[بنت بريدة]

اكثر شي استغرب منه الي تلبس
عدسات وهي بسوق مدري ليش تلبسهن
او الي يضحكن بقوه تلقى مافيه شي يضحك بس
تبي تلفت النضر والله مايستحن

[تالي حياتي موووت !]

اقتباس المشاركة الأساسية كتبها مصري والله إنك صادق كل هالموضوع إستهبال وقلة حيا ومسوي لي فيها يصلي ياشيخ تلعب على منهو هذي إن كانت السالفة كله صدق عاد البريداوية والتسذب (كتكات ماشاء الله ) وأنا بكمل بسالفك شوي { ومير أقوم من النوم }

مايكذب الناس الا اللي يكذب وهذي قاعده معروف ...

لانه يسوي هالشي ويحس كل الخلق مثله ...

حلووووووه تجنن .. << عاد البريداوية والتسذب >>

هههههههههههههههههههههههههههههه

ياخوا فتحيه الأرانب و التأليف منكم وفيكم ...

[بقايا ذكريات]

عزيزي " الصباخ " أهنئك على موضوعك الجميـل .. واللذي يلامس الواقع

لاكن أتسائل هل " العبـدهـ " مخلوق مختلف غيرنا ..؟

وبغض النظـر عن " الدقريـه " أغلبية البنـات من بيض يخرجن بكامل زينتهن ..

والبعض من كبار الحمايـل

لاكن البعض من الناس يظن أي بنت تلبس مثل هذا اللباس أنها تريد المعاكسه

وهو غير صحيح فهي مثل الشاب اللي يلبس الثوب الطويل أو المخصر) ..
:::::::::::::::::::::::::::::::::::::::::::::::::: ::::::::::
وللتحذير ترى " العبدهـ " جزوومـه عادي تسطركـ لذالك كن على حذر ..!!

<--- متعقد من السوق إذا ما رجعت بضاعته شوي وتلفعن

دمت بخيـر وأكرر شكري وتقديري لشخصك القديـر

للمعلوميـه أخي الصباخ " تعجبني شخصيتك وتواصلك بالمنتدى ومواضيعك

لك كل التقدير

[المتزن]

اقتباس المشاركة الأساسية كتبها الصباخ هلا هلا بالمتزن ، هلا بالزين كله ، خخخخخخخخخخخخخ ، ياخي المفروض تدفع لي دراهم ، بكل سطر حاطن اسمك ، مسوي لك دعاية ، الناس تدفع علشان الواحد يسوي له دعاية وأنت زعلن علينا خخخخخخخ ،، بعدين أنت ماتدري أن حلق اللحية حلال ، تراه مهيب حرام ، يعني أحلق لحيتك عادي ، محدن قايل لك أنه حرام ، يقولون أن فيها اختلاف هالمسألة ،، بعدين ياخي ماتعرف ترد بأدب ، يعني أنا ماقلت أنك ثوري وإلا حماري وإلا كلبي ، أنا قلت أنك إنسان فارغ ومخك فاضي ، وهذا صدق والله ، ماوراك إلا الدجه وقلة السنع ،، بعدين ياخبل وأنا داخل المحل وهي تطلع المرأة تبين أغمض عيوني ؟؟ أنا شفته وألتفت ومشيت وكل هالكلام وأنا شايفه من أول نظره ،، بعدين ياخبل ماسمعت أنه أول نظره لك والثانية عليك ،، ياخبل أنا ماقلت أن مكياج السوق يخرج من الملة ، لا تصير زي ابن دواس تفكر على كيفك ، وتفسر باللي تبي ،، بعدين مهوب فخر إني أعرف وإلا ماأعرف وشو مكياج السوق ذا :D ، ولازم اذا أنا أعرف كل شيء إني أعرف أي شيء :D ،، ياخبل فكر شوي وبتعقل ولا تغلط على الناس ،، <========= يقاله ولد الصباخ ماقله ولا كلمة غلط ،، المهم يالمتزن أنت المفروض بكل رد وبكل موضوع وبكل دقيقة من حياتك ، لازم تدعي لي وتذكرني بالخير ، لأني جبت طاريك بموضوعي ، ولك الفخر في ذلك ،، خلاص يكفي هالرد كله لك مع أنك ماتستاهل كل هالرد ،،

ما يهذري المهذري إلا من حر السخونة . :D

لكن تراي خابرن لك تمبرا يناسب الصغيرين .

