[مدحت شوقي بريده]

السلاااام عليكم ..
نهاركم سعيد .. مثل ابو سعيد .. يابريدة ستي .. وانشاء الله من مزيد لمزيد ..



تعرفون هاليومين العالم هرجتهم غباااااااااار الهجير .. وش صار على محمد وش سوا مسلط ..
تصدقون ان جدتي موضي اذا قلنا له جت غبار الهجير وهي تصلي .. تقعد تصفق بإيده وتأشر لنا ..
تقول لايبدون اصبروا .. تحسبه على كيفنا ..



همن عاااااااد اذا جت وقعدت اتفرج .. ماتشوف عيونه من الدموع ..
الماء اللي به كله يقضي ..يابعدي هي تنشف .. لو تعفط ايده انكسرت ..
يقضي هالمغرب وحنا نحقنه موية علشان ترطب لاتيبس ..



نننننشششششششششششش .. <<((== هذي نشقة جدتي وهي تصيح ..
اوووويل تسبدتس ياموضي ..
اويليه بس من يقضب لي هالمسلط والله اني لاأبرك عليه بقرتنا .. الين ينقطع نفسه ..
كره .. تسيف عزر بهالوليد الضعيف محمد ..



اقول يمه موضي ..
هاللحين قضت غباااااار الهجير .. وش استفدنا منه ..
وش النتيجة اللي هاللحين طلعنا به ..

ماغير صياااااااااح هالحريم وهالبزاااااااااارين ..





تدري وش اللي انا اكتشفته ..
انك ياوليدي والله ماغير تدربي دميجك وانت تناظر هالمسلسل ..
اجل هاللحين كل هالفوايد والعبر ولافهمت منهن شي ..


الشرهة مهيب عليك .. الشرهة على ولد المحيميد اللي المفروض انه يوم قضت الحلقة الأخيرة ماحط صبورة وقعد يشرح لك انت وخشك ..
انا من يوم شفت شهادك حقت الثانوية وهم كاتبين التقدير ( يالله يالله نجح ) وانا عارفتن انك دبشة ..



مير شف انا اللي ابعلمك



اول شي .. يبونكم تشوفون حالنا منول .. شوفوا الكساااااااااافة وقلة الربح وقلة الوااااااااااالي ..
واحمدوا ربكم على هالنعمة ..
شوفوا وشلون معاناتنا مع الموية .. معاناتنا مع لقمة العيش ..


وانتم الوااااااحد يقوم من الأكل .. واللي طايحن بالسماط اكثر من اللي اكله ..

انتم الوااااااحد يفتح الماء ويقعد يناظره يحترية الين يبرد من حرارة الشمس ..
وبالشتاء يشغل الصخااااااااانة ويصب الماء ويحترية الين يحمي ..
هالماء اللي اهدرتوه يسقي قرية مثل حقتهم سنة كاااااااااملة ..



غباااااار الهجير صورة لنا ..
حياة الخوف ..
حياة الرعب ..
حياة الشقاء والتعب ..
حياة الفقر ..



وإستفدنا منه بدروووووووس وعبر كثيرة ..
ابسردهن لك ياهالتنكة .. اغديك تفهم ..




التعااااااااااااون

غبار الهجير صور لنا حياة الأمس وكيف يكون التعاااااون بين الناااااااااااااس ..
الغني يساعد الفقير .. والكبير يرحم الصغير .. والصغير يحترم الكبير ..
العمل الجماااااااااااعي لمصلحة الجميع ..
وقفة الجيرااااااااااان مع بعضهم في السراء والضراء ..
بموت ام محمد .. والفرح بالعيد .. ونهاية بحفر البير ..




زوال الفاسقين والعابثين

يوم هالمسلط طلع من القرية .. حلت البركة ..
يعني ياوليدي لو يفطسون هالعلمانيين واللي ياكلون الربا وأمثالهم او يهتدون ..
كان تحل البركة علينا .. ويزول الغلاء وتنزل الامطار ويعم الخير علينا ..





بركة الضعفاء ..

