[اميـr]

السلام عليكم ورحمة الله وبركاته

في موضوع سابق كثر النقاش والجدل فيه بين مؤيد ومعراض والذي

حتى أن بعض الردود تعدت الأخلاق بشتم ولعن ولم نجد حتى رد من أدارة المنتدى

الموضوع ::الرجال السعوديين قسم بالله لعبه بايدينهن؟؟؟ ::


أخواتي الغاليات في هذا الموضوع لن أكون أستاذ في عالم العلاقات الزوجية أو عالم نفس
أو متفلسف على أكتاف أهل العقول الصغيرة

نعم أنا شاب وأبحث أن شريكة حياة تعرف وتقدر الحياة الزوجية بمعنى الكلمة

سؤال يطرح نفسة :: لماذا دائماً ما نسمع (( يا زين حريم أول )) لماذا ؟؟ وما السبب هل
أنقرضت الأنوثة والأحترام ومتطلبات الزوج ....

أختي الغالية :: مثل معروف (( اذا عرف السبب بطل العجب )) هل سئلتي نفسك بما قصرتي في حق زوجك ... بعض الزوجات بعد زواجها بفتره ليست بالقصيرة تزرع فتور في طريق الحياة الزوجية

ولكم الأمثلة الواقعية للأسف

1- ذهاب متواصل لزوجة لأهلها من باب تغيير الأجواء أو زيارة أقارب لها وتذهب لروئيتهم
2- عدم الأهتمام بتحضير وتنويع الطعام لزوج ... وهذا المثل كثيير للأسف
3- الأعتماد الكبير على (( الشغالة )) وهنذي مصيبة العصر للأسف الشديد
4- عدم الأهتمام بالمظهر من لبس وتزين وتعطر .... ألخ
5- تفخيم وتهويل أي مشكلة بينها وبين الزوج للوصل لمبتغى تريدة (( مثل سفر أو .... الخ )


أختي الفاضلة الأمثله كثيرة وكبيرة حتى .....

___________

فعلمي أختي الفاضلة أن الرجل مهما كان ليس كامل فلدية نقاط ضعف أستغليها وتفنني بالوصل إلى قلبة ... حتى لا تنصدمي في يوم من الأيام بزوجه بثانية أو ثالثة


أتمنى تقبل ندي بقلب وصدر رحب

أخوكم ::: أميــr :::

[تـهاني]

[blink]صورة مع التحية لجدتي الغالية ....[/blink]


ودايما نتمنى الماضي والماضي دائما يتمنى الحاضر

الاجداد والجدات يقولون ليت حصل لنا مثل ما حصل لكم

وحنا نقول ليت لنا مثل الاولين ...

هذه نظرية

دائما نتذكر عيد الطفولة ونحسه افضل من اعياد الان

العيد والله ما تغير

حنا اللي كبرنا وتغيرنا على العيد

كبرنا وكبرت معنا همومنا ومسؤولياتنا

كل شي صار طعمه غير

سؤال (هل تستمتع بطعم الحلاوة زي ما يستمتع فيه الاطفال )؟؟؟؟؟

اكييييد لاء

كل حواسنا تتغير مع اعمارنا

البنت السعودية صارت افضل من الماضي بكثيييير

صار لها اهتمامت بجسمها وبشكلها وبنظافتها وبأكلها

صارت تعرف تطبخ انوااااااع كثيرة ومفيدة

(الحريم الاولات حدها تهلص مرقوق مع القرعه لما يصير معجون)

وايضا الرجل السعودي تغيّر

صار يسافر ويروح ويجي ويقلب عيونه بكل محل وبكل محطة فضائية لما صار كحله ما يملأ عينه

وصارو يتفننون بحياكة النكت عن المراة السعودية ومقارنتها بالشامية والمغربية

المرأة تجتهد لارضاء الرجل

ولكن لن تمتلئ القربة وهي مشقوقة ابدا ابدا

العلاقة الزوجية ... كجسم الانسان كلما تغذى تغذية جيدة اصبح نشيطا بعيدا عن الامراض

ولا اعتقد ان مسؤول التغذية لهذا الجسم هو المرأة وحدها

لا ينتظر الرجل السعادة لتطرق بابه في ساعة متاخرة من الليل ولا حتى بعز القوايل

نحن من نصنع السعادة او نحطمها

وكثيرا ما تكون وظيفة الرجل تحطيم ما تصنعه المرأة من سعادة

متشبثا

بضغوط العمل ... والدوام ...

