[مدمن نت]

بسم الله الرحمن الرحيم

الموضوع مبين من عنوانه ... تصدقون ياجماعة الخير في هذا الشهر ذي الحجه


تشوف العالم تفحط وتسرع وتتهور بالقياده لأنه لا يوجد مرور


وتسمع بالسرقات وغيره لأنه لا يوجد امن في الحواري وغيره


تصدقون اني اعرف خمسه من العساكر كلهم ماخذينهم للحج اللي في الشرطه


واللي في الدوريات واللي في المرور .... يعني مافيه احد في بريده ابدااااا مهب معقوله الصراحه


يعني المفروض تكون الكفه متوازنه مهب كفة الحج ثقيله وكفة بريده خفيفه


يعني اللي محتاجينه في مكه ... بريده اكثر حاجه او مثلها بالحاجه


يعني والله اني استغرب من أدارات المرور والشرطه ياخذون ثلاثة ارباع العسكر ويودونهم لمكه


طيب يعني بريده اكثر امن


والله غريبه هالقرارات العجيبه


ارجو منكم مشاركتي حول هذا الموضوع


عن سبب تهاون ادارات الشرطه في تقليص او تقليل الدوريات في بريده في شهر ذي الحجه


الله يحفظنا ويحفظ المسلمين اجمعين يارب العالمين


والسلام عليكم ورحمة الله وبركاته ، ، ،

[الاكيد اولهم]

صدقت المفروض ياخذون افراد الحرس الوطني او الجيش ...
مو لازم يطلعون المرور والشرطة ...

[عبد العزيز2007]

الدولة ابخص

[هايم الشوق]

كان هنالك قرار ممتاز من سمو وزير الداخليه بأنشاء قوه مسماها قوة أمن الحج
مسؤولياتها بـ موسم الحج والعمره وبقيه ألاوقات ويكون مركزها مكه المكرمه
وبالفعل تم سريان هذا القرار من فتره بسيطه وجاري نقل وتحويل القوه الامنيه من الامن العام
والقوى الامنيه الاخريات الى هذه القوه , طبعاً تحتاج لأكمال عدد وعمل هذه القوه كأقل تقدير 5 سنوات
بعدها يتم عدم سحب العسكريين من مناطقهم في مهمات الحج الا في نسب بسيطه جداً

بالنسبه لما ذكرت انه يوجد فراغ أمني غير صحيح
فـ مديرية الشرطه وأقسام الشرط الثلاث وادراه دوريات الامن وأداره دوريات المرور
والجهات الامنيه الاخرى ذات العلاقة موجودون ويقومون بعملهم على أكمل وجه دون نقصان كحاله عامه
لكن الثغره الوحيده هي اداره دوريات المرور بحسب النقص الموجود السابق لدى الادراه نفسها
ايضاً يوجد خلل اداري كبير بعدم تحويل وتوزيع القوه الادرايه الى ميدانيه لتغطيه مواقع النقص الهامه
من خلال ذالك تنبع ملاحظات ميدانيه كالتفحيط وغيرها

المفترض والمفروض وقفه من رجالات بريده وعلى رأسهم سمو الامير فيصل أبن بندر للأمن العام
في دعم القطاعات الامنيه بالمباني والقوه العامله من أجل تغطيه النقص الواضح والكبير
والذي يظهر بازدياد كل فتره من الزمن بازدياد عدد السكان وكثره الحالات الجنائيه فيها
لو اخذنا مثال بسيط في الرياض مثلاً يوجد 5 مراكز دوريات أمن يخرج في الساعه الواحد
مايزيد عن 130 دوريه أمنيه تغطي جميع مساحات وطرق المدينه
وبالتأكيد لايوجد مقارنه من ناحيه المساحه
ولكن في بريده مثلاً مركز وحيد هي الاداره العامه ونفسها مركز انطلاق للدوريات الامنيه التي تخرج
بعدد ضئيل لايتناسب مع المساحات والاحياء الجديده والاعداد التي تزيد في كل شهر في مدينه بريده
لآن الدفاع الاول والجهاز الاول في محاربه الجريمه قبل وقوعها هو دوريات الامن في عموم المملكه
يشاركها بنفس الحال للحاله هي اداره المرور للحالات المروريه من الدوران والتفحيط والمواكب وغيرها ,
ايضاً لآبد زياده عدد مراكز الشرط التي كما هي معروفه الشمالي , الجنوبي , البصر
من انشاء مركز رابع في الجهه الشرقيه من المدينه , ومركز آخر يكون في اقصى الشمال
ومركز بريده الشمالي يكون الاوسط في المدينه
من أجل البحث والتحري واكثر عدد من المحققين الجنائيين
اللذين مهمتهم بعد قيام الجريمه وارتكابها ومطارده خيوطها والقبض على مرتكبيها

