[المهتم المغتم]

ذهبت للمسجد المختار..

صوت الإمام عذب وجميل...

المسجد صغير ومزحوم....

المكيفات لا ينعم بهبوبها إلا الصف الأول فقط...

الصف الثاني وما خلفه الحر يستحوذ على كل أحاسيسك .. التفكير، الأنف، ......


بعد هذه المقدمة أروي لكم ما حصل ، أنا مثل ما يقولون عارف الطبخة جيت بدري وحجزت لي مكانا في الصف الأول وأخذت أتنعم بهبوب غربية إسبيلتاوية(جمع إسبلت نسبة إلى المكيفات الإسبلت) ومافيه أجمل من هذه اللحضات .

أتى أحد الإخوة الشياب الله يصلحه . شايبنا يحب البراد طبعا حشر نفسه بالسطر الأول . موقفنا منه أننا أفسحنا له المجال لينعم بهذا البراد بكل تقدير واحترام .

أقيمت الصلاة بدأت الصلات وأتوقع إن عشاء الشايب رفيقنا توه يبدأ يتخرط بدأت أسمعت تفاعلات وأصوات في بطنه وحدها كافية لأن يأتينا خشوع غريب . أنا حتى الآن لا أعلم وش هو متعشي.

لكني أتوقعه متشعي كيلو ثوم ني ومخرطه بجرة ببسي كبيرة....

بدأ شايبنا يفقد السيطرة على نفسه وجميعنا يعرف مصيبة فقد السيطرة ...

بدأ أخونا الشايب بسيفونية جشاء (تغار على اللهجة الدارجة) لم أسمع مثلها في حياتي العجيبة في هذه السيفونية إنها ببصمة خاصة من هذا الشايب فهي لا تطرب الأذان فحسب بل تعدى إطرابها إلى الأنف وحتى إن سددت أنفك فما في مجال أن لا تشمها. شامها شامها الله لا يعوقك سددت أنفي وأحس بريحتها وسددت فمي لأني توقعت الرائحة تدخل مع الفم وترقى فوق إلى الأنف لكن مافيه فائدة أتوقع والله العالم أنها تخترق المسامات الجلدية وتصل إلى الأنف ....

الوكاد إني إنتهت الصلاة وصليت على النبي محمد صلى الله عليه وسلم حيث روى البخاري و مسلم عن ابن عمر أن النبي صلى الله عليه و سلم قال : " من أكل من هذه الشجرة ـ يعني الثوم ـ فلا يقربن مساجدنا " و عن أنس رضي الله عنه قال : قال النبي صلى الله عليه و سلم " من أكل من هذه الشجرة فلا يقربا و لا يصلين معنا " رواه البخاري و مسلم و رواه الطبراني و لفظه قال " إياكم و هاتين البقلتين المتتين أن تأكلوها و تدخلوا مساجدنا ، فان كنتم ولابد آكليهما فاقتلوهما بالنار قتلا " وروى الشيخان وغيرهما مرفوعا : " من أكل بصلا أو ثوما فليتعر لنا، أو فليعتزل مساجدنا، و ليقعد في بيته " ورواية مسلم : " من أكل البصل و الثوم و الكرات فلا يقربن مسجدنا، فان الملائكة تتأذى مما يتأذى منه بنو آدم".

وخطب عمر رضي الله عنه يوم الجمعة فقال: " ثم إنكم أيها الناس يأكلون شجرتين لا أراهما إلا خبيثتين: البصل و الثوم. ولقد رأيت رسول الله صلى الله عليه و سلم إذا وجد ريحهما من الرجل في المسجد أمر به فأخرج إلى البقيع، فمن أكلهما فليمتهما طبخا" رواه مسلم والنسائي.




لكن من يعي عظم هذا الدين ويطبقه في أكله وشربه ومعاملاته وشؤونه كلها .

أسأل الله أن يصلح شيباننا ويلهمهم الرشد والصلاح .

[نبوغ الفكر]

,,

بعض المرات أفكر أقطع الصلاة لأنه ينقطع قلبي من ريحة اللي بجنبي


بعض الناس مايقدر اللي حوله


خاصة بعض الشيبان والله ياهو رادن بالعالم


الله يكتب أجرك .. ملاحظة رائعة وصياغة أروع


,,

[تباشير المطر ~]

صدقتم

اتمنى ان يعي الجميع هذه العبـاره ,’

,’ [عــــــــامل النــاس بمـاتحب ان يعــاملوك ] ,’

ماشاء الله اسلوب فكـاهـي يجبر على قراءة الموضوع بالكـامل ,’

[بـــ sunـــــريدة]

جزآك الله خير ، وفعلا مأساة الله يصلح شيباننا ويهدي اللي يطبخون لهم بالبيت المفروض
يكونون عارفين الشي هذا وما يوكلونهم ثوم أو بصل ، بس المشكله الجشاء وشلون تقول
للشايب يا خال لا تاغر بالصلاة أو أكتمها أو طلعها بدون صوت يمكن يجيك طراق

شكرا لك المهتم ولملآحظتك والتي نحتاج للمسؤلين دآخل بيوتهم بالتنبيه للشياب بكل شي .

