|
|
|
|
08-04-2011, 05:23 AM | #1 |
فاصبر إنّ العاقبة للمتقين
تاريخ التسجيل: Nov 2009
البلد: . . تَحتَ ظِلّ رَحمةِ الله !
المشاركات: 5,426
|
خربشآآت × موآآقف × زنقآت × متخرمات × تطعيس ذذ ~
السّـلام عليكم ورحمة الله ,,..
__________________
. •
إنّ هٓذهِ الأمّة وإنْ استُركِعت .. فإنّ ظَهرهَا لنْ ينكَسِر ! والعَاقبة للمتّقين ، وسيرَى المُنافقِينْ هذا بأمّ أعينهـم العَورَاء . • آخر من قام بالتعديل • إنِدثـار~; بتاريخ 08-04-2011 الساعة 05:43 AM. |
08-04-2011, 05:24 AM | #2 |
فاصبر إنّ العاقبة للمتقين
تاريخ التسجيل: Nov 2009
البلد: . . تَحتَ ظِلّ رَحمةِ الله !
المشاركات: 5,426
|
[1] :: إحـــــــراج :: ! أذكر حدى النوبات بالشتاآء طآلعين باستراحة , يوم جزم علينا البرد الساعة 11 بالليل تقريباً .. هالحريم كل وحده بدت تدور أحد يجي يآخذه , واللي ماشاء الله بتنلفز بسيارة فلآن, واللي بتروح مع العلاّن على دربهم المهم قالوا بنروح مع ولد عمتي .. وآآوك فشيلة ولااااااا... اعتراض.... ومالي خلق.... واستحي..... مبطي ماشفته --> من الهدآرة ذذ طبعاً هالحريم لا دبّرن وعبّرن اكود تنلطسين مالتس كلمة : ( .. جزموا وطلعنا بالشارع وحنا 5 حريم .. وش نشوف ودآفع البلآء كآمري ..! يآحـلآلي هذي لو نركبه عزّ الله انفقع الكفر ولا بتدقّر المكينه وهالحريم عسآهن منب قآيلة للدمّل .. :/ لا أبد مهنآ ضييق وسآآع ماشاء الله .. وأنا اللي رجلي رآبضتن عليه حدآ هالهرّات ورجلي الثّـانية مدري وينه .. ويافلانة وطيتي عبآتي عسآك للعمى قومي .. ودوكم شنطتي خلون أركب ..,.افحزوا لي مالي محل نصي طايح .. الحقيقة يوم ركبنا شوي وتشنقل الكآمري .. حتّى وسفابه جديدة , حسيت أن رآعيّة شرشح أبو اللي جمعنا .. عآد الفششششيلة صدز وشي ؟؟ طلع اللي ركبنا معه .. مب ولد عمتي .. ولا ولد خالتي .. طلع ولـد مرت جيرآن عمتي منول ! ياخال عم جدي حك ظهر أبوي .. ! عمتي جآيبتن مرت جيرآنهم منووووول .. ووسيعات الوجه ركبن معه بيمرمر بهن على بيوتهن .. والله ياأنا أنفقع طبلوووني . جآحدآت عنّ علشان ما أعيّي ..! عاد مابه فايده ركبنـا ,, طبعاً قصيت لكم مأسآة الزحمة وكل وحدة بحجر الثّآنية والخد لآزقن بالدريشة ... ماتشوفين ألا عبآيآت وعيون .. عــاد أختكم في الله لا صارت بزحمة تمسك معي ضحححك .. أبدأ بس أكركر .. اسم الله علي وعليكم الناس بلشه بروحه وووه افتحوا الدرايش كتمة . وـأنا أضحك ضحك مب صاحي تخيلي بس الموقف .. وآحد ماتعرفينه , وكبير شوي يعني مب جذع على قولتهم , وأنتِ ماسكته ضحك .. أبسكت .. عجزت .. بكتمه .. تطلع بصوت غبي .. قلت مالي ألا أخلي هالضحكة تنفقع وأفتكّ .. والله أني نزلت وبسّ أعضّض اصابعي من الفشيلة . هالضحكة مب بيدي |! [2] ولكلّ عجوز ناديها المُفضّل :/ كنا مجتمعين عند خالتي بالرياض , البنات بيجلسون بالبيت استهبال وفلة والحريّم بيطلع لزواج , عاد مهنا حريم , كم عجوز إن شاء الله وكم مره .. عاد قالت حدآ العجيّزات تعني اللي جنبه واللي كانت لا بسة ثوب زيتي: قالت ياحليلتس ثوبتس نصر ! وتجيكم أميمتي بآزعة تقول لاااا الله يهديكن وش نصره هلااال ذا هلااال .. وتقول اللي أكمخ وأكمخ : هاه ؟ .. مب ذآ إتّحـاد أجل ؟ ..ألا إتّحـاد هجّت بهن المتعصّبات , بغيت أنذر أنا أنّ اللي عليه وحدااوي [3] :: وعملٌ دام 20 سَنــــــــة ! :: تقول أميمتي سلّمت مرّه على وحده ماشفته من قبل 20 سنة ! فرررحت به وهلينا ورحبّنا ووشلونكم يافلانة بشرينا عنك , وو.. قالت أمي : تصدقين ياأم ناصر ماشفتتس من يوم تدخلين علي يوم أحمس القهوة ! قالت أم ناصر ذي :/ عاد بشري عساه قضت القهوة . ؟ * إبرآء للذمة :/ أم ناصر اسم من عندي لأني ماأعرف المره ذي ض1 . [4] تسمع بالمعيدي خير من أن تراه ..! تسولف علي وحده من رفيقاتي ., في ماترويه عن أخوه :/ أنّه له صلة بواحد عن طريق الجوال بس , ماأدري وش جابه ووشلون , على ماأعتقد أن الرجل شوي معروف مثل لو أقولكم شيخ أوصـاحب حلقة .. المهم أنه تواصل مع أخو رفيقتي بالجوال واتفقوا أنهم يتلاقون ,, عاد سلم عليه الولد بحرارة وحبّ راسه ووخري عنه أنوآع الذرابة قال من زود الحماس :/ تسمع بالمعيدي خير من أن تراه يقول أحسبه مثل زين بمعنى يالله من فضلك يوم شفتك هههههههههههههههههههههههههههههههههههههههههههههههههه هههههههههههههههههههه [5] |..وانخطف البصر فجأة ! | حدى المرات وآحد من أخواني يتلبّس .. يقول فصخت الثّوب وأنا أرفعه على فوق " بحيث أنه يغطي وجهه " انصكّ الكهرب فجأة ..! أخيي يوم وخّر الثوب وش يشووووف ! ظلاااااااام مايشوف شيء أمر ينهبل يقول أحسبي انعميت وهواااااااااا على غرفة امي وهو يناقز :/ ماأشوف شيء ماأشوف شيء ..-> امر تنهبل أمي وش اللي جـاء الولد :/ ايه اسم الله عليك كلنا ماانشوف الكهرب طفى :- ابررررده الله بالعافية آخر من قام بالتعديل • إنِدثـار~; بتاريخ 08-04-2011 الساعة 05:44 AM. السبب: مالي خلق تجين رسالة من الإشراف ذذ |
26-06-2011, 01:50 AM | #3 | |||||||||||||||||||||||
عـضـو
تاريخ التسجيل: Feb 2010
البلد: بريدة
المشاركات: 1,706
|
ههههههههههههههههههههههههههههههههههههههههه:073 : والله يآآآآآآآآآآآآآآآآهو موقـــــف أنوآآآآآآآآآآآآآع الرعب يآآآآآآآآآآآآآحبي لك اندثآآآآآر كثثثثثثثثثثثثثثثثري من هالمواقف الي تفتح النفس
__________________
[FLASH="http://dc15.arabsh.com/i/02203/u5ciodmj92dn.swf"]width=400 height=300 t=0[/FLASH] |
|||||||||||||||||||||||
08-04-2011, 05:25 AM | #4 |
فاصبر إنّ العاقبة للمتقين
تاريخ التسجيل: Nov 2009
البلد: . . تَحتَ ظِلّ رَحمةِ الله !
