[الغالي 111]

السلام عليكم
اسعد الله أوقاتكم بكل خير
عندي موضوع مهم حصل لزميلي وحبيت اعرضة على الاعضاء الكرام واستفسار عن التصرف ( شاب نوى يتزوج وتعرفون تم البحث وتم الاتصال وسئلوا عن الشخص بالعمل والمسجد والحمد لله ومشاء الله سيراتة طيبة وتم الاتصال بأهل البنت وقالوا خل الشخص يمر علينا بالبيت تعرفون تم الاستقبال من اخو البنت واخواتة الباقين وتعرفون تم الجلوس وكانت اسئلة موجه للزوج وتعلمون جلوس الزوج (مقبل النافذة) بدات الاسلئة من الاخواة الارابعة للزوج الواحيد انتظر انتظر الزوج كثير وين الزوجة لعلة يتم خروج الاخواة ويبقاء واحد لكي تأتي الزوجة للنظرة الشرعية اذن الموذان وتعرفون خرجوا لكي يأدو الصلاة تفاجأ الخاطب قالوا له يتم الاتصال عليك ؟؟؟؟؟؟؟؟ تعرفون استغراب الخاطب انا جي لكي يتم النظرة الشرعية او لزم تنظر الزوجة قبل الزوج ؟؟؟؟ حبيت اعراض لكم قصة زميلي ويطلب الاجابات المفيدة والمقناعة لهذا العمل هل من حق اهل الزوجة العمل بهذا الشكل00 ويسأل الله التوفيق لما فية الخير

[ـالتُفاحة الورديّة]

اولاً النظرة لكلا الطرفين

ثانياً الخطبة اذا خطب الرجل يتم السؤال عنه في العمل و أهل الحي اذا اعجبهم

قالوا خلاص مر علينا يمر عليهم ويشوفونه اذا اعجبهم تصرفاتة وعقليتة قالوا خلاص تعال بعد

أسبوع شف البنت مو اول مره يطب عليهم يورونه بنتهم حلا هي

[بنت القصيم مثل النسيم]

اصلا الرجال الي يشوف اشوفه الشرعيه مو المره هي له حق بس الرجال حقه اكثر
وفيه ناس عندهم الرجال مايشوفه وهي ماتشوفه
ولاهي الي تشوفه
وفيه احد يقول تكفي شوفت الأهل
بس الي معتاد عليه الرجال الي يشوف
وبعدين ظلم انه مايشوف لوقدر الله انه تزوج ولااعجبته

[طالب متقاعد]

طيب ليش ما طلب منهم يشوفها ؟
لان هذا من حقه شرعا
رزقه الله البنت الصالحه~

[صمت النار]

( وكان الإنسان عجولا )

واضح ان زميلك مستعجل بالحيل , وشكلها اول خطبة له .. ( بس انتبه قول له إذا الله وفقه وتم كل شيء على خير مو يكب العفش من اول ليلة ينتبه )

المهم

انت قلتها في الموضوع : < قالوا له يتم الاتصال عليك >
وهذا شيء معروف , لابد البنت تستخير ويسألون اكثر وبعدها يتصلون عليه ويقولون له حياك في الوقت الفلاني عشان يشوف العروس , وإذا راح يشوفها خله يجلس مقابل الباب عشان يشوفها وهي تدخل ويشوفها وهي تطلع

وللعلم جلسته مع اخوانها مهمة جداً ومفيدة لأخوانها ولزميلك أكثر .. لازم يشوفون علومة وطريقة هرجة بالكلام وهل هو ثقيل وإلا رجة , وزميلك كذلك ممكن يرتاح لاخوانها وممكن مايرتاح , وإذا ما ارتاح لهم ياخذها من قاصرها .. هذولاء خوال عياله أهم شيء ..

مبروك لزميلك مقدماً ,, وإذا محتاج خدمة كذا وإلا كذا فيبشر بعزة

[loquacious]

وخويك الله يصلحه يبغا يشوفها على طول !

لازم يجلسون معاه مره مرتين ثلاث
اذا جزموا عليه وخلاص , صارت النظره الشرعيه

يعني هو خايف انها شافته والا اعجبها عشان كذا قالوا نتصل عليك
مين قاله يجلس قدام الشباك
قوله مره ثانيه لاتجلس قدام الشباك , عشان ماتتمقل فيه وترفضه

[دَفَـادِفْ ..!]

هذي عكس سآلفة وآحد أعرفه ,,
أول مآطق بآب ذولآك النآس يبي يدلي على بنتهم ( يعني أول مرة يجيهم )
رحب فيه أبوهآ ودخلوهـ بالمجلس وطلع شوي ,, يوم دري الرجّآل أمر تدخل عليه بنتهم بثوب الزفه ههههه أستغفر الله ما صدقوآ خبر
,,
صديقك لا يضيق صدرهـ ,, هذي هي الخطبة معروف يجلسون معه الأهل أول ويسألون عنه ,, بعدين آخر شيء يجي يشوفهآ .. بس لاطولوآ قل له يطلب منهم !
بالتوفيق مقدمآ
ونسيت أقول النظرة للجميع ,, بس للأسف البنت إن ناظرت قالوا / ما تستحي , وإن دنقت مشكلة تبي تشوفه ! هه
أحسن شي يورونه صورته

[%*%الحلوة%*%]

بالعكس طريقتهم حلووووووووووووهـ


ماقصروا الاخوان ^^

الله يتمم عليه ويوووووفقه

[تويتي 2]

ضروري يتعرفون على شخصيته .

[مافـﮯشـﮯءاسمہ محال]

الله يوفقك ويرزقك الصالحه من خلقه ..

[سمو الحرف]

الامر عادي جداً والله يوفقه ان شاء الله

دعواتكم لي بأن القى الزوجه الصالحه

[دعبل نجد]

طريقتهم لا غبار عليها بل هي الأفضل أن يتم أخذ رأي البنت أولا
ومن ثم تحقق له الرؤية الشرعية بعد موافقة البنت على ذلك .

[بدون اسم...]

اقتباس المشاركة الأساسية كتبها قلب من ألماس اولاً النظرة لكلا الطرفين ثانياً الخطبة اذا خطب الرجل يتم السؤال عنه في العمل و أهل الحي اذا اعجبهم قالوا خلاص مر علينا يمر عليهم ويشوفونه اذا اعجبهم تصرفاتة وعقليتة قالوا خلاص تعال بعد أسبوع شف البنت مو اول مره يطب عليهم يورونه بنتهم حلا هي

وهذا الي يصير غالبا

[أميرة الفهد..]

اقتباس المشاركة الأساسية كتبها دعبل نجد طريقتهم لا غبار عليها بل هي الأفضل أن يتم أخذ رأي البنت أولا ومن ثم تحقق له الرؤية الشرعية بعد موافقة البنت على ذلك .