وطلعة يوم السبت اللي كل يوم احد

وطلعة حقين الدوام الاثنين

وطلعة خوياه يوم هم بالثانوية كل ثلاثاء

عاد حقين الجامعه ما يقدر يفوتهم الاربعاء

والخميس عاد طلعته الدورية مستحيييل تفوته

الجمعه بكرا دوام ما بيطلع لمكان بس بيجلس مع الشباب بالاستراحة لما الساعه 12 بالليل ويرجع ما في طلعات
وطلعة خوياه اللي هو حج معهم قبل 7 سنوات يطلعون كل اول خميس من كل 3 شهور
هذا غير التناتيف ...
اذا امطرت طلع مع ربعه يقول مطر ووناسة وبنخيم واخذ اجازة
واذا ذبحهم الحر راح مع ربعه لابها والا صلاصل يتبردون واخذ اجازة (عاد حنا نصدق بسرعه انها ابها والجواز مقفل عليه ما نشوف وش فيه من اختام)
واذاقلنا ودنا نتمشى قال اووووف ما عندي رصيد اجازات والعمل محتاجيني لان كل الشباب اجازات ....



هذا جدول رجل سعودي ...... صح ؟؟؟؟

[اميـr]

اقتباس هذا جدول رجل سعودي ...... صح ؟؟؟؟

للأسف نعم .... ولكن متى يكون هذا حال الزوج عندما لا يجد من يستقبلة بكل أريحية
وبصدر رحب .... فأنا شاهدة أمثال كثيرة في مجتمعنا ولن أقول أقاربي حتى أقع بسوء الظن
ولكن البيوت أسرار والجميع يعرف أن الزوجة الحكيمة التي تعرف معنى الحياة الزوجية هي تلك التي يبحث ويحلم بها كل زوج ..... الرجل يصحو كل يوم لبيحث عن لقمة العيش ويعود منهك القوى فلا يجد تلك الأيادي التي ترعاها
بل في ((( سبات ))) عميق للأسف


الأطباق والأصناف التي تعج بها المائدة في زمننا هذا للأسف أفكار مسروقة وتقاليد مرهونه بعطاء الزوج لزوجته
فمثلاُ :: عند زعل الزوجة هل تعد هذه الأطباق ((( للأسف لا ))) >>>> لأن حرمنا المصون زعلانه

** الحديث يطول والحلول بين يدي الزوج والزوجة (( ولكن )) تتحمل الزوجة النصف بزيادة صاع من المودة والأللفة
أختي الغالية الحياة مدرسة ومن سبقونا هم أساذتنا بالحياة فلا عجب ولاعيب بسؤال عابر عن كيفة تملك الزوج


وجهتي الخاصة
أميــr

[طق طق]

بالعكس أخي أميـ .........

النساء اليوم أفضل بكثير الآن من السابق .... سابقا المرأة كأنها عبدة مملوكة تزوج بدون علمها والرجل عيب يسولف على زوجته ويضحك فقط ( أنتسبي الغداء ) أو ( تراي أبطلع ) . ومظلومة في بيت حمولتها ولا تزور أهلها إلا بالشهر مره واحده فقط ..

أما عن الوقت الحالي فأغلب النساء محشومات وعلى كيفها في الأسبوع تروح مره أو مرتين لأهلها وتلقاها من يوم تتزوج وهي في شقة وعندها النت أول مايطلع زوجها تخلي المرعى ترعى ... والدولاب مايتسكر من كثر الملابس المشيوفات على 700 ريال وطالع .. وكلمة ( جبلي عشاء على دربك ) .. والله مدللــه على كيفها ..

ونساءنا الآن أغلبهن فيها قلة أدب و (حياء ) وكيد ... أدخل على محلات السوق الداخلي وتشوف لسان المرأه عالي جداً وتنكت بعض الاحيان وإذا كانن إثنتين بدأن بالظحك والتطنز والنغز وصارت العباءه مجرد عادة وليست عبادة .. ودخل الأزقة الدروب تقابل المرأة وجهاً لوجه ولا كأنك قدامها لازم تبتعد أنت عنها من قلة الحياء . ولابسه الجنز ولا سروال النوم ولا خط البلدة وتسمع صوت الكعب .. وتبط عينك لو تنصحها .

