[قـــصـــيـــة]

ربما .. تكون المكالمات قبل الزواج سبب في المشاكل وعدم التفاهم ثم إلى الطلاق
إذا .. كانت تلك المكالمات غزليّة وخيالية لا تُلامس الواقع البتّه ..!

أما .. إذا كانت المُكالمات جديّة وواقعيّة وهدفها التعرّف والتفاهم فيما بينهما فبإذن الله لا وجود للمشاكل والطلاق


وهذه تجارب واقعية من بعض الأخوات في هذا المنتدى

اقتباس السلام عليكم انا ابكتب لكم رايي وعن تجربه انا وحده انخطبت وجلست بين الملكة وزواجي ثلاثة شهور حب زوجي يكلمن بس انا بداية الامر كنت خايفة ومترددة بس زوجي اصر وكلمن انا بصراحة ارتحت له وحبيتة من المكالمات والحين لنا ثلاثة سنوات متزوجين والاالحين وحنا نتلذذ بذيك الايام واللة تهبل .

اقتباس أختي كلمت زوجه ويجي ياخذه منْ الكليهَ ويزوره بالبيتً والحمدلله متوفقينْ

اقتباس في البداية طلب يكلمني قبل الزواج بـ 18 يوم << مانست وأنا وافقت وأول يومين مسجااات بعدين كلمته والحمد لله أرتحت بالمررره حتى أهلي لاحظوا ع نفسيتي أول كنت متوتره وشايله هم لأني بأقابل إنسان ماأعرفه ويوم كلمته أحسن نفسيتي زانت شوي مع الاخذ والعطا والسوالف والمشاورات<متعوب عليها وماشاء الله ماجاء يوم الزواج إلأا وأنا زايل شوي من الخوف وانا أنصح بالمكالمات لكن فيه شي هو اللي مو حلو بالمكالمات إنك لازم تفرغي نفسك وتقابلي االجوال وأنا اللي ضايقني أنه أخذ رقمي متآخر يعني قبل الزواج بأسبوعين وشوي وأنا بهالوقت يالله أخلص أشغالي هذا بس اللي ضايقني إني أترك وأأجل بعض الشغلات وأجلس أكلم .. وماشاء الله لي 9 شهور متزوجه ولاشك فيني ولاشي

اقتباس أنا من مؤيدين المكالمه قبل الزواج وبعدالملكه طبعآ من تجربة من قبل 8سنوات حنا ماعندنا نظرة وملكنا سنة وبعدين طلب مكالمتي قبل الزواج ب4شهورطبعآبالبداية شهر رسايل وبعدين مكالمات وأمي وخواتي بس يدرن وشفته وشافني مرة وحدة طبعآ بالدس . والنتيجة أفضل أيام حياتناودايم نتذكرها أنا وهوونتمنى الأيام تعودوماأثرت على حياتي أبدآ بالعكس كان لها دور كبير لتفاهمنا

أتمنى أخي سلمان أن لاتؤثر عليك تجربة أو تجربتين وتنظر للمكالمات قبل الزواج بأنها سلبية وسبب للفراق!!
فالحياة الزوجية تعتمد على التفاهم والتنازل والحلم <-- أن يكون حليم أو أن تكون حليمة




وفقك الله

[الكساندرا]

×~


لا أدري حقيقة عن نوعية نظرتي للمكالمات ..!
فالأشخاص يختلفون .. وكذلك ظروفهم ..~

عمومًا .. شكـــــرًا للإثراء ..

~~ ألكساندرا ...


×~

[شهدالحروف]

المفروض مو تكلمه بس تطلع معه بعد خلاص اتزوجوا عشان يتعود عل بعض وجهة نظر

[* شــــذى *]

يآدآفع البلآ ورآهـ الرجل "مثعب" ..ولآ عشآن التنآغم أنهآر>< مثعب ...هع
,,
الحين بعض الناس دقة قديمة المكالمات , يتناقشون بالطلعات ,,
وعن رأيي أبدآآ لآ أتوقع أن هذه المكآلمآت تسبب طلآقآ ولو بعد حين , صديقآتي كلموآ ولآ شآفوآ إلآ العافية خصوصآ فئة () من مجتمعنآ عندهم مهم جدآ المكالمات ..
طبعآ المكآلمآت بحدود المعقول ,, وعن أن الرجل والمرأة يرسم كل وآحد منهمآ خيآلآ بآهرآ و "أحلآمآ زهرية هع" فـ هذا حاصل سوآء كلموآ بعض أو لآ .. بمجرد أنه خطب يبدآ كل منهم بالتخيل , بالعكس يمكن المكالمات ويسمع منها وتسمع منه يقلل من تخيلآتهم الوهمية ..!

