 |
|
|
|
|
19-07-2008, 10:07 PM
|
#1 |
|
عـضـو
تاريخ التسجيل: Jul 2008
المشاركات: 19
|
اختكم ضحية شات ... داخلتن على الله ثم منكم تساعدوني
السلام عليكم ورحمة الله
بداية انا من المتابعين لمنتداكم الحيّ والمتفاعل الرائع وبما اني شفت فيكم نخوة وفزعة فناا طالبتكم طلب يااانكم تساعدوني او تدعون لي تكفون الاخوة المشرفين هالموضوع ماادري اي قسم يناسب بما اني جديدة عندكم فياليت تخلونة بهالقسم لاني طالبة العون من اخواني واخواتي الاغلبية يمكن يخيل له اني بضائقة مالية او مشكلة اجتماعية او.. او... لكن اقول لكم وبكل صراحة ويمكن جراءة ولحد يلومني لاني تعذبت وربي تعذبت اني في مشكلة وورطة عاطفية بالمختصر احب شاب من خلال النت تعرفت عليه لين طحت بشباك الحب رغم اني كنت بيني وبين نفسي اقول انا العاقلة وماتهزني هالتفاهات ولااحد يقدر يلعب علي لكن لاتزعزعت ثقة البنت من قبل الأهل تنحد انها تنحرف من كثر ماتنهز وتدور حولها الشكوك بس عشان عندها نت قصتي بالبداية وطالبتكم تقرونها ووالله العظيم اني صادقة بكل تفاصيلها ومافيه شي يجبرني على التحريف دامني خلف معرف ونك مجهول ..كتبتها عشان تدرون ان الشيطان ملعون وحريص يبدأ بالمسلم من خطوة لخطوة ..لين يطيحة بالوحل .. عرفت النت من ثلاث سنين السنة الاولى كان اطلاع وماكان فيه مشاركات بالمنتديات الابالقليل وكانت منتديات نسائية ومواضيع هادفة وجادة وتوعية وكنت من عائلة ولله الحمد متدينة جداً و تربيت على دور التحفيظ والمراكز الصيفية واحفظ من القرآن اجزاء لابأس بها ولله الحمد لكن كان ينقص بيتنا الحنان والثقة اقولها بمراااااااارة الجفاف العاطفي مسيطر على بيتنا بالكامل يمكن لان امي تربت على هالشي وابوي توفى وانا كنت صغيرة .. المهم اهلي كانوا يحرصوني من النت بشكل مخيف حتى ظننت بالبداية انه بمجرد الاطلاع على المنتديات يوقعني في ورطة مع شاب وماكنت اعرف شي اسمة شات حتى الماسنجر صديقاتي ومعارفي يطلبوني اني احط وكنت اخاف اقول مابي افتح للشيطان باب لين جاء اليوم اللي شدني موضوع كان يسخر من احد المشائخ وخذتني الحمية وسجلت في المنتدى وريت علية رد مفحم وكان المنتدى مثل هالمنتدى مرت الايام وتعمقت بالنت اكثر وخذتني المواضيع والسواليف مع الشباب والبنات والمزح لين صرت امون عليهم وجاء اليوم اللي مااقدر استغنى عن هالنت وخاصة المنتدى اللي انا فية.. استملدت اقولها بصراحة بالمزح مع الشباب في المواضيع وهذا كله كان داخل مواضيع ولايتعدى رسايل او شي من هالقبيل مرة من الايام دقت علي صديقتي كانت هي تدخل شات مع وحدة من معارفها ويسولفون بما ان ماعندهم مسن وطلبتني اني ادخل واسولف معها انا شهقت قلت صاحية انتي لانه كان يخيل لي ان الشات كله ذيابة ..