[الأول]

السلام عليكم .

بدون مقدمات مالي خلق أكتب .

.................................................. .............................


الحمد لله على كل حال فقد تزوجت لمدة أربعة شهور و ماكتب الله نصيب و توفيق و الآن
ودي أعرس و أعتقد إن فيه حواجز و عثرات و ودي أستشيركم فيها :


1- أنا من بريدة (يمكن أطباع المدن تفرق ) وش رايكم أعرس بعد طلاقي على طول لإني مطلق من أربعة أشهر ؟

2- ما هي نظرة المجتمع للمطلق إذا جاهم يخطب ؟

3- هل أذكر سبب الطلاق عند خطبتي إذا سألت؟

4- هل هناك أسئلة من العروسة بعدين تورط ؟

5- هل سأتذكر طليقتي مع الجديدة؟

6- للبنات : وجهة نظرك لو تقدم لك مطلق ؟

7- دعواتكم لي بالتوفيق الله يوفق و يسعد كل مسلم .



..........................

[طيرالمحبه]

المطلق يخوف مالسبب الحقيقي للطلاق
مافيه سبب يمنع من زواجك وانت لك 4شهور

وابشرك فبه بنات يقبلون والتوفيق بيد الحي القيوم

[بنت البشر]

لا بالعكس المطلق مايخوف

و4 شهور موعشرة علشان يصير يخوف

ودايم المطلق ياخذ بنت مومطلقه..


توكل على الله واخطب لك بنت بنوت واذا سالوك عن سبب الطلاق قلهم عادي لاتستحي.


يمكن كره والاعدم توافق بالطبع ...

الا اذا كان سبب طلاقك شيء ثاني وانت تخاف منه الله اعلم؟؟

[نبض القصيم]

الطلاق ياخوي بحد ذاتة مو مشكلة اطلاقا لكن تبى الصدق وما ودى اخوفك لكن ابصرك الحين الناس صارت تخاف من الامراض النفسية الى انتشرت يعنى ان كان الطلاق فقط لعدم المحبة او ان البنت مااعجبك فيها شى فابشر بسعدك الله يوفقك بنت الحلال الى تخاف بك من الله ويرزقك الذرية الصالحة

[طموحي قمه]

وراك ياابن الحلااااال

كل عمرهم مطلقين ومطلقات وفقهم الله بتجربتهم الثانيه

والله واحد اعرفه مطلق وتزوج وصارت ام عياله ماشاء الله

لاتصير موسوس الي تبي ترفضك ابدبغه < حرب

ولاتنسى ان اي عاااائلة بالدنيا

يبون يعطون بنتهم واحد ملتزم بالصلاة واخلاقه زينه

بغض النظر كان مطلق ولا لا ..

الله يوفقك ان شاء الله

وتوكل على ربك

[صفراوي]

اخي الأول ...


مساء عطر ..
المده من بعد الطلاق ليس لها علاقه .. سواء خطبت بعد الطلاق بفتره قصيره او طويله . لأنك عاقد العزم على الزواج من زواجك الأول ... فأنت لست كالمطلقه .
*
اما نظرة المجتمع فهي ليست واحده . فالأصيل اصيل حتى ولو كان مطلق .
*
أما بالنسبة لسبب الطلاق فكن صريح مع من تخطب منهم . "هذا اكبر سبب ساعدني على الزواج"
*

اما بخصوص الأسئلة التي " تورط " صعبه افيدك فيها لأني ماخضت التجربه.
*

هل تتذكر طليقتك مع زوجتك الثانيه ...؟؟ إن كان سبب طلاقك عدم توافق .. وتوفقت مع زوجتك الثانيه " وهذا الي راح يكون ان شاء الله " فسوف تنسى طليقتك لكون زوجتك الثانيه قد عوضتك ماكنت تريده .


ادعوا الله ان يوفقكـ اخي


واهم شي

(( اخلاص النية اخلاص النية اخلاص النية ))

[الحد]

أقترح عليك ما تستعجل ، ترى حياة الحرية زينة بالحيل ، وبنات هالوقت قليل تلقى اللي تترس العين ( أخلاق وجمال وعنج ودلع ومنترسة حياء )
ترى عيشة العزوبية أحسن ، أترك عنك وجع الراس والغرابيل

[●غزآل العآرضية~]

لا عآدي بالعكس بس عن الحركات اللي يسوونها بعض الناس وخذ مطلقة مثلك !
مو يصير يحق للـ ( الرجال ) المطلق يآخذ بنوتات والمطلقة مايحق لها تآخذ وآحد يبدأ أول حياته معها !!

مع إني ماأدري شلون البنات يرضونها لهم الله يعافيهم ولايبلانا !