عاد وشلون لو يفصخن العباءة كان علووووووووووووووووم .

[كتكوته]

ياحبيبي كلن يحكي عن زمانه..
حريم اول رجال مو حريم بالقوة والصبر..ورجال اول همهم كيف يجيبون لقمة العيش لاهاليهم وبس..
اما لو تشوف مرة بالزمن هذا مثل ح ريم اول كان قلت هذي قرويه ماتعرف الاتكيت والكشخه..وجاهلة ومادري ايش..
والحين هم الرجل كيف يتمتع بحرمته وكيف يسعد عيونه..والحرمه همها كيف كيف تتكشخ وتتعدل..
وعسى السعوديات يملن عيونكم لانكم للاسف مشافيح..خخخخخخخخخ
ومن ناحية الطبخ ..لاتعمم..الكثير منا فيها الخير وتعرف تطبخ وبالعكس الحين صرنا نتفنن بالطبخ مو زي اول هريس ومطازيز.
فكر..لو عندك حرمتين بالبيت وحدة منهم تهتم باولادها وطباخها وصبورة هذي اولوياتها طبعا .. وعندك ثانيه تهتم بشكلها واناقتها ودلعها.. قل الحق مين راح تجذبك؟؟اكيد بتميل للثانيه..
ومن ناحية الطلعات انتم السبب ليش طلعاتكم واجد هذا زميل العمل وهذا صديق قديم وهذا تعرفت عليه بالنت..اكيد بنطلع زيكم وبنفرفش..
اما من ناحية التعدل والتزيين فوالله ما صدقت ولا بحرف..بالعكس الحين هم الوحده كيف تتملح وتتزين..
والاعتماد على الخادمة لاننا بشر ونحس ونتعب وكثرة الالتزامات والكماليات والاثاث المتنوع مو زي اول غرفه مليصه ويكنسون بعرجد..وبزراننا الله يصلحهم مزعجين ومحجورين بيننا لايطلعون ولاشي وهذا يكبونه وهذا يحوسونه والا بزران اول مايدخلون البيت الا وقت النوم لذلك كان مايستدعي ان الوحدة تجيب خادمه..
اما من ناحية تهويل المشاكل كل وحدة وحسب تربيتها وطبعها..وبعض الرجال للاسف يحطون المسؤليه كلها على الحرمه وهي تنضغط ويبيها ترضيه اوقف معها فكر تسعدها وتعطيها يوم بالاسبوع راحه عن الطبخ وخصصوا يوم للنزهة بروحكم..واذا اسعدتها انا متاكدة انها راح تسعدك..وبعضهم يبي يمشيها على كيفه بالزين والشين يحس انه ملكها لازم يتحكم فيها..تدري انه مو واجب عليها انها تطبخ وتغسل لك..واذا طلبت خادمه مالك حق ترفض لانه بالشريعه مو خادمه لك انما زوجه لازم يكون بينكم احترام متبادل ..واحنا نسوي هالشي ونخدمكم بعيوننا لانكم تقدمون لنا اشياء مو واجب تسوونها لنا ولكن من بالب المحبة والالفه والعون..
والله يسعد كل زوجين ويرزقكم الصبر انتم بعدلانه الحين الطلاق كثر ..لو الواحد ماجازت له الحرمه مستحيل يصبر عليها ..
وتصدقون بعض الشيبان والعجز بعد ماشيبوا كل واحد كان يقول صبرت عليها لاجل الاولاد والا ماحبيتها وسمعت هالشي باذني..من منكم يقدر على هالشي..مستحيييييييييييييييييييييييل لانه مافي صبر بهالزمن..
وبالله التوفيق..

[ابوولعf]

انا مع حملة خلو البنات تصدي ههههههه السبب ان بنات اول موب زي الحين

الحين تغيرن موب زي اول الحين نصهن رعيات اسواق ودشوش وخربيط

واذا جاء الوحد يخطب بتشوف اعيونه اذا كانن زي اعيون وئل الكفوري توفق

وسبحان الله الايام هذي الرجال يرفض والسربوت يزوج

لا خلاص حنا الشباب نبي نستورد من سوريا زوجات تحشمك وتهتمبك وتخاف عليك من نسمة الهوا

[!وش السالفه!]

