[مهندس بريدة]

واضح إنك متحاملة كثير على الرجال , و ممكن كل هالنقاط تعانين فيها بالمجتمع اللي محيط فيكي لكن في صفات كثيرة مهب موجودة بالرجال ,, و ممكن كل رجال عنده وحده او ثنتين من هالنقاط اللي ذكرتيها لكن أستبعد استبعاااااد قاطع يكون فيه رجال عنده اكثر من نص النقاط اللي ذكرتيها .

اقتباس لماذا المرأة لا تطلب اي حق من حقوقها لو حتى كان نفقة لطفلها او نفسها الا وزوجها راضي عنها ؟(ولو مو راضي واثقة انه بيعيي او يتمنن فتكره تطلب حق من حقوقها)

يا أختي هذي الطبيعة البشرية مبنية على الإحترام و التقدير حتى لو كنتي تطلبين شيء من حقك , و اختيار الوقت المناسب لطلب هذي أهم أساسيات التعامل و الإحترام , حتى الولد مستحيل يطلب من أبوه طلب و هو زعلان عليه او حتى مزاجه متعكر علماً بأن الأبو مسؤولية ينفق على ولده ,

اوضحها لك أكثر ,, نفرض انتي عندك مشوره تبي تشاورين اختك بشغله , مجرد سؤال وجواب تدخلين عليها و هي بنفسها عليك شيء ؟؟ مستحييييييييل مهب من الأدب ولا من اللباقة و لا من اي شيء
المعروف انك تنتظرين لين ما يهدأ خاطرها و تدخلين عليها يعني شيء طبيعي ما اشوف فيه مشكلة .

حتى لو صار حق من حقوقك الواحد يعرف يختار الوقت المناسب , هذا الكلام للولد و للبنت , كثير مرات نسلف ناس فلوس و لا نطلبها منهم و بخاطرهم شيء علينا ننتظر الفرصه المناسبة و هو شيء من حقوقي بس احترمته و خليته يطيب خاطره علشان اطلب حقي بإختصار لإنه خويي .

اقتباس ولماذا الاخ يطلب ما يشاء من اخته (طبخ - غسيل - --) وهو لايعلم ولا يبالي بمشاعرها سواءيروق لها ان تعمل ما اراد ام لا اوانها تعبانه او لا ؟

ما أكثر الشغالات بهالزمن و السبب من وين يا أختي ؟
ما راح أمشي بالطريق اللي انتي مشيتي فيه و هو اتهام الرجل لكن انا اقول كثرة الشغالات بهالزمن و يكاد ما يكون فيه بيت الا فيه شغالة و بيوت كثيره شغالاتين و ثلاث و السبب بالنسبة لي ان الدنيا ما صارت مثل أول لا بالنسبة للبنات و لا لرجال

ولو كنت بمشي بنفس طريقك كان قلت السبب ان البنات ما صاروا قرمات مثل أول تغسل و تنفخ و تشيل و تحط لكن السبب من وجهة نظري ان الزمن الأول مهب مثل الزمن الآن .

اقتباس ولماذا الاخت ماتطلب طلباتها لو هي ضروريه لاخوها الا لما تعاين نفسيته ولو نفسيته ليست ممتازه لاتقول له ( الطلب مرفوض) ؟!!

حتى الولد لما يطلب طلب من اخته او امه لازم يعاين نفسيتها , و كثير مواقف تمر علينا يجي يتضيحك و ينكت و يعرض خدماته و بالنهاية يطلب الطلب اذا كان جامد و الضحك وخفة الدم دليل على انه يبي يطيب خاطرها قبل الطلب و هذا شيء طبيعي ,

أكبر اساس الإحترام انك تختاري الوقت المناسب لطلب , الا الطلبات الضرورية فهذي شيء ثاني , يعني معقولة نفسيتي تعبانه لأي سبب و تجي اختك تطلب منك طلب ثانوي مهب مهم بالوقت هذا ؟؟

اقتباس لماذا الاب يميز الابن عن البنت ؟؟!!

اللي نشوفه حنا العكس و الله . لكن طبيعة بالبشر يخيل لنفسه انه الشخص المظلوم و اللي الكل ضدي و من هالكلام لكن الصحيح ان معاملة البنت تفوق معاملة الولد بمراحل و السبب ان مشاعر البنات حساسة مهب مثل العيال .


ع العموم الكثير من النقاط فيها تحامل غريب على الرجل , و مثل ما قلت هي طبيعة بالبشر يحسس الناس و المجتمع انه المظلوم و من هالكلام , و نفس المكان لو تناقشين شباب قالوا لك حنا مظلومين و الأسواق كلها عوايل و الحدايق عوايل و بالسفر كل الأماكن عوايل و الكفيات المحترمة عوايل و حنا عدنا جلسات شيشة و غيرها .

أختم بقوله تعالى : { الرجال قوامون على النساء بما فضل الله بعضهم على بعض وبما أنفقوا من أموالهم فالصالحات قانتات حافظات للغيب بما حفظ الله واللاتي تخافون نشوزهن فعظوهن واهجروهن في المضاجع واضربوهن فإن أطعنكم فلا تبغوا عليهن سبيلا إن الله كان عليا كبيرا }