قالت وشفيها وقامت تضحك علي وانحرجت انا قلت: لا مو معقول قالت لي اني بس انا واياك اللي نتكلم مافيه احد معنا ولااحد يشوفنا بغرفة خاصة وكنت لازلت على رايي لين اقنعتني.. كانت نيتها هي طيبة تسولف وتطلع بس واعرفها انها عاقلة هالبنت مرة عشان كذا جزمت ادخل معها بعد ماعلمتني على طريقة الدخول ولاول مرة ادخل الشات شفت سواليفهم ومزحهم واستانست رغم ان يديني ترجف وانا ارد على صديقتي مر اسبوع ولاعاد دخلتها وكنت افكر واقول كل القناعات اللي حاطينها لي الناس من النت طلعت عكسية هذاني اشارك بمنتديات وبمواضيع ولاشفت تحرش وهذي الشات دخلتها ولاشفت فيها غزل بالعكس كانت فيها مسابقات وحركة اكثر من المنتديات رغم ان قناعاتي ان كلها مراهقين طلع اغلب اللي يرتادها من فوق العشرينات عبر استطلاع سويتة بعدها صرت كل يوم ادخل بس كنت ملغية الخاص واتابع فقط اوسع صدري لين يجيني النوم واطلع وهكذا ..<<هذي مشكلة عدم وجود الأذان الصاغية بالبيت>> مرت الايام وانا اتابع واحيانا اتحمس وارد وجاء اليوم اللي اعجبني فيها احد الشباب كان هو اكثرهم اللي يجاوب على المسابقات وكلامه وسوالفه فيها ادب ومنطقية ولايعطي البنات وجة كل سوالفه مع الشباب ولاصارت فيه هوشة هو اللي يهديهم كنت اعده مثالي واعجبت فيه بالصراحة وكنت ادور الرومات لين اشوفه فيه واجلس اتابعة مرة وانا اتابعه ناداني ولااخفيكم يوم شفت نكي كاتبة ويناديني طاح قلبي وفرحت على اني مااعرفه ولايعرفني ترددت اني ارد يوم ناداني اكثر من مرة رديت وسئلني يمزح قال لاتكونين مباحث رديت عليه بايقونة ابتسامة وسكتت وقام يعلق ويكتب هو مستغرب من وجود نكي كل يوم ولااتكلم فقط اتابع وارد عليه بابتسامات تعبيرية المهم ذاك اليوم مانمت من التفكير قلت وش يبي وطردت هالافكار من راسي وبعد كذا يوم اضطريت اتكلم كانوا طارحين موضوع عن اسباب العنوسة وعزوف الشباب عن الزواج وشاركت معهم واعجبة ردي وشجعني من هالكلام ومااستجبت معه اكثر عشان مااطول عليكم جاء اليوم اللي صرنا نسولف مع بعض وبما ان سوالف الرومات اغلبها صارت هوشات كنا نروح بروم فاضي ونسولف سواليف عادية وكنت اعرف انه يستغبي بمواضيع نتكلم فيها عشان يستكشف وش عندي من خلال اسلوبة عرفت اني اعجبتة كان صريح بمعنى الكلمة وصادق وكان يقول اسمه للشباب بالكامل ومع مرور الايام كونا صداقة وتكلم لي عن ماضية وكان للاسف اسود ودمار مايمت عن شخصيتة اللي يتكلم فيها حاليا باي صلة بس تاب من كم سنة واستقام والصلاة حريص عليها بالمرة حتى بنومة حلمت كذا حلم اني انكشفت من اهلي وهذا الشي اللي كان يقلقني لدرجة أني فزعت من نومي وعزمت على اني اترك الشات نهائيا وبالفعل يوم جاء وقت دخولي بالنت دخلت الشات وطلبت منهم انهم يسامحوني اذا غلطت على احد لان نكي كان معروف عندهم وتربطني بهم علاقة هو لما عرف اني بترك الشات تبين من كلامة انه ضاق صدرة وكان يقولي الله يثبتك وادعيلي وقبل لااطلع بدقايق قال كلمة قال ليتني ماعرفتك !!!!!!!! ماعرفت