[التسي]

لاحظت ومن عدة سنوات كل واحد شاقل يد والا رجل والا جنب ويعطيه قريبه وقريبه يعطيه مثله وهكذا تدور الحلقه
واذا قريبه ماجاب له يمكن يسقط اسمه في لحم العيد القادم وكذلك الحال مع الجار اذا ماعطاه ينتقل الجنب الى الجار الاخر
السؤال الكبير وين الفقير عن زحمة هاللحم؟؟؟؟؟؟!!!!!!
يمكن لان الفقير ماراح يرجع لك يد او جنب بدل الي عطيته
اقول يمكن ماني متاكد ترا <<<مجهز سنونه للعرمشه

اخواني اعتقد الفقير ضاع في وسط هذه الزحمه
يمكن يطق عليك عامل تعتقد انه فقير ويقول لحم وتعطيه واذا عطيته تعطيه من لحم الوصايا
وطبعا بما اننا قصمان فنصنا ان لم يكن كلنا جده والا جدته موصيه بضحيه لبوها
ولكن السؤال الكبير الي تبي تستغرب منه
ليه تعطي هذا العامل الي طق بابك؟؟
يأن مخك مقفل او ارفل وماتبي تبحث عن فقير
اذا هوتاجر موسم ويتعامل معه مثل تعامله مع اي موسم اخر موسم التمر موسم الجح موسم الفطره موسم الشحاذه في رمضان وغيره
ليه ماتعطيه احد ثقه يعرف فقراء او تبحث عن الفقير بنفسك وياليت يكون عائله سعوديه
عائله طول السنه تعيش على الدجاج وماتشوف اللحم الا بمثل هذا الموسم
سوا من فقر او بخل
فالبخيل يعتبر اولاده فقراء ان لم يكونو اكثر حاجة من الفقير لان ظاهرهم الغنى ولكن ابوهم ببخله فقرهم
نجي الان للحم<<السنون بعد العرمشه
هل فيكم واحد تذكر بحياته انه عمره اعطى فقير كبده
ياليت ياخوان مستقبلا بعد تنظيف الكرشه والمصران ولفهن على الكرشه وتقطيع اللحم وتكيسهم وكانك تبي تحطهم بثلاجتك
ومن ثم تاخذ منهم كم كيس بما يعادل ثلث الذبيحه (يعني ثلث الاكياس وتراني مافتيك بس اوضح طريقة حسابي )وتوزعهن على فقراء سعوديين او حتى غير
المهم تبحث لك عن عوائل وتترك العمال لغيرك يبحث عنهم
ياليت نحاول نرتقي الى مرتبة الاحسان وهيا:
ان نعبد الله ونتصدق له وكاننا نراه فأن لم نكن نراه فانه يرانا
متى ماوصلنا الى هذه الدرجةصدقوني راح نحتفظ باللحم الشين ونوزع ازين اللحم
حينها ستخجل من الله ولن تعطي عبده الا اطيب اللحم ومن ماتحب وليس الرقبه والراس
شكرا