المشاركات: 5,426
|
[6]
:: مــأزق :: ! أحياناً الواحد يواجه بلشة أعوذ بالله بس , ينشّف ريقه ودمّه ويبدى تقل يناقز من شين التفكير .. =( شوفوا عاد التدابير تختلف من شخص لثآني .. أذكر لكم كم ورطة امسكوهن على السريع ) - وحده من قريباتي جاء لمّه ناس بيفطرون بالرمضان.. مدري رجال أو حريم .. المهم أنّه مادريت ألا مصيفه وأنوآآآآآع العجلة حتى ماعنده شيء مفرزن .. " جاهز بالفريز " اي وتسوي لكم ذاك الحلا .. وتكشن كشنه وتسوي ذيك الحشوة اللي يحبه قلبك .. وركض ررركض .. تسوّي صوص شوكلاته للحلآ وتحركة بسرررعة بسررعة وكببته على الطبق .. و................. .. .. لااااااااااااااااااااااااااااااااااااااااااااااااا ااااااااااااااااااااااااااااااا .. .. كبّته على الحششششوة ! يااربيييييه كل شيء خرب علييييه , لا حلآ ولآ حشوة .. قممة المأسآة ..! ,,, وفي موقف مشابه وحده من قريباتي تقول :/ كلموا أحد القرايب قالوا بنفطر عندكم اليوم " .. تقول أنا ذآك اليوم ماطرت لي أسوي شيء أبد امر انهبببل وأبدأ أفحط يوم دريت , ولا بقي على الأذّان شيء .. يعني كذا باقي ساعتين ..! وأعجن أكالعجينه وأخليه تخمر وأروح أزين حدى الحاجات وشكلي طولت ونسيت العجينة أومر تجبزّ " خمرت فوق اللآزم وقسست " تقول ضآآآع وجهي ماحطيت شيء مع الفطور ألا الظاهر شوربة .. ! :: ومرّه بعد أحد قريباتي دقّت على حمولته وقالت لهم يجون لمّه ولعلّهم اعتذروا .. تقول الحمد لله الي اعتذروا .. عيالي صخنوا والدروس منكبات على الأرض .. وغسيلي حوسه وشكلنا يجيب المرررض ! المهم يوم راح الووقت دقّت حماته وقالت افتحوا لنا حنا واقفين عند الباب !!! ماشاء الله عليه هالذهينة على طولت صرفتهم قالت : بس أنتم اعتذرتوا وأنا خلاص ارتبطت ومنب موجودة ! -> تقول ايه قالوا على خير أجل .. خيره بغيره .. تقول أول ماسكرت منهم على طول دقيت على رجلي أخاف يحوس تسذبتي .. وأعلمه بالسالفة ماشاء الله طلعت حكيمة ولو أنّه كذبت الله يتوب عليه , [7] ::ضفَــادع :: ! يوم حنّا على قولتهم قعر .. بثاني وثالث ابتدائي .. وأكبرنا وخري عنه برآبع .. كنا مسافرين مع خالاتي لمكّة وكاشتين بمزدلفة الله لآيبلآنا ماأدري من وين لنـــا ضفـادع ! ضفادع ببر ! .. عآد يجونكم عاللي يضربون شوطين بالتفكير بيحلّلون ترآب مزدلفة يمكن تطلع منول بحيرة بس جفّت مالكن بالطويلة وكل وآحد منّا مسك له كم ضفدع .. الله يحوم تسبودنا أنوآع اللي رطبات وووع .. بس يالله .. وونطلق لدورة ميآه الرجال , أنوآآآع الشتآآآرة وندخل تقل جآيين بنهآوش .. ركض وهيصة وأنوآع البزعآت , عآد يقالنا رحومين بنحط الضفادع في مكان آمن .. توقعون وين حطيناهن ؟ بالمراحيض ! " وانتم بكرااامة " لا .. بالمغاسل ..! لا .. بالحمامات ! " وانتم بكرااامة " لا .. جيناكم ولآقين لنا ماصورة منكسرة وتعال عاد ياتلفيييز وترعيص بالموسكينآت وآثر وآحد أبو كرشه عيّى لا يدخل هالتّفخ .. ونحرحربه , ومنا مناك .. مآآآآآش مابه فآيدة , المهم طلع لنا رجل من أحد الحمامات طويل وسميّة ماشاء الله ,, قال يقاله أخلآق : وش تسسون هنا ياصغيرين ؟ قالت بنت خالتي : معنا ضفادع بندخلهن ومير تنقز أشطنا وتقول :/ ايه بس هذا دبّ مثلك عجز يدخل --> أحلف أنّه هجّ لكوكب مابه بزرآن عقب هالتحطييييمة ! [8] وانقلب السّحـر على السّـاحر ..! يذكرون أن وحدهـ بتروح لزوآج أخوهآ مدري أحد القرآيب , الزبدة جتكم وجآبت هوستوب ذآك اللي ينوّم .. بتحقنه عياله القعوس وتبدأ تذوق وتقول : الله شششف طعمه يجنن .. وتشربهم وتذوق شوي وهم شوي علشان يشربون .. اييييه المهم جت سدّحتهم وانسدحت معهم يقالهم بينآمون .. .. .. .. .. .. .. .. لعلّها أخذت غفوة قصيرة غير مقصـودة .. .. يوم تنبّهت شآفت السآعة 1 ليلاً .. ~~ وهذي وحده بتحضر زواج أخوهآ , ومجهزة الفستان من زمان من زود الحمآس .. يوم صتر حول أذآن العشاء وتدق على أهله وتقول ايه خلاص تعالوا خذون بعد الصلاة جت وتولّمـت وحطت الميك أب .. وزينت شعره وتجهززززت بالكآمل , بس إذا جت تمشي بتلبس الفستآن , يوم قرب الموعد جت ولبست فستآنه .. .. .. .. .. .. .. .. يآآولد .. يآآهووووووه ياعدل يابدل .... الفسآن عيّآ لآيدخل .. يمين يسآآآآآآآآر .. مآآش نششششب ولا فيه أمل ولا خديجة يدخل ! وتدقّ على أميمته يآحيآتي هي وتقول منب حآضرة ! + السالفة قديمة شوي يمكن مافيه شيء اسمه جآهز ولا شيء ! [ 9 ] :: حَبـل الكذب قَصِيــــر :: أحد الأخوآت جت لم زوجه وقالت له : أن خالتي عآزمتنآ أنا وأهلي وملززمة علي بالحيييل وأن العزيمة مهممممة تكفى ماأقدر أخليهم بالحيل ملزمين و... وبدت تفقّش عليه وهو ياحّول وآفق .. ويمكن مآرآح يعيّي لو هي قايلة ودي بس أروح لهم .. طنّت لي .. بس سبحان الله البهارات تشتغل ذذ المهم طبعاً هي مانسقت مع خالته ولا ششششيء جت وزهبت ورآحت لهم , يوم طقت الباب فتحت له بنتهم المتزوجة .. وهذي البنت متزاعلة مع زوجه شهر , وترآضوا وبيرجع له الليلة ! وأهله طالعين " معزومين " .. يعني هالملقوفة يابعدي رآحت ولا حصلت أحد ألا هالبنت ..! قالت بنت خالته خلاص أجل بقول لرجلي يجي يآخذن يوم ثآني قالت ذيك ولنرمز لها بالرمز ط.س = طس .. قالت : لا أبد حلفت وش يآخزيآه كل هالمدة وأجي أنا أخرب عليكم لا أبد روحي أولمي بس ,أنا بنسدح على الكنب بآخذ غفوة .. .. رآح الوقت ومشى .. وط.س لحاله تناظر الغمآ .. ولا تقدر تدقّ على رجله يكشف كذبته , فـ اضطرت تنتظر لين تجي الساعة 12 .. ومن المغرب وهي ترص.. ترصّ .. ترصّ ..