[مدحت شوقي بريده]

السلام عليكم ورحمة الله وبركاته ..

نحييكم ايها المشاهدون والمشاهدات .. الاحياء منهم والأموات في برنامجنا برنامج ..
الطريق الى السوق ..


ضيفتنا هذا اليوم احدى سيدات الاعمال السعوديات .. وصاحبة اكبر بسطة بالسعودية ..

ضيفتنا هي السيدة ( موضي جيااااااااااااان )



*** *** ***


ياهلا وسهلا .. بضيفتنا ..
وياليت قبل مانستقبل الاتصالاات تعطينا كم نصيحة للشابات المقبلات على التجارة ..


اولاً انا انصح البنات المقبلات على فتح أي بسطة .. إنه لاتفتح بالحارة اللي حنا به ..
والا والله الذي لااله الا هو .. عالم الغيب والشهادة اني لااسلط عليه ولدي ( علي ) ..
اخليه يكسر شنطته ويفرث جميع كاكاو به ..




سيدة موضي .. ممكن تحدثينا عن تكوين رأس المال كيف كان ..
رأس المال ياوليدي والله انه طلعت روحي وأنا اشحذ عيالي يعطونن علشان اشتري البسطة ..
بس مابهم خير .. ولا واحد مد لي ريال واحد ..


قلت هين بس .. مالي الا اكون نفسي بنفسي .. وقمت سلمك الله على شنطة العدة حقت ابو عيالي الله يرحمه ..
وانفض اللي به واغسله بالماء والصابون الين غدت تلق ..
وادخل للسوق وابيع الزراديات والمفكات اللي به .. واشتري بهن بضاعة للبسطة ..





سيدة موضي .. ماتلاقين مشاكل في تحصيل المبالغ ..

الاقي مشاكل .. والله ياللي مايدفع اني امهص اذنه الين يطلع حقي وحق موسى راعي بقالة سلتي اللي جنبنا ..




*** *** ***



طيب اجل نآخذ اتصال معنا ..
منيرة الحمد من بريدة .. اهلاً اخت منيرة ..

ياهلا بك .. أابسئل موضي جيان .. أنا عندي 20.000 وش اسوي بهن ..


انتي منيرة الحمد .. اللي امتس هيلة الصالح .. وشلون امتس خابرته مسقطة بالسابع ياويلي ..
قولي له .. تقول لتس موضي جيان .. تلهم رشاد مطحون مع بردقوش .. كل صبح على الريق ..
والله ان حملت ان يلزق الولد برحمه ومن قوة الرشاد اذا بغت تالد يمكعون الولد مكع ..

وعشرين هالألف اللي معتس يابنيتي هاللحين ماينفعن .. انتي ماتدرين ان اليوروا ناقزن ثلاث تريل ..
انا اقول تجادعي انتي وخواتس واشترن استراحة تجمعن به يوم هالخميس ..
غدين اجي كل خميس اشوفكن واسبح بالمسبح ..
بمان الله ..




اتصال من الأخت سميرة قراشيع متولي .. مرحبا ..

اهلين .. انا دحين ابغى اسئل الست موضي .. واقولها .. نحنا عندنا بالحارة زقاق صغير والسيارات ماتخش فيه ..
وابغى اسوي فيه محل ايش رآيك ..


اول شي الله يحوم تسبدتس يالمدودة .. اجل زقااااااق . .
قولي شارع صغير .. مير عناد ماوالله اقولتس وش تسوين خلي شين هرجتس ينفعتس ..





اتصال من هيلة العبدالرحمن .. مرحباً اخت هيلة ..

انا حتى السلااام مانيب مسلمة ..
هاللحين ياموضي وشلون ارسلتس الشلااااااح الموف وقوطي النيدو ماليته حنا مع ولدي ابراهيم ..
ومن العام ماعطيتين القروش ..
وجاية تغزين خشتس بعد علينا بدال هاك الشايب ياحبيلوه ..
سددي حق الناس اول يامال الفاري .. همن تعالي اهمقي علينا ياعجوز قريح ..
بعدين ماتستحين على وجهتس يوم انتس تطلعين بالتلفزيون من زين وجهتس فاتشة بعد ..
انتي وجدايلتس هالبيض هاللي تقول حبال خيمة ..



يوم ابو علي يتسلط عليتس .. وحنا نقول .. الحمدلله اللهم لاتجعل مصيبتنا في ديننا ..
الدنيا تروح وتجي .. لكن المصيبة مصيبة الدين ..

وهاللحين هكوا عليتس وقالوا خليتس مرأة متفتحة وعصرية ..
متربعة بين هالرجال ومتمكيجة صايرتن تقول مهرج .. الحمدلله بس على العافية ..
انتي منتيب عصرية .. انتي عقب العشاء ياهالعجوز .. اليوم او باتسر تبي تموتين ..

و مصيبتس بالدين الله مير يخلف عليتس .. بعتي دينك بغرض الدنيا ..

واللهم لاتجعل مصيبتنا في ديننا ..


عاد ياهيلة من زيني .. من يبي يناظرن ..
اها بس انثبري مع السلااااااااااامة ..