اقتباس المشاركة الأساسية كتبها ارا3993 انا مع حملة خلو البنات تصدي ههههههه السبب ان بنات اول موب زي الحين الحين تغيرن موب زي اول الحين نصهن رعيات اسواق ودشوش وخربيط واذا جاء الوحد يخطب بتشوف اعيونه اذا كانن زي اعيون وئل الكفوري توفق وسبحان الله الايام هذي الرجال يرفض والسربوت يزوج لا خلاص حنا الشباب نبي نستورد من سوريا زوجات تحشمك وتهتمبك وتخاف عليك من نسمة الهوا

الله يقويك من ماسكك لايكون البنات ميتاتن عليك بس ياخلف الله عليك تسان ذا تفكيرك اجل تخاف عليك من نسمة الهوا ـهههههههههـ
موب حبن لك والا حبن لشهبك لا والله حبن لقروشك

[كتكوته]

تاخذ من سوريااااااااا؟؟؟؟؟
خخخخخخخخخخخخخ ضحكتني موت ..
ما اقول شي..هونت

[طق طق]

صدقت أخوي بعض الشئ ... لكن خليها تصدي فلا .. لأنهن بنات المسلمين ..

أما عن السربوت صحيح
تحصل الرجال يخطب يرفض لأن راتبه قليل مثلاً أو تلقاه لسى يدور شغل ..
ويجي المدخن راعي الشقق ويخطب على طول يوافقون عنده فلوس أبوه مغنيه الله ... بعدها بـ 6 أشهر تلقاها تسب في الرجال ... خليك قلعك .
أنا أعرف واحد خطب من ناس ( مطوع ) ووافقوا بعدها أتصلت الأم عليه وقالت : شف ترا أبنيتي ماتعرف إلا للشاهي وتابع المسلسلات وتلبس القصير لاتعقدها من الحين ..
الرجال علي طول أتصل على الأب وقال : ما أراد الله .. والغى الخطبة .

والحين يخطب الملتزم البنت ترفض ليش السبب ... تبي دش بالصالة وتبي تلبس الجنز والعباءة المخصرة مو معقول تروح للعزيمة وعليها عباءة الرأس بدون أكمام . قدام بنات خالاتها .

وخذ العلم إن أحياك الله راح يتمنن الزوج لو سكير .. والله عالم الغيب والشهادة .
الآن تحصل بمستشفى الولادة 18 مولود واحد ذكر والباقي إناث .

[اميـr]

اقتباس الحين الطلاق كثر ..لو الواحد ماجازت له الحرمه مستحيل يصبر عليها ..

