[مدحت شوقي بريده]

السلام عليكم ..

مرحا ىكم أهااااااالي بريدة ستي .. من أعضاء وعضوات .. الأحياء منهم والأموااااااات ..
وأسعد الله صباحكم ومسائكم بالخير .. وكل عام وأنتم بخير ..



جدتي موضي تقرئكم السلام .. وتعايدكم كلكم .. وتقول سلملي علي كل اللي بالمنتدى ..
وعلمهم إني اشجب وأستنكر اللي صار بالخبر باليوم الوطني ..
وإني مستنكرة كل اللي صار بهاليوم الوطني .. ولايرضين بتاتاً البتة ..
وتراي شرهة بالحيل على الملك عبدالله علشان هالجامعة المختلطة اللي بجدة ..




************************




الا شفت ياوليدي هالقصاصة من الجريدة ..
قلت لأختك مريم .. منهوا هاللي صورته بالجريدة يشبه لجدك سليمان يوم هو شباب ..


قالت .. هذا محافظ المؤسسة العامة للتدريب الفني والمهني ..
إسمعي يمه وش يقول ..

اقتباس كشف محافظ المؤسسة العامة للتدريب الفني والمهني عن توجه المؤسسة لتأهيل كوادر نسائية للعمل في الصيانة والسباكة والكهرباء .. 30/09/2009 م جدة –الوئام:

قلت يعني مايحتاج هالعيال وهالرجال يمنون علينا ..
كل ماخر بزبوز والا ضرب الكهرب شوط ..


يعني لو تخر هالصخانة انقز فوق هالسلم ومعي ابوجلمبوا .. وافره فرتين ..
ياأطيح وتنشب خشتي بالأرض والا افك العوامة ..


ولو تطفى هاللمبة مايحتاج نجيب كهربائي .. امكعه من محله واركب بداله ..

والا اذا بغيت تغير الزيت لسيارك .. ماعليك الا تدخله بهالحوش ..
واندعس تحته انا وطشت هالثياب ..
واغير لك الزيت .. والعشرة اريل أنا أولى به من هالبنقالي ..


ولا اقعد الاحقك انت وباقي اخوانك .. يادافع البلى تقول اشحذكم شحاذة ..
هذاي هاللحين لي اسبوع وانا ابيك تصلح ( لي المكيف )
اللي ماصعة سليمان ولد اختك منيرة ..
ولي اسبوع وأنا اقولك جب سباك يصلحه .. وكل يوم ياحمد باتسر ..




*********************




ياميمتي .. والله انه هاجتن بتس .. وش هالحتسي ..
المرأة معززة مكرمة .. والدين ( كفل ) له الحياة الكريمة ..
المرأة .. ملكة ببيتها .. المرأة عزيزة عندنا ولانسمح لأحد يذله ..

والأعمال هذي أعمال تعتمد على الجهد .. ومهيئة فقط للرجال ..


يعني عاااادي تلقين حصة بنت اختي منيرة وهي واقفة بشارع الصناعة ومعه عوامة ..
وكل ماجاء واحد نبطت معه بالسيارة راحت تصلح سخانتهم ..


وإلا مزنة بنت اخوي صالح .. مدعستتن الشطرطونات بإيدينه تقول لابستن غوايش ..
وأي واحد خربانة لمبته تنقز معه وتروح تصلحه ..



بعدين ياميمتي ..
هاللحين الشباب المتخرجين في هالمهن مالقوا وظايف او فرص عمل علشان البنات يصير لهن فرصة ..

ماأدري وش هالتفكير عند بعض المسئولين ..
الدين يرفع المرأة وهم ينزلونه للحظيظ ..
سبحان الله اذا جاء طاري المرأة ( طار ) العقل ..
ونسى كل شي وبداء يهذري ويهرف بما لايعرف ..



خليهم بس يوظفون الشباب .. المتخرجين بنفس هالمهن ..
وغيرهم من الخريجين ..
اللي مالين البيوت .. ابرك لهم .. والله إن ندعي لهم ..



ومع السلامة ..




سي يو ..