[أم عبدالله]

بسم الله الرحمن الرحيم


السلام عليكم ورحمة الله وبركاته


بصرآحه ادهشتني اليوم عنيزه بصرآحه كانك مو بالقصيم نهائي وأنآ بس رحت للمزروع مآرحت أمآكن ثانيه ..

رآحه ...ونآسه ..ومآفي إختلآط مره (((عكس الحضآري ))

كل وسائل الترفيه للطفل موجوده ..يعني الي بالقصيم ومايقدر يسافر بس يروح لعنيزه
مآشآء الله دبآبآت وعربآت وخيل وقطآر وأجوآآآآآآآء رآئعه جداً جداً وأهم شي المكآن وآسع مره..

بس فيه ملآحظه بسيطه وهي انه المكآن بصرآحه مو نظيف ولا فيه عمآل نظآفه..
ومآفيه رجآل الهيئه وهذى اهم شي بالنسبه لأمآن النسآء...

أمآ من نآحية الترفيه فمآشآء الله أهنيهم وانآ اقيمهم بالدرجه الأولى ...

ويآعنيزه هنيئاً لكم بذلك الرجل المعطآءمدير بلدية عنيزه...الحريص على أهل عنيزه وسعآدتهم
فبآرك الله فيه ووفقه الله أسعدكم وأسعدنآمعآكم...

(( كلنآ أمل في تطوير وتحسين بريده))

وفقك الله الجميع لمآيحب ويرضآه...

أختكم بنت بريده... أم عبودي

[عذووووب]

اقتباس المشاركة الأساسية كتبها أم عبدالله بسم الله الرحمن الرحيم السلام عليكم ورحمة الله وبركاته وعليكم السلام ورحمة الله وبركاته بصرآحه ادهشتني اليوم عنيزه بصرآحه كانك مو بالقصيم نهائي وأنآ بس رحت للمزروع مآرحت أمآكن ثانيه .. رآحه ...ونآسه ..ومآفي إختلآط مره (((عكس الحضآري )) عجيب كلامك المتناقض !! كل وسائل الترفيه للطفل موجوده ..يعني الي بالقصيم ومايقدر يسافر بس يروح لعنيزه مآشآء الله دبآبآت وعربآت وخيل وقطآر وأجوآآآآآآآء رآئعه جداً جداً وأهم شي المكآن وآسع مره.. بس فيه ملآحظه بسيطه وهي انه المكآن بصرآحه مو نظيف ولا فيه عمآل نظآفه.. طيب وش الفايدة اني اروح اتنزهه بمكان وسخ والله حوشنا أولى نظافه ويالله من فضلك ومراجيح وزحلايق ومآفيه رجآل الهيئه وهذى اهم شي بالنسبه لأمآن النسآء... طيب وشلون توا تقولين مافيه إختلاط ؟ والأن تقولين مافيه رجال هيئه للنساء وشوله رجال هيئه تجي إلا لمنع الإختلاط والأمر بالمعروف والنهي عن المنكر امرك عجيب يااختي يعني إن دل كلامك فإنه يدل على وجود الأختلاط وعدم أخذ الراحه أمآ من نآحية الترفيه فمآشآء الله أهنيهم وانآ اقيمهم بالدرجه الأولى ... ويآعنيزه هنيئاً لكم بذلك الرجل المعطآءمدير بلدية عنيزه...الحريص على أهل عنيزه وسعآدتهم فبآرك الله فيه ووفقه الله أسعدكم وأسعدنآمعآكم... (( كلنآ أمل في تطوير وتحسين بريده)) لا تعليق الله يسامحكم يابريدة ماحطيتوا دباب وحصان تفرح ام عبدالله !! والله يااختي اعرف عنيزة نختوب نختوب مثل مايقولن هالعجز هالمكان اللي رحتي لمه اللي قدام مهرجانهم وبه عربات وبه دكاكين صغار ماشبهتهم إلا على جدة ومعلومه قبل أكمل سالفتي (( أمانة جدة منعت الدبابات والبعارين والخيول على البحر )) وأكيد مالقوا أحد يستقبلهن غير عنيزة ! المهم ارجع لسالفتي والله حنا قبل اسبوع اخذنا قهوتنا وقلنا نروح لعنيزة بثيلهم نتقهوى ويام مرينا ندور مكان عجزنا من الزحمه والناس بجمب بعض الرجل منسدح ومعطي قفاه اللي بجمبه واللي بجمبه بعد حريم قال اخوي اقول ماهنا قعدة بهالمكان شوفوا هالرجال وهالحريم حول بعض قال مالكم إلا الدائري نفاهـ وراحه ووناسه . وهذا ماشاهدته بام عيني يام عبيد قصدي ع بودي وفقك الله الجميع لمآيحب ويرضآه... أختكم بنت بريده... أم عبودي