*..شكرآ ~

[الـصـمـصـام]

باعتقادي أستاذي الكريم أن هذا الموضوع غير منضبط بقاعدة و لا أصل ، و لكل إنسان تجربة ، و لكل عروسين ظروفهما الخاصة النفسية أو الاجتماعية أو المادية .. و هذا لا يعني أنني مع أو ضد .. و لكن أنا مع الظروف

شكراً لك على هذا الموضوع المهم ، و من تجارب الآخرين نستفيد ..

[صـآلـح]

كم ان الكلام اعجبني

شششكرآ لك

[•°انكسار الأماني°•]

السؤال / وش يحسون به ؟ والله بجد أسأل لأنهم محومين كبدي لاقالوا باب ماجاء في الرومانسية إلا باب الشفاحة والخفافة والطفاقة .
المكالمات بوجهة نظري حركة غبية يحاول أفراد مجتمعنا العيش من خلالها ضمن أجواء في الحقيقة ليست لهم .
شافوا كم مسلسل وتأثروا والتقليد الأعمى يضر , ترى المسلسلات يعرفون بعض قبل ومايصير تأخذون بعض وتتركون بعض .
اللي أقصده إن المكالمات لم تأتي بمحض الصدفة والأثنين يجهلون بعضهما تماماً كحالة زواجاتنا ,
يعني وقفت على إنه يكلمن وهو مايدري وش سالفتي اللهم قدر الله وخطبن , خوش تعارف !
وش بيتغير بالله ؟ وش اللي يبي يعرفه ؟ كلي مجهولة عليه وكم مكالمة ماراح توضحني .
وإلا كرمال جوع الرجل العاطفي سيُسخرني آلة لأجله !
هذا الواقع فلن يظهر الطرفين بجدية عدا في بداية الأمر ثم يفتحونها بحري .
يبدو لي أن المكالمات أول من سنّها مراهق وجُلَ من طبقها مساكين .
بقووة حركة مراهقين , حركة ناس طافيين ، ماصدقوا خبر إلــخ
أكره أن أجعل نفسي في موقف الجائع الذي قدمت له وجبة لذيذة .
لأني في الواقع أتألم من هذا الموقف وأحاول قدر الإمكان توضيح عدم إحتياجي للطعام ,
وأجدني أنجح في محاولاتي فيُخيل لمن معي أني أشبعهم بطنا ،
وأنا في الحقيقة أشدهم جوعا وليس ذنباً لي إن دُعيت لعشاءٍ رائع ،
فكل ماأتحاشاه لسان من الألسنة يقول عني ( ماذاقت العيشة )

مثال على الأكل وتحاشي لفظ ( مشفوحة ) وعليها نقيس بقية الأمور ,
قبيح أن نكون مشافيح بالطعام ,
مشافيح بالمال ,
مشافيح بالعاطفة ,
مشافيح بالمشاعر ,
مشافيح بالبنات ومشافيح بالرجال ,
وجميل أن نكون وسطاء كي لانفقد إحترام أنفسنا ولاإحترام الغير لنا .
أقول إحترام لأن الرجل ( المشفوح ) يطيح من عيني وأسأل الله أن لايجمعني به في مكان .
وأجزم أن الرجل يبادلني ذات الشعور كونه لايحترم المرأة ( المشفوحة ) وقد يملٌّها في قادم الأيام .

هذه وجهة نظري ، ( وجهة نظري )

* أؤيد الرسائل الراقية رفيعة المستوى أو بشكل أفضل الماسنجر ولايهون البي بي هه < مراهقة .

..

[•°انكسار الأماني°•]

اقتباس المشاركة الأساسية كتبها هنـادي ^^ هي تقول الرجال مشافيح وانت تقول انتي مشفوحه ..

لا أبداً ماقلت
كلهم ملح


/


على فكرة يامهستر أنا لاأنفي عني صفة الشفاحة ولكني أعترف بتفاديها ,
ولو تركت نفسي بفوضى عارمة لصارت مشفوحة - درجة أولى - كحال غيرها .
الفرق بين هذه وتلك تهذيب نفس ,

..

