[{ صوت بريدة }]

بعد ماقرقنا عن المواضيع المكررة، وعن الحفريات والصبات والتصريفات والأسهم الي تقولون أنها ( مشفرة ) بالكشته ، وتقشعات الأسفلت ، والي نحاول ومنلهدين وفاقعة مرارتنا بأن تكون شوارعنا راقية ، وعشان نبحث عن حلول للي سجلو بمعرفات مشاكل الشوارع من قوة ماهي مسببه توتر لهم والبعض الآخر صارت عندهم وجبة رئيسية



قلنا اليوم نغير الموجة ، ونقلب 180 درجة ،


وجاء ببالي أعيش لحظات معهم ،

جلست افكر من اجلس معاه أجلس

حفرية ، صبة ، مفرق ، تحويلة ، سفلت

فقلت يالله بجلس مع حفرية << الحين يقولون سباك


بعدين غيرت رأيي


وقلت


لا

لا

لا


بجمعهم ، وأواكب ارائهم وأيش السلبيات والايجابيات



من دون هواش ولجة وصجة ودعاوي


وأنقل التفاصيل لكم من أرض الواقع ، وأنتم احكموا




فقلت يا أنا ياهم ،


فقررت

أني أجتمع


وأبجلس وأستمع وأشوف طلباتهم ، بنفس الوقت أعطيهم طلباتنا ، ونوصل لإتفاق


أخذت حبتين بنادول + بايسون


وبديت أمخمخ



قلت نشوف يمكن فيه ايجابيات ، صراحة طيبين مرة خصوصاً الصبة اناقز فوقها ماتقول شي


بعكس كلام البعض عنهم


وعاشرتهم بموضوعي ، وجلست معهم جلسة مصارحة


وأخذت سهم وضربته فوق الصبة < حركة المطرقة الي بالمحكمة = اعلان الجلسة

بدأ الاجتماع


وبدأت قرقتهم بس خذ تسليك ومن حفرية إلى صبة ومن صبة إلى تحويلة ومن تحويلة إلى سهم

ومناااااااااااا ومنااااااا

لين ماطلعنا بمغزى ..


فطلعنا بهالتخيلات :



يقولون


تخيل طريق الملك فهد واسع وإنارة من قوتها تشترك من أقرب ماصورة لافضت بطارية سيارتك ، وعيون القطط تلمع وأنت بالسيارة تحسك راكب طيارة وبتهبط ، وتطفي العالي عشان مايعمنك وتتفاجئ أنك مطفي اصلاً النور من قوة نور الشارع< تصدقون ضعت معكم> المهم ، ومن قوة ماهو عدال وأنت بالسيارة تترك الدركسون من اشارة الثمانين ماتضغط الفرامل إلا عند اشارة البصر ومافيه أي مطبات وتقشعات بالشارع ..



وتخيل معي شارع القناة الأربع اسفلت طويل زي يوم السبت ، وجديد ومافيه أي تشققات بالاسفلت ومن اشارة الثمانين إلى اشارة الخليج وهو مسطرة بس تدور علامة ( روكو ) .. ومافيه اشارات ابد ، بس دوار ونافورة لدرجة تشك أن الي موافق عليهم أسم ولده دوار وبنته نافورة ..



وتخيل معي طريق الملك عبدالله من كثر سلالم المشاة بس رافع راسك ، ومافيه اشارة الا مفرق صغير اجباري ( لمستشفى التخصصي ) < للإسعاف لاوبعد تحصل فيه مواضيع منزعجين منه ويطالبون بـ ( هيلوكبتر اسعاف ) ، ومن قوة مافيه تحويلات ولا أعمال صيانة الرواف والفهد غيروا نظام شركاتهم من مقاولات إلى دعاية وأعلان ..



وتخيل شارع الثمانين


وتخيل طريق النهضة


وتخيل شمال وجنوب بريدة ،

وابتـل


والنتيجة :








كثرة الحـوادث



كثرة التفحيط ، فماراح تكتفي بالي عندك راح تكون ( ملجئ ) لجميع المشهورين بالتفحيط والسبب زين شوارعك ..



كثرة الدوران لدى المراهقين والي يتميلحون بجميع الشوارع سواء بالشمال أو الجنوب والسبب ( الشارع الانارة يعطونك )



زيادة السرعات من العاقلين فالي يمشي بشارع وهو متكسر 100 راح يمشي بالشارع الجديد 140



قطع الإشارات


حملة لشراء الدبابات والتفاخر في الشوارع والاستعراض


نزوح الكثير من المجاورين والسكن داخل مدينة بريدة والسبب خروجها بهالمظهر ..