وصلى الله وسلم

[فتاة العرب]

السلام عليكم

أنا عضوة جديدة


وهذي اول مشاركة ::::........
ام عبدالله


صدقتي والله
منتزهات تفتح النفس وجلسات كثيررررررررررة ليت بريدة يحطون مثلها !

كثيييييييييرررررررررررر نروح لها .

ممتعه للترفيه والتمشي <<<>>>

تقبلي مروري

[فتى الارياف]

اقتباس المشاركة الأساسية كتبها أم عبدالله بسم الله الرحمن الرحيم السلام عليكم ورحمة الله وبركاته بس فيه ملآحظه بسيطه وهي انه المكآن بصرآحه مو نظيف ولا فيه عمآل نظآفه.. ومآفيه رجآل الهيئه وهذى اهم شي بالنسبه لأمآن النسآء... أختكم بنت بريده... أم عبودي

وعليكم السلام

بالنسبه لنظافة المكان نظيف بس يمكن المكان اللي انتم فيه ماوصله دور التنظيف لاني اشوف عمال النظافه يمرون مو قادرين يلحقون من كثرة الزوار

وبالنسبه للهيئه كل ماجيت اشوفه واليوم انا هناك وشايفهم يمكن ماشفتيهم لانه يدورون بالسيارات ومركزين على العربات والشباب اللي ينزلون اهلهم ويروحون يهجولون
ويمكن ماشفتيهم لانك متعوده على ربعنا ياقفون فوق روسنا جزاهم الله خير

نقاط الشرطه لاتسمح بدخول العزاب لاماكن العوائل

حراس الامن رحت اجيب عشاء كل اشوي اقابل واحد يسائلني وين رايح ويبلغني ان المكان خاص بالعوائل ويوجهني بكل ادب حتى اني توقعت انهم اخذو دورات تدريبييه في التعامل مع الزوار ولا زلت

المسطحات الخضراء مرتفعه وبارده والمطلات الرمليه هواء يرد الروح
كل شي متوفر هناك مطاعم اسواق خضار كل شي

والله ونااااااااسه ووساعة صدر وهي افضل مكان يمكن يقضي فيه الناس اجازتهم بعد الطائف
فعلا تستحق عنيزه لقب باريس نجد

السر في نجاح مهرجان عنيزه بعده عن المباني

انا من الارياف الغربيه والارياف لها نفس تضاريس موقع مهرجان عنيزه من كثبان رمليه وجو عليل واكثر وكم تمنيت ان تستغل الارياف في ان تكون وجه سياحيه للملكه ولاهالي نجد خاصه

كما اتمنى ان ارى مهرجان بريده في السنوات القادمه بعيداً عن قلب المدينه كأن يكون جنوب بريده بالقرب من الجامه مثلاً

في الاخير كلنا ننتمي للقصيم ونفرح من اجلها وكلنا ابناء هذا الوطن ونعتز بنهضته

دمتم بخير
محبكم

فتى الارياف

[عقد وسوار]

صراحه اهل عنيزه ماشاء الله متميزين بكل شي

[جولانار]

الا على طاري المنتزهات ...من راح للحديقه الي جنب مصنع الببسي ببريده
حلوه صح.....انا مره اعجبتني ...ومافيهازحمه ،،،،بس العاب اطفال ومبعدين مكان الشباب عن العوائل
الصراحه حلوه ونظيفهمممممممم انا من الرياض وماشفت زيها هناك . ماعندنا الا الثمامه وخواتها