[ام نايف]

غريب أمركم !

>>>>>>>> لكل شخص نظرته ..

بس عذرا نظرتكم [ تفشل ] ~

أنا لو طلب مني بـ أني أكلـــم سـ أرفض بكل تأكيد (ولكن ليس بأسبابكم)لا بسبب أني أتنرفز بـ وضع الجوال ع أذوني ..

[قائد المجد]

انا تقريبا ضد المكالمات قبل الزواج لان سلبياتها اكثر
الايجابيات

[توبه منك يادنيا]

اقتباس ما الظاهر فيه امور ضروريه تستدعيهم انهم يكلمون

كلآم صحيح وآوفقك عليه بشروه آني برحل
وآللي يقول يتعرفون على بعض ونطبآعتهم آكثر
خلآل آلمكآلمه
آلآيأم جآيه آن شآءآلله وبيتعرفون على بعض آكثر وآكثر
وبيملمون من بعض

اقتباس المفروض مو تكلمه بس تطلع معه بعد خلاص اتزوجوا عشان يتعود عل بعض وجهة نظر

آذ قصدك يطلع معه بعد آلملكه
آنآضد هآلشي
بتكحلينها عميتيها يـ آختي

[شهدالحروف]

اقتباس المشاركة الأساسية كتبها توبه منك يادنيا كلآم صحيح وآوفقك عليه بشروه آني برحل وآللي يقول يتعرفون على بعض ونطبآعتهم آكثر خلآل آلمكآلمه آلآيأم جآيه آن شآءآلله وبيتعرفون على بعض آكثر وآكثر وبيملمون من بعض آذ قصدك يطلع معه بعد آلملكه آنآضد هآلشي بتكحلينها عميتيها يـ آختي

ليش جالسه بصالون عشان اكحلها واتوقع كل انسان وبئيته اذا انتي ببيئتك هشي مرفوض فهذي وجهة نظركم وكل انسان له وجهة نظربنهايه الاختلاف براي لايفسد لودي قضيه

[برفسور ملتمس]

[quote=•°انكسار الأماني°•;2918506][وإلا كرمال جوع الرجل العاطفي سيُسخرني آلة لأجله

جوع الرجل العاطفي هههههه .. ليش يعني العواطف صارت للرجال فقط !!

طيب وين الي يقولون : الربيع عذراء ، والصيف أم والخريف أرملة ، والشتاء زوجة .. ولا الي يقولون المرأة ملح الحياة ، ومدري ايش وتجيك بنت تتفلسف حنا وحنا .. واخر شي اعتراف ولله الحمد من امرأة فيما معناه أن العواطف ملك للرجل وان الأنثى دخيله عليها هههه < يضحك يقول وش هالتفكير الغريب العجيب ، ياجماعة الخير الحين العواطف ملك لمين للمرأة ولا للرجل أفيدوني واذا ملك لهم كلهم هل الحياء ملك للمرأة والرجل ولا للمرأة طيب ، هنا الخلاصة : هي ملك للجميع ولكن تختلف النسبة العاطفية أو الحياء ، لذا المرأة تمتلك نسبة أكثر من الرجل للعواطف والحياء

خارج عن الموضوع :

أتمنى بحال وجود موضوع عن ( الرجل ) أنك ماتاخذيه بهالعداوة والحساسية الزائدة ، لأنه للأسف كثير من ردودك ضد ( الرجل ) وأحس لو الود ودك كان تنفينا من الوجود .. وهذي مشكلة !!

لأنه قد الأنثى تاخذ موقف من رجل وتتشوه الصورة ولكن لايجب الحكم على جميع الرجال أنهم بهذا الشكل وبهذا الأسلوب وإن كان كذلك فهذا للاسف شخص جاهل .. وشكراً

[A . R]

بالنسبة لي ضد المكالمات ...


هو صح زوج بالحلال بس يظل غريب .. كيف اتكلم معه وانا ما اعرفه ..

بعدين كلام الحب اللي بيقولونه لبعض كله سخافه و كذب لان مو من المعقول انهم حبوا بعض من اول او ثاني مكالمه ..


يعني برايي ان الموضوع نفسه نفس المعاكسات ..


على فكرة اتمنى اللي يعارض الموضوع و بعض الردود يكون شوي محترم بمعارضته مو يجلس ينتقص ..