[ahm1]

صباح الخير ... أكتب لكم هذا الموضوع بعد حضوري جلسة السحب بالقرعه على أراضي النقيب العظيم .
تذكرون قبل أسبوعين تقريباً أعلنت الأمانة عن موعد السحب بالقرعه على أراضي النقيب بجريدة الجزيره (حسب إطلاعي) .. ما أطول عليكم حضرت الساعه 8 بالظبط كنت بوسط القاعه ، حضر المواطنين المساكين بقاعة حرها شديد ، فعلا كانت بلا تكييف ، حاطين تقريبا أربع مكيفات صحراويه مؤقته داخل القاعه يعني جنب الكراسي ولكن للأسف ما تشتغل ، متنا من الحر وكل واحد من الحظور معه ورقه يهف على نفسه .
حضر أعضاء اللجنه مشخصين وجلسو على الكراسي وجاك هاذاك الباكستاني لابس كاب أصفر ويصب لهم قهوه يتقهوون ويسولفون وحنا بهالحر ، وبعد نص ساعه بالظبط شغلوا المكيفات الصحراويه ، انبسطنا وبعد 3 دقايق طفت المكيفات ، واااوك . حر .. متنا وبعد 5 دقايق اشتغلت المكيفات لمدة 5دقايق وطفت يقولون انه فيه مشكلة بتمديدات الكهرباء ، طبعا المكرفون تابع للمكيفات وعلى هذه الحاله يمكن أربع أو خمس مرات .
طريقة الفرز بدائيه جداً جداً ، جابو محقان برتقالي وحطوه على آلة الفرز عشان يعبون الكور اللي عليها الارقام (كل كوره مكتوب عليها رقم ، تنظر في الجدول رقم الكوره يقابله رقم القطعه) اول شي فرزو الاوامر الملكيه وبعده فرزو باقي الطلبات . يذكرون أسم الشخص ثم يسحب له موظف البلديه كوره ويقول رقمه ، نسيت أقول لكم عن الكراسي كراسي غبيه إذا واحد يبي يمشي وكان بالوسط لازم كل اللي قبله يطلعون عشان يطلع وإذا واحد يبي يدخل نفس الوضع وأنتم خابرين جماعتنا ( يجلس شوي بعدين يبي يروح هناك لأنه شاف واحد يعرفه وهذا يبي يروح حول المكيف وهذا .. وهذا .. الخ ) الساعه 9 تقريبا طلعت هربا من الحر وتعليقات الجمهور وكان المصور ؟؟؟؟؟ يصور فقلت له صور الناس اللي معه أوراق تستخدمه مروحه . فقال لي ههههههه . طلعت للدور الرابع وإذا الموظفين بلا تكييف فسألت عن السبب فقالو أنه عطل من شركة الكهرب . فقلت والمكينة الاحتياطيه اللي جنب البوابه الخارجيه قالو أنه خربانه .
صراحة ما أدري وش أقول ولكن أفضل إني أترك لكم المجال للتعليق على ما حصل ... أكيد فيه بعضكم حضر .
أشكر لكم سعة صدوركم ... وأعتذر لكم عن سوء الانشاء .
( أستغرب سوء التنظيم من قطاع يفترض أنه مضرب المثل للدوائر الحكوميه )