بريدة






عـودة للخلف بريدة ستي » بريدة ستي » سـوالـيـف كـشكـولـيـة » يوميــــــــات فيصـــــل ( جميع الأجزاء )

سـوالـيـف كـشكـولـيـة الطرائف و الألغاز

إضافة رد
 
أدوات الموضوع طريقة العرض
قديم(ـة) 28-03-2003, 05:43 PM   #1
العمود
عـضـو
 
صورة العمود الرمزية
 
تاريخ التسجيل: Feb 2003
البلد: alamod640@live.com
المشاركات: 3,413
يوميــــــــات فيصـــــل ( جميع الأجزاء )

الجزء الأول


المشهد: فيصل جالس مع أخوانه الثلاثه وأخته في الصاله .. تدخل امهم

الام: السلام عليكم

فيصل واخوانه: وعليكم السلام

الام: وراكم قاعدين عند التليفزيون ماعندكم مذاكره؟؟

*** كان فيصل اكبر واحد وعمره 23 موظف في شركه .. ومحمد في الجامعه.. وعبدالله في الثانوى.. واحمد في المتوسط... وحنان متخرجه من الكليه

فيصل: ليش تطالعينى قولى للسقاط يقومون .. ويضحك

*** يقوم عبد الله ويعرف انه المقصود

عبدالله: اقول .. لو ماكان عندك واسطه كنت بالبيت اقول بس كرمنا بسكوتك

محمد: الله لايبلانا .. انا طالع

احمد: يؤ يؤ يؤ اول مره اعرف يافيصل انك داخل بواسطه

فيصل: اقول احمد الحق محمد ليجيك شىء مايرضاه عبد..

احمد: بطلع من غيرك

حنان: خلاص لازم هذا الموال كل يوم

عبدالله: قولى لاخوك الفالح

الام: اقول ان مانطميتم ابحرمكم من الطلعه واقول لابوكم

فيصل( يضحك يعرف ان امه ماتقدر عليه))

عبدالله: انا طالع بس هين فيصلووه

حنان: انا بروح اسوى الغداء

فيصل: يستحسن والله بدال قعدتك هنا

الام: فيصل ورا ماتروح تجيب مقاضى للبيت

* عبد الله يطالع وهو على الدرج ويضحك على فيص

فيصل: لازم اروح طيب قولى لابوى ويجيب معه

الام: اقول حنا ماطلعنا لك السياره الا علشان تتقضى لنا يالله بس خذ ((( وعطته ورقه مكتوب فيها الاغراض)))

فيصل: وشو كل هذا ؟؟!! استحى امشى بالورقه .. اقول بحفظها

*** المشهد: في السوبر ماركت فيصل معه العربيه ويطلع نص الورقه علشان محد يشوفه... والا وهذاك الكف على رقبته
فيصل محمر وجهه ويلتفت ويلقاه صديقه