اخوتي المشاهدين والمشاهدات ..
شكراً لكم على متابعتكم لنا في برنامج الطريق الى السوق ..
ونستودعكم على خير .. <<((== جديدة هذي صح ..


سي يو ..

[خوي السرور]

ولو موضي من يوم سلكت درب التجارة هلكت ..

شييكرن ابو ابراهيم ..

[أبو رُبـــــى]

موضوع حلو وفيه من الفكاهة الشي الكثير .. ويرمز للشي الكثير .. وفعلاً هذا ما تصبو إليه بعض فتيات المسلمين هداهن الله وهذا ما يكون من بعض المترززين .. أكل أموال الناس بالباطل .. وجزاك الله خيراً ..

[أمنيه...وقدر]

أسلوب جميل


المشكله بعضهن يطلعن بالتلفزيون تتكلم بلسان السعوديات وهي تلقاه ( متسعوده ) >> أخذه الجنسيه

[مدحت شوقي بريده]

اقتباس المشاركة الأساسية كتبها خوي السرور ولو موضي من يوم سلكت درب التجارة هلكت .. شييكرن ابو ابراهيم ..

هلا بالبي خوي السرو ..
والله مانتب سهل .. وش ( سلكت ) هذا بزر يقول سرقت ..
بس ولو يالبي صايرن تحوف السجع .. سلكت وهلكت ..


بعدين يالبي ترى جدتي موضي من حينه وهي لعبته التجارة ..
كانت تلعب على جدي سليمان ..
كل ماشرى له طقم ذهب .. قامت الصبح وقالت انسرق ..
همن تآخذ الطقم وتروح وتقعد بسوق الذهب .. ويجي جدي سليمان يدربي دميجته ..
وأول مايشوفه قاعدة ويشوف الطقم عنده ..
يشهق ويقول .. تكفين يابنت الآجواد ابي هالطقم يشبه للي شريته لموضي امس ..
همن تبيعه عليه .. وكل يوم على هالحاااااال الله يخلف ..


شفت إن جدتي موضي لعبته التجارة ..

ومشكور يالبي شرفت المودوع ..


سي يو ..

[دعبل نجد]

والله ياهالموضي عجزنا نمسك له سالفة

[مدحت شوقي بريده]

اقتباس المشاركة الأساسية كتبها ابو ربا موضوع حلو وفيه من الفكاهة الشي الكثير .. ويرمز للشي الكثير .. وفعلاً هذا ما تصبو إليه بعض فتيات المسلمين هداهن الله وهذا ما يكون من بعض المترززين .. أكل أموال الناس بالباطل .. وجزاك الله خيراً ..

ابو ربا ..

حضورك ياسيدي ابهج مهجتي ..
وسطورك لئالئ .. وسطورك لاائلاء .. وسطورك لاء اء لاء ..
<<((== ياناس من يكتب عنه جمع لؤلؤ .. ترى بلشن به هالدبشة ..
وانـتعشت صفحتي .. <<((== واذا ماتعشت وش الدبرة .. انتم مثلي صفحاتكم اتعشى ..



ابو ربا ..
بعض المغرر بهن من البناااااااات يحسبن إن التطور والتمدن ..
هو نزع الحجاب وقلة الحياء ..
والتسدح على كنبات تقديم البرامج ضيفة او مستضيفة ..

شكراً لك حبيبي على حضورك ..
ودمت بود ..

سي يو ..

[داهية العرب]

هههههههههههههههههههههههههههههههه
يا رجال انت منتهي

[اخو دريحم]

ماشاء الله جدك موضي كشكول

في دار القران ومرة في التجارة

الله يطول عمرها على زود عمل صالح

[نبوغ الفكر]

منسسسسسسسم أبو ابراهيم

[A N A S]

اقتباس اولاً انا انصح البنات المقبلات على فتح أي بسطة .. إنه لاتفتح بالحارة اللي حنا به .. والا والله الذي لااله الا هو .. عالم الغيب والشهادة اني لااسلط عليه ولدي ( علي ) .. اخليه يكسر شنطته ويفرث جميع كاكاو به ..

والله من الهبال بموضي .


الحين جدك اللي بقلبه بلسانه .

ما تغبي شئ عن الناس .


تصلح في إذاعة لندن .



تحياتي لك

[اكستراextra]

يازين سواليف العجز

الله يطول باعمارهم على طاعة الباري

[غنوجة نجد]

موضي جيااااااااااااان..... ههههههههههههههههههههه تحفه هالعجيز .. بس ماتوقعته كذا اكبرت وانهبلت,,
عواافي اخوي مدحت...

[سامي بريدة]

هلا مدحتوه هلا بالطيب الغالي
هالجدة عندي لك بها راي زوجنيها واكفيك مشاكلها
عاد والله لو تجيب طاريها هنا بعد ما خذها وتعلم الناس باسمها على طول هيئة التحقيق
777
77
7
تصدق مدحت لو هو موضوعي كان شاتوه بوز مو لسواليف لا تلقاه بالرصيف هذا إذا ما سووا له >>> دلت