 |
|
|
|
|
11-10-2008, 01:31 AM
|
#1 |
|
عـضـو
تاريخ التسجيل: Sep 2001
البلد: &^ ضراس المحتلة ^&
المشاركات: 3,476
|
== بعد أن وافقت أمي بالإمراح عند خالي ==
ــبـــســـمــ ــالــلــهــ ــالــرحــمــنــ ــالــرحــيــمــ
الحمد لله ثم الحمد لله << == فك الله عينه على هالمقدمات المقدمة >> ياهلا والله بالحبايب وياهلا بالمزايين ومبطين عندكم يا ألبي انتم قلنا قبل الدراسة والدوامات خل ندسمهم بموضوع ،،، <<< === ينكت لا أرميه  السالفة ومافيها يمكنكم تدرون الموضوع طويلن عريضن طايلن قاصر ما أدري معين أبدأ هاجن كشرتي ياما فتحت باب البايكة ياما صكيت باب الحريم الموضوع ولب الموضوع وزهمة الموضوع << == شكل الاخ تووه آخذن دورة بالوطنية أمي ياعله بالجنة وأبوي ياعله مايطب النار ماعمرهم وافقوا إني أمرح عند خالي إلا بشق الأنفس <<< == متعوبن عليه بشق الأنفس <<<- - - لو تعصرون شكسبير ولوس أنجلس ماجابو شق الأنفس هذي ،،، بالعزر والغرابيل والمساحر وتكفون يوافقون أمرح السالفة وبسم الله نبدأ في يوم الخميس 11/8/1408هـ <<< == والله ياهو كلاااااك يقاله جاب اليوم بس انه حول هكالوقت وبعد صلاة الظهر من هكاليوم الخميس أمي :: يا أبوسعفة ودنا نروح لخوي اليوم ان الحريم متجمعات ومرت اخوي تقول تعالوا خل نتعلل أبوي :: طيب ومن الي يبي يجي من الحريم أمي :: والله الحروة ان فطيمة تبي تجي - ومرت خالد - ونوال مرت عبدالعزيز وأم محمد ويمكن بنات صالح السليمان وخبرك كلهن مجتمعات أبوي :: طيب أجل لا صارت الساعة خمس خلوكم زاهبين أمي :: سم سم الله يعدي عنك يا أبوسعفة أبوي :: سحب قطعة فاين وقعد يمسح النظارات يفكر بروحتنا أمي :: يالله يا بنات بسرعة تزهبن أبوكن وافق نروح لخوي اليوم يالله هولمن أنتي روحي استشوري البنات وانتي بسرعة حممي البزارين -- البيت خبة وصارت لجة وماتسمع إلا صوت الاستشوار والدينمو والصخانة أمي يوم دخلت علينا بالغرفة الساعة 3 الظهر يالله قم يا سعفة الله يعطيك القطع قم اشر خبز من البقالة علشان ما تشغلوننا عند خالك تقولون جوعانين مهب لا رحنا لمهم اشغلتونا بفتح الثلاجات وأكل الموز أنا :: سروال خط البلدة وفنيلة علاقية وحافي وأمشي طريلون لم البقالة وبعد ما بلعت أنا واخواني وخواتي بعضاً من الخبـيزات < = مهبولة اللغة هالحين الساعة 4.30 من عصر هاليوم الخميس أبوي :: دييد دييييد <<<< واقفن عند الباب يطنب أمي :: يالله يا بنات أبوكن يطنب بسرعة ترانا قطعناه أمي بآخر الدرج بالدور الأرضي والبنات فوق بنت1 :: أصبري يوه مالقيت المشابك ونهنبوه أمي :: أفتحي الكمدينة ويمكن تلقينهن تحت مكينة الخياطة بنت2 :: لا لا يوه أنا شايفتهن بدولابي أمي :: يالله حطيهن بالشنطة وبسرعة ترانا صيفنا البنات وراء بعض مع الدرج وكل وحده شايلتن بزر وحدة من البنات وطت عباة الثانية وردت الثانية تقول ( قطعن يقطعتس ، عمياء أنتي ما تشوفين ) ردت عليه تقول ( أحلفي عاد ) عاد أنا وراهن أقول :: عاد ولا ثمود <<<<< أحلق شنبي أن تساني منول أعرف عاد ولا ثمود ألمهم يوم ركبنا السيارة