من الناحيه الامنيه بشكل عام بريده مميزه جداً من ناحيه الدفاع الاول
لكن يتطلب المزيد من بذل الجهد بالنسبه للمرحله الثانيه أي البحث والتحري
المرحله الثالثه وهي الاهم لابد من زياده العقوبات والجزاءات خصوصاً في مايتعلق بالجرائم الجنائيه الصغيره

أجمل تحيه لك

,,

[مدمن نت]

تحية معطره لكل من قام بالرد على الموضوع



وجزاكم الله خيرا ...



واشكر اخوي هايم الشوق على المشاركه والمعلومات الجيده والمفيده

[مُعان]

مدمن نت
ملاحظة في محلها
اتمنى النظر لها
تحياتي لك

[يربش بريده]

الله يحفظنا ويحفظ المسلمين اجمعين يارب العالمين

[جمس الهيئه]

الله يحفظنا ويعصمنا من كل شر
دولتنا اعلم وابخص في هذا الامر

[Leader.20]

,,

,

هاهو سوء التنظيم في توزيع القوات يرمي بظلاله على أمن المدن

اللهم احفظنا بحفظك يا اكرم الاكرمين



,

[أبورامي]

من قبل لايروحون لمكة ووجودهم كعدمهم
فما بالك مع قلتهم الآن

[To be]

اقتباس المشاركة الأساسية كتبها مدمن نت تشوف العالم تفحط وتسرع وتتهور بالقياده لأنه لا يوجد مرور

أنا ما أدري هل أول سنة يفحط به ولا آخر سنة ؟
من طلعة الدنيا والناس تفحط بس شكلك أنت توك تشوف التفحيط والدوران !
مليت من المواضيع ذي كل يوم ناقز لنا واحد هذا يقول انعدم الأمن وهذا يقول بريدة موب زي أول ، تقول داخلين على العراق
بعدين من اللي يقول لك ما بوه مرور وأنا امس بالليل ثلاث تفاتيش ما بينهن ربع كم !

اقتباس المشاركة الأساسية كتبها مدمن نت وتسمع بالسرقات وغيره لأنه لا يوجد امن في الحواري وغيره

السرقات ما له دخل بالمرور والتفحيط وأكتبه بموضوع ثاني بعدين إن شاء الله .

اقتباس المشاركة الأساسية كتبها مدمن نت تصدقون اني اعرف خمسه من العساكر كلهم ماخذينهم للحج اللي في الشرطه واللي في الدوريات واللي في المرور .... يعني مافيه احد في بريده ابدااااا مهب معقوله الصراحه يعني المفروض تكون الكفه متوازنه مهب كفة الحج ثقيله وكفة بريده خفيفه يعني اللي محتاجينه في مكه ... بريده اكثر حاجه او مثلها بالحاجه [/U][/I][/COLOR] يعني والله اني استغرب من أدارات المرور والشرطه ياخذون ثلاثة ارباع العسكر ويودونهم لمكه طيب يعني بريده اكثر امن والله غريبه هالقرارات العجيبه

بارك الله فيك ، قياسك هذا موب صحيح ، وما كد شفت مرور بحياتي مثل اللي شفته بـ أيام العيد
بعدين ترى حقين المرور موب 15 تقول والله لا أخذوا للحج 7 بقى 4 ومايقدرون يضبطون المرور !

اقتباس المشاركة الأساسية كتبها مدمن نت ارجو منكم مشاركتي حول هذا الموضوع

شف مشاركتي فوق

اقتباس المشاركة الأساسية كتبها مدمن نت الله يحفظنا ويحفظ المسلمين اجمعين يارب العالمين والسلام عليكم ورحمة الله وبركاته ، ، ،

آمين ، وعليكم السلام ورحمة الله وبركاته .. ،

[ξــزتــےِ مَالهَـآ כــد]

الله يستر

[مدمن نت]

اقتباس المشاركة الأساسية كتبها جمس الهيئه الله يحفظنا ويعصمنا من كل شر دولتنا اعلم وابخص في هذا الامر

بارك الله فيك على المشاركه


ولكن لا باس بأن تطرح رأيك لنا

[التواضع]

لا تعليق