[مُهـــــابة]

السلام عليكم ورحمة الله وبركاته

يؤسفني ان انثر امامكم اسباب الفشل الذي رئيناه في روضة واحات الإيمان في الأيام الماضية عامة وفي الحفل الختامي بشكل خاص .

بعد صبر دام عدة ايام ونحن بانتظار الحفل الختامي للروضة , وبعد وصول فرحة الأطفال المنتظرة ,
نرى مالم يكن في الحسبان ,

تفاجئنا باستقبال سيئ من الطاقم الإداري في الروضة
قوبلت الأمهات بنفس شينه ولم تكرم ولم تحترم
حتى الكراسي ماقدموها للأمهات تركوهن واقفات يتفرجن من بعيد
ولو اقتربت واحده منهن قوبلت ببعض الكلمات مثل ( اووففففف حررررر + عجزنا نسوي شغلنا منكم + روحو اجلسو بالغرفه هناك تراكم تعطلوننا عن شغلنا + ممنوع التصوير ترى اللي تبي تصور باخذ جوالها منها )
ياسبحان الله !!!!
الأمهات دافعات فلوس عشان ينهانن بالروضه !!
صحيح انهم لم يدعو الأمهات والحفل خاص بالأطفال فقط لكن لايمنع من احترام الضيوف القادمين ليرو فرحة ابنائهم في الروضة
صديقة لي ابنها في روضة من الروضات تقول انهم لم يستدعو الأمهات لكن لما حضرن الأمهات مع اطفالهم اكرموهم ادارة الروضة وجلسوهم على كراسي وضيفوهم وطلعوهم مبسوطين على الآخر
وهنا في روضة واحات الإيمان محجورات بغرفه صغيرة وعليهم عباياتهم وكل وحده ماسكة شي تهف فيه من الحر لأن الكهرب للأسف طفئ علينا اربع مرات وعفنا عيشتنا من الحر والفوضى , ومانعينهن من الوقفة من ابنائهن
هذا غير الاطفال اللي بالحضانة مالهم نصيب من التصوير والفرحة محجورين , وامهاتهم يتمنون شوفتة صور لهم, لاهم راحمينهم ولا مخلين رحمة الله تنزل ,
هذا اللي يتعلق بالأمهات واهانتهن من الطااقم الإداري ,, ووالله اني صادقة بكل كلمة قلتها ولا ياعساني مااتهنى بحياتي .
اما الحفل هذا شي ثاااني ,,,,,,,,,,,,,,,,,,,,,,,,,,,,
اتخيلو الأطفال جايين من الساعه سبعة ونصف وحاجرينهم بفصولهم ولا طفل يطلع واللي يطلع يهزؤونه شوف عيوني قسم بالله
ينزلون فصل فصل يصورونه ويعطونه هديه ويرقونه فورا لفصلة ويحجرونه مرة ثانية
اتخيلو اخر فصل نزل للتصوير الساعه عشر
من الساعه سبعة ونص الى الساعه عشر جالسين بفصولهم ينتظرون الحفل اللي يحسبون له ولا شافوه
وبمجرد مانزلو اخذو لهم كم صورة وكم فيديو مع بالونات ومخلينهم يضحكون ويناقزون اثناء التصوير
واللي يشوف الفيديو يقول وش هالحفل والوناسه والحقيقة تقول غير , اول ماتطفي الاشارة الحمراء للتصوير يرقونهم علطول لفصولهم ويحرمونهم من الفرحة بين الاطفال والامهات .
ساعتين ونص محجورين بالفصول وهم ينتظرون الحفل !!!!!!
وبعض الفصول يحسرون بهم وينزلونهم واذا نزلو وصفو طفى الكهرب بعدين يرقونهم من جديد
انواع الفوضى
تعبو الأطفال وماتو حر وضاقت صدورهم ينتظرون الحفل لكن الحقيقة انه مافيه حفل
فيه انهم طالبين من الاولاد يلبسون زي معين والبنات كذلك عشان التصوير فقط
وياليتهم بينزلون الصور هنا بالمنتدى كان تهون
بيحطونها بسيديات ويبيعونها .. وهذا يهون عند منع الادارة التصوير وهم يمسكون كم طفل من اللي يبونه بالواسطة ويصورونه بكل مكان وكم صورة مرة وهو معه بالونات ومرة وهو يضحك ومرة وهو معه شهادته والأمهات مقهورات يبون يصورون عيالهم وعاجزين من منع الإدارة

حاطين بوفيه الاطفال يناظرونه مايقدرون يقربون له .. ولما سمحو للجميع ياكلون اكتشفو ان كل الحلويات ذايبه من الحر الله يكرم النعمة وصارت مهزلة بالأخير

الحفل اللي ينتظرونه الاطفال مو حفل لهم ولفرحتهم , الحفل حقيقة هو حفل للروضة بتصوير الاطفال وبيع السيديات وعمل دعاية على حساب الأطفال