أمي قدام والبنات بالمرتبة الثانية وأنا ورااااااء من حسن الحض أمي شايلتن معه باغة صامولي وكرتون جبن وخذ يا ملط بالسيارة وكل ما زينت وحدة أرسلته وراء ،، تقول يالله كولوا <<< === تحلف اننا بمجاعة أم سعفة بس ولو هذي الأم الله يخليه لنا ويوم وصلنا خالي ونزلنا كلنا بقت أمي يقاله تبي تقول لأبوي سر أمي :: الله يعافيك يا أبو سعفة أبي عشرة يمكن ألقى البزارين كلهم معهم أريل وسعفة والبنات يصيرون مامعهم شيء علشان أعطيهم يشرون مع الرضاعين من البقالة أبوي :: دوتس هالعشرة وردي الباقي عااااد ::::: = نزلنا ،، ولعبنا ،، وأكلنا ،، وسنـتـرنا ،، وحلتنا على العمال ،، وكسرنا النجفات ،، ولحقنا سيارة الفليت وسدينا الخرطوم حقه لمين خرب ،، وقمزنا على الجيران وكسرنا شجرهم وأكلنا من شجرة العبري حقتهم لمين قلنا بس ،، ورحنا لم المطعم وطلبنا وهجينا ،، وحلتنا بلكاش على الحفريات ،، وشغلنا العربجية حقت العمال ودوسنا ديزل وفركنا ،، ولفينا شطرطون على بوري أبوالجيران الي معه كرسيدا قديمة وهجينا وحنا قاعدين فوق الملحق بس نسمع صوت البوري وميتين من الضحك ،، وأعلقنا بالجرايد الي بالبراحة ،، وصطـّـرنا واحدن فاتنن على ولد خالي بآخر الحارة ،، وشلحنا تونه وديو من الأسواق الي باللفه ،، وصرخنا بمكرفون المسجد ،، وكسرنا البيض حقت القوقسية الي بالمنارة ،، ونسمنا كفر الشيول الي موقفن بدحدير الحارة ،، وعبينا تفيخ ماء وفلقنا بهن الهنود ،، وشرينا بخاخ أزرق وكتبنا على كل جدران الحارة ذكريات أبوفلان وأبوفلان ،، وفتحنا باب الشبك حق الغنم لعجوزن بآخر الحارة وهجن الغنم ،، ونطلنا من مطبخ خالي ليفة ناعمة وشبيناه وبدينا نلعبهن بالحارة هماهن يطلعن شرار ،، ولعبنا بالشحنة وبدينا ننابط من فوق الملحق على الشحنة وصرخنا بالعمارة ألي توه تعمر بجنب بيت خالي ،، ونطلنا علوك من غرفة الشغالة عقب ما نآبطنا فوق سريره ،، وما هنا شيء استغفر الله العظيم والشكر ما سويناهـ = وش قلنا الموضوع :: بعد أن وافقت أمي بالإمراح عند خالي .. هنيا زبدة الموضوع . أييييييييـــــه <<<< يوم صارت الساعة 11 بليل ،، والله من القلق الحلقة الأخيرة ،، أمر يجي أبوي ويطق الباب والله ياحنا زملنا بعد فتحت له بنت خالي الصغيرة وأنا وراء الباب كسلاااااان أويدز مع الفتحة وماغير أسمع إذاعة لندن وصوت تفريك الرادو من موتر أبوي أنطلقت أنا من لم الصالة واثر بوه عيال خالي يقولون لي وراه ما تمرح عندنا أنا :: والله أنه فكرة خيال مهيب معقولة ،، وراه ما أقول لأمي تقول لأبوي أغديهم يطيعون ،، قلت لأمي يا يمه ودي امرح ، قالت والله ما علي منك رح اسأل أبوك واااااااااوك ،، أبوي مافيه أمل يطيع تكفين قولي له أنتي أمي :: وراه هالحين يا سعفة ما تروح ولا صار الاسبوع الجاي أنا أقوله أنا :: يوه يوه تكفين يا حبيلتس ودي أمرح بس هالمرة وشحيت ولد عمي هكليوم جاي لم خالي وأمرح وأنتي تعيين أمي :: طيب طيب أبروح هالحين أقول لأبوك بعد ما ركبت أمي بالسيارة قالت لأبوي شف يا أبوسعفة ترى سعفة يبي يمرح أبوي :: لالالا يقعد يشغلهم ولا