[مدحت شوقي بريده]

السلام عليكم ..

حيالله شباب واعضاء وعضوات بريدة ستي ..
ياربيه وش هالحر يادافع البلى ..
مسائكم ( حر ) معطر برائحة ( .. ) .. يعني حر وش تبون تحسون بوه ..


تعرفون هالايام درجات الحرارة نازلة .. والكهرب مايطفئ ابد ..
وفي هذة الاجواء الجميلة الرائعة ..

دخلت على جدتي موضي ولقيته متوسدة ثلجة من قوة الحر ..
واول ماشافتن مقبلن عليه .. قالت لي .. تعال شف هذي ثلجة ..
لاتقعد تشوف هالمياهه تحتي تحسبن مسوية شي ..
ماغير والله ذبحنا هالحر ..


تصدق ياوليدي إني أشرب الماء البارد وإنه على طول يطلع ( عرق ) باااااارد ..
مايمديه يآخذ دورة بالجسم .. الا هو مسرسب عرق ..

ياوليدي الله أعلم أن المثانه يابسة ماله علم بالمياه ..كل السوايل يطلعن عرق ..
مير أغدينا بالصيف نمدد له ونوصله بالمعده ونستفيد منه بدال جلسته فاضيه ..


بعدين ياوليدي لاتحسب إن الحر بس عندكم هالاياااااااااااام ..
حتى حنا اول .. جانا ( حر ) اللهم ياكافي ..


أنا ماأنسى يوم عرسي ..
جدك سليمان جاي ياخذن وماعليه إلا فانيلة علاقي وسروال سنة من شدة الحر ..

ويدخل علي ورجلينه وسيقانه طين ..
ياويلي وهو يمشي بالطريق غبرات و رجليه يلثقن عرق .. ( وطينن ) ..

يوم شفته واقوم اركض بسرعة .. قلت لوه وش بك فرقعين جدي .. منين هالطين ..
ويناظرن وهو يستحي .. وهي هاك المرة اللي استحى به بس ..
واقوم وأغطس سيقانه بالزير .. ويوم حس بالبراد ويصلق كلوه وسط الزير ..
وابلش بوه هاك اليوم وشلون اطلعه من الزير .. ماطلع غير شوشتوه ..


وانا كاشخة لابستن لوه هاك المقطع ( الزم ) .. خضر بوه وريدات حمر ..
وحاطة ( بكلة ) متسلفته من حدا بنات الديرة ..

عااااااااااد من تلبس بكلة هاك الأيام ..
مايلبسه الا بنات التجار اللي عندهم بقرتين فأكثر ..
وحمارين واكثر .. واحد للحراثة والثاني للنقل .. والثالث للتمشي ونقل العفش ..



ياوليدي أحمدو ربكم .. أنتم عندكم مكيفات وإسبيلتات ..
ونوم بهالنهاااااااااار وسعسقة بالليل اذا برد الجو ..

الغرفة مكيفة .. والصالة مكيفه .. والسيارة مكيفة .. والمسجد مكيف ..


حنا اللي اذا جانا الحر منول .. هلكنا .. نموت مووووووت ..
ماعندنا إلا مهفات الخوص .. وتقضي كله بإثم جدك سليمان ..
كل يوم كاسرن منه عود يتنقش بوه ..


وهذا كله هاللي جانا .. وشو عند حرارة جهنم .. الله يكفينا واياكم شره ..
حرارة الجو .. ماقدرنا نتحمله .. كيف اجل بنار جهنم ..
والا ظلمة القبر ووحشته وضيقه وحشرته ..
البيت كامل بحجرة الوسيعة ماتتحمله من شدة الحر .. فكيف بقبر مترين في نص متر ..


مااقول الا الله يرحمنا برحمته بس ..



سي يو ..

