[torki]

والله موضوعي ليس من باب التشهير أو قطع الأرزاق ولكن

المثل يقول / حدث العاقل بما يعقل

قبل يومين أخذت موعد في مستشفى الدكتور سليمان الحبيب
والسالفة وما فيها (( نهب xنهب )) للأسف

فتحت ملف بــ 250 ريال وعند سحب الشبكة طلع لي العملية مرفوضة
وفي نفس الوقت جتني رسالة من البنك أنه تم سحب 250 ريال من حسابك
أستغربت من السالفة وقلت للي سحب الشبكة أن تم سحب من رصيدي 250 ريال لحساب
مستشفى الدكتور سليمان الحبيب

قال عادي راح ترجع بعد أربع وعشرين ساعة
وسحب مره ثانية 250 ريال وتم قبول الشبكة لكن المصيبة
جتني رسالة من البنك أنه تم سحب المبلغ 250 ريال
وبعد عشر ثواني جتني رسالة أنه تم سحب مبلغ مره ثانية 250 ريال ( طارت عيوني )
وجي أكلم أبو الشباب قالي راجع المالية

يعني سحبو مني 750 ريال ويا غافل لك الله
رحت لصرافة وسويت كشف حساب وفعلاً طلع المبلغ الي أسحبو 750 ريال

يعني يا جماعة الخير أنتبهو قسم بالله الي يسحب عن طريق الشبكة ضروري يشيك على حسابة قبل
ما يدخل المستشفى ويشيك بعد الخروج وراح تشوفو كلامي صح أو ( لا )


: كلمة واحد من خوياي بالأستقبال حق مستشفى الدكتور سليمان الحبيب

يحلف حلف ويقسم أنهم أكبر حرامية ونصابين
ويقول أن بعض الأستشاريين الي بالمستشفى ما يعرفون بالأستشاره ولا يحزنون

أنا نزلت الموضوع من باب التنبية
ولا عندي قصص عنهم وخاصة الي صار مع الوالدة
ترقيد ثلاث أيام بــ 8000 ريال -

[العبد الضعيف]

والله كلامك صحيح نهب في نهب أنا أكلون ولاستفد شي ..

[لا تنساني]

وش موديك ؟

[ورد البيلسان]

حسبي الله عليهم
جازعين من غلا الدنيا ويكمله الحبيب
ورد البيلسان

[torki]

اقتباس المشاركة الأساسية كتبها لا تنساني وش موديك ؟

مودين تعب الوالده بالقلب الله يكفيك شره
وعطني مستشفى ببريدة فيه أخصائيين للقلب

ولا تقول مستشفى سلطان للقلب لأنه مواعيدهم بالخمس شهور

[وين عايشين]

من ناحية الأسعار ما ادري

لكن بالنسبه للشبكه تحصل كثير وبجميع المحلات الي عندهم شبكات وقد حصلت معي قبل كذا ولا رجعت راجعت الراجحي ورجعوه لي لكن بشرط تحتفظ بالإيصال

وانت الله يهديك جاي مدرعم تحسب ان الحبيب ناطلك " ان تطلع العملية مرفوضه ويسحبون من حسابك هذا ماله دخل الحبيب "
الحبيب وغيره ما عليه الا ان تطلع العملية مقبوله وغير كذا تراجع البنك وبعض الأحيان ترجع بعد 24 ساعه

[جساس1000]

اما عن العناية المركزه فهي مجرد تخدير وابرة مغذي فقط
لا علاج لا عناية
ورسوم الليلة في العناية المركزة 5000 ريال

[فروحه الفيصل]

............................................الوحد يموت ويحياه وهو ماعرفو علته ............................................

[torki]

اقتباس المشاركة الأساسية كتبها وين عايشين من ناحية الأسعار ما ادري لكن بالنسبه للشبكه تحصل كثير وبجميع المحلات الي عندهم شبكات وقد حصلت معي قبل كذا ولا رجعت راجعت الراجحي ورجعوه لي لكن بشرط تحتفظ بالإيصال وانت الله يهديك جاي مدرعم تحسب ان الحبيب ناطلك " ان تطلع العملية مرفوضه ويسحبون من حسابك هذا ماله دخل الحبيب " الحبيب وغيره ما عليه الا ان تطلع العملية مقبوله وغير كذا تراجع البنك وبعض الأحيان ترجع بعد 24 ساعه

والله أنت الي مدرعم مو أنا ... والله ما سحبو دم قلبك عشان
تقول مدرعم

[m555m]

والله انه مستشفى نصب واحتيال وشفط للأموال حسبي الله عليهم .... الله لايحللهم ولايبيحهم


أنتبهوا تروحون له ... أقسم بالله العظيم اني رحت لهم قبل 10 سنوات بالرياض كان فيني ثالول ورب البيت ماتصدقون رحت لدكتور استشاري اسمه سلطان العنيزان سعودي حق جلدية قال بسوي لك كي بالتبريد وتروح الثآليل ان شالله وتعال شف التعذيب يوووو شي ماتصدقون عذاب وألم شي يكرهك حياتك والله اني أمسك دموعي غصب وقال لازم 5 جلسات وكل جلسة 300 ريال الله لايحلله ولا يبيحه ولا راحت ولا شي ...

تركتهم وشفت اعلان بجريدة الرياض عن زيارة بروفيسوره مصريه لمستوصف سلامات بعنيزه منسى اسمها للحين بذاكرتي اسمها (منى الفنجري) الله يوفقها ويسهل أمرها انكانها على قيد الحياة وانكانها تركت الدنيا فالله يرحمها ويسكنها الجنة والله وبالله وتالله أنها كانت السبب في شفائي من الثآليل بعد الله وبشكل نهائي سوّت لي تركيبه وسوّتها في نفس المستوصف وبـ 100 ريال مع الكشفيه

وكلها 3 أيام والثاليل مختفيه نهائياً ولله الحمد لأنها كات بمكان محرج (باليد اليمنى) كل من سلم علي يتوحش خخخخ


الزبده من هالكلام ان الحبيب نصاب وكذاب ... ولايهمكم سمعته صح ممكن تلقى 10% من المرضى يلاقون شفاء بعد الله من بعض الدكاتره لكن 90% نصابين الله حسيبه من مستشفى

[hsdt]

الله يرحم حالي وحالك وحال امك والمسلمين

[لا تنساني]

اقتباس المشاركة الأساسية كتبها torki مودين تعب الوالده بالقلب الله يكفيك شره وعطني مستشفى ببريدة فيه أخصائيين للقلب ولا تقول مستشفى سلطان للقلب لأنه مواعيدهم بالخمس شهور

اخوي تركي
مقصدي من الرد إنهم لا شافوك طاروا فيك و يعطونك من كل تحليل عشان ياكلونك

[نــادال]

انا من يوم قالوا اشعه الرنيم المغناطيسي بــ 1900 غسلت يدي

[ام ركوني]

اختي صباتها الجلطه عندهم وهم ماعندهم علم ويوم ودينها الرياض نفس المستشفي عند الدكتور الزهراني
جزه الله خير قال وشلون هذي عندها جلطه وقال نفس الدكتور ارفعو عليهم شكاوا