[{ صوت بريدة }]

السلام عليكم ..


ياناس أنا اشك بوجود مؤامرة ضد المراعي ، الي تسويه بعض المعرفات بهالمنتدى وغيره من المواقع وبحماس وشوي ويلفعونك اذا خالفتهم ماظنه من اجل الوطن وماظنه من اجل رفع ريال انا أشوف أنه من اجل تحطيم الشركة ووصل بهم الحال يدخلونها من ضمن الدنمرك بس عشان ماتشترون .

يوجد شركات كبيرة وعالمية رفعت اسعارها ماتكلموا وقرب رمضان اطلعوا للاسواق شوفو الارتفاع واذا قلنا لهم الشركة الفلانية اهم وهي الأساس ومابه بديل قالوا لا لا لا حنا نبي المراعي عشان تكون عبرة ؟ أي عبرة الشركة نزلت السعر وشوله شان حملة .

ياخوفي تكون المؤامرة من شركة دنمركية عشان نرجع نستورد منها لان المراعي الوحيدة الي غطت على المنتجات الخارجيه وفكتنا من الاستيراد .

الشباب متحمسين بمواقع كثيرة ومعرفات جديدة وتصاميم ومسميات للمقاطعه ماقد مرت علينا وماظن هذا الشي يجي باسبوع اكيد شي مخطط له من زماان .

[برفسور ملتمس]

الحين يجونك بعضهم [ خاطمين ] .. ويقولون لك الكلمات المشهورة :-

1) أنت أكيد مندوب لوزين .

2) مانفخ خدودك الا قشطة المراعي شكل لك نسبة

3) وش مقومك عندك توصيل الصبح على الدينا قم نم ..

....إلخ ..

وبالاخير تلقى بعض الشركات شانين حملة ضدها - ولا مثل ماقلت [ الدنمرك ] تخطط شان تضبط وضعها ..

ملاحظة : مع العلم أن مطعم الطازج رافع على كل وجبة 3 ريال وماحد جاب طاريه ..!

[الـعـابـر]

اقتباس ياخوفي تكون المؤامرة من شركة دنمركية عشان نرجع نستورد منها لان المراعي الوحيدة الي غطت على المنتجات الخارجيه وفكتنا من الاستيراد .

اي المؤامرات ؟
مؤامرة استغفال المواطن والا ستخفاف به ؟
او
مؤمراة قيادة الشركات الاخرى في الرفع على المواطن ؟

هذا حقه و ماجاه و تستاهل اكثر ان شاء الله حتى الصفر

[{ صوت بريدة }]

اقتباس المشاركة الأساسية كتبها برفسور ملتمس الحين يجونك بعضهم [ خاطمين ] .. ويقولون لك الكلمات المشهورة :- 1) أنت أكيد مندوب لوزين . 2) مانفخ خدودك الا قشطة المراعي شكل لك نسبة 3) وش مقومك عندك توصيل الصبح على الدينا قم نم .. ....إلخ .. وبالاخير تلقى بعض الشركات شانين حملة ضدها - ولا مثل ماقلت [ الدنمرك ] تخطط شان تضبط وضعها .. ملاحظة : مع العلم أن مطعم الطازج رافع على كل وجبة 3 ريال وماحد جاب طاريه ..!

تسلم برفيسور ولكن والله الموضوع مو طبيعي انت ماشفت شلون مندفعين

[ذكريات طفله]

كل الشركات رافعه أسعارها مش بس المراعي

حتى شركة كي دي دي الكويتيه رافعه أسعارها والمطاعم وحتى الاسواق

وحتى لو ترتفع شركة المراعي مالنا غنى عنها

الوطني أنفع من الخارجي يستنفع من فلوسنا ولا أحد يتكلم

[{ صوت بريدة }]

اقتباس المشاركة الأساسية كتبها من الجماعة اي المؤامرات ؟ مؤامرة استغفال المواطن والا ستخفاف به ؟ او مؤمراة قيادة الشركات الاخرى في الرفع على المواطن ؟ هذا حقه و ماجاه و تستاهل اكثر ان شاء الله حتى الصفر

ياخي انت ماعندك بزارين ماعندك مصاريف كل تفكيرك لبن شف بكم الحفايظ والحليب وكم ارتفع الرز بكم الكيسة رح ادخل السوق ناظر مقاضي رمضان اقل شي ارتفاع خمسة وجاي بريال وين الي تبي تربون نقاطع المراعي عشان يتربون الشركات الا والله تقاطع المراعي وتنشغل فيها وتنسى الشركات الثانيه .

مالي خلق اعيد الاسطوانة وترجع وتقولون لي عشان تتربى عشان تكون عبره للشركات الثانيه

[{ صوت بريدة }]

اقتباس المشاركة الأساسية كتبها ذكريات طفله كل الشركات رافعه أسعارها مش بس المراعي حتى شركة كي دي دي الكويتيه رافعه أسعارها والمطاعم وحتى الاسواق وحتى لو ترتفع شركة المراعي مالنا غنى عنها الوطني أنفع من الخارجي يستنفع من فلوسنا ولا أحد يتكلم

وموظف سعوديين والارتفاع ريال ورجعه والى الحين المراعي والمراعي ، والله يفتح لك شكوك ان فيه مؤامرة ضدها ، صدقتي فيه مئات من الشركات ومهمة اجل رز ابوكاس .