[رفيــع الشانــ]

مدحت شكلك جدتك فيها تنسم وإلا الماء على طول يطلع
الله يحفظ جدتك ويطول بعمرها

أكيد الأولين كانوا يعانون من الحر والبرد
لكن هم ما تعود على الرفاهية مثل الآن فيه مكفيات بالحر وتدفئه بالشتاء
وبعد الحر كل سنة يزود عن السنة الى فاتت يقولون طبقة الأوزون كل سنة توسع ويزيد الحر <<< طبعاً كلام العلماء مو كلامي

سي يو بنكهة مدحت شوقي

[مدحت شوقي بريده]

اقتباس المشاركة الأساسية كتبها رفيــع الشانــ مدحت شكلك جدتك فيها تنسم وإلا الماء على طول يطلع الله يحفظ جدتك ويطول بعمرها أكيد الأولين كانوا يعانون من الحر والبرد لكن هم ما تعود على الرفاهية مثل الآن فيه مكفيات بالحر وتدفئه بالشتاء وبعد الحر كل سنة يزود عن السنة الى فاتت يقولون طبقة الأوزون كل سنة توسع ويزيد الحر <<< طبعاً كلام العلماء مو كلامي سي يو بنكهة مدحت شوقي

رفيع الشأن ..


صباحك فل وعبي يامتغبي ..

يابعدي انت .. جدتي مابه تنسيم وبس .. من كثر المناسم غاديتن تقول منخل ..
منخل والا من كتشب .. <<((== اولاه انثبر بس لاتقعد اتميلح علينا ..



يابعدي انت الحر بكل وقت وكل مكان وزمان ..
وزمانهم رااااااااح يابعدي .. قزروه بتربيص الخياش ورش جدران الطين ..



ومشكور يابعد معاليق فروة شعر ركبتي ..



سي يو ..

[ْْْXXXراكب بورشXXX]

هههههههههههه ياحبيلتس يامويضي وويزين سويلفاتس.......
ماشاء الله ياحظ مدحت كل النهار وهو عندتس ياسعده بتس ............


مدحت اهنئك بوجود جدة لك تسمعك احلى الحكايا الجميله وانت منصت لها بإهتمام ثم لاتلبث الا قليلا وتذهب في نوم عميق

لك شكري وتقديري وتقبل مروري

[هاوي الربع]

اقتباس المشاركة الأساسية كتبها ْْْXXXراكب بورشXXX هههههههههههه ياحبيلتس يامويضي وويزين سويلفاتس....... ماشاء الله ياحظ مدحت كل النهار وهو عندتس ياسعده بتس ............ مدحت اهنئك بوجود جدة لك تسمعك احلى الحكايا الجميله وانت منصت لها بإهتمام ثم لاتلبث الا قليلا وتذهب في نوم عميق لك شكري وتقديري وتقبل مروري

نفس الرد

تقبل مروووري يالغلآآآآآآ

[مدحت شوقي بريده]

اقتباس المشاركة الأساسية كتبها ْْْxxxراكب بورشxxx هههههههههههه ياحبيلتس يامويضي وويزين سويلفاتس....... ماشاء الله ياحظ مدحت كل النهار وهو عندتس ياسعده بتس ............ مدحت اهنئك بوجود جدة لك تسمعك احلى الحكايا الجميله وانت منصت لها بإهتمام ثم لاتلبث الا قليلا وتذهب في نوم عميق لك شكري وتقديري وتقبل مروري

راكب بورش ..


يابعدي اشوف قاعدن تدلع جدتي ..
اويليه بس لو يسمعك جدي سليمان ..

والله ان يمكع حواجبك تمكيع ..
لأنه يغااااااااااااار عليه ..
المشكلة انه ازين منه .. لولا انه عور وخشمه قنزة تقول عبسة زيتون اخضر ..


راكب بورش .. شكراً لك عى مرورك الكريم ..



سي يو ..

[شفق]

الصراحة مهيب حلوة عندكم مكيفات وسبيليتات والجدة موضي بنت العز وزوجة سليمان توسّد ثلجة

صدقت يا أخي الله المستعان ويجزاك ربي خير على التذكير فقد جاء في صحيح البخاري عن النبي
‏
صلى الله عليه وسلم ‏أنه قال:{‏اشتكت النار إلى ربها فقالت رب أكل بعضي بعضا فأذن لها بنفسين

نفس في الشتاء ونفس في الصيف فأشد ما تجدون من الحر وأشد ما تجدون من ‏ ‏الزمهرير}.

