[مدحت شوقي بريده]

اء اءا اءاءا .. اءاءا اااء ..



أوووووووه .. هذا انتي بهذا يا ( الليدي ) موضي ..
وين جدي سليمان أجل .. موصين اجيب لوه لمبات ..
يبي يركبهن بالحوش .. بدال هاللي كسروهن البزارين .. يقول العيد عندنا ..
أنا مأدري وش دخل العيد باللمبات .. عيدنا الصبح ..



إيه هاتهن هنا .. جدك رايحن يصلي التراويح عند ( البصيلي ) ..
يقول اليوم يبي يختم ..
يادافع البلى جدك صايرن تقول مفتش بوزارة الشئون الاسلامية كل يوم بمسجد ..



ماأدري وش بوه مسجدنا مايصلي بوه ..
لاعااااد ان إمامنا صوته زين .. وصلاته خفيفة .. ومسجد يالله من فضلك ..
صحيح أنه بتلة مزكوم وبوه غنة .. بس ولو نفهم بعضات الشي ..


وياويلي ياهالامام يوم شاف هالعالم ماهيب تصلي معه بداء يعطي هالشيبان هدايا ..
مرة معطيهم كراتين كوسة .. ومرة معطيهم سطول تمر .. يبي يرغبهم يقعدون بس ماعندك أحد ..


حتى حنا ماتخلينا ( نورة ) زوجتوه .. والله ياويلي انه ماغير ( تدعس ) علينا من هالباغات ..
كل يوم ( تشرط ) لنا .. وتقول تعالوا باتسر .. ترى عندي لكم مفاجئة ..





إلا ياوليدي وراه كل واحد مايقضب أرضه .. ويصلي بمسجده مع إمامه ..
ترى الجماعة والصلاة مع الجماعة زينه .. والتراويح والقيام والجلسة بينهن تولف القلوب ..
ليت كل جماعة مسجد يهتمون بجمع الشمل بهالليالي المباركة ..
ويجتمعون ويجمعون عيالهم بحارتهم ..
ويكون المسجد ( منارة ومنبر ) لقاء لأهل الحي ..


وشباب الحي بدال مايراكضون ويقامزون من مسجد لمسجد ..
يقعدون لحارتهم .. ويجتمعون مع كبار السن ومع الشباب والأطفال ويحطون لهم برامج زينه ..
تجمع القلوب بدال ماكل واحدن اعوذ بالله صاكن على روحوه بببيتهم ..


صادقة يمه .. صادقة .. بس من يتبرع بنفسه ويقوم بهالعمل ..
الله يهدي الجميع ..



عاااااااد اقول يمه ..
والله يانتي شكلتس طول اليوم ماشفتي أحد .. ماصدقتي تشوفينن هذيتي المسباح ..
خوذي بس هالباغة .. وإذا جاء جدي سليمان عطيه إياه ..


طيب إجدعه بهذا ورح صل .. لاتفوتك الصلاااااااااااااااااة ..



ايه .. مير خل أقلب هالباغة ..
مادام انه قلب خشتوه هالدربية .. خل أشوف وش بوسطه ..

يقول لمبات ولد قريح .. أجل هالبني هذا وشو ..
ماشاءالله .. هذا كاكاو .. .. إيه جابه الله ..
وسبحان الله اليوم ماصليت .. بس مافاتن الشرط ..

وه بس وازين طعمه .. لولا هاللي بوه .. كل شوي يتمزلغن بوسط إثمي ..


واتسبديه واتسبديه .. وين راح سني .. اويل تسبدتس ياموضي ..

يامنيرة .. يامنيرة .. تعالي بسرعة اولاه ..
تعالي ياحبيلتس ..




سمي يمه .. وش تبين ..



يابنيتي جاب لي هالتفخ هالوارم مدحت .. هالباغة .. ولقيت هالكاكاو ..
اللي قرطاسته بنية .. وعليه كتابة زرقاء ..





وأكلت منه .. وأنا آكل حسيت بشي يلعب بإثمي .. يوم طلعته أثره هاللوز ..
وتعرفين يابنيتي مااقوى آكل هاللوز .. مالي سنون .. كود أجرعهن جرع ..


عااااد قلت أغدي اجمع هاللوز .. واكزهن للطازج علشان يحطونهن بالبسبوسة حقتهم ..

وأنا قاعدتن آكل وأجمع بهاللوز .. أومير ينقز ( سني ) ويطيح بينهن ..
ولاأدري أيهن سني .. ضاع بين هاللوز .. تكفين تعالي طلعيه ..



ياحليلتس ياميمتي .. هذا ( السن ) خوذي .. وشوفيه علشان تعرفينه اذا نقز ثانية ..
المارية إنه لازقن بوه قطعة علك ..



بمان الله يمه ..




سي يو ..

[مدينـة النخـيل]

ماشاءالله عجوز وله أسنان

[المسفهل]

.
.
.

هههههههههههههههههه

والله يالإجتماع بالمسجد والصلاة مع أهل الحارة إنه أدعى للمعرفة ولتوالف القلوب .