ينامون ، ولا اجتمعوا هالرضاعين حاسو وأشغلو أخوتس بهالحالة كل عيال خالي عند الباب واقفين بالدرج ينتظرون البشارة أبوي :: يالله روحوا تسالموا سعفة خلوه يطلع ولا دخلت عليه ولحته باللي - عيال خالي :: تكفا تكفا يا أبوسعفة خل سعفة يمرح لو هالمرة أبوي :: يالله بس هناك روحوا تسالموه ،، أنتم لا اجتمعتوا صرتوا شياطين أخوي الي أصغر من راكبن بالسيارة :: ويقول لأبوي يبه لا يمرح وش حيتي أنا ما عمري أمرحت أبوي :: لالا مهب ممرح لا تقعد بعد أنت تشغلنا أبوي لعيال خالي :: يالله روحوا تسالموا سعفة ولا تراي أبدخل عاد زوجة خالي عليه الجلال وواقفتن عند الباب وتقول لأبوي :: مسيك الله بالخير يا أبوسعفة تسيف أنت الله يعدي عنك خل سعفة يمرح عندنا خله يستانس مع العيال أبوي :: والله الرآي عند أم سعفة ما أقول شيء << -- يقاله أخلاق مرت خالي :: هاه يا أم سعفة وش تقولين خليه يمرح يحّول أمي :: أخاف يوذيكم يا بعدي أنتي وولدي منتالي صايرن شيطاني مرت خالي :: لا عاد هاو ،،، يعقلون وينامون ان شا الله .... أنا ... ما دريت بهالمفاوضات ولا دريت أن أبوي وأمي موافقين كزيت حدا عيال خالي وقلت رح قل لأبوي تراي أبمرح غصب ؟؟؟ راح ولد خالي لم أبوي وقاله :: يا أبوسعفة ترى سعفة يقول أبمرح غصب أبوي :: غصب ، وشي غصب قله بس ماهنا امراح خله بس يمشي وجع أمي :: عاد قلنا لهم ميخالف أبوي :: أيه بس يقول غصب هذي ما تمشي علينا صارت قيقهيه (( عاد أبوي نزل وكسر له من شجرة البرسوبس حتى يدخل البيت ويلوحن )) عيال خالي :: سعفااااااهـ سعفاااااااه ،، هج ترى أبوك دخل يبي يرقى عليك هجججج أنا :: فركت له مع الدرج وأدخل الصالة الفوقية حقت خالي وأدور لي مغبا ياولد ياعدل يا بدل وهذا ولد خالي وراي يقول ادخل بالدولاب قلت له :: لا يا ابن الحلال ان رقى أبوي يدورن والله ان يفتش الدواليب مير نبي لنا مغبى ما يكتشفه لو هو أكبر ذكي ولد خالي ،، يالله يا سعفة أنبطح خل ألف عليك الفرشة أنا سويت انبطاحة ولف علي الفرشة تقل تووه مشريـّـه وأنا صايرن بالوسط ماغير مبحلقن اعيوني لم الجدار أخاف يمر ابوي وأشوف رجلينه همن عاد أصرخ والله وهذا صوت أبوي يرقى مع الدرج يصارخ ،،،، ياااااسعفة يا تبن وينك عاد يقول لولد خالي وين سعفة وين انت مغبيه ولد خالي :: يا ابوسعفة أنا مثلك أدوره أبوي :: والله ما ادري عنكم إباليس عساكم للماحي ، مير خل اشوفه أوريك به أنا :: بيني وبين نفسي ،،، وااااااوك يا حزني من ابوي (( أبوي نزل وراح لم السيارة وركب وأهلي كلهم راكبين )) عاد ابوي فاتحن الدريشة يقول لولد خالي شف رح قل لسعفة والله اني لا أغبي سيكلك ولا تشوفه أبد وكمبيوتر سيقا تراي مانب شاريه لك ،، حتى المرة الثانية تتوب ومشى أبوي رايحين لم البيت وعيال خالي منابط ورقص فرحين إني أبمرح عندهم وهذا ولد خالي رقااا لمي فوق يطلعن من الفرشة ، وعاد قالي الخبر المحزن إن السيكل راح علي وكمبيوتر السيقا مهب مشرين لي ،، آآآخ يا الحزن قعدت أتنفض من غبار هالفرشة هالي جالدته الشمس لمين قالت العيد الليلة ونزلت أنا وعيال خالي