[العند ليب]

السلام عليكم





الخطأ الجسيم اللي جالس يصير ببريدة جميع الخدمات جامعينها حولنا يجب أن تفرق على المحافظات والمراكز ، بحيث نفتك من هالعالم اللي تقول كل شيء ببريدة قوه نسكن به ، حتى الأسواق بها قوه نتقضى منه ..
يعني السالفة طب ببريدة وخذ اللي تبي .. وعقب ما جانا الحرس الوطني وهو كمل الناقص .. يعني يجب على المجلس البلدي يقف للزحف السكاني المتجه لبريدة عبر توصيل الخدمات للمحافظات والمراكز .. وبالأخير بريدة الشعير الماكول المذموم .. والله يريد بنا خير

واللي يقول ما به زحمه ملاحظة ببريدة أقول له والله إنك غلطان ، سابقاً كنا نتجنب شارع الخبيب من بعد عصر الخميس إلى آذان العشاء الجمعة الآن كثرت الشوارة اللي نتجنبها في فتراة متقاربة في اليوم ، بدليل ناخذ طريق الرمال لقلة الحركة والإشارات وناخذ امتداد الثمانين باتجاه البصيرية بدلا من الخبيب وإشارة العويضة ونتجه عبر العجيبة للسوق بدل ما نروح للصناعة ، حتى إشارة كبري الثمانين أزمة وكثير منكم لديه أماكن لا تخطر على البال وإلا أقول لك رح لدوار النافورة ياتنطق يا إنك تخطم وتصدم أو تصدم ... والله المستعان

[سلاف@]

صحيح كلامك
ياليت يلاقون حل هذا وهو ماجاء رمضان

[وسيم &]

الله يعين ياخوي

[حربي عابر دربي]

والله ما اشوف زحمة قوية

وبعدين شي طبيعي تشوف كثرة السيارات بسبب زيادة السكان وكثرة الانشطة التجارية وكثرة العمالة التي تمتلك سيارات خاصه بهم وكذلك الطرق التي مازالت قيد الانشاء او التي لم تكتمل بعد

لكن لو ينقلون الدوائر الحكومية ومن في حكمها وكذلك الزام الشركات الكبرى على الخروج على محيط الدائري كان تخف حركة المرور بشكل كبير

[تسيف تسذآ]

*




لو يرجعون آهل الشمآل ل ديرتهم مرة موب لابقين مع اهل بريده

يكون آفضل واوسع لنآآ

[يالبيه يابريده]

اقتباس المشاركة الأساسية كتبها تسيف تسذآ * لو يرجعون آهل الشمآل ل ديرتهم مرة موب لابقين مع اهل بريده يكون آفضل واوسع لنآآ

والله من العنصريه كان بريده ملكك لحالك اتق الله بما تكتب
وليه مو لابقين ترانا كلنا من تراب وكلنا نحاسب يوم القيامه

[torki]

اقتباس المشاركة الأساسية كتبها تسيف تسذآ * لو يرجعون آهل الشمآل ل ديرتهم مرة موب لابقين مع اهل بريده يكون آفضل واوسع لنآآ

عيب هالكلام لو يدخل احد ويشوف كلامك من أهل الشمال وش راح يكون ردة وش الفكرة الي راح يأخذها من هذا الرد


وبعدين بريدة هي ملك لك أو لأهل بريدة
بريدة وجميع محافظات الممكلة هي ملك لكل مواطن سعودي ...

[ورد وبيلسان]

وين الزحمة ههههههههههههههه

[ربي يخليك_]

الى العضوه تسيف سذا من زين بريده الحق ينقال اهل الشمال ماعليهم كلام بس بريده وش جانا منهم غير التطنز والبجاحه واللقافه

والتشدد ولو تروحي اي مدينه تشووفي كيف يكرهوننا

عايشين عصر الجاهلييييييييييه

[آنسة تفاحة]

اقتباس المشاركة الأساسية كتبها ربي يخليك_ الى العضوه تسيف سذا من زين بريده الحق ينقال اهل الشمال ماعليهم كلام بس بريده وش جانا منهم غير التطنز والبجاحه واللقافه والتشدد ولو تروحي اي مدينه تشووفي كيف يكرهوننا عايشين عصر الجاهلييييييييييه

كلُ يرى الناس بعين طبعه
ماجازتلك بريدة خله لأهله

[شتاء دافي]

صحيح كلامك بريده زحمه

[نايف123]

أكيد راح تلقى زحمة بسبب كل الطرق حفريات ومسكرة وبطء بإنجاز الأعمال والمشاريع

[اللهم اغفر لنا]

شي طبيعي الزحمة والدوائر الحكومية والاسواق

لاتنسى بريدة عاصمة القصيم

ولاتنسى القصيم تضم اكثر من 300 مابين مدينة وقرية وومركز

والزحمة سببها عدم احترام الطريق والتداخل بين السيارات

سيارة تمشي 20 وسيارة اخرى تمشي 120 فرق ولازم يكون فيها زحمة


بس لو يمشي كل واحد بالسرعه المعقولة كان الطريق يمشي بدون زحمة

[عضو بارز]

حتى المشاريع المستقبلية لم يراعى فيها الازدحام المتوقع ..
امانة بريدة عايشين يومهم للأسف