[الـعـابـر]

الاغراض الاخرى ترتفع بالجمله وليست بالحبه
وبعدين فرق بين شيء تشتريه بالشهر مرة
وبين شيء تقريباً يومي تشتريه
كمان فيه فرق بين شيء يرتفع لأسباب مقنعه
وبين اسباب ترجع للمزاج
و بعدين الاستهتار الي سوته المراعي لكي تعوض على نفسها من جيب المواطن بتقليل كمية العلب و بنفس السعر
و الكلام يطول

[برفسور ملتمس]

اقتباس اي المؤامرات ؟ مؤامرة استغفال المواطن والا ستخفاف به ؟ او مؤمراة قيادة الشركات الاخرى في الرفع على المواطن ؟ هذا حقه و ماجاه و تستاهل اكثر ان شاء الله حتى الصفر

ههههه ياليل بس ولو اني مليت من هالردود الي تجيك ضد المراعي لدرجة شكلي ابي اقدم اقتراح للإدراة تسوي لنا اختصار أسم [ المراعي ] من كثر ماقرقنابه ..

اقتباس الاغراض الاخرى ترتفع بالجمله وليست بالحبه وبعدين فرق بين شيء تشتريه بالشهر مرة وبين شيء تقريباً يومي تشتريه كمان فيه فرق بين شيء يرتفع لأسباب مقنعه وبين اسباب ترجع للمزاج

ههههههههههه هذا الرد بس يكفيه هالضحكة أجل فرق ترتفع بالجملة وفرق بالحبة ..!

لكن نصيحة : لايستخفون بك بهالمقاطعة وانت مصدق [ قاطعوا قاطعوا ] : والله يانا كسلان ارد واجيب اساميهم لكن بختصر لك وبقولك [ وجبة الغداء ] كل مكوناته ارتفعت ..!


ملاحظة : شرط قبل مايجي العيد أن الطرطعان [ مرتفع سعره ] ههههه واذا سالتهم ليش قالوا [ البرسيم أرتفع هـع ..] وجاي هنا حاطين حيلكم على لبن وتاركين المنتجات الثانية .

[فـــتــى سـلـطـانــه]

أقول مؤامرة أو ليست مؤامرة مقاطعين مقاطعين .... المراعي الى الجحيم..

[حربي عابر دربي]

هو صحيح فيه يد لشركات المنافسة لاكن هذا ليس مربط الفرس

وقضيت الدنمارك استبعدها لان المراعي يقال بانها تستورد الزبدة من الدنمارك

وكذلك وجود عدد كبير من البدائل الممتازة والمنافسة وقد تكون متفوقه على المراعي ببعض المنتجات ينفي هذا الاحتمال

لاكن سوف اكون معك صريحآ

في الامس كان قادة المقاطعات غالبآ قدوات سيئة للمقاطعة فهم يفرضون على الناس المقاطعة وهم اول من يقتني هذه المنتجات

وكم هز المنابر بعض الذين يطلق عليهم شيوخآ باساليب تقنع الحاضر بجدوى وضرورة مقاطعة المنتجات الامريكية

واذا خرج الشيخ من المسجد امتطى صهوت ذلك اليوكن او الفرد او جمس الصالون والذي يمثل منتجآ غربيآ امريكيآ بحته غير الادوات الكهربائية وبعض التقنيات

اذآ خذلوا الناس مما سبب ردة فعل عكسية تنكرية


لاكن يا اخي وعي الشعوب زاد خصوصآ باستخدام التقنيات مثل المنتديات والفيسبوك وغيرها

وثقافة المقاطعة عند الجيل الحالي جماعي وليس لها راس او قدوة فهي نابعة من قناعات ثابته

والقادم احلى باذن الله

وهذه وجهت نظري

شكرآ

[الـعـابـر]

برفسور يوم انا احبهم وانا عاجن بهم مدح يهالمنتدى و بغيره
حتى اني اذكر ارسلت لهم رسالة شكر
لكن يوم استخفوا و طمعوا هالشركة الوطنية الي كل ادارته من فلسطين ولبنان
من حقي اقول عنهم ما اقول

[{ صوت بريدة }]

أشكر الجميع ولكن ياليت تجاوبون على سؤاااااالي

هل يوجد مؤامرة وهل الحماس الي اشوفه من بعضهم بالمقاطعة عاادي ، يعني ماتحسون أن في تخطيط لتدمير الشركة ؟

[الـعـابـر]

اقتباس هل يوجد مؤامرة وهل الحماس الي اشوفه من بعضهم بالمقاطعة عاادي ، يعني ماتحسون أن في تخطيط لتدمير الشركة ؟

ليش كل شيء ينسب للعدو
حتى الثورات العربية مستكثرين عليهن النجاح على طول انسبوا تدبيرهن للغرب
وهذه المقاطعه نجحت نجاح باهر و نُسب نجاحها للعدو
الجواب .... لا