للصالة وربضنا بذاك عاد يقالنا طاهرين ماهنا شطانة عاد يوم حسينا ان الأوضاع مستتبهـ <= = عاد وش رايكم بمستتبه منب لغة ونطلع للحوش وندعيه زيطه من تفحيط كفرات السيكل وخذ ياتصبيخ لمين دخنا ونجيك يا الطاهرين ونولع الدينمو ونملى الحوش ماء ونكب فيري وخذ ياتزحلق صرنا ملاعب صابونية أحسن شيء ماغير بلاطة مرتفعة والله ياهي شققت فخوذنا بس الامور زينة إلى هالحين وندخل عاد للصالة وحنا نرطش مياههـ وماهنا فرشة سلمت منا ونرقى مجلعدين ماتسمع الا خرفشت هالثياب الرطبة تحلف اننا لابسين حفايظ ،،،، ونجيك مجلعدين لم غرفة الشغالة ونآخذ شبك الثياب ونتلبس وألبس ثياب عيال خالي ،، صارت اشكالنا مصيفين هذا كمومه طوال وهذا ثوبه قصير ألمهم عدت الليلة بسلام <<<< أمحق من سلام ونقوم من فجر الله مستعدين لشطانة جديدة وتجينا هكالفكرة الي بالمقص تدرون وشي نروح نلعب كورة بالحفريات ،، وندوس حافين قلنا قبل نلعب لازم نحلت حصا ثم ننزل نلعب بس أعلمكم له طعم بالرآآس ريحة رمل وريحة بيارات ،، خليطي الدعوة عاد يوم صار حول الظهر ونقمز فوق الملحق ونضف الحطب حقات خالي ونروح نعلدز بهن بالبراحة عاد يقالنا نحب الضو وحنا مصيفين ألمهم // خالي يوم قام يصلي الظهر ولا هذولا الجماعة تقل ضايقن صدورهم ماغير يفضفضون لخالي ويشرحون المآسآآآة الي صايرة هذا شجر بيتهم طايحات ومتكسرات وهذا كفر سيارته منسم وهذا بابهم كله حصااا وذا مليان جداره طين ويا حالة لا تسأل عنه يوم صار نص العصر من هكاليوم وانا تفحيط بالحوش والله واشوف عيال خالي داخلين ضايقن صدورهم يقولون تشششششش تشششششش تششششششش قلت لهم وراه ،،،،، قالوااا أبوك عند البابــ عاد انا قلت مثلهم تشششششش واااااااوكـ والله واطلع واتكي مع ابوي وانا يقالي أنواع البرائة وابوي ماغير هواش وماغير يردد أكيد انكم موذين أكيد انكم مخربين ،، أكيد انكم قامزين وانا صراحة طول الطريق خانقتن العبرة ودي أرجع للوناسة بس راحت راحت راحت راحت ..... وطلعت راسي مع الدريشة وأنا أقول <<<-- - - تسذبتن طيبة ويـــن ايـامـنـا ويـــــــن ........ اللي قضــيــناهـا راحت في غمضة عين ......... يـامـحـلا ذكراها وانتهت القصة وتراي ياحبيلكم انتم ويابعد تسبدي معطيكم الموجز قلت ماودي أخليكم تملون وأضيق صدوركم عاد ماقلت لكم عن ام الجيران الي نطلنا منه عسكريم << يقاله ماقالهـ بس انتم لاتشرهون علي وهذولا الصغارين عندهم طاقة عاد بذمتكم وين نفرغ الطاقة <<<< = = = طيب وراك صحت محنب مثل جيلكم بلايستيشن و لعبة ترافيان حنا ذاك الوقت ولد النعمة طاقن له ابوه أتاري وسلامتكم وانتم سالمين يا حلالي انتم وعاشت ايامكم ياخلفهم والصراحة انه ضايقن صدري انه قضى هالموضوع ودي أسولف عليكم أحس لساني يحكن ودي أسوي قرقر مير أبشرو أتعصر وأطلع لي موضوع ثاني بس أخاف يصير قيصرية مثل هالموضوع الي طلع له قرون كل يوم اليوم ودي انزله المنبطح وراء الشاشة (__(__(ـــــــــعــفـــة ®
__________________
 |
|
|
| الإشارات المرجعية |
| أدوات الموضوع | |
| طريقة العرض | |
|
|
النمط الأحادي