يوم صآرت 12 وجآء رررجله ووه يآفرج المكروووبين .. لبست العبآة وهي وآقفة عند عتبت الشارع دخلت راسه للحوش وقالت : بمآن الله كلــــــــــــــــكم .. --> هالخبيثة بتموّه لرجله إيقاله الحوش مليآن .. يوم صكت الباب ويجي وينصكّ على عبااااااااااته .. يالهووووي ! جرجرت العبآة يمين يسآر .. هآآه .. مآش الصكّة هي الصكّة .. طيب طقي الجرس .. أتصلي عليهم ..! ايييييه اكتشف الرجل أنه لآعبه عليه , وخسّ بالإهآآنة وجرح له هالخديعه ! النتيجة = سيدآآآآآآ على بيت أهلهآ ! =( [ 10 ] :: ثــرثـــآر :: ! يقولكن سلمكن الله هذولا اثنين .. يسآفرون جميع .. يطلعون جميع .. ومايفارقون بعض .. بس أنهم مايتكلمووون أبد أبد .. كل وقتهم صآمت ! يلبقون على الطريق .. يسوون قهوة .. يتقهوون .. يسوون عشاء .. ينآمون .. وهم صآآآآآآآآمت ! طبعاً ماتخاووا ألا علشانهم موآفقين لبعض .. المهم حدآهم بيسوي العشآء .. وجلس يدور الملح .. يدور يدور .. العزبة .. السيارة .. يمين .. يسار .. مآآآش مالقاه .. التفت على خويّه وسأله : فلان وين الملح .. قال الثاني : / أووه ماأكثر قرقك شفه هناك ! هذا لو يقعد جنبي ساعتين بس أن يموت .. بس شهيد شهيد بإذن الله عاد أختم لكم لحلى عشاء بعض الأسماء تحرّف على لسـان البزوره .. فتطلع عوووجآء قوة وتفقعين من الضحك .. مثال :/ أخوي كان بيقول ابتسام فعجز يجيب الإسم .. بس يذكر ان به "س" .. أو من هالقبيل .. قال ايه اسمه مسيّـان وبنت خالتي مثل .. بتقول ابتسام تقول كيسـان .. واللي صححح يالتحريف أختي يوم هي بأولى يألونه أهلي وش اسم خويّتك ؟ .. بتقول صفيّة بس ماعرفت .. قالت :/ صــفريّة ! ومره كنا قاعدين قلت ايه ولد فلانه سمّوه غسّـان .. أومر يلتفت اخوي قال : خزّااااان !!!! ووووووووز طعّ .. قضى موضوعي القصير قوة , بعد أبشركم بإذن الله قريب الجزء الثاني ذذ وكونوا على موعد مع ىموضوع الأكشنات ,, --> حسنيّة مصطفى تسوق لمواضيعه لأشووته wــيلآآآآم .. آخر من قام بالتعديل • إنِدثـار~; بتاريخ 08-04-2011 الساعة 05:27 AM. السبب: الموضوع بدون مرآجعة تقل محلوف علي أنزله بسرعة + يعني استروا ماوآجهتوا ذذ |
08-04-2011, 06:11 AM | #5 | |||||||||||||||||||||||||||||||||||||||||||||||||||||||||
مميّزة
تاريخ التسجيل: May 2010
البلد: :..المدينة المنوره..:
المشاركات: 2,927
|
ترحم عجزت اعبر رحمتها تلقينها جلست شهر عنداهلها من الفشيله كان شقت العباة ولايدري .. سبحان مكتوب انه ينصك الباب....
هذا مثلي مره اقول لااخوي جب كندر قلت كنتور <<عاد علقوا علي وهج عليتس الاثم وشوله تنزلينه اللحين قاعده اقرا موضوعتس والدريشه مفتوحه شكلهم الجيران قاموا يخزياه كل موقف اطلق من الثاني نحتري الباقي لاتبطين
__________________
* * * |
|||||||||||||||||||||||||||||||||||||||||||||||||||||||||
08-04-2011, 06:33 AM | #6 |
عـضـو
تاريخ التسجيل: Mar 2009
البلد: بـــريـدة بقلبيـــ..