[abu.malk]

صدقت يا اخي المهتم المغتم والله انني اتعذب من ها الرائحه افكر اني اقطع صلاتتي على شان ها الشايب


اللهم صبرنا

[سفير الشمال]

المتهم المغتم/والله موضوع جدا مهم

لكن ودي اطلب منك تدبرنا بفتوى من احد علمائنا عن هذا السؤآل

س-هل يجوز لي ان اقطع الصلاة اذا كان من بجانبي رائحته كريهة من ثوم او غيره نظرا لأني لا استطيع الخشوع فيها لهذا السبب؟

[المهتم المغتم]

اقتباس المشاركة الأساسية كتبها نبوغ الفكر ,, بعض المرات أفكر أقطع الصلاة لأنه ينقطع قلبي من ريحة اللي بجنبي بعض الناس مايقدر اللي حوله خاصة بعض الشيبان والله ياهو رادن بالعالم الله يكتب أجرك .. ملاحظة رائعة وصياغة أروع ,,

شكرا لك على كلامك الجميل وبالنسبة لقطع الصلاة بالنسبة لي بغض النظر عن حرمتها وحلها لكن ما أقوى نفسي أقطع الصلاة تعرف أخاف يحمل بنفسه علي خصوصا إذا كنا من حي واحد

شكرا لك على مرورك الجميل

اقتباس المشاركة الأساسية كتبها نورة 11 صدقتم اتمنى ان يعي الجميع هذه العبـاره ,’ ,’ [عــــــــامل النــاس بمـاتحب ان يعــاملوك ] ,’ ماشاء الله اسلوب فكـاهـي يجبر على قراءة الموضوع بالكـامل ,’

أهلا وسهلا وفعلا حكمة رائعة لكن بعض الناس أصلا عادي يجلس بجانب أحد ريحته كذا وأعرف واحد من الشباب راعي كده ما يصلي الجمعة إلا في مسجد كله عمال لكي ما يكلف نفسه يسبح ويلبس ثياب نظيفه هو اللي راح يبحث عن اللي ريحتهم شينه يعني يحب لنفسه الريحة الشينة وشلون تبينه يعاملنا مثل ما يعامل نفسه

شكرا لك على مرورك العطر

اقتباس المشاركة الأساسية كتبها بـــ sunـــــريدة جزآك الله خير ، وفعلا مأساة الله يصلح شيباننا ويهدي اللي يطبخون لهم بالبيت المفروض يكونون عارفين الشي هذا وما يوكلونهم ثوم أو بصل ، بس المشكله الجشاء وشلون تقول للشايب يا خال لا تاغر بالصلاة أو أكتمها أو طلعها بدون صوت يمكن يجيك طراق شكرا لك المهتم ولملآحظتك والتي نحتاج للمسؤلين دآخل بيوتهم بالتنبيه للشياب بكل شي .

والله أنت صادق ليت اللي يطبخون يراعون هذا الشيء ولا الشيبان ما منهم رجاء مهوب سامع منا لكن أملنا بالله ثم من ربات البيوت .

شكرا لك على تنبيهك وردك الرائع

اقتباس المشاركة الأساسية كتبها abu.malk صدقت يا اخي المهتم المغتم والله انني اتعذب من ها الرائحه افكر اني اقطع صلاتتي على شان ها الشايب اللهم صبرنا

الله ياجرنا وإياك وإن شاء الله إننا مأجورين لأن هذا من الصبر على البلاء

شكرا لك على التفاعل

اقتباس المشاركة الأساسية كتبها سفير الشمال المتهم المغتم/والله موضوع جدا مهم لكن ودي اطلب منك تدبرنا بفتوى من احد علمائنا عن هذا السؤآل س-هل يجوز لي ان اقطع الصلاة اذا كان من بجانبي رائحته كريهة من ثوم او غيره نظرا لأني لا استطيع الخشوع فيها لهذا السبب؟

والله يابعدي إني علمي علمك وماودي أفتيك وأستأثم بك أغديك أنت تفتينا وتفيدنا

بس يا أخي أتوقع إنه شينه إنك تقطع الصلاة لأنه يبي يزعل عليك الشايب إذا صار يعرفك وأنت تنفس من فمك يقلل الرائحة وتحرى (تغاره) وقدمله بقطع النفس يعني إذا تغر قدم للريحه واكتم نفسك لك عشرين ثانية ولا كد تعدت الريحة والشكوى لله أما قطع الصلاة فوالله ما أقدر أفتيك يابعدي أحس إنه صعبة

[@@ المجاهد @@]

مشكور ياغالي على هالموضوع والأسلوب الجميل .. وصدقت والله ..