هالفئة هذي اللي دائماً نشوفهم .. وماهنا ياوليدي حارة ماتخلى من جنس محمد ..
هم البركة .. بقلوبهم الطاهرة النظيفة ..
هذولا دائماً خلوكم حولهم .. الله من قرية وقرية ترزق بسببهم ..
وكم من عايلة تعول مثل هذولا ربي رازقهم ومبارك لهم بأموالهم وبأعمارهم بسببهم ..
هذولا لازم نحافظ عليهم .. ونغير من معاملتنا لهم وننتبه لهم .. ونحتويهم ..
لان دعوة منهم تكفي لانقاذ امة ..





مير ياوليدي حافظوا على هالنعمة اللي انتم به ..

غباااااااار الهجير يقول :

كنا مانجد شي نآكله ونشربه وحياتنا خوف ورعب وجوع وعطش وهلع ..

اخشى أخشى أخشى .. يجينا يوم نقول لعيالنا :
كنا ناكل وكنا نشرب وكنا بأمان ورغد عيش وأي شي نبيه نحصله ..


وسلاااااااام ائليكم ..


سي يو ..

[الكامل]

جميل.

[مدحت شوقي بريده]

اقتباس المشاركة الأساسية كتبها الكامل جميل.

هلا بالبي الكاااااامل ..
ادري ان حروف الكيبرود اللي عندك متسحلة .. يوم إنك ماتكتب الا هالكلمة ..
حتى حاسن بك وانت تكتبه غيب ..

يابعدي انت ترى يكفي النية ..


الكامل ..
وجود معرفك فقط .. اعتز فيه ..


سي يو ..

[نبض المشاعر]

رااااااااائع بوركت يمينك على هذا الابداع

وفعلا لا بد لنا من مراجعة انفسنا فان الله لا يغير مابقوم حتى يغيروا ما بانفسهم

تسلمين يا جديده موضي والله اننا حبناه واحنا ماشفناه عسا الله يعظم اجرها ويحسن خاتمنتنا وخاتمتها

الشكر لك يا مدحت

[مدحت شوقي بريده]

اقتباس المشاركة الأساسية كتبها نبض المشاعر رااااااااائع بوركت يمينك على هذا الابداع وفعلا لا بد لنا من مراجعة انفسنا فان الله لا يغير مابقوم حتى يغيروا ما بانفسهم تسلمين يا جديده موضي والله عسا الله يعظم اجرها ويحسن خاتمنتنا وخاتمتها الشكر لك يا مدحت

وشكراً لكي نبض المشاعر ..
على مرورك الكريم ..

اقتباس اننا حبناه واحنا ماشفناه

وش تبي تشوفين .. وجه كله متعرفط وبوه فتحااااااااااااااات ..
تقولين جدار طين بوه درايش ..
ماتعرفين اثمه الا من سنه اللي يتدودل ..

سي يو ..

[fhed]

إي والله صدقت جدك وأشوف العالم كله متعاطفه مع محمد إلى واحدن كتبه قصيده

مرحوم يامن مات وموته شهيدي .. يمناه مسحاةِ بجوف القليبــي
رايه سديدٍ وعند ربعه زهيــــدي .. له ماقفٍ مشهود ضد الغريبي
فعايله تنطق بفعل مجيـــــــــدي .. مبرته باخته وعلمه يطيبـــي

[مدحت شوقي بريده]

اقتباس المشاركة الأساسية كتبها fhed إي والله صدقت جدك وأشوف العالم كله متعاطفه مع محمد إلى واحدن كتبه قصيده مرحوم يامن مات وموته شهيدي .. يمناه مسحاةِ بجوف القليبــي رايه سديدٍ وعند ربعه زهيــــدي .. له ماقفٍ مشهود ضد الغريبي فعايله تنطق بفعل مجيـــــــــدي .. مبرته باخته وعلمه يطيبـــي

فهد ..

الصراااااااحة إن شخصية محمد .. شخصية خياااااااااااااااال ..
لإننا ملينا من شخصية ( الهدر ) اللي يتصنع الدلااااااااااخة ..