[عذووووب]

اقتباس المشاركة الأساسية كتبها جولانار الا على طاري المنتزهات ...من راح للحديقه الي جنب مصنع الببسي ببريده حلوه صح.....انا مره اعجبتني ...ومافيهازحمه ،،،،بس العاب اطفال ومبعدين مكان الشباب عن العوائل الصراحه حلوه ونظيفهمممممممم انا من الرياض وماشفت زيها هناك . ماعندنا الا الثمامه وخواتها

أهلا ومرحبا فيك ياجولانار

أما الحديقة اللي جمب مصنع الببسي هذي حديقة الأبراج

وفعلا حنا رحنا لمه شرحه ونظيفه وهاديه وكبيرة انهبلنا عليه

وعاد انتم يالرياض ماشاء الله ماشاء الله كل شيء عندكم

والثمامة وأخواتها والله زينات بس لولا غلا سعر الثمامة بس

عندكم حديقة الوطن وحدائق واجد مااعرف أسمائهن

آآآآآآهـ ليتني أسكن فيها الرياض آآآآهـ يالرياض امووووت فيك

[جولانار]

انا ماحبيت الرياض بس لا تتضايقين مني حلوالرياض زياره بس سكن لا دوامه توجع الراس
وصراحه مانروح منتزهات قهرررررر تاركينها للاجانب هم المستفيديـــن
وحنا بس بالبيوت صكه تصدقين يوم شفت حديقة ابراج الكويت ..براد ونفاه وبارض مرتفعه شرحه
قلت لامي الصراحه خطيره او ونسه ماعندنا منتزهات حلوه هناك،،رحت لحديقة الحيوان انسدت نفسي ورجعت
كنت المس كل شي بمناديل من القرف.وعالم فوضى ان رحت رحت فيفا شوي لانها قريبه منا ادور شوي وارجع
اما الثمامه واخواتها ماطيقهن..لهفو فلوس العالم ومافكرو يغيرون ديكور الشاليهات او ينجدونه قرف.

[اللؤلؤة المصونة]

فعلا ماشاء الله منتزةعنيزة رهيييب
بس انا الي رحت لمه كان نظيف انت وين رايحه بالضبط؟
وغير كذا المكان يوسع الصدر

[اميره بريدة]

اقتباس المشاركة الأساسية كتبها عقد وسوار صراحه اهل عنيزه ماشاء الله متميزين بكل شي

والله انتس صادزة كلش ماشاء الله تسذا

شششششششششكككككرا يام عبد الله

[&الحلــم المستحيل&]

مشكووره والله يام عبودي عسى ربي يخليلك عبودي على الموضوع
وصدق والله ياعنيزه اذا رحنا للثيل حقه تقل حنا مو بالقصيم انوااع الفله والرياقه يعني الواحد لو نفسه منخنقق تنفتح غصب اذا راح للثيل ولا بعد الجو يهبللل بالثيل براااد اكثر مافي الثيل زوااار اللي من الرياض واللي من الشرقيه واللي من تبوكةواللي من الطايف كم مره نتعرف على ناس بس يصيرون مو من عنيزه
صدقتي يام عبدالله ومشكوره على طرحك ..ولا تنسين المثل((عنـــــــــــــــــــيزه ما تنباع بالزهــــــــــــــيد))

[جولانار]

يـــالله مشينا لعنيــــزه
المفروض يدورونك يام عبدالله ويعطونك مليون سويتي لهم دعايه ولا يفكرون فيها

[برمائية]

حتى أنا مثلك يا جولانار ساكنه بالرياض وما نطلع أبد

بس إذا رحنا للقصيم نروح لحديقة البصر وما شفت غيرها بس ما عليها حليوه

[. الأمــــل .]

ما شاء الله والله صادقه يا ام عبد الله ثيل عنيزه روووووووووعه

وما فيه كلام لكن اللي يروح كل يوم يمل لازم يغير شوي

والا فيه نظافه وهيئه ووناسه والعاب وترفيه مره حلو وكم مره رحنا له

والله اننا مره رحنا منتزه بفلوس وطلعنا منه ورحنا للثيل لانه حلو مررره

تقبلي مروري .