[...ايام...]

بسم الله الرحمن الرحيم

اهلا وسهلا بإخواني اعضاء وزوار المنتدى المتألق ..
نعم هذا ماحصل لي في المركز الوطني للقياس والتقويم في التعليم العالي في القصيم ,,
لقد حصل لي بالامس القريب يوم الخميس 3 / 3 / 1428 هـ
فاليكم القصة بالتفصيل :
في يوم الاثنين الموافق 29 / 2 / 1428 هـ وردتني هذه الرسالة :
من قياس
اخنبار عبدالله ( الي هو انا ) يوم الخميس 3 / 3 قي جامعة القصيم .ا هـ
انا بطبيعة الحال رحت اتأكد من مسؤل الامتحانات في المدرسة هل مكان الاختبار في جامعة المليداء ولاكلية الشريعة (النفود) ..
فاجاب :
أن اختبار القياس أكيد بجامعة المليداء ..
قلت :
خير انشاء الله ,,
وبعد صلاة الفجر من يوم الخميس ذهبت انا وبعض الشباب إلى جامعة المليداء منطلقين من الدائري الشرقي مرورا بالدائري الشمالي ومرورا بطريق حائل حتى وصلنا حجز القرعاء (الله يستر)..
وانا واقف بالمحطة التي قبل حجز القرعاء اتصل علي احد الشباب ,,
السلام عليكم :
وعليكم السلام ,,
هلا عبد الله وينك ؟
قلت :
حول حجز القرعاء .
قال :
ارررجع بسرعة الاختبار بمعرض الكتاب بكلية الشريعة !!!؟؟؟؟
قلت :
صاز ولاتمزح؟؟؟!!
قال :
والله اني صادق , انا رحت للمليداء ولقيت لوحة مكتوب عليها :
اختبار القدرات (قياس) في معرض الكتاب بكلية الشريعة .
قلت :
انت وينك ؟
قال :
بالدائري راجع لكلية الشريعة .
قلت :
مشكور وماقصرت .
ــــــــــــــــــــــــــ
ساعة السيارة تشير 45 : 6 يعني باقي ربع ساعة على دخول الاختبار ,,,
وعشق الكامري بـ D ( تماتيك هلا! ) وأطلع من المحطة واركب الدائري الغربي
واكتل الموتر كتل 120 160 180 200 تهور ادري لكن وش اسوي وراي اختبار.
واطلع من عند عنيزة واصل جامعة النفود الساعة 04 : 7 وقت قياسي ,,
المهم : دخلنا مواقف المعرض الله يحيكم وقفنا وخليت الموتر يرتاح شوي ,,
راحوا الزقرت الي معي يناظرون الاسماء على بال ما اطفي الموتر ...
طفيت الذيبة ورحت لمهم ولقيت اسمي ابشركم .:D
رحت للبوابة ودخلت حينما ابرزت بطاقتي الشخصية (الاحوال) ,,
المهم :
دخلت وجلست بالكرسي وناظرت الساعة 20 : 7 ولا وزعوا ملف الاسئلة الا 30 : 8
قلت بنفسي لو انا داري انهم يبي يرصوننا هالرصة كان يوم وقفتنا بالمواقف منزل الفرشة ومتقهوين باقي القهوه والشاهي لكن يالله مشيها ,,
نرجع للسالفة :
ويوم وزعوا ملفات الاسئلة قالو :
لا احد يفتح الملف .
قلنا ميخالف .
ثم قالوا طلع ورقة البيانات من تحت الغلاف .
طلعنا ورقة البيانات .
تصدقون قعدوا مايقارب الثلث ساعة في ورقة البيانات , لكن يالله مشيها ,,
لكن المراقبين ماعندك احد يوجههم مشرف القاعة بمكبر الصوت مايعرفون البرتكول حق تنظيم الاختبار , لكن يالله مشيها ,,
وبعد رصة طويييلة قالو لنا افتحو ملفات الاسئلة وأبدو بحل القسم الاول ولكن لا احد ينتقل للقسم الثاني ترى نبي نطبق به النظام الجزائي ....
وبدينا بالحل ,,
وش تشوف طلاسم واسئلة تهول القلب .
الله لا يوريكم صعوبة الاسئلة وخاصة الكمي .
دخنا من هالاسئلة .
كل قسم له مايقارب 25 دقيقة او 27 دقيقة ..
واذا بغيت تذهب الى دورة المياه لازم تحط بطاقتك وجوالك .
والادهى من ذلك والأمر تصدقون متى طلعنا .........................
.
.
.
.
.
.
.
.
.
.
.
.
.
طلعنا الساعة :
40 : 11
يعني مايقارب 4 ساعات و 20 دقيقه وهم يقولون حوالي 3 ساعات .
يوم طلعنا ياانا استانست وناسه
والحمدلله طلعنا من هالجحيم وربنا ستر.
تراي منب اوحشكم ياالي اختباركم هذا الاسبوع ولكن هذه هي الحقيقة المرة .
الله يوفقنا ونطلع من هاالثانوية (ربنا اخرجنا منها فان عدنا فانا ظالمون )
وتقبلوا تحياتي ,,,,,,,,,,,,,,,,,,,,,,,,,,,,,,,[/color][/font]

