[الصباخ]

بسم الله، يالله حي الشباب الكشكوليين واحداً واحداً وكل أبوكم .
تصدقون إني مشتاقن لكم بالحيل، ومبطن ما كتبت عندكم ومثلكم يعذر .
مالكم بالمؤخرة الطويلة العريضة لأني ماحب الرسميات.
سالفة هالموضوع إني منسدح وطاقتن الهواجيس وأفكر ومن كثر التفكير جلست أضحك .
أهلي استغربوا وش به الولد انهبل؟ قلت أبد تذكرت سالفة وجلست أضحك عليه .
طبعاً قبل ما أذكر السالفة هالموضوع يبي يكون للسواليف والمواقف المضحكة والغريبة والعجيبة اللي تمر عليكم، كل واحد يدخل هنا يقرأ مواقف غيره ويسدح لنا موقفه، ولو كل واحد كتب لنا موقف طلع الموضوع فيه عشرات المواقف المضحكة واللي تونس وتوسّع الصدر.
أدري الفكرة يمكن انطرحت قبل وبطريقة أو بأخرى بس من باب التجديد والتنويع والتحسين والتزبيط والأمور اللي مش ولا بد << مقصدي شريف .

الموقف يا سادتي، إنه مرتن من المرات كنت معزب لحالي بالبيت أنا وأخوي الصغير، ومثلكم عارف العزوبية يعني لا وقت منظم ولا أمور مرتبة والدنيا حوسة بحوسة.
وكان الوقت متأخراً بُعيد منتصف الليل بقليل << كيف اللغة بس .
يعني كانت الساعة ثنتين أو ثلاث بهالمحاري، وكنت جالس بغرفتي لحالي إلا واسمع أخوي يصارخ بالصالة ويقول: يا حمار لو أنت رجل انزل، يا كلب لو بك رجوله انزل وواجهن << مسوي عنتر زمانه أبو الشباب قاعدن يهوش.
أنا طلعت أركض وش فيه يابو الشباب؟ سلامات عسى ما شر؟
إلا معه عصى وسكين وقاعدن يلجلج يا بن اللذينا لو بك ذرة رجولة انزل!
أنا بيني وبينكم ارتعت يا ولد وش السالفة؟ لا يصير به أحد وحنا ما ندري؟
قلت وش فيه؟ قال ما تسمع الكلب يمشي بالسطح؟ قلت منه؟
قال حرامي!!
إلا وفعلاً جلست اتسمع وأسمع صوت طقطق بالسطح.
هو أنا بس سمعت الصوت؟ إلا على طول تسدحت من الضحك هههههههه.
وألتفت عليه وأقوله أنت تدري وش هالصوت؟
هو استغرب من سؤالي؟ وسؤالي وضحكي يعني إني فاهم الشغله وعارف من فيه .
قلت هذولي حمام ينامن عند خزان الماء ويتحركن بالليل علشان كذا يطلعن أصوات، ولا عمرك ياخيي تسوي فيها عنتر زمانك وتقعد تهوش، لو إنك رجل كان رقيت وشفت وش هالصوت .
هذا الموقف كل ما شفته وقصيته على أخوي جلسنا نضحك .


عطونا مواقفكم الممتعة والمضحكة والجميلة والغريبة والعجيبة، والسواليف ممنوعة والتعليقات السامجة واللي ولا بريال ما نبيه وسلامتكم .