الاطفال رجعو للبيت تعبانين من الحجر والضغط
والأمهات رجعو للبيت يحملون اهانات من ادارة الروضة
القهر انها روضة اهلية والأهالي دافعين دم قلوبهم على اطفالهم عشان ينبسطون ولا ينهانون
وبالاخير ينهانون الأمهات على مرئى من أطفالهم
هذا غير التدريس والضعف بالأطفال ,
وغير حوسة الاطفال بالثيل بالحوش بعز الشمس الظهر , اذا فكرو يرفهون الطفل طلعوه بالشمس يلعب قسم بالله شي يقهر ويعور القلب , فصل من الفصول اعتقد انه فصل الثلاث والاربع سنوات مكانه بالحوش مو داخل الروضة,
والاطفال دايما يحوسون برا بالشمس والمعلمات تحت مكيفات السبيلت
المفروض اذا بيطلعونهم بالحوش يوفرون مظلات تحمي الاطفال من الشمس , مو يستاجرون مبنى بيت ويسرحون الاطفال بالشموس بدرجة حرارة تقارب الخمسين !!
انا سولفت مع الامهات يوم الحفل أو نقول يوم التصوير العالمي والكل مستاء ومتضايق من الاهانات اللي لاقوها من هالروضة والكل والله يقول لايمكن ابنائنا يكملون بهالروضة وهم يهانون قدام عيوننا
حنا دفعنا فلوس نبي اطفالنا يدللون مانبي يحسرون بهم
الروضات الثانية تشهد الكرم والنفس الطيبة والضيافة الراقية والصور في هذا المنتدى تشهد
وقريباتي يشهدن بذلك ايضا . واحدة منهن تقول والله اني اول مادخلت وحده اخذت عبايتي ووحده بتاخذ شنطتي وقلت لا خليها معي واسلوب راقي ويهلون ويرحبون
ويسوون لهم محاضرات ويستدعونهم دايما للتواصل مع اطفالهم
لكن مع روضة واحات الإيمان يقطعون صلتك بأبنائك اذا سالت عنهم جاوبوك واذا ماسألت تركوك هذا غير تلفونهم الثابت اللي يتكسر من الرن ولا احد يرد
وغير سحب الفلوس اللي كل كم يوم ساحبين منا مبلغ وقدره حتى الزي الرسمي للروضة حنا دافعين فلوسه مو مثل الروضات يكون مجانا

والله ثم والله ثم والله لو يجلسون ابناءنا بلا دراسة طول اعمارهم ماندخلهم روضة مثل هذه الروضه
لكن هي غلطة ومنها نتعلم

انا مانثرت سلبيات هذه الروضة الا اريد ان ترتقي هي وغيرها بمعالجة هذه السلبيات وتحويلها الا ايجابيات
لا نريد ان يطغى حب الكسب المادي على حب التعليم والإفادة
لأن هذا الشيء لا يرضي الله ولا يرضي الأهالي

كلنا أمل أن ترتقي الروضات وتكون احسن مما رأينا في هذه الروضه
ومن عنده استفسار او اعتراض يطرحه وانا بجاوبه بكل مصداقية
اجزل الشكر لهذا المنتدى الذي اتاح للجميع الفرصه بالنقاش والحوار ومعالجة الأخطاء بأي مكان كان

[فيزيائية]

ياأختي وينك عن روضة سرايا المعرفه
قمه في الأدب والذوق والتعامل
يحترمون الأمهات ويسوون برنامج الأم الزائره
كل أسبوع يستضيفون أم طفل تناقش مع الأطفال الوحده الأسبوعيه
سواء كانت عن الغذاء أو الماء أو النظافه وما إلى ذلك
الله يعينكم
ماتوقعت واحات الأيمان كذا
كنت ماخذه عنهم صوره حلوه

[مُهـــــابة]

اقتباس المشاركة الأساسية كتبها فيزيائية ياأختي وينك عن روضة سرايا المعرفه قمه في الأدب والذوق والتعامل يحترمون الأمهات ويسوون برنامج الأم الزائره كل أسبوع يستضيفون أم طفل تناقش مع الأطفال الوحده الأسبوعيه سواء كانت عن الغذاء أو الماء أو النظافه وما إلى ذلك الله يعينكم ماتوقعت واحات الأيمان كذا كنت ماخذه عنهم صوره حلوه