أحد إخواني كان يصلي التراويح جاء أحد الشياب ووقف عنده طبعا أخوي عجز يتحمل فيوم خلص

الإمام من التسليمة نكس من الصف وخلا واحد بداله يجلس جمب هالشايب .. تعرفون ليش

لأن ريحة هالشايب ريحة قلي .. أخوي قاعد يقول لي (تلقاه هو اللي قالي السمبوسة )

والله يصلح الحال

[SORRY]

صياغة الموضوع جميله ومسليه الله يعطيك العافيه

الحمد لله مسجدنا ما به الا شايب واحد ولا يفطر الا على شربه

[سدومي]

يارجال المشكلة في كل مسجد ....
الجهل عدو الإنسان ولو فقهوا مافعلوا

[ضايق الصدر]

والله اني اعاني من هالشي

لكن مافيه حل ,

[عآشق الوفآ..!]

يآالله...يآسيمفونية ( التغآر والمتآغر) شي لآبد منه بآلصلآة عند الشيبآن

وربي أستغرب منهم...دآخلين بآلصلآة وبنيتهم الخشوع

ثمن فجأه


آآآآآآآآآآآآآآآآآآآآآآآع...
.
.
أهنيك على هالموضوع والطرح خيي

[المهتم المغتم]

اقتباس المشاركة الأساسية كتبها @@ المجاهد @@ مشكور ياغالي على هالموضوع والأسلوب الجميل .. وصدقت والله .. أحد إخواني كان يصلي التراويح جاء أحد الشياب ووقف عنده طبعا أخوي عجز يتحمل فيوم خلص الإمام من التسليمة نكس من الصف وخلا واحد بداله يجلس جمب هالشايب .. تعرفون ليش لأن ريحة هالشايب ريحة قلي .. أخوي قاعد يقول لي (تلقاه هو اللي قالي السمبوسة ) والله يصلح الحال

ههههههههههه حلوه ريحة قلي أحمد ربك يا رجل هذا من زين الكرشة أيس تهضم شيء ياحول لذلك تلقاه الدهن متجمع له ثلاثة أيام بكرشته وإذا دخل عليه طعام جديد حار بدأ يغلي وتجيك هالريحة

شكرا لك على مشاركتك التحفة

اقتباس المشاركة الأساسية كتبها ramy صياغة الموضوع جميله ومسليه الله يعطيك العافيه الحمد لله مسجدنا ما به الا شايب واحد ولا يفطر الا على شربه

ياهلا بك
واحمد ربك وأقضب على مسجدكم وحب راس هالشايب لأنه مسوي فيكم خير

اقتباس المشاركة الأساسية كتبها سدومي يارجال المشكلة في كل مسجد .... الجهل عدو الإنسان ولو فقهوا مافعلوا

إي والله

مشكور على الرد ياخيي

اقتباس المشاركة الأساسية كتبها ضايق الصدر والله اني اعاني من هالشي لكن مافيه حل ,

الحل ماهنا إلا إننا نتحرى ورا إمير تضمن اللي بجنبك يكونون ناس فاهمين

وإذا بليت فاصبر

تحياتي لك

اقتباس المشاركة الأساسية كتبها عآشق الوفآ..! يآالله...يآسيمفونية ( التغآر والمتآغر) شي لآبد منه بآلصلآة عند الشيبآن وربي أستغرب منهم...دآخلين بآلصلآة وبنيتهم الخشوع ثمن فجأه آآآآآآآآآآآآآآآآآآآآآآآع... . . أهنيك على هالموضوع والطرح خيي

يابن الحلال آآخذين راحتهم بالصلاة أهم شيء يكونون مرتاحيين نفسيا لأن الشايب إذا ما ارتاح نفسيا يكون ضرره أشد من أن يكون مرتاح .

أذكر من عناد الشيبان واحد متبلينا بالمسجد يوم كنا ندرس بالإختبارات يجيك ويسكر كل اللنمبات وهو يشوفنا قاعدين نقرأ وآخر ما فكر به هو أنت وكل وقت وحنا معانات مع هالشايب كلها عناد مو زود توفير .

بس خلها على ربك
تحياتي إلك

[صافي النية]

والله صدقت لا من شيبان ولا من غيرهم الله يهديهم يا رب,,
وكما قالت الأخت نورة تلك الحكمة والتي أعتبرها أفضل حكمة لدي وهي(عامل الناس كما تحت ان يعاملوك به)
شكراً لك عزيزي لطرحك الجميل ,,