومة بعد ..

[أبوفارس الخالدي]

لله درك ..

تتابع السيناريو والحوار رائع ..

ما شاء الله ..

ضرغامنا المبدع آسر :

كل القلوب تقول بحبك نتغنى ، ولقربك نتمنى ، ولشكرك نتبنى ..

أقام الله الخير في مدينتك فلا سفر ولا موت ..

على فكرة (خطمه فلاشية) تراي أصلح دفاع وملاحق كور ..
احسب 16 هدف كل هدف كورة ..

رعد من الحماس ماعاد يكتب ،، أصبر له لين يالدن الماعز

تقبل وافر تصفيق وتشجيع زميلك أبوفارس ..

[ميكرو تيود]

ههههههه الله يقطع شيطانك00

بس والله ياهو مشوار أبقراو كله00

قريت إلين اتصال المنخرش على أبو وليد00

ونكمل نشالله00بس السراحه أكه00

يمال الثانكيووو

[آسر]

اقتباس المشاركة الأساسية كتبها أبوفارس الخالدي لله درك .. تتابع السيناريو والحوار رائع .. ما شاء الله .. ضرغامنا المبدع آسر : كل القلوب تقول بحبك نتغنى ، ولقربك نتمنى ، ولشكرك نتبنى .. أقام الله الخير في مدينتك فلا سفر ولا موت .. على فكرة (خطمه فلاشية) تراي أصلح دفاع وملاحق كور .. احسب 16 هدف كل هدف كورة .. رعد من الحماس ماعاد يكتب ،، أصبر له لين يالدن الماعز تقبل وافر تصفيق وتشجيع زميلك أبوفارس ..

أستاذي .... أبا فارس ..


شهادة أفخر بها من شخص مختص ..


وأما من ناحية .. أنك تذكر مواهبك .. علشان .. تدخل ضمن المحترفين ..

فما أظنه .. لأن لحاقين الكور واجد بها المنتدى .. ولا يدوّرون للأسف ..

فيه فايض ..


تصدق معينين ناس على البند ..


أخوك / آسر
تلميذ الحياة ،،

[آسر]

اقتباس المشاركة الأساسية كتبها ميكرو تيود ههههههه الله يقطع شيطانك00 بس والله ياهو مشوار أبقراو كله00 قريت إلين اتصال المنخرش على أبو وليد00 ونكمل نشالله00بس السراحه أكه00 يمال الثانكيووو

أخي الغالي / ميكروتيود ..


من ناحية مشوار .. مشوار .. أنا مليت وأنا أكتبه صار مذكرات كل يوم أكتب شوي ..


وبلشت بالمنخرش مدري وين أوديه ..


متعلق به ابو يمن .. ومعين يطلدزه .. لكن الأحداث الدراماتيكية .. رجعت لنا أبو فهد .. ..


ولكن انتبه إن شاء الله تكتب بهذه الصيغة .. دمت حبيباً ..


أخوك / آسر
تلميذ الحياة ،،