[الـدعساوي]

السلام عليكم....

اولا الصباخ ومدحت وكل حقين الرياض لايقرون الموضوع ولا لايقعدون يهوشون
هلا والله بالفاضين راعين البعاريين مايعرف يقدم

تصدقون مانيتي احط موضوع بس يوم شفت كل من قال انا عضو حط موضوع قلت وش ناقصن ابربر عليهم معنى ابربر(اسولف)راجع القاموس الهندي للدعساوي 608

المهم مالكم بالطويلة ....

بقولكم وش عندي بس لاحد يتطنز يقول والله يانت فاضي ماعندك هرج على كيفي الكمبيوتر كمبيوتري والكيبورد كيبوردي


عاد تصدقون وانا اكتب الموضوع تمطر عندنا انت مثلي << يقاله بالمريخ

اقولكم يوم الاربعاء رحت للرياض اودي اهلي ولأهلك عليك حق قلت خلن اوديهم للرياض؛؛؛يقاله مب غصب عليه

المهك راح اليوم الاول بسلام يوم صار يوم الخميس وبالتحديد بعد العصر وبالتحديد بعد خروجي من هايبر بنده , الا ارفع راسي للسماء واشوفه خيال قلت بس ان شاء الله مطر وجهي وجه خير يوم رحت للرياض بدت تخيل,,,, اللهم لارياء

وبديت ادور بالرياض يمين ويسار ادور عن مطرة لكن ماعندك شي قحط قلت مادامه تسذا خلن ادق على احد الشباب ببريدة اشوف عندهم مثلنا ولا لا يوم دقيت قال ماعندنا الا شمس قلت ايه قلعكم يوم رحت عنكم ماجاكم شي لكن يجيب الله وانا ادق من واحد لواحد واتطنز عليهم وفرح بالخيال

المهم يوم صار اليوم الثالث يوم الجمعة بالظبط وبالتحديد بعد ماقمت من النوم مع اذان العصر <<طبعا مصلي تراي لاحد يهوشن

الا اشوف الجوال به حوال عشرين مكالمة يوم ناظرت ولا بعض الشباب داقين علي قلت وش عندهم المهم دقيت وقلت هاه وش السالفة قال عنكم مطر انا بغيت اتسذب بغيت اقول ايه بس تذكرت انه حرام التسذب<<< والله من الصدز

قلت: لا.
قال :جنا عندنا امطار وعجزنا نمشي من المطر والموطأ(هذا حي اسمه الموطأ مب كتاب الموطأ)

عاد يوم شفت انه صدز قلت الله لايعيد الرياض وادق على اهلي قلت تولمي يالله انا جاي بنمشي وامر اهلي واشيلهم ودوسان لبريدة واشيل اغراضي من محطة القصيم<<المحطة هذي ماأطلع من الرياض الا لازم اوقع عنده تعرف القصيم

والله ويذن المغرب قلت الصلاة ببريدة مع العشاء ودوسان على الهلي علشان هالمطر تقل يبي يطير

عاد وانا بالطريق احظرم على الرياض واقول بنفسي امس مستانس ان عندهم سحاب واليوم ببريدةمستانسين عندهم مطر

عاد اهلي يقولون لي ترفق لاتسرع وش وراك

عاد(عاد ولا ثمود)ينكت لارنعه انا اقول وشلون مااسرع وراي باتسر جامعة اخاف اتأخر بالنوم عاد أهلي ياحوول مصدقين وانا صادز بس مب كله علشان الجامعة

والحمد لله يوم تعديت المجمعة الا اشوفه تبرق بس ماأشوف مطر ودوسان(يعني اسرع)قالها الدعساوي في كتابه:041:

لين وصلت قبل تفتيش ام سدرة واشوفها تضرب بذاك عجزت امشي والله من الوناسة وبديت اطعس باهلي بالمطينة من الفرحة

ويوم وصلت بريدة وادور مطر واثره واقف المطر قلت لاحول وش بي انا شكلي من امس يوم اغتر بنفسي واقول السحب اللي بالرياض من انا

واستغفر الله واتوب اليه ولله الحمد

ويوم صار اخر الليل يمكن الساعة 11تسذا بدت تمطر ولله الحمد

اللهم صيبا نافعا

س1/ كم مرة ورد هذا الرمز
ماستفاد من السالفة
1/الرياض احسن مدينة بالمملكة ,,,, خايف من حقين الرياض
2/المطر يعيد للنفسة البهجة والفرحة
3/يجيب طاعة الاهل
4/السرعة قاتلة ,,,, مب يسرع ابد
5/عدم الاغترار بالنفس,,,هذي صدز
6/النوم مبكرا لانه وراك جامعة
وبمان الله لان وراي كشتة باتسر قصدي جامعة