هلا فيزيائية
كلنا لم نعلم بالذي سيحصل من روضة واحات الإيمان من الإهمال للأطفال والفوضوية في العمل والترتيب والتعليم الأقل من ضعيف
كثير من قريباتي يمتدحن بعض الروضات وعلى رأسها روضة الإيمان اسأل الله ان يكلل مساعيهم بالنجاح والتوفيق
وبالنسبة لبرنامج سرايا المعرفة فهو برنامج ممتاز جدا يربط الأم بطفلها داخل الروضة وكأنه في بيته وبين والديه
لكن في روضة واحات الإيمان لم يضعو ولا اجتماع ولا ندوة ولا حفل ولا غيره ولم يجتمع الأطفال بأمهاتهم ولا مرة
ويوم جاء الحفل وفرحن الأمهات بالإجتماع لأول مرة مع اطفالهم رجعن الى بيوتهن مهانات متضايقات من منسوبات الروضة
والله لم ولن نرضى بهذه المهازل التي تحصل امام الجميع والكل ساكت وهو دافع رسوم قوية
من المفترض اذا كانت الروضة مبتدئة وفيها اخطاء فادحة كهذه الأخطاء ان لاتكون رسومها مرتفعه
لو واحات الإيمات اخذت رسوم خمس مائة ريال فقط لسكتنا وتحملنا مايحدث بحكم انها روضة جديدة
لكن رسوم غالية وفوضوية واهانات وتعليم ضعيف ومبنى ضيق وفصول قليلة لا والف لا
شاكرة لك مرورك وتعليقك

[صبرا غزة...]

غييير روضة الإيمان اللي بالنقع لا تدوروووووون فهي تستحق كل خيير ،،

وشاهدتم ذلك بالتغطية هنا وماتناله من المديح الدائم .

وولد أختي وبنت أختي فيهاا وفعلا تعلموا شيء مو سهل لطفل بهالعمر ،،

بالتوفيق لروضة داار الإيمان،،

وتقبلوا مروري،،،

[مُهـــــابة]

اقتباس المشاركة الأساسية كتبها صبرا غزة... غييير روضة الإيمان اللي بالنقع لا تدوروووووون فهي تستحق كل خيير ،، وشاهدتم ذلك بالتغطية هنا وماتناله من المديح الدائم . وولد أختي وبنت أختي فيهاا وفعلا تعلموا شيء مو سهل لطفل بهالعمر ،، بالتوفيق لروضة داار الإيمان،، وتقبلوا مروري،،،

اهلا بك
صدقت .. والله ان روضة الإيمان تستحق كل خير عسى الله ان يوفقهم ويكون في عونهم ويرزقهم
والتغطيات الموجودة هنا بالمنتدى تشهد على ترتيبهم وتعبهم وكرمهم وحبهم لأطفالهم وحرصهم عليهم واكرامهم لضيفهم
من نجاح لنجاح ياروضة الايمان
وتمنياتنا لروضة واحات الايمان وجميع الروضات ان ترتقي وتتقدم للأفضل
شاكرة لك مرورك

[رحيق الوردة]

معليش ابي اصير صريحة ليش تروحون بدون دعوه؟طفيلين انتم؟ماعزموكم هم ابخص.. لابعد تصورن!!
بعدين انا مااعرف هذه الروضه الا من خلال هذا المنتدى باين انه خرطي ماغير تصوير اتوقع مافيه وقت لتعليم الاطفال رحلات و.....
روضة دار البيان روعة من ناحية التعليم

[مُهـــــابة]

اقتباس المشاركة الأساسية كتبها رحيق الوردة معليش ابي اصير صريحة ليش تروحون بدون دعوه؟طفيلين انتم؟ماعزموكم هم ابخص.. لابعد تصورن!! بعدين انا مااعرف هذه الروضه الا من خلال هذا المنتدى باين انه خرطي ماغير تصوير اتوقع مافيه وقت لتعليم الاطفال رحلات و..... روضة دار البيان روعة من ناحية التعليم

اهلا وسهلا اختي رحيق الورد
انا لااريد الا الصراحة والمصداقية هنا سواء كنت معي او ضدي
رحيق الورد .. روضة تدرس اطفال ترم كامل ولا تدعو امهات طلابها ولا مرة .. هل ترينها معقولة !!!
ترم كاامل يدرسون ولا فكرو الروضة يضعون اجتماع واحد فقط لأمهات الأطفال لكي تتواصل المعلمة مع ام الطفل وتكون أقرب للطفل من خلال امه !
من اول يوم سجلت الامهات فيه الاطفال لم تخطو قدمها للروضة ولا مرة وتعتبون عليها اذا ذهبت في يوم حفل ابنها !!!!!
ولو ذهبت اثناء الترم سترى من الاهانات مارأته في يوم الحفل المشهود بالمضايقات
روضات كثيرة لم تضع دعوة للأمهات لكن بمجرد دخول الأمهات مع اطفالها رحبو بهم وجلسوهم وضيفوهم وعاملوهم احسن معاملة ,, لماذا لاتكون روضة واحات الايمان بهذه الأخلاق !!!
هذا وهي اهلية وليست حكومية بعد !
انتي قلتي انها روضة تصوير فقط وكلامك عين الصواب
كل الحفل تصوير , واللي يشوف الصور يقول انه حفل معتبر وهو كلله حر واهانات وضيق وشينة نفس
الله يعوضنا خير في روضات اخرى تحترم الأم وتحنو على الطفل وتحرص على التعليم
شاكرة لك مرورك