فيصل : الله يرجك

صديقه: السلاام كيف الحال؟

فيصل: بخير يامال الخير .. انت كيفك حمد

حمد: تمام .. وش عندك هنا؟؟

فيصل: اتقضى للبيت.. انت وش اللى جايبك؟؟

حمد: اللى جابك .. ويضحك

فيصل: ياثقل دمك

حمد: لا والله جايب اختى تبى تتقضى للحلى بتسوى اليوم حفله وبتنادى صديقاتها

فيصل: الله يخلف عليكم اجل كلمكم اليوم بالمستشفى .. ويضحك

**
اخت حمد: يالله حمد قضيت

حمد: يالله فيصل أستاذن اشوفك على خير

فيصل: انشاء الله ولاتقاطعنا

حمد: يصير خير اذا شفتنى.. ويروح وهو يضحك

*** المشهد فيصل داخل البيت والسياره مليانه

فيصل: حنانوووه. احمد تعالووو

حنان: خير وش فيك تصارخ

فيصل: اقول انكتمى روحى راحت روحك جيبى الاغراض من السياره

حنان : طيب اعصابك

** المشهد : فيصل يدخل غرفه محمد .. محمد يذاكر وشوى يرسم قلوي..

فيصل: وش عندهم العشاق

محمد: لحووول .. وانت ماتعرف تطق الباب قبل لاتدخل

فيصل: اخبر انى اخوك الكبير والا انت ناسي .. واذا ناسى اذكرك عادى مافيه مشكله

محمد: لا مانسينا وش تبى

**فيصل يجلس على السرير وينطط

محمد: ياخى بتكسر السرير وين انام؟؟

فيصل: نام بالشارع.. ويضحك

**المشهد : الام تنادى عيالها

االام: فيصل , محمد, احمد, عبدالله .. يالله الغداااء

** فيصل يمسك محمد ويدفه ويشخط على تحت

فيصل: السلام يبه

الاب: وعليكم السلام .. وين اخوانك؟؟

فيصل: العباقره قاعدين يذاكرون .. الحين جايين

*** وبعد ماتجمعوا على الطاوله بدأ ابوهم وبدو وراه

عبدالله: ابوى ابى منك شىء؟

الاب: قول

عبدالله: ابى سياره مثل الخلق
** فيصل ومحمد واحمد يضحكووون

الاب: اقول كمل غداك

عبدالله: والله حاله كل اصدقائى عندهم سيارات الا انا رايح راجع برجول

فيصل: احسن علشان تخف يالدب

محمد: انا اكبر منك وماطلعت سياره

الاب: اقول تغدو وانتم ساكتين

**عبدالله يقوم وماد بوزه شبرين

االم: والله ماعندكم سالفه .. الحين من يراضيه

الاب: اقول اذا تبين تاكلين كلى واذا تبين تقومين الله معك

*** وبعد الغدا قعدوا في الصاله يشربون شاااى

الاب: انا طالع انام لاحد يقومنى واذا تبون شىء فيصل هنا

فيصل(( بصوت واطى)) لا .. لا تقول .. تكفى .. الا انا

محمد: معليه اخوى عادى رفع صوتك ياحلو

فيصل: روح رسم قلوب بس

حنان: اقول فيصل ماله داعى تروح تنام ترى اليوم بروح السوق

فيصل: هاهاهاهاها تضحكينى ياحلوه اقول مافيه طلعه

الام: اقول سمعت وش قال ابوك

فيصل: لحوول .. اوكى خلاص تجهزو انتم بس

احمد:فيصل طلبتك لاتردني

فيصل: وش عندهم بعد البزران

احمد: ابى اروح معك

فيصل: لا ماتكفي السياره

***** احمد يطلع غرفته وهو ماد بوزه

** وبعد ساعه يطلع فيصل ويدخل غرفه احمد

فيصل: احمد تبى تروح معنا

احمد: ايه, يالله اجى

فيصل: اذا مانزلت الحين ترى بروح واخليك

احمد:انا جاهز خلاص

*** محمد يدخل ويقول: انا بعد بروح اخذ كتب من المكتبه

فيصل: اوكى خذ لك فلوس مانى دافع شىء

*** المشهد: في الحوش فيصل داخل السياره ومحمد واحمد يتضاربون على اللى بيجلس في المقعد الاول

فيصل: والله لو احلف الحين محد يروح منكم

محمد: طيب انا اكبر واحد خلنى قدام

فيصل: اقول امك الى الان عايشه هى اللى بتقعد ,, يالله ورى
************************************************** ************

انتظرو الجزء الثاانى ترى مشوووووووق وبتعرفون وش صار يوم راح محمد وفيصل البحر
وش قال محمد لفيصل!!!






الجزء الثاني

المشهد: اذان المغرب فيصل واخوانه يروحون المسجد وفي الرجعه محمد يمسك فيصل

محمد: اقول بقولك سالفه فيصل

فيصل: قول وانا اخو فريال (ويضحك)

محمد: ممكن تخلى خفه الدم بعيد عنك

فيصل: وش عندهم الجديين

محمد: خلنا نروح مكان ثانى

فيصل : خلاص يالله وين تبى تروح؟

محمد: البحر

فيصل: احلى يالرومااااانسي.. مااقدر انا

محمد: نروح والا .. لا؟؟

فيصل: لا نروح..

