[الحبّوب]

كان احد السلف يملك جواري وغلمان كثر .. وكانوا يأتونه يشتكون ان لا مال عندهم وانهم يتعبون من الخدمة فكان يعتقهم ..

جاءه احد اصحابه وقال يا فلان انهم يخدعونك فرد عليه الرجل ..

من خدعنا بالله انخدعنا له !!!!!!!!!!!

يا اخوان الدعوة هالايام صارت نصب عيني عينك وبدون حياء ولا مستحى ..

مرة موقف عند مطعم بنزل اطلب عشا ..

مر من عندي شاب انيق الملبس ورمى علي ورقة قلت في نفسي ذا شكله بيرقم بس يا انه احول او ما عنده نظر ..

قمت اناظر نفسي في المراية لاكون قلبت بنت وانا مدري ..

لا والله طلعت رجال وبصلعة بعد ..

خذيت الورقة وناظرت ..

انا شاب في مقتبل العمر واعول اسرة كبيرة ........................ باقي الكليشة .. اعتقد حافظينها يا شباب !!

نزلت وخذيت الطلب واتلفت ادوره ما شفته ..

ركبت السيارة وابمشي الا اللي يصارخ وقف وقف قني شلك !!

الا هو جاي يركض قال ما بتدينش حاقة ؟؟

قلت والله ما معي انا فلوسي تاخذها الحرمة اول باول .. وتنقط علي تنقيط ..

اذا بتعطيني انت اكون شاكر لك !!

قال رقع الورقة ..

قلت باخذها للمدام كود هي تتصدق علي ؟؟


ومرة ثانية عند نفس المطعم شفت شابين يطاردون حريم ..

نزلت بنصحهم ما دريت يوم شافوني جوني هم ..

بصراحة بلعت ريقي !!

ثنين وانا نص واحد باعتباري دب "" مالت ""

قال واحد منهم يالطيب حنا ما تعشينا وجايعين ..

قلت ادخلوا وانا اطلب لكم !!

قالوا لا عطنا فلوس وحنا بنشتري ..

قلت اهااا بس "" اهاا يعني معصي او no ""

تركوني ولحقوا رجال غيري ..

عجبني امامنا ..

مرة صلينا وبعد الصلاة قام رجال محرول لو تشوفه تفصخ ثوبك وتعطيه اياه من منظره المحزن ..

قام ذا الشحاذ يتكلم ..

اااا اااااا اي اااااااااااا

اطرم الظاهر ..

ما دريت الا الامام التفت عليه وكلمه قال الحين انت ما تستحي على وجهك يوم تقوم تشحذ عيني عينك ..

بصراحة نقدت عالامام وقلت ما ينبغي .. "" طبعا بيني وبين نفسي ""

التفت الامام عالمصلين وعطانا المفأجاة ..

قال والله اني شايفه يمشي برى المسجد طبيعي ما فيه شي بل لو اتسابق معه سبقني ويوم دخل الجامع صار محرول !!

ثم طرده ..


تتوقعون النصاب استحى ..

لا

راح وجلس في آخر المسجد عند الباب ولا كن الامام فضحه !!

عارف فيه ناس مستحقين ويستاهلون الصدقة ..

لكن بين ذولا وذولا اتساءل ..

وين مكافحة التسول ؟؟