وعمر الدغيري اجاااااااااد في دور المسكين .. وهذا اللي جعل الناس يتعاطفون معه ..

وشكراً على حضورك الكريم يالبي ..


سي يو ..

[A N A S]

اقتباس نننننشششششششششششش .. <<((== هذي نشقة جدتي وهي تصيح ..

ههههههههههههههه


والله أنك صادق الكلام اللي تقوله .



بالتوفيق

[مدحت شوقي بريده]

اقتباس المشاركة الأساسية كتبها بريدة city ههههههههههههههه والله أنك صادق الكلام اللي تقوله . بالتوفيق

بريدة ستي ..

هلا والله بالأنيق ..

يابعدي انت .. لو تشوف جدتي اذا بدت تصيح .. يادافع البلى كل جخر بوجهه يصب ..
خوالي يبلشون به .. اللي يسد اذانه واللي يسد خشمه واللي يسد اثمه ..

همن تعطس وتطير كل السدادات .. وحالتنا حاله حنا وإياه ..

مير هاليومين ابشرك رااااااكدين .. وباقي مناديل خليناهن للسنة الجاية ..
صافينهن مع قوارير التوت ..


سي يو ..

[ولد الـــجـــاسر]

مشكووووور

[brr777]

مبـــــــــدع كما عهدناك



بارك الله فيك



لا تحرمنا جديدك
وجديدك جدتك موضي يالله إن تخليه لكم....

[مدحت شوقي بريده]

اقتباس المشاركة الأساسية كتبها ولد الـــجـــاسر مشكووووور

ولدالجاسر ..

والشكر لك يابعدي .. ماقصرت ..

سي يو ..

اقتباس المشاركة الأساسية كتبها brr777 مبـــــــــدع كما عهدناك بارك الله فيك لا تحرمنا جديدك وجديدك جدتك موضي يالله إن تخليه لكم....

brr777

الصراااااااااااااحة اسمك احس انه كاتبه بالبرد ..
يوم تكتبه وانت ميتن برد وترتعش ولا كمل الاسم .. برررررحححح


مير مشكور يالبي .. وابشر يابعدي بالجديد ..


سي يو ..

[دعبل نجد]

ابو ابراهيم . . .

سلملي على جدتك , يا اخي هذي اللي المفروض تعطى شهادة الدكتوراة الفخريه مع مرتبة الشرف الاولى . .


ليتن نفهم مثل هالفهم مهب مثل بعض هالعالم ماغير يدور العيوب علشان يسب ويتفلسف . .

ابو ابراهيم تحيااااااااااااااتي . . .

[مدحت شوقي بريده]

اقتباس المشاركة الأساسية كتبها دعبل نجد ابو ابراهيم . . . سلملي على جدتك , يا اخي هذي اللي المفروض تعطى شهادة الدكتوراة الفخريه مع مرتبة الشرف الاولى . . ليتن نفهم مثل هالفهم مهب مثل بعض هالعالم ماغير يدور العيوب علشان يسب ويتفلسف . . ابو ابراهيم تحيااااااااااااااتي . . .

دعبل نجد ..

اقتباس الدكتوراة الفخريه مع مرتبة الشرف

يالبي انت .. تبين ابلش بجدتي .. ادري لو ابقول تسذا .. كان تقول لي ..
هو : يبي يعطونن شهادة فخرية مع مرتبة وشرشف ..

لإن سلمك الله خالتي ام خالي اسمه فخرية ..

وجدتي موضي ماتواطنه .. تقول بتلة ريحتة ثوم ..
تصدق ان جدتي تسميه ثومية مهوب فخرية ..




اما يالبي اللي يدورون العيوب وينتقدون لمجرد النقد ..
فهذولا مايقدمون ولايؤخرووووووووووون ..
اغلبهم ( حاسدين ) والحاسد هو اللي يتمنى زوال نعمة الغير ..
ويتمنى انه بمكانهم .. ويقرض اصابعه من القهر وقوة الحسد ..

لاعليك يالبي دعهم دعهم .. فلن تراع يالبي ولن تراع ..


سي يو ..