المشهد: فيصل ومحمد على رصيف البحر , محمد يقط حجر بالبحر وفيصل يناظر فيه

فيصل: وش عندك؟

محمد: بقولك شىء بس اوعدنى انك ماتضحك

فيصل: اوعدك يالله وش عندك؟

محمد: انا ودي اتزوج

فيصل: (( يضحك)) وشوووو؟؟ تحب اقول قصر صوتك

محمد: وش قلت انت ؟ ماوعدتنى

فيصل: خلاص بس لا من جد من هي سيعدة الحظ؟

محمد: بنت عمتى

فيصل:طيب وش عندك بعد؟

محمد: هذى السالفه

فيصل: جايبناااااا هنا علشان تقول انك ودك تتزوج بنت عمتك؟؟

محمد: ايه بس خايف اقولها .. واتفاجأ برده فعلها

فيصل: لا لا.. اقول متى الزواج (( ويضحك))

محمد: ياليت بس بالاول الكبير والا انا غلطان؟؟

فيصل: اقول ردد ياليل ماااااطولك

محمد: لحووول فيصل دور لك على بنت الحلال وتزوج فكنا يااخى

فيصل: طيب ابشر

*** فيصل يطالع بنت تتمشى على البحر

فيصل:خلاص لقيتها .. هذى (( ويضحك))

محمد: انا بقوم يالله

فيصل: توكلنا على الله

*** المشهد الصباح .. الام تدخل غرفه فيصل

الام:فيصل قوم يمه يالله اخوانك ينتظرونك

فيصل: قولى لهم لايروحون المدرسه

الام: اقول منت بصاحى محمد واحمد عليهم امتحانات

فيصل: وانا ابوهم على غفله مانى ملزوم فيهم

الام: الا .. دام السياره عندك

فيصل: طيب ياست الكل

***** تخرررج امه... ويااخذ وياخذ فيصل اللحاف وينام
بعد دقايق الام جايه ومعها كاسه مويه باااااااارده وتكبها عليه

فيصل: اعوذ بالله من الشيطان الرجيم وش ذا

الام: قوم بسرعه

فيصل: الله يهديك .. احد يقوم احد كذا تخيلى جاتنى سكته قلبيه ومت.!!

** فيصل ينزل تحت وهو يلعن اخوانه ويلقاهم الثلاثه مرتصين

فيصل: الله ياخذكم واحد واحد

محمد: بسم الله على

عبدالله: والله شكلك حلو وانت قايم معصب من النوم

فيصل يجى عنده ويعطيه على راسه ويقول

فيصل: وانت حلو شكلك وانت كذا

احمد: يالله تاخرنا

**** المشهد : في السياره وفيصل يتثاوب

فيصل: آآآآخ.ز اعوذ بالله منكم

احمد: اقول انا بطلع اليوم وحده ونص لاتتاخر على

فيصل: طيب اذلف الحين

احمد: طيب بنزل بس ترى مامعى فسحه ابوى نسى يعطينى

فيصل: ياحلووكم .. اوديكم واعطيكم مصاريفكم يالله ذى ريالين وترى باخذها منك بالبيت

احمد: وش يقولون عنى اصدقائى ريالين!!؟؟

فيصل: اقول احمد ربك واذلف

*** المشهد عند بوابه الثانوى مدرسه عبدالله

فيصل: اقول عندك فلوس انت الثانى

عبدالله: لا

فيصل: صاير بنك الراجحى اليوم,, خذ 3 ريال لانك بالثانوى

**** يروح فيصل بمحمد الجامعه

فيصل: وانت يالعاشق عند فلوس؟؟

محمد: تسلم

فيصل: لا بعطيك .. خذ ريال منى ويضحك

محمد: اقول مع السلامه ,, تاخرت على الامتحان

فيصل: لاتنسى تكتب اسم ليلى في الورقه
** محمد يبتسم ويدخل حرم الجامعه

***** المشهد : فيصل داخل البيت ويلقى حنان بوجهه

فيصل: جهزى الفطوور بنزل الحين

حنان: ليه شايفنى خدامه لك بروح انام..

فيصل: نامت عليك صخره ,, اقول والله لو مارحتى المطبخ لاتوطى ببطنك

حنان: بس .. بشرط

فيصل: وشو شرطك ياللحجيه؟؟

حنان : تخلى الكمبيوتر مفتوح

فيصل: يصير خير روحى سوى لى الفطوور

حنان: يعنى ماراح تفتحه

فيصل: يالله على المطبخ

حنان: اذا فيك خير دخلنى اذا تقدر

فيصل: ترى والله مانى رايق , ادخلى احسن لك ترى والله لاسحبك من كشتك

حنان تهرب فوق بسرررعه وتقفل باب الغرفه وفيصل يلحقها

فيصل: طيب ياللحجيه دواك عندى بس خليك يعنى الحين اللى يشوفك مابتطلعين هاااااااه...