المشاركات: 567
|
ياحــــي هلا الموقــــف واحد : ذكرن بمره على ايام مهرجان الربيع وحنا بالمخيم المهم اننا نسمع البوري قلنا حنا يالبنات وش السالفه اثر بنات اللذينا الحريم مواعدات واحد من العيال يوديهن للمهرجان والله ونروح ونطق العبي قبلهن ونركب الجيب ولاااحظي باترول الجيب وحنا تقريبا 15 نفره مع الحريم عاد انا وكم وحده من البنات تربعنا بالجيب وراء يوم كلنا ركبنا الا وحده من الحريم ويبدن الحريم موااالهن انزلن انزلن يووم دري راعي السياره اننا راكبين قااال طــــسن انزلن امس مودينكن تخيـــــــــــــلن ننزل بس حضرته امر عاد وننزل ونبدا نتمشى برا المخيم من القهر اوميييير يرحموننا ويرجعون ويضفوننا النكته وحده من الحريم معنا وراء وخاااااااااااايفه قوه توقعوا وراه تقول احس الجيب بيشنقل بنا ههههههه وبـــس. شسمه امى موقف اللي انصك الباااب على عباته وااااااااااااااوك موقفه يووووحش قوه بس من قاله تسذب سالفتكم مع الضفادع لحااااااله يرحم امكم ذاا مكان آمن وصفريه لحاااااااااااااااااااااله ولد اختي المكنسه > مسكنه والملعقه > مقعنه كرتون > تركون وعنده قلب مكاني يقولتس ابطلع > يعني بدخل وهوووج لاااااااا تكفين لا تطلعين جزء ثاني خوفي البنات يتحبطن ربـــــي يوسع صدرتس يالغاليه
__________________
ولدتك أمك يا ابن آدم باكياً والناس حولك يضحكون سروراً
فاعمل لنفسك أن تكون إذا بكوا في يوم موتك ضاحكاً مسروراً |
25-05-2011, 10:14 PM | #7 | ||||||||||||||||||||||||||||||||||||||
فاصبر إنّ العاقبة للمتقين
تاريخ التسجيل: Nov 2009
البلد: . . تَحتَ ظِلّ رَحمةِ الله !
المشاركات: 5,426
|
ياقمالكوووون ق1
* يَآهـــــــــــــــــــــــــــــــــــــــــلااا بكل مزيونة نوّرت وشرّفت هِنا أعتذر ثم أعتذر ثم أعتذر يآبعدهم أنتمْ , هنتكم مهونة أعلمكم بس أنتظر يعدل المنتدى , كسل أنسّق , وانشغلت هاليومين , فاعذروني خالديه هيبه
__________________
. •
إنّ هٓذهِ الأمّة وإنْ استُركِعت .. فإنّ ظَهرهَا لنْ ينكَسِر ! والعَاقبة للمتّقين ، وسيرَى المُنافقِينْ هذا بأمّ أعينهـم العَورَاء . • |
||||||||||||||||||||||||||||||||||||||
08-04-2011, 01:09 PM | #8 |
عـضـو
تاريخ التسجيل: Jan 2011
البلد: بريده
المشاركات: 548
|
لي عوووووده وهوووجه
تراي بي نوووم بس لازم احجز مقعد!!! |
08-04-2011, 02:41 PM | #9 |
قبس دائم
تاريخ التسجيل: May 2010
البلد: في حنآيآهُم ()
المشاركات: 2,067
|
وي الفُصحى غردي , حقز مكآن
__________________
|
08-04-2011, 04:12 PM | #10 | |||||||||||||||||||||||||||||||||||||||||||||||||||||||||||||||||||||||||||||||||||||||||||||||
عـضـو
تاريخ التسجيل: May 2010
البلد: هناك .!
