[حبييبة أبوها]

أعانة الله واصلح له زوجــة..
ثــم كل أمرأة لهــا أسلوب تعامل يختلف عن غيرها..
فعليه هو ان يبحث عمايستطيع أن يأثر فيهــا..
وليكون واثق بنفســةوبشخصيتة أمامها..
فالرجل المهزوز الشخصيــة تكرهه المرأة.
كـــان الله في عــونــة..

[أحب الشتاء]

اول شي سلم لي على خويك وقل له الحريم نوعين منهن من اذا وريته العين الحمرا عقلت ومسكت الجاده

ومنهن عكس ذلك تشيل الدنيا ولا تقعده

اذا خويك زوجته ماينفع فيها الشده هذا النوع يقتلها الهجر يعني اسهجه لين تجي تحب رجولك

هذا اذا هو ماقصر معاها اما اذا كان مخطي يراجع حساباته معها ويطلب رضاها

والله يوفقنا واياه وكل مسلم

[عآشق الوفآ..!]

يأدبهــآ بآلثــآنية ,
والله أعلـــم

[ام الوريدات]

اقتباس المشاركة الأساسية كتبها دفا ( بهذي لي تحفظ قلت له اذا تبي تبر بامك انت اخدمها ليس واجب على زوجتك )

كلام سليم
نعم هي بنت الناس اذا اخدمت امه كثر الله خيره و جزاه الله خير وبنات الرجال ما يقصرن و الواجب على الرجل انه يبر بامه ويطيعه
وهذه قصه
ام(الجدة ) ينام عندها ولد ولدها وفي ذلك اليوم زعلت مرة الولد من الام واخذت فراش ابنها الذي ينام عند الام
وابن الام(الجدة) خارج البيت عندما جاء للبيت استقبلته الام وقالت له ولدك اخذته امه لينام عندها وانا اريدك ان تنام عندي فوافق وقال ان ولدها سينام عندها وانا سانام عندك جاءت مرةاالولد تبحث عن زوجها فراته نائم عند امه وفي الليله الثانيه جابت مرة الولد فراش ابنها لينام عند الام (الجدة) قال الرجل لامه انها جابت فراش الابن فهل تسمحين لي ان انام عندها قالت نعم فتادبت امرة الولد

[نبض المشاعر]

انصحه بركعتين تالي اليل

ثم انصحه بالذهاب الى اهل الاختصاص

فهم اعلم وادرى منا

اصلح الله له شانه

[ملاك الغلا]

المشاكل الأسريه صعب حله لأنك ماتسمع الا من طرف واحد وبكذا ماراح توصل لنتيجه

اقتباس المشاركة الأساسية كتبها صمت النار الله يهديك اخوي دفا وش هالكلام .. كيف تقول اذا تبي تبر امك انت اخدمها ,, ليه وزوجتي وش موقعها من الإعراب ..؟؟؟ لا شكرا كثر الله خيرها وانا متنازل لاتخدمني ولا شيء بس تخدم أمي واذا ماتبغى تخدم امي ولا تزورها , فبيت ابوها اولابها , وبنات الرجال واجد , الدنيا بخير .. وصدقني وثق ثق تامة وأكيدة الزوجة اللي ماتحترم اهل زوجها ولا تحب وصلهم ( إن لم يكن فيهم شر أو مشاكل ) هذه لاتصلح أن تكون زوجة ولا أم , وأقسم بالله العظيم ماعليها حسوفة .. ومن ناحية هذه النقطة , سلملي عليه وقول له يقول صمت النار : امنعها من زيارة أهلها لمدة شهر أو شهرين , وخليه يقول لها بكيفي اذا بغيتك تروحين تروحين . وخله يشوف ردة فعلها ساعتها .. يابعد قلبي انتبه من هذه النقطة راح ارجع لموضوعك للتعليق ولكن صدقني هذه الزوجة متسلطة وإذا صاحبك ماتدارك الأمر راح يندم بعدين حتى اولادة لن يجد منهم إحترام له .. وبما انك سألت عن الرأي ,, حبذا لو بيّنت كم لديه من الاولاد وكم فترت زواجهم ..

غريب امرك تجبرالزوجه على خدمة الام وهي مو ملزومه هذا واجب الزوج
اما الزوجه اذا خدمت فهو تكرم منه
هذي امك وانت اللي تبر به مب بنت الناس لأنه زوجتك مو خدامة لامك الا اذا كنت قايل لاهله من البدايه انا ابيه خدامه لامي هذا شي ثاني !!