حنان : لا مانى طالعه الا اذا جاء ابوى

فيصل: هيييييييين

**** اللمشهد الساعه 2 وفيصل بالعمل .. يؤؤؤؤؤه نسيت اخوانى الله ياخذكم انا ماقلت لكم قومونى الساعه 1 ونص

موظف: والله كنت تشخر قلنا شكلك تعبان وخليناك تنااااااااام

فيصل: الله لايخليك انا رايح واذا احد سال عنى قولو له بالحمام

************************************************** ***********
انتظرو الجزء الثالث انشاء الله







الجزء الثالث



المشهد: فيصل عند بوابه المتوسط, ويلقى احمد واقف لحاله يدخل احمد السياره

احمد: انا وش قلت لك؟؟ متى تجي؟؟

فيصل:لا والله !! تعال كفخنى احسن

احمد: والله حاله جالس من نص ساعه

فيصل: طيب مافيها شىء هذا هو الفراش جالس معك

***فيصل عند بوابه الثانويه

عبدالله: اعوذ بالله منك

فيصل: من وجهك

عبدالله: لى ساعه واقف احترقت من الشمس والله كنت بروح مع خوي.

فيصل: كان رحت علشان يجيك من ابوى سطار

عبدالله: المره الجايه

***فيصل عند الجامعه

محمد: السلام عليكم

فيصل: شوفو العاشق ماتكلم مثلكم.. وعليكم السلام

محمد: انا؟؟ لا لو تاخرت بروح مع واحد من الشباب

فيصل: تعجبنى

*****المشهد فيصل ومحمد واحمد وعبدالله يدخلون البيت
فيصل يطالع حنان

فيصل: اللى يمسك لى حنان بعطيه 5 ريال

عبدالله يركض ولكن حنان هربت وقفلت الباب

***المشهد كلهم جالسين على السفره

فيصل: يطالع حنان وينقز بسرعه ويمسكها من شعرها هههههه مشكتك يالله من يفكك منى

عبدالله: زيدها تراها قاهرتنى مع اكلها

حنان: ترى بصوت لابوى واخليه يجى يكفخك

فيصل: ثانى مره اسمعى الكلام مو تقعدين تتشرطين انتى ووجهك
* دخلت الام وهاوشت فيصل

***وفي الليل الكل بغرفته يذاكر (فيصل والام في الصاله)

محمد: انا بروح مع خوي المكتبه نشترى كتب

فيصل: وين ؟؟ حلوه المكتبه هذى

محمد: اقول اسكت .. بلا لقافه

الام: مع السلامه ولاتتاخر

محمد: من عيونى .. دقايق .. وراجع

فيصل: تراك بتصيعين الولد علينا

الام: بسم الله عليك يالعاقل

فيصل: ماراح اطولها معك بروح افرفر على البزران

***فيصل يطق غرفه احمد ويدخل

فيصل: قاعد تدرس والا تشخبط

احمد: وش شايف؟؟

فيصل: اقول ادرس , والله لو ماتنجح مااشترى لك سيكل ويروح وهو يضحك

***يدخل غرفه عبدالله

عبدالله: تامر على شىء

فيصل: لا يالغالى جاى اشوف تذاكر والا لا

عبدالله: ليه الاخ ابوى على غفله

فيصل: اقول لاتطولها ذاكر نبى مجموع يبيض الوجهه مو كل سنه راسب خليتنا علك بلسان اللى يسوى واللى مايسوى