وتراه وحده بوحده .. أذكر حدا بزارين حارتنا أوجعه مخه مثلك وارتفعت حرارته , ويوم عطوه أهله ملعقة تمبرا خفّ شوي .

بس أنت حالك صعبه ويمكن يبي لك طنجرة تمبرا , علشان تخفّ ولاهوب أكيد بعد . خخخخخخخ

لكن ولا يهمك , أبحاول أدبـّر لك سرير بمستشفى الملك فيصل التخصصي منها تاخذ العلاج ومنها تشوف لنا موظفات المستشفى وش هن لابسات من عبايات علشان لا طلعت تكتب لنا وش شفت . :D


غفرانك ,,


وتقبل دعواتي لك بالشفاء العاجل 00
طبيبك الخاص : المتزن

[خوي السرور]

^
^
^

سؤال بريء يابو متزن : الرد اللي فوق ناقله من كتاب لأبو جديع ولا من مقولك ؟

[لمن الحياة]

الغلطان اللي يقرأ ها المواضيع
المشكله القصه تجذب وإنا متأخر أبا أنام قرأت نصه والله مادري عنك

[حبر الألم]

ياخي وراكم خربتو الموضوع بهالردود الباخية



يعني نقرأ للفائدة ( ونلقى إستهتار من بعض الأشخاص وقلة أدب )


والمشرفين يردون وجايز لهم الوضع


أنا من مبطي ما شفت ( إلزم الأدب )

[المتزن]

اقتباس المشاركة الأساسية كتبها خوي السرور ^ ^ ^ سؤال بريء يابو متزن : الرد اللي فوق ناقله من كتاب لأبو جديع ولا من مقولك ؟

يعني الحين انت جاي فزعة ؟؟!! :D

ترى الدعوى سواليف وانا اخوك .. يعني لا تحمـّس بالحيل .

وبعدين يا حـّول يالجديع , وش دخـّله بموضوعنا هو بعد ؟؟؟!!!

وكانك ما تعرف الرجال , تراه عالم من علماء المسلمين المعاصرين وانت تدري إن لحوم العلماء مسمومة ( كما هي القاعدة المقدسة عند " البعض " ويجب عليك أن تتقيد بها لئلا تـُتهم بالعلمانية والليبرالية وهاك البشكة من المصطلحات اللي انت خابر )


وتقبل تحياتي 00
المتزن

[الصباخ]

اقتباس المشاركة الأساسية كتبها التويجري

وش بك يا ولد التويجري ؟؟

وراه ضايقن صدرك :D ، قصدي وراك مستغرب ،،

[الصباخ]

اقتباس المشاركة الأساسية كتبها بريماكس حبيب ألبي / الصباخ صحيح أني حاشره معك ، لكن قيل قديماً : و من الحب ما حشر . فالشكوى لله تحملنا .. لكن بصراحة يا أبو ريم .. حشرة المتزن بالموضوع بصراحة ما له داعي إلا عاد إذا كنت تدور هوشه مع المتزن فهذا شيء ثاني .. و المتزن ما يقصر ما يحتاج تقول له مد و أمد .. أنت أشر له و أزهل الباقي .. شعواء و قليل أدب .. و الله قويه بالمرة .. أستاذ أبو ريم ، بما أنك حكمت على (المتزن) بأنه يمتلك تصرفات شعواء و كلام قليل أدب ، أتمنى أن تتكرم علي و تقتبس لي 5 أمثلة من كل حالة من مواضيع المتزن و ردوده السابقة ، حتى ننظر هل أنت محق في إطلاق هذا الحكم أم لا . أنتظرك إن كنت تسير على بينه و وضوح ، و لن أنتظرك إن كنت تسير على قاعدة (معكن يا خواتي) شكراً لكم يا سادة .. و دام الجميع في حب و سعادة