ارتفاع الاسعار في العقارات


التكثيف الأمني خاصة في المرور وأكيد في المقام الأول < ساهر >



< يمكن يجي واحد خاطم همن يلف )


ويقول أن الي يبي يفحط يبي يفحط لو بالخبيب



فا أقوله ، كثير من العقال لما يشوفون شوارع مفتوحة ، تحكهم يديهم يسوون أي حركة فمبالك المطافيق



، وللتوضيح هذي موسوعة للشوارع الي في بريدة قريبة من مواصفات الشوارع العريضة والمخصصة للتفحيط ، فنسمع بشكل أسبوعي عن حوادث بهالشوارع :



طريق المقطوع

طريق الدائري

طريق الرواف

طريق التشاليح

طريق الربيعية

أنا لست ضد التطور ، بل معاه ومؤيد له ، ولكن أذكركم أن لهذه الحفريات ايجابيات حتى لو كانت ايجابية واحدة فتبقى ايجابية


دعونا ، نفكر لو دقائق

مدينة الرياض : لماذا الأكثر حوادث بالتفحيط بالمملكة بعكس المدن الأخرى ؟

أعتقد ليس السبب الرئيسي العاصمة فأغلب سكانها من الأجانب ، بل لأن شبابها ليس لديهم أماكن ترفيهيه

مثل مايتواجد بجدة أو الشرقية البحر والمنتجعات ، أو جنوب المملكة أو شمالها سواء للأجواء أو لقربها من الحدود والسفر ،

لذا فمدينة بريدة هي الأكبر بعد الرياض وسط المملكة وايضاً هي القريبة من ناحية الأجواء وتوفر الخدمات ، فسيكون تفكير شبابها مثل ماهو تفكير شباب العاصمة ، التفحيط ، وغيره ، وستزداد المعاناة مع كل شارع جديد

في الختام لا أطالب بعدم الأهتمام بهذه الشوارع ولكن :

أذكركم في قوله تعالى

: {وَعَسَى أَنْ تَكْرَهُوا شَيْئًا وَهُوَ خَيْرٌ لَكُمْ وَعَسَى أَنْ تُحِبُّوا شَيْئًا وَهُوَ شَرٌّ لَكُمْ وَاللَّهُ يَعْلَمُ وَأَنْتُمْ لَا تَعْلَمُونَ}




،،

[أبوسياف]

غريب اتوقع انك بااااااااااالغت بشكل كبير الحوادث السرعه التفحيط ماله دخل بوسع الشارع او ضيقه او نعومته هذا طال عمرك يدخل فيه النضام طبق النضام وتشوف اللي يسرك سواء الطريق وسيع والا ضيق المشكله عندنا انه العسكري بعد مايسلم وينتهي دوامه يايمشي بموكب تفحيط يايفحط يعني النضام معدوم اما الشوارع والحفريات وغيره ماله دخل بكثرتها من قلتها

[{ صوت بريدة }]

أبوسياف

والله ياقبل سنة تقريباً اول ماضبطو الاسفلت بحارتنا ياشيخ نسمع تفحيط بشكل يومي ونخاف على سياراتنا

والصراحة كان الشارع يعطيك يعني عريض ، ومنور


الحين صار نهاية الشارع هذا والمهبط الي يفحطون فيه جفر لدرجة بعض الجيران يحطون براميل

والحمدلله عقب الجفر هذي ، صرنا مانسمع تفحيط ولاغيره ، بالعكس خفت الازعاجات

وأنا أقولها بكل صراحة / ماودي البلدية تجي تصلحه لأنه أن ضبطته اليوم أول خميس بيكون هجولة

[▪ بــيــتــــر ▪▫]

استمتعت بالقصة

صح عليك

عندنا بالحي مفرق دايم حوادثه ... وبعد الحفريات الي حطوها جنبه صاروا يهدون وقلت

يعطيك العافيه

[{ صوت بريدة }]

بكل مكاان وأنا اخوك

أنا عن نفسي لاشفت حفرية أول اتضايق وتقبس معي ، من تالي لاوالله تساوت عندي


ياخي صارت مشاكل الحوادث في الديرة أكثر من المشاكل الاجتماعية