يا حبي لجدتك [ موضي ] مبطينن ما سمعنا سويليفاته ، ومرّة ثانية جب له [ كتكات ] أزين وأطعم وألين
==>> مجنون كتكات هالشايب

.
.
.

[محمد الكويتي]

.
.
.
.
أضحك الله ضرسك وسن جدتك الله يخليها لك

[مدحت شوقي بريده]

اقتباس المشاركة الأساسية كتبها محمد الكويتي . . . . أضحك الله ضرسك وسن جدتك الله يخليها لك

محمد الكويتي ..

آمين يارب .. تصدق إن جدتي عنده هالسن بس .. ومحافظة عليه ..
بتله تنظفه .. وتحوف بوه ..

بس ماتنظفه بالفرشة والمعجون .. لايالبي ..


حاطتن بجنبه طاسه .. ومعبيته ديتول وكلوركس ..
همن اذا بغت تنام جدعت هالسن بهالطاسه ..
وإذا قامت لزقته ( باللاهات ) .. وهذا شغله دواليك ..

دواليك والا دوا لي ..


نسلم عليك يالبي ..


سي يو ..

[مدحت شوقي بريده]

اقتباس المشاركة الأساسية كتبها المسفهل . . . هههههههههههههههههه والله يالإجتماع بالمسجد والصلاة مع أهل الحارة إنه أدعى للمعرفة ولتوالف القلوب . يا حبي لجدتك [ موضي ] مبطينن ما سمعنا سويليفاته ، ومرّة ثانية جب له [ كتكات ] أزين وأطعم وألين ==>> مجنون كتكات هالشايب . . .

هلا بالبي المسفهل ..


يابعدي انت .. اجتماع الحارة في المسجد ..
فيه منافع كثيرة ..
تقوية أوصر الأخوة والوئام ..
وفرصة لإذابة أي شحناء بين جماعة المسجد ..
وايضاً تعطيك مجال لمناقشة أوضاع الحارة .. لأن ليل رمضان فرصة للاجتماع ..




اما جدتي يابعدي ماتحب الكتكات ..

تقول الكتكات اذا فتحت الكتكات وشفتهن بجنب بعض ..
يذكرن بعصاقيل جدك سليمان وهو مدد .. غاديتن سود من الشعر ..




سي يو ..

[مدحت شوقي بريده]

اقتباس المشاركة الأساسية كتبها مدينـة النخـيل ماشاءالله عجوز وله أسنان

مدينة النخيل ..

هلا بك يابعد معاليق جلال صلاة جدتي موضي ..

يالبي كل الدعوا .. سن واحد .. وكل يوم تضيعه ..

مرة نلقاه تحت الوسادة ومره سادن المغسلة ..

ومره طلعنا من عزيمة وسنه طايح عندهم ..
قالت لهم اذا لقيتوه تكفون دقوا علينا ..


عاد وزنه بدون هالسن ينقص كيلوين ..



مشكور يالبي ..





سي يو ..

[أجراس الرحيل]

صــدقت والله ..!

أي والله ليت كل شخص يلتزم بأمااام واااحـد

باارك الله فيك أخي مدحت : )

[أبوغسان]

أهلين مدحت شوقي عصمت
موضوعك يهبل ويخرش
وع طاري السنكرس
وخل جدتك تركب مع الليموزين وتسوي فيهم زي كــــذا
علشان يصيرون عياله من الرضاع قصدي من الفول السوداني


عجوز ركبت مع سواق تاكسي



وكل شوي تعطيه حبة فول سوداني.. لين شبع





قال: ما شاء الله من وين جايبته يا خاله؟


قالت: أبد والله قاعدة أمصمص سنيكرس
وضروسي ما تقواه !

[مدحت شوقي بريده]

اقتباس المشاركة الأساسية كتبها أجراس الرحيل صــدقت والله ..! أي والله ليت كل شخص يلتزم بأمااام واااحـد باارك الله فيك أخي مدحت : )

أجراس الرحيل ..


وفيك فليبارك الرب ..

صحيح مادري ورى هالشباب يطايرون ويتركون مسجد الحارة ..
لايصيرون بس يحسبون إمامهم يقراء من التوراة والا الإنجيل يادافع البلى ..

ترى يقراء مثل اللي انتم رايحين لوه من القرآن الكريم ..


الله يردهم يارب لمساجدهم .. طيور التراويح ..



سي يو ..

[خب الجطيلي]

ههههه
يعجبني أسلوبك يابوابراهيم
سلملي على جدتك مــــــــوضي !!

[مدحت شوقي بريده]

اقتباس المشاركة الأساسية كتبها خب الجطيلي ههههه يعجبني أسلوبك يابوابراهيم سلملي على جدتك مــــــــوضي !!

خب الجطيلي ..


تسلم يابعد معاليق سن جدتي موضي ..
مرورك أسعدني وشرفني ..



سي يو ..

[.:القيصر:.]

والله ياجدك مطرطعه

[!وش السالفه!]

هههههههههههههههههههههههههههههههههـ
وهـ بس يالبى العجز قسمن قسمات منسمه ياحبيل قلبه وهـ توسع الصدر حتى من العجز الجخه تاكل سنكرس ميب عاقله ياحبيله وهـ بس تسان مطخته اولاااه