ياحبيلك بس يابوخالد ، أنت احشره بكل موضوع ، أنت تدري أني أحبك :D ، علشان كذا تحشره معي أنت ، لأنك تمون علي ، ياحبيلك بس يابوخالد ،،


بالنسبة لحشر المتزن بالموضوع ، ياخي هالسوسة هالمتزن ذا لازم نحشره بكل مكان وبكل زاوية ، زيه زي البس ، اذا حشرته نط بك ، لكن اذا نط بك ، مالك إلا إنك تعلقه ، وإن علقته المرة الأولى ولا تأدب، تبي تعلقه المره الثانية ويتأدب، هذي هي سنة الحياة ،،



بالنسبة للأمثلة والله ياأنت بلشة ، يعني لازم أحفر بكل مشاركاته علشان ألقى كلام شين ، لكن مالك إلا اللي يرضيك ، خذ هالأمثلة :

اقتباس المشاركة الأساسية كتبها المتزن طيب وبعدين ؟؟!! وش فيها لا صارت النجمة اليهودية بالجهاز ؟؟!! هي تعض ؟؟!! :D عفواً أخي ابن تيمية , ولكني مللت هذه السطحية في التفكير . وتقبل تحياتي 00 المتزن

اقتباس المشاركة الأساسية كتبها المتزن دعك من الصغار ولا تهتم بهم يابو خالد .. على فكرة : هو يذكرن بصيران " الصباخ " اللي ضرره أكثر من نفعه . وترى هالنوعية من االردود مثل التطعيمه .. تفيدك مع انها مملوءة بالفيروسات الضعيفة . يعني احرص على هالنوعية وانا اخوك , بس لا تكثر منه علشان ما ينقز مر . :D وتقبل تحياتي 00 المتزن.

اقتباس المشاركة الأساسية كتبها المتزن موضوع مملوء بالفراغ . لكنه بصدق بيـّن لي أن صاحبنا فعلاً صغير . أجل توه يدري إن فيه شيء اسمه مكياج سوق ؟؟؟!!!! لا ومن زين الطبايع قاعدن يبحلق بعباة البنت وعيونه و.... ( خصوصاً صورة الفراشة بالظهر :D ) وقاعد يفصل لنا المشهد وكأننا نراه ماشاء الله تبارك الله . وتراه مهوب حرام عليه يا جماعة . مناظر الحريم مهوب حرام على الورع الصباخ , لكن عباة الفراشة ومكياج السوق كبيرة من كبائر الذنوب وقد تخرج من الملة :D وهنّ واحد يقول له غير هالهرج . الحمد لله والشكر ,, وتقبلوا تحياتي 00 المتزن

اقتباس المشاركة الأساسية كتبها المتزن ما يهذري المهذري إلا من حر السخونة . :D لكن تراي خابرن لك تمبرا يناسب الصغيرين . وتراه وحده بوحده .. أذكر حدا بزارين حارتنا أوجعه مخه مثلك وارتفعت حرارته , ويوم عطوه أهله ملعقة تمبرا خفّ شوي . بس أنت حالك صعبه ويمكن يبي لك طنجرة تمبرا , علشان تخفّ ولاهوب أكيد بعد . خخخخخخخ لكن ولا يهمك , أبحاول أدبـّر لك سرير بمستشفى الملك فيصل التخصصي منها تاخذ العلاج ومنها تشوف لنا موظفات المستشفى وش هن لابسات من عبايات علشان لا طلعت تكتب لنا وش شفت . :D غفرانك ,, وتقبل دعواتي لك بالشفاء العاجل 00 طبيبك الخاص : المتزن

شف يا ألبي يابوخالد ، أنا حطيت هالردود علشان تعرف المضمون العام في الرد ، إن كان فيه نوع من السخرية :D ، وإلا نوع من قلة الأدب ، وإلا نوع من قلة الذوق ،،

شف لا تقعد تحط لي رد ثاني تقعد تفلسف فيه ، تراي ماحطيت الموضوع للفلسفة :D ،،


ياحبيلك بس ،،

[الصباخ]

اقتباس المشاركة الأساسية كتبها الحقو2 د لا تدقق ببنات خلق الله يا ابو ريم يا الي ما تستحي نطيتبك لا سلام ولا كلام دخلت بالموضوع سلقاطي ايقاله شي جديد يوم اني احطه باحمر ويا المتزن تكشخ داخل بالموضوع وانت مالك دخل سلام..

