[اعقيل التالين]

السلام عليكم

اخواني واهل ديرتي مبروك عليكم الشهر الله يجعلنا واياكم من صوامه وقوامه

اقولكم ياطويلين الاعمار دخلت منتدى بريدة الازرق وقرات مواضيع تكوش الجلد وحسيت ان بريدة تتصير مثل جدة...شفت الاسواق هايبر بنده وجيان والحكير لاند ومصفاة بترول وخرابيط وبلاوي وياناس ارحموووو واشوف الاعضاء يردون ويشجعون مستانسين واللي يقول ياسلام وناااسة ونبي نرتاح من هالبراااان.
ياناس بالله عليكم سؤاااال مقلقن من سنين......وش فلحنا من هالحضاره والتمدن سؤاااااال بس يعجز عنه اكبر فاهم ومتزن....شوفوا الريااااض وانا ابخص انا اجي لمه بتله ناظرو وش زينو عياله باليوم الوطني....فساد وخراب ودمااار ومراااجه...هه هذي تربية الحضارة هه هذي اللي انتم تبوون...وقولوا ماقال ناصحكم اعقيل التالين...تبي تحسفون بعدين وتقولون ليتنا اهل قرايا وخببه لكن الوعد باتسر لامن اهل بريده خربوا ولابقى اهل نخوه وشهامه ولابدن الحريم يتمدنن ويتركن السنع منول يرمزون لنا باهل الدين والمحافظه والحين خله على ربك اندمرت الاحوال ياحيف علينا........

يبقى باخر الموضوع .......يارجال بريدة الاجاويد جاوبوا على السؤال

وش فلحنا من هالحضاره والتمدن؟؟؟؟ خوذوا اقرب امثله:::: الرياض وجدة والشرقية.

اترك لكم الجواااب.

[الوسيــــــم]

اللي بقلبه دين , يبقى صالح ولو صارت الدنيا وشو بس ..

وبالنسبة لسؤالك .. ما شفنا من الحضارة الا الشقا والغرابيل ..
مير وسع صدرك ..

[الــنــهــيــم]

.. [ لا يأتي عليكم زمان إلا والذي بعده شر منه ] ..

[المستشار]

يا رجاااااااال ..
يذكرون عن شايب بقبة رشيد من زماااااااان ..
يوم الدنيا بيوت طين .. به أكا الشايب يتوكأ على عصى و يمشي بوسط قبة رشيد
و يقول ( مدووووبره ، مدوووووبره .. مدووووبره ) يعني أن الدنيا أدبرت و تغيرت عليه
مهب على خبره ، و السالفة ذي يمكن له خمسين سنه .. وش عاد لو يجي هالشايب ويشوف بريدة
و هي الحين ؟ لكن ما نقول إلا اللهم أحفظ لنا ديننا الذي هو عصمت أمرنا ..


و الله يا شين تبي تشوفه ، بس أصبر ..

[سراج الخير]

المستشار عيب فشلتنا قل " فيه "..

[اعقيل التالين]

الوسيم صدقت يااخي واشكرك شكرٍ جزيل على مداخلك.

النهيم صدق رسول الله صلى الله عليه وسلم.

لكن المقصد ايضا يعني ابمر بعد عشر سنين ان ماقامت القيامه هل ابشوف بشارع القناة على يميني وليدن صغير معه ونيت ددسن والا غيره يبيع جح والا خضره هل ابمر بعد عشر سنين وابلقى مكسرات الامتياز يبيعونه سعوديين لا لا مااظن يبي يتغير الزمان ويتكيبرون الخلق.. مير صدز مدووووبره الدعوه.

[اعقيل التالين]

المستشار مانقول إإإلا حسبنا الله ونعم الوكيل كلما للدنيا تدوبر زود على ماقلت

سراج الخير اشكرك ياخيي على رديدك المميليح ياالرياضي يافيذا

[بريداوي متريض]