[وحيد المعنى]

صدق القياس


يوجع الراس


وفقكم ربي لأعلى الدرجات

[عطــر الأمــاكن]

مرحبا اخي العزيز ...ايام...

هالجامعه ذي والله مهازززززل ..

والله ياخواني باول الترم رحت مع احد اخوياي للجامعه نبي جدوله هو يدرس بالجامعه اللي على طريق عنيزه [جامعة الغبرات ] ..


ذهب الى كليته قابولنا بقولة ماعندنا شئ
رح للعماده[العماده معروفه بجامعة المليداء] ..

قلت قوه لمليداء رحنا للمليداء ..

دخلنا للجامعه وحنا متفائلييين خير ..
الجدول وااااالم وجاهز مايبي الا طباعه فقط

المهم دخلنا والزززحمه والموظفين اثنيييين بس

والموظفين نفسه فوق خشمه تقوله سم قبل مايهرج ..


انتظرنا يوم وصلنا الدور قلناله الله لايهينك الجدول ..

قال باي كليه انت .. قال بكليه اللغه العربيه [تربيه]
قال عند كليتكم ماعندنا شئ حنا ..


يعنا ارجع لطريق عنيزه ومن ثم ذولاك يرجعونك للمليداء وعلى هالحال اللين الله يفرجها ..

دخلت على العماده قلت ياحبيبي وش ذا المهازل رح للمليداء ومن ثم نجي للميداء يقولون رح لكليك نروح للكليه يقولون رح للعماده ..

المهم دخلت على احد اقاربي بالعماده قلت
وين مكتب [مدير الجامعه] .. قال وش تبيبه قال ابقوله معاناتنا !!


المهم قالي بالدور السابع بس اكتب محضر قبل لاتدخل يمه

[انا نفسيتي تعابانه قوه] وبعذرنا والله يما رايييحن ويما راجعييين

المهم كتبت محضر نص صفحه وووو

ذهبت الى مكتبه دخلت على السكرتير

السلام عليكم ..

عليكم السلام

الله لايهينك ممكن ادخل على المدير

قال : خير ان شاء الله
قال المدير وووو

قلت يالحبيب ابومتعب وهو ابومتعب واعلى سلطه بالبلد فاتح بيبانه للمواطنيييين ..
وهذا ليش ..

المهم قال والله المدير عنده [جتماع] .. كالعاده والله

انا مدري وش الاجتماعات

مره رحنا للعميد يردنا السكرتيررر يقول العميد عنده اجتماع

اقتباس الله يوفقنا ونطلع من هاالثانوية

.