الحقو2 د يارجال ملينا وحنا ندقق :D ، بس الشكوى لله ،،

بعدين خل المتزن يكشخ بالموضوع ، يحق له ، الصباخ يتكلم عنه ،،


حياك الله ياألبي ،،

[الصباخ]

اقتباس المشاركة الأساسية كتبها خوي السرور بعيدا عن الموضوع المتزن هداهـ الله يناقش اموراً أختلف فيها كبار العلماء .. ليأتي هو ( وللأمانة لا أعرف مستواه العلمي ) ليكون مطية لمن هو جاهز للتعذر بأن فعله للأمر المختلف فيه.. بأن فلانا أفتى بجوازها .. ياخي وش لك بهالأمور ناقصن ذنوب ؟

وشوله تبعد عن الموضوع ، أنت ماتدري إن الأغاني حلال ، ترى المتزن يقول إن فيها اختلاف آراء :D ، بعدين أنت ماتدري أن حلق اللحية حلال ، ترى المتزن يقول إن حلق اللحية حلال ، وإن فيها اختلاف آراء بين العلماء [ أنت كذا يالمتزن ، أنت وفتاويك :D ] ، ياحبيلك بس ياخوي السرور ،،

حياك الله ياعزيزي ،،

[الصباخ]

اقتباس المشاركة الأساسية كتبها التويجري سبحان الله ..! وهل العلماء وُلدوا أعلاماً جاهزة .. كلٌ يؤخذ من قوله ويرد .. إلا خليل الرحمن -عليه الصلاة والسلام- .. لا حق لك في مصادرة حريتي في الإجتهاد على أصوله .. خصوصاً مادمت لاأخالف لاكتاباً ولاسنة .. وكذلك إن دعم هذا رأي من يعتد به ..

طيب وراك نطيت بالرجال ، ياخي ترى عندي حرية شخصية ، كل واحد يعبر عن رأيه ، ولا تجحف الرأي الآخر ، بعدين هو ماقال إن العلماء مايخطئون علشان تقول له إنهم ولدوا وهم يعلمون ، لكن فيه خطأ عن خطأ ، وفيه شطحة عن شطحة ، وإلا وش رايك ياولد التويجري ؟؟

[الصباخ]

اقتباس المشاركة الأساسية كتبها لويس دينيرو أعتقد أن الأخ الصباخ فكرة موضوعه الأصلية جميلة جداً ولكنه شطح فنطح ترك الزبدة وانتقل للهامش وأعطاه حيزاً أكبر مما يستحق مما أثر في الموضوع وجعله يبدو مهلهلاً وغير مرتب , ولعل الأخ الصباخ يبتعد عن الاستطرادات الغير محبذة خصوصاً إذا كانت في فنزويلا والموضوع في سنغافورة ..!

شكرا ً على إطراءك ، لكن وش معناة [شطح فنطح] ؟؟

ياخي مانيب ثور علشان أنطح :D <===== يفهم على كيفه :D ،،

الحين أنا أبي أعرف نص كلامك لغة عربية ، واسمك غربي وش لون تجي ذي !!


بعدين وش دخل فنزويلا وسنغافورة بالموضوع ؟؟


أبعطيك نصحية ياألبي ، ترى التكلف في الحديث غير محبذ تدري ليش ؟؟

لأن رسول الله صلى الله عليه وسلم ، أعطي جوامع الكلام ، فلم يكن كلامه غريباً أو شاذاً أو فيه نوع من التكلف والتصنع ، كان كلامه صلى الله عليه وسلم ، يفهمه الصغير قبل الكبير والجاهل قبل العالم ، هذا هو رسول الله صلى الله عليه وسلم ،،

على النقيض بعضنا ، يعتقد أنه اذا تحدث باللغة العربية الفصحاء ، وتكلف في الحديث وبدأ يأتي بالغريب والعجيب أنه فنان ومثقف ،،


نوع من التعقل ياإخوان ،،


أشكرك لرحابة صدرك ،،