المشاركات: 3,749
|
الموضوع قيصريـه ولا طبيعـي ذذ
وعليكم السلام ورحمة الله وبركاته يا قدعه ياختي مواضيعتس طعيمه وانواع الفله لأن قرقتس يذكرن بقرقي فاستمري يا غلامه فهناك من يترقب مواضيعك من كل حدب وصوب بنت بنت عضوه عضوه زنقه زنقه <<هجت به
هذا بس لو يقعد عندي ثواني صابته سكته قلبيه ممزوجه بجلطه دماغيه
ذكرن بتقريري
أليــــــــم بس هذا نتيجة التسذب ![بالنسبــه للاحراجــات]! موقف وحده من البنات تقول اني مره عند خالي عزيمه وخالي هذا ماعنده شغاله وتقول أنـا راحمة مرته وبس اشتغل معه ومع بناته الزبده تقول ان مرت خالي قالت الرجال راحوا يصلون روحي ضفي فطورهم << برمضان تقول واجي اجدع الجلال بالمطبخ << عشان اضف زين وبضمير وانا متحمسه بالضف والشيل والحط الا اشوف الي فوق راسي وماسك شماغه <<< ولدهــم الي عمره بالعشرين ليته الي بالمتوسطه او الثانوي تقول انا من الوحشه صرخت صرخه يسمعه الي منسدح بجنب سور الصين العظيم<<ابوك يالوصف وهو من ربكة الصرخه يدور بجنبي ويقول ياولد ياولد ولا وحده ثانيه من البنات تقول أنـا كنت مجدله شعري جدايل صغيرات يقالي ابيه يتكسر ونايمه بغرفتي وفجأه سمعت صوت صرااااااااخ مب صاحي برا أثر اخوي طايح وراسه يطلع دمان تقول انا الجدايل طايرات ومتوحشه من الدمان << وكان ولد خالته نايم عندهم هو مع الصراخ دخل واثر أم الجدايل بوجهه هو من الوحشه والروعه نز تقول يوم شفته نز وجي استوعب وارجع لغرفتي ولا وحده ثالثه من البنات تقول اننا بمكه وكنا نطوف تقول امر اضيع اهلي << وهالبنت ذروقه لابعد الحدود تقول وجي اشوف واحد تسنه ابوي مع ورا واجي اروح لمه احسبه ابوي وأطحله واقول وينكم انتم ويوم ألتفت علي وش اشوف اثره مب ابوي << تقول من الخوف ورهبة الموقف بديت اطوف عكس الاتجاه ![ بالنسبه لكبة عشا للبزارين ]! << نسبه ولا معدل موقف وحده من البنات تقول اني مجعده شعري ومخليته كدش الكدشات ويجي حدى هالبزارين وقدام الحريم والبزارين والبنات وحتى الشغالات قال الحين ورا شعرتس شوشه خربان استشواركم <<تحطيم ![ تطعيســــات ]! مره من المرات كنا بالبر كاشتين بصعافيق وقلت لابوي تكفى قل تم قال وش عندتس قلت قل تم عندي كل خير <<كثري منه خير ويوم قال تم وضمنت عدم التراجع قلت ابسوق بالجيب << من يقول اني بغيت أقلب بالعائله الكريمه بروح اسوي مساج لاصابعي و أرجع أرد هذي مقبلات
__________________
(وَإِنْ يَمْسَسْكَ اللَّهُ بِضُرٍّ فَلَا كَاشِفَ لَهُ إِلَّا هُوَ وَإِنْ يُرِدْكَ بِخَيْرٍ فَلَا رَادَّ لِفَضْلِهِ يُصِيبُ بِهِ مَنْ يَشَاءُ مِنْ عِبَادِهِ وَهُوَ الْغَفُورُ الرَّحِيمُ) ..
آخر من قام بالتعديل عُباب; بتاريخ 08-04-2011 الساعة 04:14 PM. السبب: مسوين فيها الانتربول مثلا تبون تعرفون كل شي ذذ |
|||||||||||||||||||||||||||||||||||||||||||||||||||||||||||||||||||||||||||||||||||||||||||||||
08-04-2011, 05:44 PM | #11 |
عـضـو
تاريخ التسجيل: Jul 2009
البلد: في وطني
المشاركات: 285
|
اسمعوا هالموقف حصل لي شخصيا >اكشخ يا مهمة