[مدحت شوقي بريده]

اقتباس المشاركة الأساسية كتبها شفق الصراحة مهيب حلوة عندكم مكيفات وسبيليتات والجدة موضي بنت العز وزوجة سليمان توسّد ثلجة صدقت يا أخي الله المستعان ويجزاك ربي خير على التذكير فقد جاء في صحيح البخاري عن النبي ‏ صلى الله عليه وسلم ‏أنه قال:{‏اشتكت النار إلى ربها فقالت رب أكل بعضي بعضا فأذن لها بنفسين نفس في الشتاء ونفس في الصيف فأشد ما تجدون من الحر وأشد ما تجدون من ‏ ‏الزمهرير}.

شفق ..


يابعدي انت .. لو تشوفه وشلون رابطتن هالثلاجة بجدايلة ..
تقول علشان ماأحد يمعطه من حدري ..
ماتدري انه تبي تموع .. همن يلزق صابره بالبلاط ..




شفق ..

صدقت ورب محمد ..
ونسئل الله ان ينجينا وإياكم من عذاب جهنم ..

حرارة لم نستطع مقاومتها وآذتنا أيما إيذا ..
وهي لاتساوي الا نفساً منها ..
نسئل الله السلامة ..



وشكراً لك وسلم يراعك ..




سي يو ..

[الـصـمـصـام]

الله يرحمنا برحمته ..
مشكور .. فاقدينك والله يابو إبراهيم ..

[مدحت شوقي بريده]

اقتباس المشاركة الأساسية كتبها الـصـمـصـام الله يرحمنا برحمته .. مشكور .. فاقدينك والله يابو إبراهيم ..

الصمصام ..


مرحباً بك إستاذ عبدالله ..
وماتفقد عزيزي ولا غالي يالغالي ..


وشكراً لك على حضورك الكريم ..



سي يو ..

[أتعبني طموحي]

..


قال رسول الله صلى الله عليه وسلّم :
( مَايُصِيْب الْمُسْلِم مَن نَصَب وَلِاوَصَب وَلَاهَم وَلَاحَزَن وَلَا اذِى
وَلَاغَم حَتَّى الْشَّوْكَه يُشَاكُهَا الَا كَفَّر الْلَّه بِهَا خَطَايَاه )
بإّذن الله مأجورين في تحمّل مثل هذه الأجواء ,,

وإن شدة الحر من فيح جهنم كما أخبرنا نبينا محمد صلى الله عليه وسلم
أسأل الله أن يعيذنا منها برحمته ,,


وفقكم الله وبارك فيكم ,,




..

[مدحت شوقي بريده]

اقتباس المشاركة الأساسية كتبها أتعبني طموحي .. قال رسول الله صلى الله عليه وسلّم : ( مَايُصِيْب الْمُسْلِم مَن نَصَب وَلِاوَصَب وَلَاهَم وَلَاحَزَن وَلَا اذِى وَلَاغَم حَتَّى الْشَّوْكَه يُشَاكُهَا الَا كَفَّر الْلَّه بِهَا خَطَايَاه ) بإّذن الله مأجورين في تحمّل مثل هذه الأجواء ,, وإن شدة الحر من فيح جهنم كما أخبرنا نبينا محمد صلى الله عليه وسلم أسأل الله أن يعيذنا منها برحمته ,, وفقكم الله وبارك فيكم ,, ..

اتعبها طموحه ..

صدقتي ورب محمد .. الصبر والاحتساب هما فقط سلاحنا لمواجهة هذة الأجواء ..


حضورك وسام .. فشكراً لكي ..



سي يو ..

[Chocalain]

الله يكفينا من حرارة جهنم
ويجعل ما اصابنا تكفير لذنوبنا

[بدر بن عبدالله]

رائع حبيبنا أبو إبراهيم ، وصدقت ( قل نار جهنم أشد حراً لو كانوا يعلمون ) اأسأل الله أن ينجينا منها
و أسأل الله أن يرحمنا برحمته وأن يلطف بنا ، اللهم آمين.

شاكر لك أبا إبراهيم هذا الطرح الجميل، ونتمنى أن نراك قريباً.