وزياده على كذا تنصحه انه يمنعه من زيارة اهله بأي حق !! ياكوني خدامه يامافي روحه لاهلك !! وبنفس اسلوبه هي بتقوله انا بعد بكيفي مابي اخدم يعني وحده بوحده

اسمحلي اللي يمشي على المنطق هذا مافيه ذرة رجوله ! ولو به خير كان هو خدم امه مب بنت الناس

والله لايحيجنا ولا امهاتنا والمسلمين لغير وجهه الكريم

[صمت النار]

اقتباس المشاركة الأساسية كتبها صافية : للأسف أغلب حالات الطلاق بسبب هذه المشكلة وللأسف لأنها تافهه جدا اذا صار ذابحه البر ويجبر زوجته على البر بأمه يا ناس الدنيا تغيرت الامهات ألحين يخدمونهم الخدم وبنت الناس اذا قدمت شي فهو من طيبها وكرمها واذا ما قدمت شي ماهي ملزومة كثر خيرها اذا سلمت وزارتهم وكانت لطيفة معهم بالكلام احد زميلاتي طيبة جدا وكان زوجها بره بأهله فقط عن طريق زوجته فيجبرها بزيارة امه يوميا مما أدى الى حدوث غيرة بين الزوجة والاخوات ولأنهن يتضايقن منها كل يوم عندهم مما أدى الى حدوث مشاكل وانفصالهما عن بعض وأحد الامهات الكبيرات جميع زوجات ابنها طيبات معها جدا وعايشات مع ابنائها بسعادة واستقرار ولما سألناها قالت اني ما أطلب منهم زيارتي دائما واقول لابنائي لا تحضروا زوجاتكم الا وهن راضيات جدا وموافقات على الزيارة المطلوب من الزوجة هو الاحتـــــــــــــــرام فقـــــــــــــــــــط وغيرة زود وكرم منها لا تكرهوا زوجاتكم بأهلكم ولا تكرهوا أهلكم بزوجاتكم اي واحد مقبل على الزواج لا يهدم بيته بسبب اهله ، اهلك كل اللي يبون انك تتوفق مع زوجتك وتعيش معها بسعادة لصاحب الموضوع اخي دفـــــــا اعذرني لردي على صمت النار وبالنسبة لصاحبك فلا يمكن التوصل لحل مشكلة زوجية الا بعد سماع كل الطرفين فالافضل لهما الاتصال بمستشار اسري

عجباً .. ولماذا توجهين رسالتك للرجل ولا توجهيها للمرأة ..
فالزوجة نفورها وعدم تقبلها لأهل زوجها وعدم خدمتهم كلياً قد يكون سبب في طلاقها ..

أنا لا اقول أن خدمة الزوجة لوالدة الزوج واجبه عليها , إلا إذا كان قد إشترط ذلك عليها عند العقد
فهنا يكون خدمة الأم واجبه عليها ولها أن تطلب مقابل لخدمتها ..

وليس هذا حديثنا , ولكن صلة الزوجة بأهل زوجها وخدمتها لوالدته هو من باب المودة لزوجها وبرها به وطاعتها له ..

طاعة الزوجة لزوجها أوجب من طاعتها لوالديها , وفي المقابل طاعة الزوج لوالديه أوجب من طاعته لزوجته ..

والواجب على كل زوجة أن تفكر في نفسها مستقبلاً حين تكون أم .. فهل تريد من إبنها أن يرميها بين الخدم أو يقوم هو وزوجته بخدمتها .. ( الله يستر لاتقولون يوديها لدار المسنين )

إن كانت زوجتي لن ترى أهلي ووالدتي شيء , فإني سأراه لاشيء بالنسبة لي ..

وهذا رأي خاص بي

[صمت النار]

اقتباس المشاركة الأساسية كتبها ملاك الغلا المشاكل الأسريه صعب حله لأنك ماتسمع الا من طرف واحد وبكذا ماراح توصل لنتيجه غريب امرك تجبرالزوجه على خدمة الام وهي مو ملزومه هذا واجب الزوج اما الزوجه اذا خدمت فهو تكرم منه هذي امك وانت اللي تبر به مب بنت الناس لأنه زوجتك مو خدامة لامك الا اذا كنت قايل لاهله من البدايه انا ابيه خدامه لامي هذا شي ثاني !! وزياده على كذا تنصحه انه يمنعه من زيارة اهله بأي حق !! ياكوني خدامه يامافي روحه لاهلك !! وبنفس اسلوبه هي بتقوله انا بعد بكيفي مابي اخدم يعني وحده بوحده اسمحلي اللي يمشي على المنطق هذا مافيه ذرة رجوله ! ولو به خير كان هو خدم امه مب بنت الناس والله لايحيجنا ولا امهاتنا والمسلمين لغير وجهه الكريم

قد وضحت في ردي السابق قبل أن أقرأ ردك هذا وبينت أن خدمة الأم ليست واجبه على الزوجة إلا إن كان إشترط ذلك في العقد , وإنما خدمتها من باب المودة وطاعة الزوج ..

