[أبو سلمى]

السلام عليكم

بلخير

يمكن اللي يقرأ منكم الموضوع يحسبن متعصب للأشياء هذي .. لا والله ما همّتن ولا قامت عندي ولا قعدت .. وللمعلومية تراي عبد أنا لا تحسبونن شيخ .. بس أنا بصراحة ما كتبت هالموضوع إلاّ لحل المشكلة .. مهب مشكلة إننا عبيد وهم شيوخ ..؟؟ .. لا لا لا .. المشكلة اسمعها بهالسالفة اللي صارت لي :

حنا مجموعة من الشباب ، أول شي كنا حلقة ، بعدين كبرنا وصرنا مجموعة من الشباب لنا استراحة نطلع به كل يوم خميس مثل ما أنتم عارفين

يوم من الأيام انضم لمجموعتنا واحد - من فئة عبيد - ( زقرتي ) شوي ، يعني بالأصح : عربجي نوعاً ما .. الشاهد يوم تعرفنا عليه وسلكت أمورنا شوي ، قعدت أسولف أنا وياه بسالفة به طاري ميّة وعشرة وميّة عشرين ، وقلت له من عرض السالفة ( والظاهر ان ذولا خطّهم ميّه وعشرة ( عبيد ) مثلنا ومثلكم ) .. والله يوم دريت يوم تغير وجه الرجّال ..!! بدا يحمّر ويصفّر ..!! وأحس اني ضيّعت وجه الرجّال يوم انّي قلت له هالكلمة ...!! الشاهد انّي ضيّعته منّا ومنّا .. ومشّيته عليه ..أو بالأصح هو مشّاه ..أي ( ابلعه )

الظاهر انّكم عرفتوا وشّي المشكلة هالحين ؟؟؟؟

ياجماعة الخير - بالعربي - أنا ودّي أكسّر الحاجز الحاجز هذا .. اللي هو ان الواحد إذا صار ولد عبيد يحس ان هذا عيب عليه ، و ولد الشيوخ ينفخ رويحته يحسبه صار الملك !! ... أنا ودّي تصير المسألة عادية .. خلاص هذولا شيوخ بلا شوفت نفس ، وهذولا عبيد بلا مذلّة .. وراااه .. كلّنا عبيد لله !! ... صح ان هذا عرف ماشين عليه من زمان .. العبيد ما يتزوجون من الشيوخ ؟؟.. مايخالف هذي ماقلنا به شي ..كلّن له حريمه .. بس كون الواحد يشوف رويحته علشان انه ولد شيوخ ..!! أو ينذل ويحس انه ذليل وخسيس علشان انّه ولد عبيد ..!! ... هذي اللي مانبيه وهذي المشكلة اللي أبيكم تحلّونه ... وجزاكم الله خير لا تصيفون بالرد ..


مع السلامة