 |
|
|
|
|
07-09-2009, 03:31 AM
|
#1 |
|
عـضـو
تاريخ التسجيل: Aug 2007
البلد: غريب في زمن الفتن
المشاركات: 1,047
|
رحلة إلى بلاد الأندومي ( قصص وصور )
السلام عليكم
يسرني أن أطرح لكم تفاصيل الرحلة الممتعة والتي كانت في شهر 8 1430 توكلنا على الله وانطلقنا بطيران الجارودة إلى بلاد الأندومي وكنا أربعة خامسهم كلبهم  طبعا الطائرة مليئة بالفنس وعليهن روائح يحبه قلبك لكن نعمة من الله أننا كنا بالطابق العلوي وفي مقدمة الطائرة وكل من حولنا سعوديون ؟؟ ويبدو لي أنهم قد خططوا أن يكون السعوديون بجوار بعض عموما كانت الرحلة بالطائرة متعبة قليلا خصوصا أننا بلينا بمضيفة ( راكبة راسة ) وكانت تهدد وتتوعد الجميع ماتبيك تطلع الجوال حتى لو هو طافي طبعا مابقى أحد من السعوديين ماجاو تهزيء حتى وصل به الحد انه تقول تراكم بالخطوط الاندونيسية لاتحسبك بديارك تتفرنك  وأول مرة صراحة أحس بقيمة الخطوط السعودية عموما وفقنا الله انه يصير بيننا كرسي فاضي فصرنا 2 على 3 كراسي يعني نقدر نتمغط ونتضجع لكن مامكثنا إلا برهة من الزمن إلا وجاء بالكرسي اللي جنبنا مجموعة سملق سعوديين من الدمام وكل واحد أكبر من الثاني تعرف أهل الشرقية ماشاء الله عرضين طبعا حنا اقلعنا من الرياض للشرقية وشلناهم وكملنا لاندونيسيا فحنا اكثر منهم خبرة بالطيارة وشايفين ان المكيف اللي فوقهم يطيح قطع ثلج صغيرة بعد شوي حسوا ان فيه شي بارد يطيح عليهم فبدوا يقولون وش ذا جيتك انا وتليقفت وما ادري وش اللي لقفن قلت لهم ( طف زر الثلج ) الاخوان صدقوا لانه ماجاء ببالهم ان واحد ثقيل دميمكن يتميلح بها الطريقة وقعدوا يحربشون بفرارات المكيف طبعا لاتسأل عن اخوياي فطسوا من الضحك والسعودين اللي حولنا من باب اولى أنا طقيت حوله وغمضت كني نمت وانا داري أنهم ودهم يدبغونن عموما بينما انا وخويي قاعدين نتبادل التجطل بالكرسي اللي بيننا لمحناهم يلخسوننا فبنباهت الفطاحلة درينا أنهم يبون منا شي أو ودهم يجون يلفعونن وبعد برهة من الزمن تبيجح واحد منهم وقال لنا لو سمحتوا ممكن نجيب خوينا عندكم لانه يحوووول لحاله تحت طبعا بشيم الكبار وافقت دون تردد < أي هين بس اشترطت عليهم شرط قلت ( عسى ماهب سمين مثلكم ) يقالي أبرقع الأوله وألطف الجوومادريت إلا أخوياي يتهددون وكروا العالم ضحك وبلشت واحمر وجهي وفكرت قلت لو يقومون يدبغونن وش موقفي حتى المضيفة ماهب قايله شي لأنه منغثة منا قاله جلفهم على مضض لا لاتخاف نحيف يوم جاء توحشت هو صدق انحف منهم بس بمقياسنا هبرة ولابس الله يجيرك نفس لبس هوقوقن المصارع < ياقدمه حاط ربطة على راسه ولحيته تقل مكنسه طبعا قعد وسلم وسولفنا وصار حبيب قوة واكتشفت ان اللبس اللي عليه لبس أعضاء مجموعة هارلي للدبابات وقعد يسولف علينا وانا ما ادري وش يقول عموما < ياكثر عموما : أحتجت للحمام أكرمكم الله ورحت ( والله ياهو ضيق ووصخ ) وانا ملقوف قعدت ارش الكرسي بالماء واحاول انظفه يوم طلعت أثر المضيفة الثانية تحترين يوم طلعت استلمتن هواش وبما اني بلبل بالانجليزي اكتشفت انه تقول وراك تملي الحمام ماء ( والله قهر قاعد انظف وهذا جزاي ) رجعت للكرسي ولقيت أخويانا الباقين يسولفون مع واحد مطوع كبير وأسمع خويي يقول لذاك طيب هل هناك مخرجات ؟؟ أنا انهبلت ومنين جاب مخرجات ومسكت معي مخرجات فبديت اويتز على خويي وأقول له أحلى يا أبو مخرجات طبعا المطوع مايدري لانه لاهي مع خوينا الرابع والله من الخرط أحس كل واحد منهم بلشن بالثاني ولصقت بوينا مخرجات وبعد توفيق من الله وصلنا مطار جاكرتا ونكمل لاحقا ان شاء الله ....
__________________
لاتنسني من دعوة صالحة آخر من قام بالتعديل الواقعي 9; بتاريخ 07-09-2009 الساعة 03:45 AM. |
|
|
| الإشارات المرجعية |
| أدوات الموضوع | |
| طريقة العرض | |
|
|
النمط الأحادي