وش يقصد فيها لكن تبين لي بعدين وش يقصد طلعت من الشات وداعسة على قلبي وكنت اقول (ومن نهى النفس عن الهوى فأن الجنة هي المأوى) وحذفت الجافا عشان ماادخلها ومع مرور الايام عجزت لااتحمل الحنين كان ياخذني له ولكلامه العقلاني وكنت استفيد منه مرة خصوصا وانه نفس مرحلتي العمرية ونفس تفكيري ماكان يستقبل على الخاص احد لامن الشباب ولامن البنات ومرة اضطريت اني اكلمه خاص وكان يرد علي على العام جاء اليوم اللي صلحت لي ايميل عشان المسن بما اني مشرفة قسم فضطريت اني اضيف المشرفات اللي معي على اساس افكار القسم حبيت هالشاب وكنا نسهر لين الصبح على سوالف ومواضيع احيانا ومزح وكنت احاول قد مااقدر اني مااخسرة على الرغم اني كنت افكر واقول وش مصلحتي يوم تربطني علاقه فيه ماكنت أؤيد صداقات النت من البنات لاتعدت للجوال كيف من شاب بس كان قلبي يقولي غير كذا انجرفت معه وحبيتة وكنت اخفي هالشي لين مرة كنا نتكلم عن الاغاني <<اتركها وارجعلها الله يتوب علي>> وقلتله عن اغنية قالي ماعرفها وكنت وربي على نيتي جبتله الرابط وسمعها وظن اني قاصدتها واعطاني هو رابط اغنية بس قالي اسمعيها وفتحي اذانك وقتها دريت انه كان يلمح لي صحيح اني فرحت بهالوقت لكن عقلي كان يردد لي ويقول يكذب عليك ؟ راحت الايام 3 شهور وحنا مع بعض جته ظروف هو وكان يغيب عن الشات وساعتها والله العظيم توصلني الصيحة اذا ماشفتة واحيانا يوصل سلامة لي مع احد اصدقائة اللي بالمسن ولاشافني يقولي مرت ايام وهو على هالحال لين جتني الجرأة وطلبت منه ايميلة عشان اراسله على البريد بس ماهو المسن ماتحملت غيابة هو انصدم لانه ماكان يكلم احد خاص كيف ايميل وتوقعت انه يرفض بس بينت له الاسباب عشان لاغاب يحط لي خبر وانتظرت ردة وتأخر وقالي والله مدري وش اقولك <<بتقولون اني مااستحي لكن واللي خلق سبع السموات اني لين الحين اقول شلون قلتلة لكن الحب ومايسوي>> قالي ابشري وعطاني اياه لكن تفاجئت انه اضافني عندة بالمسن ولااخفيكم مشاعر الخوف والفرحة مستمرة وكنت اول بنت يضيفني عندة .. توثقت علاقتي به اكثر ووثق فيني اكثر لدرجة انه عطاني رقم الباسورد حق ايميلاته عشان اصدق ان مامعه بنت غيري واعترف لي انه يحبني واعترفت له بس بعد ايام .. مضت الايام وعلاقتي فيه ازدادت اكثر لين جاء يوم العيد اللي فات ويوم فتحت المسن تقاجئت كان حاط صورتة الصراحة هو ماكان جميل ابد اسمر شوي ومعالم الرجولة الخشنة كانت واضحة عليه صحيح انصدمت فيه بس الجمال ماكان يهمني كان حبي له طاغي فوق كل شي ايضا راحت الايام ومرة كان بيجرب المايك حق المسن لماسنجرة واتصل علي وقالي اكتمي الصوت وكان حريص على هالشي وسمعت صوتة وياليتني ماسمعتة تعلقت فيه اكثر واكثر بعدها صار يكلمني بالصوت وانا ارد عليه كتابة واستمرينا على هالحال6 شهور كنت انتظر الليل على نار عشانة ونسهر لين الصبح