أما من ناحية منع الزوج لزوجته من زيارة أهلها فله الحق أن يمنعها إن كان من منعها فائده لهما ..
وطاعة الزوج أوجب من طاعة الوالدين ..

وأنا لما طلبت منه يوقل لزميله هالكلام , ليس من باب أنه حل لمشكلته , ولكن مجرد توضيح أن الزوجة لاتفكر إلا في نفسها ولكي يرى ردة الفعل من قبل الزوجة ..

[ابوي كل الوجووووود]

اصلا ياكثر هالاشكال من الزوجات لانه يمكن يناظر خاطره بشكل لأني اشوف كثير من مجتمعنا نفس زوجته تحس ان تأديب الرجل كذا وهو يمكن معطيه وجه بزود لأن المرأه مب دايم تعطى وجه,,,,,وهو ماله شخصيه عنده والحمدلله الشرع أحل لزوج اربع نساء علشان يأدبه ولازم الزوج يظهر شخصيته على زوجته مب يروح يشخص على امه وزوجته يخاف منه لأني اعرف رجال على هالشاكله........

[صمت النار]

الأخ دفا

اوافق الأخت متصفحة في كلامها جملة وتفصيلاً وبالأخص أن زميلك ضعيف شخصية ..

فكلنا نعرف أن العود من أول ركزة ,,
والخيل من خيالها والحرمة من رجالها ..

طبعاً خلاص راحت عليه لكن قد يستطيع تعديل بعض من حياته

زوجته واضح كوضوح الشمس أنها من النوع المتسلط , وتعجبت من غيرتها الزايدة ...!!!
فالغيرة على الزوج ناتجة من الحب , وإن كانت تحبه فكيف تفعل ماتفعل , وبالأخص إهانته أمام أبنائه ..
وهنا يجب أن يتدارك نفسه , فإن لم يضع حد لها فإن شخصيته على أبنائه ستكون ضعيفة جداً ..

واقولها من خلال واقع وتجارب للغير وليس من الخيال

واسمح لي اقولك الخطأ من زميلك والدليل تفكيرة بترك البيت وهذا أكبر خطأ ..

الواجب عليه :

- يبقى في بيته وإن كان هناك من يجب أن يخرج فبالتأكيد هي الزوجة وإلى بيت أهلها إلى أن تعتدل
- يغير من تصرفاته وبشكل تدريجي لا بشكل مباشر , وبالاخص الحب ( ومو كل مازعلت قالها وش فيك ياقلبي , ومو كل ماطلبت شيء قالها سمي من عيوني ) وكذلك إذا أنه من النوع النشبة اللي طول الوقت في البيت يحاول يطلع لو يروح يدور في السيارة لساعات أهم شيء يبتعد لساعات ..
- يبتعد عن الغضب من الأمور الصغيره ( التافهه )
- يحاول أن ينسى الماضي وأي مشكلة تحصل لايحاول ذكر مواقف سابقه , يحاول ثم يحاول ثم يحاول ان يروضها من جديد وكما يريد ( ولا يكون ذلك في حرمانها من حقوقها الواجبه عليه )
- أي موضوع أو مشكله صغيره يحاول أن يقلل من الكلام معها . يعني لايكبرها وهي صغيره .
- المرأة المتسلطة معروفة بطول لسانها , وإن حصل نقاش وطولة لسان منها فليحقرها ولا يرد عليها
وثق حينها ستشتعل الزوجة وتطالبه بأن يرد عليها ( وهذا ماتريدة المرأة المتسلطة ) حينها يرد عليها بإختصار دون الخوض في المشكلة أو الموضوع ويقول : إذا أصبحتي محترمة وتكلمتي بإحترام ساقوم بالرد عليك , ويقوم من مكانه إلى غرفة أخرى , والأفضل الخروج من البيت ..
- إن كان من الازواج اللي ينقلون الكلام عند زوجاتهم أو بمعنى اوضح من يذكر تصرفات زوجة فلان وعلان فقل له يبتعد هن هذا الأمر فالمقارنة سبب من أسباب المشاكل , وإن كانت هي من النساء الاتي يتحدثن عن فلانه وعلانه وتعمل مقارنه بينها وبين زوجها , فيجب أن يوقفها عن هذا الأمر ويبين لها أن لهم حياتهم وظروفهم الخاصة ولا مقارنه بينهم وبين الغير .. ( وسبق أن حصل لي موقف في هذه النقطة وغيرها مما سبق ومما سياتي وكانت النتائج إيجابية 100% )
- الهجر الهجر الهجر .. ليس في الفراش فقط , بل حتى في الاكل في البيت , وانتبه يخق بسرعة قول احررررررق قبل لاتنحرق , طبعاً بعد الهجر ورجوعة لايفتح سيرة الهجر والاسباب وووالخ خلاص مشكلة وإنتهت والزوجة عرفت خطاها , وحتى هي يحاول أن لاتفتح الموضوع معه . لأنه إذا فتح الموضوع فما راح يستفيد شيء ..
- نقطة مهمة جداً وهي أن ينبهها بأن مشاكلهم أو أي حوار ونقاش حاد لايكون أمام الاطفال ولا تخرج المشكلة خارج البيت وإن حصل فلن يكون هناك إلا تصرف واحد سيتصرفه ( حينها إن كانت عاقله فستحسب لهذا التصرف الذي سيحدث الف حساب ) ولو سألته وش هالتصرف يقول : بعدين تعرفين ,, ومثل ماقلنا احرررررررق
- يفرض شخصيته في بيته وانه الرجل وصاحب القرار , وهناك خطوط حمراء لايمكن تجاوزها بل حتى النقاش لامجال فيها . وهناك بعض الأمور لامانع من مناقشتها بينهم ..