يالحبيب نصيحة محب لك !!

خطط من الان بماذا ستدخل

ترى الجامعه مغيره نظامها سنه تحضيريه ودورات مكثفه
لاتدخل على عمى وتضيع مثل ماضاع الكثير ..

والله يوفقك ويوفق الجميع يارب ..

[س ن ر]

الله يعينن اجل واااااااو هذا اوله والله ان ينعاف تاليه
اجل يبون يهبلونبي

[فطين]

الله يعين ويوفق

انا اختباري يوم الأحد
يبي يكزوننا اجل
الله يكتب اللي به الخير والبركة
ويطلعنا من هالثانوية سالمين غانمين
.
.
.
فطين
faTTen

[.: أبو مصعب :.]

الله يعيييين ..

اذكر يوم اختبر القياس قبل اربع سنوات جلست على الكرسي من 6 المغرب إلى 1 بالليل ..


ويبون الواحد يحل زين ...


أوله تقدم !!!!

[التويجري]

اقتباس المشاركة الأساسية كتبها ...ايام... الله يوفقنا ونطلع من هاالثانوية (ربنا اخرجنا منها فان عدنا فانا ظالمون )

ههههههههههه ..!

صدقني ياخيي ..

يبي يجيك اليوم اللي تتذكر فيه أيام الثانوية الحلوة ..

ساعتها راح تتذكر نفس الآية ..

وتقتنع أنك ظلمت الثانوي باستدلالك بها ..

ومثل مايقولون ..

أول الغيث قطرة ..

فلا تستعجل فأنت ياما وياما حتشوف بالجامعة هوايل ..

بالنسبة لقياس احمد ربك انك بالفترة الصباحية ..

حنا اخذناوه بالفترة المسائية وخذ تهديدات ..

اللي نصلي المغرب وهو غير موجود سيحرم من الإختبار ..

ونصلي المغرب عندهم ونبوبز على هالكراسي ..

ونصلي العشاء ونرجع ويوزعون الأسئلة بعد الصلاة بساعة وربع ..

ومانطلع إلا الساعة 1.45 بعد منتصف الليل ..

يمكن تقول مبالغة ولكن هذا اللي حصل والله الشاهد ..

وكانت الأسئلة ست فصول كل فصل نصف ساعة ..

قسم الكمي والله من الخراص اما القسم اللغوي والله من المخمخة عليه ..

لكن الفصل السادس خراااااااااص كميوه ولغويوه دخناااااا وتعبنا من الجوع والعطش ..

ومصخوه بملاحظاتهم بالمايك وتنكف هالمراقبين عليك لاتضحك لاتلتفت لاتقوم لاتقعد ..

وطلعنا وسحبنا على امتحان أعمال السنة لإحدى المواد بالثانوي من قوة التعب ..

ورجعنا لبيوتنا على كفرين مانشوف الأرض ..

[الـصـمـصـام]

..


ذكريات ..
الله ييسر أموركم و كل مسلم ..
و الحقيقة أن القياس مشروع تجاري ناجح

[al7nooooon]

إختبار إبراهيم برقم ********* الاحد 06 ربيع اول مجموعه **في القصيم ..!


الله يعين على الرصه وااااااااااااااااااااااوك المشكله كل خوياي اختبروا الخميس والله يانا زمل ،،

[...ايام...]

الله يعين يااخواني لكن يبقى القياس على طبيعة نفسيتك ...
وهونوها وتهون ...
مشكورين على المرور ..
محبكم ...ايام...

[بريدة العز]

ياجماعة الخير

تراني زملت

<<< تووه لكن ولو

[عطــر الأمــاكن]

اقتباس المشاركة الأساسية كتبها بريدة العز ياجماعة الخير تراني زملت <<< تووه لكن ولو

وسع صدرك يالحبيب ,,


وكل شئ يهون بالتوكل على الله سبحانه وتعالى !!