وعلى هالحال وضميري يأنبني وانقطع عنه واحاسب نفسي لكن للاسف ارجع له وانا بعيوني الدموع حتى هو مرة قالي يا..... حبنا زي الهباء..!! قلت له كيف: وبما انه صريح بالمرة معي قال مثل منتي عارفة صعبة نبنية...!! وعلى الرغم اني كان عندي من المستحيلات واني ارفض فكرة الحب قبل الزواج الا ان هالكلمة كانت له صدى بقلبي وهي اللي خلتني اعزم اني ابعد عنه نهائي وادوس على قلبي صرحت له وقلتلة ضاق صدرة حيييل ونبرة صوتة تغيرت وطلبت منه يساعدني قالي خير ان شاء الله مثل ماتبين وخذا رقم الباسورد حق ايميلي عشان يغييرة هو ولااقدر ادخل ومن حسن حظي اني ماكنت احفظ ايميلة اعترف ان قلبي تقطع وصحت وش صحت ؟الا شاهقت من الصياح على فراقة والصدمة انه هو يودعني تلعثم وفجأة تغير صوتة وعرفت انه صاح ذي كانت قاسية علي من جد لانه ماقد نزلت دمعتة الا لشي كايد وهو كان يرددها لي حتى جده يوم توفى كان يقولي اللي نزلت دمعة بس ماتحملت قطعت الخط عنه وطلعت على طول وقضيت ليلتي كلها صياح وحزن عليه وطلبت من الله العوض بما ان هالقرار ارضاء لله ولاهلي اللي لاشفتهم احس ان عيونهم تشك فيني تمر الايام وكل ماتذكرت صوتة وصورته اطردها عن خيالي لكن ارجع لها غصب واحس بالحنين لها وادعي الله انه ينسيني اياه وينزع حبة من قلبي مر كمان 3 اسابيع ونفسيتي وربي زفت لا من البيت ولامن فراقه ولا تذكرتة يواسيني من اجواء بيتنا كنت اشوفه بالحلم وحنيت له كثيير وكنت ادخل الشات اللي كنا فيها اول بس للاسف مو فية لانة عاهدني اني اصير اخر بنت بحياتة وكل يوم على هالحال ادخل الشات يمكن اشوفة والله بجنون استمريت اسبوع لين يئست وكنت في رووم الشعر وانقل ابيات واكتبها وكلن يكتب بيت شعر ومن ضمن الاعضاء اللي يكتبون كان هو بس متخفي بنك ثاني ويدري فيني بس ماكنت دارية فيه ويوم شاف كل يوم ادخل رووم الشعر راح رجع اسمه الاول والله شهقت شهقة من الفرحة وجيت يمة بجنووون كان يقولي اللي بيني وبينك انتهى يابنت الحلال ووين همتك وعزيمتك ؟؟ وكنت اطلبه واترجاة انه يرجع لي والله عشت عذااااب رجع لي ورجعنا مثل اول وهو من فرحتة جاب لي هدية بطاقة انترنت لمدة سنة واستمرينا لين هاليوم قبل اسبوعين قلت له بسافر وسافرنا ورجعنامن اسبوع وادخل المسنجر غير متصل واشوف رسايلة تفجر الصخر واحن له لاني سمعت محاضرة لعصام العويد وتأثرت فيها مرة ومعزمة ثاني مرة اتركة بس وشلوووووووووووووووووووووووووووووووون؟؟  نخيتكم مانخيت رخووووم يااهل بريدة.. واللي عنده ردود شخصنة يحتفظ فيها لنفسة لاني مو ناقصة انتظر ردودكم على احر من الجمر اختكم.. في ورطة.. ومن هذة القصة اللي عشتها انا ياليت يعتبر هالموضوع مفتاح للنقاشات عن اشباع الأسرة لمشاعر ابناءها وأعطائهم الثقة وتعزيزهم وعدم تهمشيهم |
|
| الإشارات المرجعية |
| أدوات الموضوع | |
| طريقة العرض | |
|
|
النمط الأحادي