والله يوفقك ولاتخاف لأن المطلق بالعكس يكون أكثر تفاهم وأكثر أريحية لأنه مجرب ومايبي يكرر أخطاءه ..

[فياض]

خذ نصيحة مجرب ياأخي الحبيب ..

من تجربتي أرى أن الطلاق ليس يسوءالمرء مادام غيرمفرط ولامتهور , بل أصابه عدم التوفيق وماشابه !

وأقترح عليك تتريث حتى تخف وطأة التجربة أيآ كان مسببها

وعليك بأن تبحث عن ذات الدين والخلق , وعلى قولة العوام : احرص على البنت اللي شبعانه , يقصدون الشبع العاطفي والنفسي والمادي من قبل أهلها

والحديث يطول ويطول , وبحسب ظرفك يكون الجواب مفصلآ .

وفقك الله

[•°انكسار الأماني°•]

,,
من وجهة نظري لاتتزوج بنت بل تزوج مطلقة والأسباب بقولها لك ..
أنا أعرف بنات واجد تزوجوا مطلقين لكن صارت مشاكل وغثاء وضيقة صدر .
لإن طبع البنت حساسة وبتشغلك عند الطليقة السابقة .
حتى لو كانت تحبك ولو أظهرت لها حب خيالي يفوق الأولى ملاين المرات , يبقى الطبع غالب ..
بتصير حياتك نكد معه >> وراك أنت كذا أكيد تذكرت زواجك الاول أكيد ماتحبن ووووو من الأمور اللي أنت بغنى عنها .
نصيحة من أخت عاشت واقع مثل واقعك من قريبات وصديقات جازفن في حياتهن .
لاتتزوج بنت وتزوج مطلقة مثلك وصدقني بتسلم من وجع الرأس .
؛
بالنسبة لسؤالك لزواجي من مطلق بصراحة لاأقبل , ورفضي ليس لشيء إلا لتعاون إجتماعي مشترك .
إذا أنا وغيري من البنات تزوجنا مطلقين من يتزوج المطلقات في زمن رفض الشباب الإرتباط فيهن ؟!
حرام أتسبب في ضياع مسلمة بالحياة وإجبارها لخوض تجربة الزواج من ستيني و ثمانيني ظلما وعدوانا .
هذا كل التوضيح لن و لن و لن أكون أنانية كحال الكثير من فتياتنا الأنانيات فأبحث عن مصالحي وحسب .
إذ أن مصالحي سالكة فبإمكاني الزواج من شاب لكن المطلقة عكسي تماماً لذا وجب تقدير ذلك مني تجاهها .
أعلم أني لن أصلح الحال لوحدي فاليد الواحدة لاتصفق ولكن تكفيني راحة ضميري حالما أفكر في مصالح الغير وأتجاوز مرحلة التفكير في الأنا فقط .

وفقك الله والمسلمين أجمعين ..

؛

[عايشة بكيفي]

اخوي اول سؤال راح يسالونك على قةل الاخ لية مطلق؟؟؟؟حتى لو الشي خاص راح يسالونك؟فالله يعينك..النك بديرة يحبون يشرفون حتى لو الشي مايعنيهم...

[ابويسرى]

اسأل مجرب والله والله ان تندم على فراق الاوله

[•°انكسار الأماني°•]

اقتباس فأنت لست كالمطلقه .

اقتباس اما نظرة المجتمع فهي ليست واحده . فالأصيل اصيل حتى ولو كان مطلق .

والأصيلة أصيلة وإن كانت مطلقة !!
مالكم كيف تحكمون !!

؛

اقتباس فالله يعينك..النك بديرة يحبون يشرفون حتى لو الشي مايعنيهم...

أجل يحبون الشرافة ؟!
أفهم إنك بتتزوجين رجل على عماك لاسؤال ولايحزنون !!
من حق الفتاة السؤال عن أي رجل يتقدم إليها وهذا لايندرج تحت بند "الشرافة" كما تفضلتي بذلك مسبقاً .
فكما أن الرجل يطالب بالنظرة الشرعية والتدقيق بكل كبيرة وصغيرة فكذلك المرأة لها نصيب من التدقيق فيه .
قليلاً من العدل بينهما بارك الله فيكم ,, ووالله إنها لمشكلة مؤلمة أن تشتم الديرة المسكينة على كل كبيرة وصغيرة .
وبقولكِ ذلك تنقدين حالكِ ولاغير إذ أنكِ فرداً من أفراد هذه الديرة المظلومة بأبنائها العاقين .


,,

[صطيف]

ابويسرى مع احترامي لك

يمكن تكون الثانية هي فال الخير والزوجة الحبوبه وينسى الاولى .........


لو هي بنت كان اقول يمكن يكون صحيح لأن المراه لا تنسى الزوج الاول ( مجرد راي)