[زهرة بريدة]

السلام عليكم ..

أولاً : أشكر إدارة المنتدى على خوفها وتحذيرها لنا من الذئاب البشرية وأعتذر على فتح هذا الموضوع مع أنه مداخلة على موضوع أخونا المشرف يحيى فقيه ..

بما أني شبه قديمة ومشاركاتي قليلة جداً هذا لايمنع تصفحي الدائم هنا وملاحظتي لأشياء كثيرة ,,

( عموماً مداخلتي بسيطة ولكن أرى أنها مهمة جداً )

أكيد الكل يعرف وجود فئة بيننا تحت معرفات أثنوية ( وهم أشباه رجال ) وذلك لأغراض دنيئة قبحهم الله وأبعدهم عن بنات المسلمين ..

بما أنني عضوة هنا من حقي أن أعرف أي معرف بيننا ينتمي لتلك الفئة لكي نحذر منه جميعاً
لأني أخشى التعرف على أخواتي هنا وهم من أروع مايكون خوفاً من الفئة الفاسدة ,,

نأمل من الإدارة عند إكتشافها لأي معرف هنا أن تكتبه لنا بأسمه لكي نحذر منه .

أكيد العديد من البنات تعرفو على بعض وتواصلت معها بالمسن وأنا متأكدة أنها ماعرفتها شخصياً ولاكلمتها ولا سمعت صوتها ولاتدري وش خلف المعرف !! لاتقولون غبية وماعندها سالفة لكن تكون بطبعها إجتماعية وتحب تكون صداقات خصوصاً أنها بمدينتها وقريبة منها وش ذنبها طيب ؟ ..

وأخر شي يكون واحد من هالأشكال والبنت على نياتها يمكن تعلمه بكل شي عن حياتها إسمها وأهلها وعائلتها وطلعاتها وهو يجلس يراقبها ويالله عاد ماتدرون وش يصير بعدها وتعرفون البنات صغيرات وخوفها من أهلها ممكن تسوي أي شي ولايفضحها !!

يعني من حقنا نعرف حنا بعد مانرضى بالشي هذا إذا كان عقابه التوقيف أو الطرد من المنتدى البنت وش عرفها ماراح تدري أنه انطرد وتستمر معه بالمسن لكن لو قلتو العضوة فلانة مو بنت بموضوع واضح وصريح وقتها راح تعرف على طول وتعرف تتصرف ..

ولاحظت كثير بالردود وخاصة وقت الهواش تطلع كلمات بالغلط تبين أنه ولد مو بنت وماراح أقول الكل ما لاحظ لكن الأغلبية ما انتبهو للشي هذا ..

وختاماً همسة لأخواتي الغاليات : لو بيوم صار لك هالموقف لاتترددين بإخبار أهلك ولاتخافين من شي دامك واثقة من نفسك صدقيني راح تكبرين بعيون أهلك أكثر وأكثر هم اللي يخافون عليك أكثر من أنفسهم وراح يوقفون معك ويكونون لك القلب الحنون ولو وقتها ممكن عصبو عليك أو أخذو الجهاز منك لايضيق صدرك دامك على حق بالعكس خليهم يشوفونك قوية وواثقة من نفسك وهي مسألة وقت بس من خوفهم عليك من الذئاب البشرية وبعدها راح يثقون فيك كثيييير ومايخافون عليك لأنك كفووو يوم أكتشفتي هالشي رحتي وعلمتيهم وراح يتأكدون وقتها أنه لاصار لك شي مو زين لاقدر الله بعالم النت راح ترجعين لهم على طول

أعتذر على الإطالة وكتابة الموضوع على عجل لكن أتمنى أن تحققو لي طلبي والأكيد أنه على بالكم ماغاب عنكم وجزاكم الله خيراً