بسم الله الرحمن الرحيم
موضوع رائع اخوي اعقيل التاليين وكان الاجدر بك ان يكون سؤالك ماذا اعددنا للحضارة القادمة وكيف نواجها وما بعدها ؟؟؟؟؟
انا بريداوي واسكن الرياض من ولادتي لعبنا الطبة والدنينة و الحبشة واخذنا معنا الفسحة للمدرسة وركبنا صندوق التدتسن ولعبنا بالشحنة وتلذننا طعم الكوكاو بالتراب واشياء كثيرة لانراها اليوم واستبدلت بالبلاي ستيشن والدباب والالعاب الالكترونية وماشفنا القناة الاولى من ندرة التلفزيون والحين ضعت القناة مع القنوات ، ولم تتسأل عنها اخوي لأنها جاءت بتدرج ورضينا بالامر الواقع ، وساتكلم عن موضوعك من عدة نقاط ابدأها :
ما اجمل الاسواق فهيا متنافس جميل للمدن الصحراوية والحارة فبلكل امانه ماذا لدينا من اماكن حتى نقضى اوقاتنا فيها ( فاي وقت تذهب تجد التكييف والنظافة وجميع احتياجاتك في مكان واحد ولا يوجد فيها اي شئي غريب فجدرانها شيدت من البلك والاسمنت ودهاناتها مثل تلك الدهانات التي في بيتي وبيتك وما الفرق بينها وبين تلك الاسواق المتواجدة في قبة ابن رشيد وشارع الملك عبدالعزيز ( الجردة ) اذن الوضع عادي جدا فأين المشكلة ؟؟؟؟
بأعتقادي أخي أن المشكلة فينا نحن وليست بالاسواق ! اصبح الرجل لا يعرف سوء باب السوق تارك امر السوق وما فيها للمراة للتعرف عليه اكثر ! ! نعم اضعنا الامانة لم نصحب ابناءنا وزوجاتنا واخواتنا الي الاسواق لنستمتع معهن بقضاء اغراضهن بل اصبحنا يبحثن عن من يذهب معهن سوء خالة ام عمة ام اخت ام صديقة ونقول لماذاااااااا الاسواق امتلاءت بالنساء وأنها شر ونحن نقاش هذا الحديث مع اصدقاء وفي احضان الاستراحات الخاصة التي اصبحت مفروضة على كل شبابنا وازدياد اسعارها يوما بعد يوم واصبحت النظرية تقول الاستراحة من (14) سنة فما فوق ونقول لماذا ولماذا؟ وان الاسواق شر علينا !!!! اخي الحبيب الشر بمن يترك اهله عند باب السوق ويواعدهم بعد ساعتين او ثلاث وليس في السوق ؟؟ ولكن سؤالي لماذا يخشى رجال بريدة من الذهاب مع اهليهم للاسواق والمطاعم والاماكن العامة ؟؟؟؟؟؟؟؟؟؟
اخيراً أقول نحن لسنا خير ما في هذا الكون ولله في امره حكمة لميحص قلوب الذين امنوا.
واتمنى ان يكون هذا الموضوع نقطة انطلاق لنقاش موضوع ( اندماجنا مع اهلنا اكثر )) فنرد حقوقهم التي سلبناها منهم وتركناها في الاستراحااااااااااااااااااااااااااااااااااات
امل ان تكون الفكرة قد وصلت ولكم تحياتيييييييييييييييييييييييييييييي

[شموخ نجد]

وش دعوة!!!!!

عشان فتح عندكم جيان صارت الدنيا خربت وتطورت ((ما يجتمعن الا ببريدة خراب وتطور!!)) ومدوبرة ((والله ياهي صعبة )) بعد!!

اجل لو يفتح عندكم مطاعم صينية وهندية عوائل واندية رياضية للنساء وش بيصير لكم!!

ومن قال لكم ان الرياض وجدة والشرقية متمدنين!!

ربما الرياض الاقرب لكنها تتمدن من جانب وتتراجع من جوانب !!

[اعقيل التالين]

بريداوي متريض اشكرك بالحيل الله يبارتس فيك على الرد وصراحه جبت كلامن يجمد على الشارب ويقنع شوي اشكرك بالحيل مرتن ثانيه.

اختي شموخ نجد كلن يعرف ان اي ديره به المتمدن والقروي والمتطور والقديم والبدوي والحضري لكن موضة هاليومين " عمم ولاتخص" وحنا غصبن علينا نمشي مع الموضه الا من رحم الله....لكن اخذنا على العموم الرياض مدينه متطوره ومثله الدمام وجدة وهذا الوااااقع واهله بعد وبه ناس محافظين والحمدلله وعسى الله يحفظ بريدتنا واهله من هالحضاره الشرّيه.
وسلاااااااااااااااااااااااااااااااااامٌ عليكم اخواني المؤمنين.

[همس نجد]

الدنيا مدوبرة...

انت تقول شفتوا عيال الرياض وش سووا..


ما شفت بنات بريدة وش سون باليوم الوطني...