عبدالله:تعال وشو العشاء

فيصل: مافيه عشاء خبرى انك متغدى ويخرج

**** في اليوم الثانى

المشهد الام والاب في الحديقه وفيصل توه طالع

فيصل: صباح الخير

الام والاب : صباح النور

الام: ماتدرى يافيصل وش صار؟

فيصل: خير انشاء الله

الام: ولد عمك ماجد خطب وبيتزوج

فيصل: مبروك متى خطب ولد اللذين؟؟

الام: من قبل اسبوع والزواج السنه الجايه

فيصل: زييين .. عقبالى

الام: انشاء الله

***فيصل خلص فطوره ودخل البيت ولقى اخوانه في الصاله يشوفون التلفزيون

فيصل: صباح الخير ياعباقره

محمد: صباح النور

عبدالله: اعوذ بالله

احمد: هلا فيصل وش عندك قايم من النوم بدرى؟؟

فيصل: بكيفى متى مااقوم اقوم .. وانت ليش اعوذ بالله شايف جنى قدامك.. اقول والله اشكالكم تكسر الخاطر

محمد: ليه فقراء على الطريق

فيصل: لا بس شكلكم زهقانين صح؟؟

احمد: ايه والله زهقانين

فيصل: خلاص بعد صلاه العصر نروح الملاهى

عبدالله: قول والله

فيصل: وانا عمرى كذبت .. مع كرشتك

عبدالله: يمكن تسويها

فيصل: اقول لو حلفت الحين منت براكب السياره

عبدالله: انا قايم اذاكر

فيصل: من متى تشطر الولد ههههه

عبدالله: من يوم مادخلت بالواسطه

فيصل: اقول قم بس قم .. وانت يامحمد ماتبى تروح معنا

محمد: ماادرى بشوف جدولى

فيصل: احمد تسمع وش يقول (البزنس مان) بيشوف جدوله ويقول لنا

***حنان تدخل عندهم

احمد: حنان ترى بنروح الملاهى العصر

حنان: من بيودينا

فيصل: انا يعنى مين؟؟

حنان: ايه بروح ترى قومونى بروح انام

فيصل: يصير خير اذا احد قومك

احمد:Iwill go to my mother

فيصل: يضرب احمد على ظهره ويقول يعلن ابو الانجليزى ياشيخ ماااقدر

احمد: تعلمناها اليوم ويضحك

فيصل: اقول How old are you?

احمد: 14

فيصل: اقول ضف وجهك
************************************************** *******




الجزء الرابع



محمد يطلع غرفه حنان ويطق الباب

حنان: نعم خير

محمد: انا محمد افتحى بكلمك

حنان: واذا محمد وش تبى ؟

محمد: اقول لاتصارخين مع وجهك افتحى عندى لك شىء

فتحت حنان ودخل محمد وقعد

محمد: بطلبط طلب

حنان : اطلب خلصنا ابى انام

محمد: اجل اخليه وقت ثانى

حنان : لاخلاص وش تبى ؟؟

*** يرن جوال حنان

حنان: السلام عليكم .. اااااهلين

المتكلم : وعليكم السلام هلا فيك

حنان: كيف الحال يالقاطعه

المتكلم: اعذرينى والله كنت مشغوله بالكليه وامتحاناتها

حنان: اقول ليلى لحظه اطلع بعض الناس

ليلى : اوكى بسرعه

محمد: من هذى ؟؟ لاتقولين ليلى بنت عمتى؟؟

حنان: ايه وش تبى فيها؟

محمد: سلمى لى عليها

حنان: اقول اطلع بس

**حنان تسولف مع ليلى ومحمد من ورى الباب يسمع
فيصل وراه ويصرخ

فيصل: بوووووه وش قاعد تسوى هنا

محمد: الله يرجك احد يخرع كذا

فيصل: وش عندك تتسمع مكالمه حنان؟؟

محمد: لا ولاشىء بس انتظر تخلص ابى اكلمها

فيصل: متاكد ؟؟

محمد: ايه

فيصل يدق الباب على حنان وتفتح

فيصل: من قاعده تكلمين؟؟

حنان: وش دخلك

فيصل: يمسكها من شعرها ويقول من قاعده تتكلمين ؟؟

حنان: الله لايوفقك هذى ليلى بنت عمتى

فيصل: اهااا خلى محمد يكلمها ويضحك

محمد يطالع في ويروح غرفته

فيصل: عادى وانا اخوك تكلم زوجه المستقبل


***في العصر

المشهد فيصل ومحمد والجميع في المطبخ

فيصل: اقول مافيه طلعه معى

عبدالله : ليش؟؟

فيصل: ماتشوف امك وش قاعده تسوي كأننا رايحين سفر ماخذه نص ساندويتش البيت وشاى وقهوه وتمر