هذا رأيي بإختصار وهو من خلال تجارب حصلت لي ولمن أعرفهم ..

وإن حصل إنه مافيه فايدة تتعدل الزوجة .. فـ اللهم لك الحمد والشكر الله أحل له أن يتزوج من اربع وأحل له إنه يطلق ..
الإنسان يتزوج يبي الراحة والإستقرار مو الهم والغم والنكد وطولة اللسان وكثرة المشاكل ..
واللي مو قد الزواج لايتزوج

واللي مو قد التربية لا يجيب عيال فكونااااا تكفون <<< هذي خارج الموضوع

[slmon]

لن اطيل

فقط كلمة واحده اخي الكريم أصبر عليها علشان اولادك
وأكثر من الدعاء والح على الله بذلك وأحتسب الأجر
وهذا ابتلاء من الله لك يختبر فيه ايمانك وحلمك وصبرك

أصبر أصبر أصبر أصبر ثم أصبر
وستجد ما يسرك بإذن الله ولاتستعجل

أصلح الله لك ولنا أزواجنا وذرياتنا
وأعاننا الله واياك على البر بوالدينا أحياء وأموات

[مــــــلاذ]

أخـــــــــــي دفا...
موضوع كهذا وإستشارة كتلك
ليس مكانه هنا في الساحه المفتوحه
مع الاجابات والآراء المتناقضه منهم من جرّب ومنهم من لم يخض التجربه
ومنهم من نجح ومنهم من فشل....

هناك من هم أولى بالاستشاره,, خصصوا أوقات لها ,,أطلق عليهم مسمى إستشاريون..
وبما أني أضفت ردا
سأدلي برأيي (مجرد رأي بلا تجربه)..
تقصيري بحق والدته كتقصيري بحقه
وإن كان هو يعني لي الكثير فإهتمامي بوالدته دليل على محبتي له...
وهناك فررق ياغاليات بين الخدمه أو التقدير والاحترام والسؤال عنها...

[areeen]

التجربة خير برهان

يقطع أي اتصال بالبيت ( تلفون )

1- يقطع التلفون
2- يقطع الجوال

والنتيجة بعد اسبوع فتاكة
أما كيف يقطع الجوال ففيه أجهزة تباع عند محلات الجوالات مهمتها قطع ارسال الجوال عن المكان المحدد

الله يصلح مابينهم

[دفا]

اقتباس المشاركة الأساسية كتبها أبوسياف دائما وابدا الزوج يتحمل اخطأه والرمح من أول ركزه لكن رفيقك ذا اسمحلي ماله شخصيه ولاهيبه قدام زوجته وصدقني من واقع تجربه اي زواج فاشل فهو من الرجل السبب انه مايضبط اموره من اول يوم مثل التعامل مع الزوجه والبنت لاعرفت ان وراه رجال مايطلع منه مثل هالمور خل رفيقك يراجع حساباته من جديد .

مثل ماقلت في الموضوع الزوج حبوب مررره ورحوووم وهذا سبب جعل زوجته تستغل هذا الشيء
وانا نصحته بان يتعدل اقصد يكون له شخصية ويحاول السيطره على البيت بكل شيء

شكرآ على مرورك