[عبد العزيز الرجيعي]

هههههههههههههههههههه اجل طفيلليين دار العلوم مسوين الحفل بالرصافه مشاء الله وفله و بوفيه وشغل اجل انتم مكرتنينكم ايييييه يابنت الحلال ادعي ربتس انهم يزينون ههههههههههههههههههههههههههههههههههههههههههه
ولد اختي بروضة الايمان ذي اللي تقولين ماغير عطوه تفيخه وتفلو بوجهه بس مير اخذ فلوس وعلى الفاضي

[مُهـــــابة]

اقتباس المشاركة الأساسية كتبها عبد العزيز الرجيعي هههههههههههههههههههه اجل طفيلليين دار العلوم مسوين الحفل بالرصافه مشاء الله وفله و بوفيه وشغل اجل انتم مكرتنينكم ايييييه يابنت الحلال ادعي ربتس انهم يزينون ههههههههههههههههههههههههههههههههههههههههههه ولد اختي بروضة الايمان ذي اللي تقولين ماغير عطوه تفيخه وتفلو بوجهه بس مير اخذ فلوس وعلى الفاضي

اهلا اخوي عبد العزيز
نحن لم نطلب من الروضة المستحيل
فقط نريد ابتسامة في وجه اطفالنا
ونريد احترام للأم التي اختارتهم ليكونو أم اخرى لأبنها
لانريد حفلات بقاعة الرصافة
ولا نريد بوفيهات تكلفهم وهم في بداية مشووارهم
كل مانطلبه هو حق لنا لا اسراف فيه

[هشاآآم]

روضة الإيمان قامت بعمل جبار وابدعت في الحفل
وعلى فكرة هم سووا ثلاثة أيام أحتفالات حفل للأطفال وحفل للأمهات وحفل للأباء
وحفل خاص لمنسوبي الروضة
شكلك دلوعة انتي ماتحبي الحر صح ؟؟
نشكر القائمين على روضة دار الإيمان كل الشكر والتقدير
<< ولي امر طالب

[مُهـــــابة]

اقتباس المشاركة الأساسية كتبها هشاآآم روضة الإيمان قامت بعمل جبار وابدعت في الحفل وعلى فكرة هم سووا ثلاثة أيام أحتفالات حفل للأطفال وحفل للأمهات وحفل للأباء وحفل خاص لمنسوبي الروضة شكلك دلوعة انتي ماتحبي الحر صح ؟؟ نشكر القائمين على روضة دار الإيمان كل الشكر والتقدير << ولي امر طالب

اهلا وسهلا
ليس لأني دلوعة لا والله لكن الأجواء مع انقطاع الكهرب المستمر ومع درجة الحرارة العالية ومع صغر المكان وازدحامة بالأطفال والمنسوبي والأمهات صارت الأجواء لاتطاق

روضـــــة الايمان !!!!!!!!!!
هم فعلا يستحقون الشكر
لهم مني ومن الأطفال والأمهات وأولياء الأمور اجمع كل الشكر والدعوات القلبية الصادقة على مابذلوه في سبيل انجاح اعمالهم التربوية والعلمية

[بنت الكرام]

بصراحة رضا الناس غاية لا تدرك
أعرف من تمدح واحات الإيمان وأعرف من تسبها
وأعرف من تمدح دار الإيمان وأعرف من تسبها

والحقيقة أن ذهابكم من غير دعوة خطأ أنتم تتحملون مسؤوليته وفوضويته.

[مُهـــــابة]

اقتباس المشاركة الأساسية كتبها بنت الكرام بصراحة رضا الناس غاية لا تدرك أعرف من تمدح واحات الإيمان وأعرف من تسبها وأعرف من تمدح دار الإيمان وأعرف من تسبها والحقيقة أن ذهابكم من غير دعوة خطأ أنتم تتحملون مسؤوليته وفوضويته.

اهلا بك
انا الى هذه الساعة لم أرى من تمتدح هذه الروضة
حتى في يوم الغحتفال كان الحضور مستاء جدا من الوضع
لكن لايلدغ المؤمن من جحر مرتين
وذهابنا كان ضروري لنرى لأول وآخر مرة الروضة التي قضى ابناؤنا اغلب وقتهم فيها
شكرا لك

[ام الكتكوت]

بعذرهم يحطووون البزران بالشمس العدد كثيييييييير والمبنى صغييير

اصلا انا من يوم شفت مبناهم والضييييق الي فيه هجيييت ودخلت بنتي روضه ثااانيه