الام: طيب وش فيها كل الناس اللى بيروحون هناك معهم مثلنا

فيصل: لا مابنروح احنا الحديقه احنا بنروح الملاهى نلعب

محمد: طيب خلها ياولد الحلال ولاتجلس معنا

فيصل: مين اللى بينزلكم من السياره مو انا

عبدالله: يعننى الولد يستحى اقول عط السياره محمد وخله يودينا

فيصل: اقول انطم انت .ز اصلا مابيجيبون الاكل معنا الا علشان
تكفين يمه لاتودينه معك وانا على انى اعيشيكم على حسابى


الام: الا بنوديه معنا

***المشهد في الحوش

فيصل: يالله بسرعه ترى اذا اذن المغرب والله لاكنسل الروحه

محمد: عاد انت قاعد تدعى اننا مانروح علشا ماتتفشل

فيصل: ايه انشاااء الله

الام: يالله خلاص خلصنا

فيصل: يالله توكلنا واسمعونى انتم انزلو بالاول وانا ومحمد بننزل مع بعض خلااص

الام: طيب بس احنا مانعرف وين نروح؟؟

عبدالله: انا اعرف

الام: طيب توكلنا

**** المشهد عند بوابه الملاهى فيصل متلثم ويقول : بسرعه نزلو عدتكم طبعا نزلو ودخلو الملاهى
فيصل يوقف السياره بعيد وينزل مع محمد ويشوف فيصل اهله

محمد: هلا والله يمه تعال فيصل ترى امك هنا

فيصل: الله لايعطيك العافيه من ولد
محمد يضحك

فيصل: من يقوم يلعب معى

عبدالله واحمد: انا انا

فيصل: وانت يامحمد منت بقايم معنا والا خايف

محمد: هذانى جاى

عبدالله: خلونا ندخل هذى اللعبه

فيصل: مجنون انت شوف الناس كيف تصارخ اكيد شينه

عبدالله: ياخواف وش ذا شوف البزران داخلينها

فيصل: انا ماقلت انى خواف بس احمد مايقدر يدخلها

احمد: الا بدخلها

محمد: انا بروح اخذ التذاكر
محمد يوصل وعنده التذاكر ويعطى كل واحد تذكرته

فيصل: انا بيقعد معى محمد وانت يااحمد معك عبدالله

دخلو المركبه

فيصل: بسم الله الرحمن الرحيم ( قل هو الله احد...)

محمد: وش عندك تو اللعبه مابدت وانت تسمى وتقرا قران

فيصل: وش مدخلك اقول خلك في حالك بس

بدت اللعبه ودارت اول مره عادى

والمره الثانيه اسرررع وبقووووه

فيصل: محمد احمد عبدالله تمسكووو

محمد: فيصل ليه تصارخ

فيصل: اقول تمسك الله لايبارك في اليوم اللى دخلته هذى اللعبه

**محمد يضحك

فيصل: (يصارخ) قفل اللعبه الله يقفل راسك ابى انزل بسرعه ترى ان ماقفلتها بوريك شغلك

وبعد 5 دقايق وقفت اللعبه
فيصل طايح على محمد

محمد: يالله فيصل خلصت اللعبه والا تبى تلعب من جديد

فيصل: وشو وشو العب من جديد قول من بيوديكم المره الجايه
**************************************************


الجزء الخامس



بعد 3 سنوات

الام: فيصل تعال

فيصل: هلا يمه فيه شىء؟؟

الام: ايه

فيصل: خير انشاء الله

الام: خير خير بس ترى لقيت لك بنت الحلال

فيصل: اها عاد مااصدق اخيرا بتزوج

فيصل: من هى سعيده الحظ

الام: ليلى بنت عمتك خوله

فيصليقوم من على الكمبيوتر

فيصل: وشو؟؟!!!