مرة من المرات رايحين لم خوالي بمناسبة زواجي خالي تعرفون زواج لا زم خلق الله تجتمع كلللللللللللهم اليوم اللي يسبق العرس المغرب كان به رجال خالتي كللللهم وقاعدين بالمجلس مع خوالي تعرفون قعدت رجال وقهاوي وحليات والبخور يدهر وشغل سنع المهم ويذن العشاء ويطلعون الرجال يصلون ونجي حنا شعب البنات وهجوم على المجلس انواااع الوناااسة لقينا ثروة اهم شي الحلى ونسينا ارواحنا وسواليف وتفنجل فنجال رايح وفنجال جاي المهم ما درينا الا الرجال مدرعمين بالمجلس واااااااااااااااااااااااااااااااو ويجي خالي ويدخل الرجال كلهم بالمجلس ويصك الباب ويقولهم يللة تخيروا (أعمارنا كانت على سادس اولى متوسط تونا بادين تنغطى ) ويوم طلعنا وامسكت شعر بنت خالاتي وجرررر وتقول انا وش دخلي بتس انا من غير شعوري وة الا اللحين ما انسى الموقف ذا |
08-04-2011, 07:15 PM | #12 | ||||||||||||||||||||||||||||||||||||||
عـضـو
تاريخ التسجيل: Feb 2011
البلد: القصيم
المشاركات: 840
|
ياااطععمتس انتي ومواضيعتس اللي تفتح النفس مواقف تحففففه هههههههههههههه
آححححححرآآآآج صدق مره مرونا خالتي بنروح لخوالي يوم ركبنـآ وآمي تقول حي الله مشعل <<ولد خالتي وهو سساكت وتعييد آمي .. ياحي الله مشعل وهو سساكت وتبتل تعيد وترفع صوته آخر شي نغزته بنت خالتي قالت هذا صديقه مب هو عاااد تخيييلو وجه امممي وقته آححححراج تهلي وترحب وترفع صوته واخرته مب هو والمشكله كبير عمره بأول الثلاثين وهو شكله يقققول الله يلعن ابليييس اللي جاي يممممرهم عاد هذا يوم انا صغيره كنت اروح مع عيال خالاتي والحين مسستحيل اركب مع اححد يا أقعد ببيتنا يا اخوي ولا ابوي يودونن يا السواق خلق الله مب يكدون علي امي تروح معهم وانا اقعد بالبيت لين القى احد يودين << لا تقولون معقده ومدري ايش .. تصير السسياره زحمممه وتخيلون رايحتن راصتن روحي معهم تقل به الجنه
ع هالطــآري هذي عجيييز اعرفه اذا جت مباراة النصر راحت طقت الروووز الأصفر والأزرق ههههههههه وترتز عند المباراة وتشجيييع وشوي تلعييييييين وعمرره بالتسعييين بس يالله ماينشره عليه مهذريه شوي وييياويييل اللي يشششجع الهلااااال .. تعطيييه ذيك القبصه المحترمه لي نكسسه , إن شآء الله
__________________
تفـآئل !لآن حتى َ كلمة ( ودآع ) ! إنْ عكككستهآإ سترى َ ششي ْ ممختلف يوحححي بنظرة | التفآؤل
|
||||||||||||||||||||||||||||||||||||||
08-04-2011, 08:47 PM | #13 | |||||||||||||||||||||||
عـضـو
تاريخ التسجيل: May 2010
البلد: هناك .!
المشاركات: 3,749
|
__________________
(وَإِنْ يَمْسَسْكَ اللَّهُ بِضُرٍّ فَلَا كَاشِفَ لَهُ إِلَّا هُوَ وَإِنْ يُرِدْكَ بِخَيْرٍ فَلَا رَادَّ لِفَضْلِهِ يُصِيبُ بِهِ مَنْ يَشَاءُ مِنْ عِبَادِهِ وَهُوَ الْغَفُورُ الرَّحِيمُ) ..
|
|||||||||||||||||||||||
25-05-2011, 10:48 PM | #14 | |||||||||||||||||||||||||||||||||||||||||||||||||||||||||||||||||||||||||||||||||||||||||||||||
فاصبر إنّ العاقبة للمتقين
تاريخ التسجيل: Nov 2009
البلد: . . تَحتَ ظِلّ رَحمةِ الله !
المشاركات: 5,426
|
يآلله حيّهم :)
.
كلّن على همه سرى
أذكر حينمآ كنت طعسة متهورة برآآبع .. قال أبوي تعالي أعلمتس السوآقه
__________________
. •
إنّ هٓذهِ الأمّة وإنْ استُركِعت .. فإنّ ظَهرهَا لنْ ينكَسِر ! والعَاقبة للمتّقين ، وسيرَى المُنافقِينْ هذا بأمّ أعينهـم العَورَاء . • |
|||||||||||||||||||||||||||||||||||||||||||||||||||||||||||||||||||||||||||||||||||||||||||||||
الإشارات المرجعية |
|
|