فعلاُ حتى أن الأرقام تعد بالأرقام الخيالية

اقتباس القرني يطالب الأئمة بالتركيز على القضايا الاجتماعية أكثر من دارفور دراسة.. نسبة الطلاق في السعودية وصلت إلى 60 بالمائة دبي - العربية.نت أكدت باحثة سعودية أن 60 في المائة من المتزوجات السعوديات انفصلن عن أزواجهن، ما دعا جهات حكومية وأهلية سعودية للتحرك، فيما طالب الداعية الإسلامي المعروف عائض القرني الأئمة بالتركيز على القضايا الاجتماعية عوضا عن الحديث عن دارفور والشيشان. وفي التفاصيل، أوضحت مديرة وحدة الأبحاث في مركز الدراسات الجامعية للبنات الدكتورة نورة الشملان أن معدلات الطلاق في السعودية ارتفعت من 25 في المائة إلى 60 في المائة خلال الـ 20 سنة الماضية". وذكرت الباحثة في حديثها للزميلة فاطمة العصيمي من جريدة "الحياة" اللندنية أن "من أبرز الأسباب المؤدية إلى الطلاق عدم معرفة الزوج والزوجة بالحقوق والواجبات المترتبة على عقد الزواج، والتعجل في التعاطي مع المشكلات التي تطرأ في بداية الحياة الزوجية". وأضافت أن "تفاقم المشكلة دعا مركز الأبحاث في جامعة الملك سعود إلى دراستها، ووضع خطة توعية تبدأ بندوة متخصصة تضم خبراء مهتمين بقضايا الزواج والطلاق والمشكلات المرتبطة بهما". من جهة أخرى، طالب الداعية السعودي عائض القرني أئمة وخطباء المساجد بالكف عن تناول قضايا البوسنة والهرسك والأوضاع السياسية في كوسوفو والشيشان، إضافة إلى الشأن القائم في دارفور في سبيل التركيز على القضايا المحلية المعاصرة في خطب الجمعة والتي باتت تشكل هما رئيسا لأصحابها. وبحسب التقرير الذي أعدته الزميلة هدى صالح ونشرته صحيفة "الشرق الأوسط" اللندنية، قال القرني خلال ندوة (أبناؤنا كيف نعدهم لزواج ناجح): "للأسف نرى من يتحدث من النظيم والسويدي ( أحياء في مدينة الرياض) عن دارفور، مقابل تجاهله للازمات المحلية الاجتماعية"، ملمحا إلى قضية التحليل السياسي لبعض أئمة المساجد، مقابل إغفال القضايا المحلية في إجابة عن تساؤل إحدى الأكاديميات التي تطرقت من خلاله لدور أئمة وخطباء المساجد المفقود بشأن القضايا الأسرية والاجتماعية". على صعيد آخر، قالت الدكتورة الجوهرة الزامل، من قسم الدراسات الاجتماعية من خلال بحث أعدته أن 43 % من حياة الأسر والعلاقات الزوجية في السعودية ممن شملتهم الدراسة قائمة على الإهمال والتجاهل والعنف والقسوة والخلافات الدائمة إلى جانب سيطرة أحد الطرفين على الآخر. وذكرت الزامل أن تلك الظاهرة تسببت "بالانفصال العاطفي" ما بين الزوجين رغم استمرار الحياة الزوجية، مقابل 57 % من العلاقات الزوجية للمبحوثين قائمة على التفاهم والحب.

من المسئول هنااااااااااا
الزوجة أم الزوج

[الــ ع ــود الأزرق]

ياجماعه ..كل زمن له حلاوته..

انا اعترف ان البنت الحين في المطبخ مووو زي اول ..كانو كل اهتمامهم الاكل اذا دخل الرجال حطووو الغدا ولا القهوووه والمره الثانيه العشاء وبس سالفتهم واهتمامهم ببعض يعبرون عنه بالاكل..

لكن الحين لا اهتمامه بنفسها ونظافتها اكثر وكل تركيزها على الاشياء الي تعجب زوووجها..شكلها ولا الاكل الي يحبه ولا اللبس الي يروق له..

واعتقد ان الحين نظرة الشباب غير اووول وتفكيرهم بالاجنبيه لان الي كانوو يلاقونه الاولين بالاجنبيه صارووو بناتنا دكاتره فيه..

بالنسبه للأمثله فبالمقابل لها امثله على الزززوج..ولكن الحياة ماتمشي كذا حاسب علي واحاسب عليك..

الله يوفق الجميع ويهديهم ويصخرهم لبعضهم

[an6]

السبب في الحنين للماضي واسترجاعه هو ارتباطه بالطفولة والعفوية والبراءة المطلقة

أو ارتباطه بالشباب والعنفوان والنشاط بالنسبة لكبار السن لذلك (نحن) كلما ذكر الماضي

[قانون السيطرة]

لأني متــأكــد أن بدراً أو غيره من المشرفين سيحذف ردي كالعادة ويصادر أفكاري
ويجعل أكبر همه إرضاء القلم النسوي . حتى لو تمسخر حد الثمالة

. فأنا لن أرد . آسف ياصاحب الموضوع







وبايباي لندن

[اميـr]

اقتباس المشاركة الأساسية كتبها قانون السيطرة لأني متــأكــد أن بدراً أو غيره من المشرفين سيحذف ردي كالعادة ويصادر أفكاري ويجعل أكبر همه إرضاء القلم النسوي . حتى لو تمسخر حد الثمالة . فأنا لن أرد . آسف ياصاحب الموضوع وبايباي لندن

قانون أتمنى أشوف ردك ولا هنت ضروري ((((( مودتي القلبية لك )))))