[مستحيل اجرح]

صباحكم ومسائكم ملي بالخيرات والمسرات

موضوعي بسيط وملاحظه صغيره على الشباب اللي يشتغلون بالسوق

كل مره اروح لسوق خآصه سوق الخضار والتمور القى شباب بمختلف الاعمار
ماشاء الله عليهم والله يرزقهم يارب

بس الملاحظه انهم من يشوفون زبون يتذللون له ويستعطفونه بكلمات ما اشوفها مناسبه
مثل يا عمي يا خالي وغيرها من الكلمات وكأنهم يشحذونه يشتري منهم

حتى الصغار حقين العربيات يلاحقون الناس يا عم يا خال يابوي احمل عنك بضاعتك حتى لو الزبون صغير وكأنهم يشحذون

عمر التجاره وطلب الرزق ما صار بالمذله والترجي ...


مع ان الزبون بعض المرات صغير واصغر من اللي يبيع
كانوا بس الاجانب يستعطفون الزبون لان همهم الفلوس وبس/!

مدري احس مهوب لايق على شباب بريده اللي عرفوا بعزه النفس والكرامه والتجاره الحره من كل ما يأثر على شخصيتهم وكرامتهم





المفروض يعرضون بضاعتهم ويصدقون بالقول ويخلصون مع الزبون بكذا يكسبون ثقه الزبون بدون كلمات الاستعطاف..

ومثل ما سمعت من كبار السن انهم ما كانوا يتعاملون مع الزبون كذا بالعكس البضاعه قدامه يبي يشتري بدون رجاوي وتذلل واذا مايبي يشتري الله الرزاق..


يمكن بعضكم يقول من احترام الزبون يقلون له كذا بس ممكن يحترمون الزبون بطريقه ثانيه مهوب كذا

ابي رأيكم في اساليب الشباب بالسوق لكسب الزبون وهل تشوفونها مناسبه


مع خالص تقديري واحترامي لكم