[O X Y G E N]

إلى متى والحريم بوجيه الاجانب وحتى السعوديين .. معقولة لايوجد في بريدة محل جوالات نسائي ، ترى أصبح الموضوع خطير وبصراحة صرنا نزمل اذا صارت مشكلة لاسمح الله في جوالات محارمنا ..

منهو المحل الي نثق فيه نوديه يتصلح وبعضهم شيبان يرمي جواله عند المحل ويمشي والله مايدري وش فيه أو حتى يقلبه ويتأكد من الصور والأسامي والرسائل والخصوصية ..

التقنية الحديثة والأجهزة صارات بأيدي الأطفال ومحلات الجوالات بعضهم لاذمة ولاضمير يحط ايميله وخذ ارسال بيانات وخصوصيات ، ولا ينسخ الخصوصيات وخذ فضايح ..

ويمكن الي عندهم خبرة بمحلات الجوالات وقد اشتغلو قبل يجون يسدحون لنا تجاربهم مع خصوصيات العالم ..

حتى الرقابة مافيه رقابة ، اصلا كيف رقابة والنسخ والبرامج المخترقة تنباع عيني عينك ..

ترى والله الموضوع خطير الحين الخبيرين بالتقنية لاصارت مشكلة يجلس يحذف عن طريق برامج معينة وبعد الحذف يشكك بالجهاز هل انحذفو ولا مانحذفو ، وبعض الرجال او الحريم تمسح الصور والاسماء وتحسبه خلاص انحذف كل شي وتروح تصلحه أو تبيعه ..

اليوتيوب أمتلى من المقاطع الخاصة الي بعضها مستحيل أصحابها راضين ينزلونها وهي من تصوريهم ولكن يمكن انتقلت عن طريق بيع جهاز أو ارسال بيانات ..

يجب على الأقل من المسؤولين في البلدية وضع منافسة لأحد المحلات الي تتبع لها او في شارع المشاغل محل خاص بأجهزة الجوال وايضا محلات اجهزة كمبيوتر جميعها خاصة بالنساء .. على الاقل يسترون على محارمنا .. أفضل من الأجانب والثاني والثالث الي مانثق فيه ..

أو يجي من هالتجار ويفتح له كم محل نسائي وأنا أضمن له راح يكسب 1000000000% ..

على الاقل لاصار ماصار يكون مافيه عذر ، عندنا محلات نسائية للاجهزة كان رحت لها ، ولو صارت مشكلة وفضايح يكون المحل موجود ورسمي ومعروف ، مو مثل محلات هاليومين الي يفتح اليوم وبعد اسبوع مقفل ..

ومحلات الأجهزة الي بالموالات وبشارع الصناعة وغيرها تمتلي من هالحريم وتصلح وتبيع وتسوي برامج وغيرها ، وانا بصراحة مالومهن لأنهن مالقن مكان مخصص وهالشي راح يفتح باب مغلق للمعاكسات والتشرف على الخصوصيات ، صحيح قد يكون منهم صالح ولكن بعضهم لا طبعا ، وقد يستغل مثل هذا العمل .. ولكم في القصص والأخبار دليل ..

ولاحد يستظرف ويقول الهيئة تراقب ومن هالكلام ، الهيئة ماقصرت بس مستحيل تحط عند كل محل محتسب يراقب كل جهاز يتصلح وكل جهاز ينباع ..


اللهم بلغت اللهم فاشهد ، ترى عندكم نساء ومراهقات وأطفال ، والأجهزة الحديثة توحش وانتم عارفين هالوقت ماحد يستغني عن الجهاز ، وكل دقيقة طالع برنامج ماتدري وشو ، وماحدن درى عنكم محلات الجوالات ماتدور الا مصلحتها ومافتح محل الا يبيع ، والحريم اذا راحت لهالمحلات ارجع واقول معذورة مالقت من يحفظ خصوصياتها ..

ولاحد يجي يخطم ويتلقف ويقول يمكن يصير فيه مشاكل اذا صارت محلات اجهزة للنساء مثل ماصارت في محلات الرجال ، أقوله هذي المشاغل كلها حريم ومايدخلها غير الحريم وماشفنا الا كل خير ..

على الاقل اذا كانت نسائية خاصة يرتاح الشخص وحريمنا يرتاحون في خصوصياتهم ، واكيد فيه مراقبين لهم مثل مافيه مراقبين للمشاغل ..

والحمدلله هذا الانترنت شفنا كيف المنتديات والمواقع بعض النساء كيف يقدمون البرامج بمواضيع وهذا دليل على خبرتهم ولكن الخبرة تحتاج مكان مخصص ، ومالها فائدة اذا صار البائع رجال فصعبة تاخذ وتعطي ، ويجب علينا أن نكون واعيين بعض الشيء ، قبل لاسمح الله يحدث مالايحمد ..