الام؟ وراك انرجيت

فيصل: لا يمه الا ليلى ماابيها

الام: اقول انا بنادى لك حنان توصفها لك

حنان داخل عند فيصل
حنان: تهبل ماشاء الله عليهااا

فيصل: لا ياحنان الا هذى

حنان: ليه اصلا هى تحبك

فيصل: من قالك الخرابيط؟؟

حنان: هى قالت لى

فيصل: مستحيل البنت ماهى لى لمحمد

حنان: من محمد

فيصل: من يعنى اخوك يحبها وربى يكتب شعر فيها

حنانك من جد

فيصل: والله بس لو طلع الكلام له لا تلومين الا نفسك

حنان:طيب

وبعد مناوشات فيصل عن ابوه

الاب: اقول مالك الا ليلى

فيصل: لا يبه ماابيها دورولى غيرها

الاب: انا عطيت الرجال كلمه وماراح اتراجع عنها (( ويقوم))

فيصل: يمه تكلمى عاد محمد يحبها

الام: مااقدر اقول اكثر من كذا

***** وبالفعل تمت الخطبه ومحمد مايدرى عن السالفه لانه كان مشغول بالامتحانات

فيصل: محمد تعال ابيك

محمد: خير

فيصل: ابى اقولك سالفه

محمد: وش عندك؟؟

فيصل: انا خطبت

محمد: مبرووووك ويالله انا رايح اخطب ليلى بس من تكون سعيده الحظ

فيصل: الا سيئه الحظ والله

محمد: بلاش تخبى من هى

فيصل : محمد والله ماهو خيانه لك بس الوالد عزم على الامر خفيه من الجميع

محمد: ياخى رجيتني وش فيك

فيصل: انا خطبت ليلى

محمد: وشو لا لا مستحيل تمزح معى انت صح؟؟!!

فيصل: لا والله يامحمد والله يشهد انى مابغيتها لى بس الوالد قال كلمته

محمد رايح والدموع بعيونه

*********
وتم الزواج ومحمد لم يحضر الزواج

محمد قطع عن الدراسه ومايشوف فيصل الا من شهر لشهر

محمد عند الوالد

محمد: ابى اتزوج الحين

الام: طيب بالاول اشتغل

محمد: ماابى بعدين بشتغل

الام: طيب بدورلك

محمد: لا خلاص انا ابى بنت خالتى نهى

الام: ونعم البنت

***********************
وتم الزواج كانت نهى تحبه لمحمد بس محمد ماهو حاس بشى كان تفكيره كله مع ليلى وبعض المرات كان يتخيل نهى هى ليلى

اما فيصل كان يعيش اسوأ ايامه كانت ليلى مو ليلى اللى يمدحون فيها الناس

كانت مهلمه لنفسها وكثيره الطلبات كان فيصل لما يجى من العمل تعبان ويدخل البيت يزيد تعبه لا غدا ولا عشاء الا برى بعكس نهى

اللى كانت مدلله محمد بس محمد غافل عنها وبعد ماقال فيصل لمحمد كل شىء قاعد يصير بينه وبين ليلى حمد ربه وشكره ان ليلى ماكانت من نصيبه

والتفت على نهى اللى كانت متحملته كل هالاياااام وهى صااابره..

تمت


أتمنى أن تكون القصة قد أعجبتكم


تحيــــ العمود ــــــاتي


سلاااااااااااااااااااااااام

:

:


العمود غير متصل   الرد باقتباس


قديم(ـة) 29-03-2003, 09:58 PM   #2
ابوعمرنت
عـضـو
 
صورة ابوعمرنت الرمزية
 
تاريخ التسجيل: Oct 2002
البلد: بالملحق
المشاركات: 1,751
مشكور على هيك اليوميات >>>>> متطنز بسوري
مابه شين ثاني يوميات العمود تكفا دبرنا تراهن رهيبات
__________________
ابوعمرنت
: 12 : 12 : 12
;) ;)
:)
ابوعمرنت غير متصل   الرد باقتباس
إضافة رد

الإشارات المرجعية


قوانين المشاركة
لا يمكنك إضافة مواضيع
لا يمكنك إضافة ردود
لا يمكنك إضافة مرفقات
لا يمكنك تعديل مشاركاتك

رمز [IMG] متاح
رموز HTML مغلق

انتقل إلى


الساعة الآن +4: 12:48 AM.


Powered by vBulletin® Version 3.8.6
Copyright ©2000 - 2017, Jelsoft Enterprises Ltd

المنشور في بريدة ستي يعبر عن رأي كاتبها فقط
(RSS)-(RSS 2.0)-(XML)-(sitemap)-(HTML)