[إكلــــيل]

بسم الله الرحمن الرحيم ..

<< طالب جديد

حياكم الله .. اقلطو ..

دوافع عمل الكنافة .. /

أولا / الشرح سهل مرة وطريقته بسيطه ..
بس ياويلي يالتطبيق بديت احمر واصفر خفت تخرررب .. همن افشل عند اهلي ..

ثانياً / ماكان في بالي أبد لكن مره تذكرت كنافة ابو ميسم وانا امشي بالسياره ..يووم التفت يمين ولاي بجمب محل الصانع اللي بطريق الشاحنات .. امر اصفط قلت ياولد وراه مانجرب .. <<< بززززع ..

والله وادخل واشري صحن كنافة ولقيت الزرادية حقته اللي يقول ابو ميسم ..
تلقون الزرادية مع الصور بس اصبرو ..

المهم الكلام هذا آخر العصر .. يوم الاثنين كملت مشاويري يوم صليت العشاء وانحر السوبر ماركت واخذ معي عجينة كنافة وقشششطة .. وسيييدا للبيت ...

يوم دخلت واجيك واسوي إعلان في البيت .. قلت تراي ابزين كنافة .. من اللي يبي ..؟

أكثر ولا ازين لي لحالي ..؟؟

<<< :D ضامن الرجال انه تنضبط ..

ههههههههه

بعضهم قعد يضحك علي يقولون وش جاااوه .. ذاا :D

المهم وابزع وادخل المطبخ ..

بس الحمدلله الصحن وشريته يعني لو خرب عادي

( معليش الصور راح تكون مختصرة بدون تفصيل ) ..

أيضاً الصور من الجوال لا تشرهون ..


إليكم الآن الصورة الأولى ..


بعد ما وضعت العجينة ثم القشطة ثم العجينة الأخرى ..

بس اعلمكـ بلشت بلطس القشطه يالله ضبطت ..

ولا حظ القطامة .. قصدي الزرادية حقت الكنافة .. << مايلعب

تقول الصورة << بريماكس



والآن وبعد ذلك ..

وضعتها على الضوية .. ( مع كون الضوء هادئة قليلاً .. )

((مهب الضوية يعني شاب على الحطب .. بس على شان مجنون هيله قلت الضو .. ))

المهم .. لمدة 1.5 دقيقة ..أو دقيقتين ..

ثم قلبتها على الجمب الثاني .. << عند هالموقف بلششششت ..

وشلون اقلبه .. بدت تميلص وتتفتت ..

<< اثر خويكم متذيهن شارين صحنين كنافة ..

المهم لصقت الصحن الأول بالثاني ..وقلبتهن ..صارت الكنافة على الصحن الثاني مقلوبه ..

<< شغل عدل :D

إليكم الصورة بعد ماقلبتها على الجمب الثاني ..

ولاحظ الزرادية تاصةٍ الصحن تصصص ..

صايرتن عروة ماشاء الله :D



بعد ذلكـ ...

تم عمل الشيره ..

طبعا طريقة عمل الشيرة كالتالي ..

تضع كأسا من الماء .. على قدر صغير ..

وتضع من ثلاث إلى أربع فناجيل سكر . على حسب الرغبة

وخلة يطبخ لما يغدي غلاظ ..

بعض الناس يضيف معه هيل حتى يطعم به ..

اللي يبي يحط هيل لازم يشخله أول ما يخلص ..

ملاحظه : الشيره عادي تخليه بالثلاجة تراه ماتخرب .. يعني يمكن تجوز لك الكنافة وتزين مرتن ثانية .. يعني خله يمكن تلقاه .. ولا لا تزين كثيرة ..

....

نكمل ..

للأسف لا يوجد صورة للشيرة ..

المهم بعد ماخلصنا من الجمب الثاني أيضاً 1.5 دقيقة ..أو دقيقتين بالكثير ..

حطيناه بصحن وكبينا عليه شوية شيره على حسب الطلب .. :D

وهذي آخر صورة ..

الكنافة جاهزة للأكل .. وتراه ماحرقت شوي ...



تفضلو يالله حيهم



تم الإنتهاء بحمد الله ..

واللي ما ذاقه أنصحه يذووقه .. مهب لازم أنت تزينه ..
خل اهلكـ يزينونه بس جبلهم الاغراض ..

والله ياهي فرق بين كنافة البيت وكنافة المطعم .. والله ياهي شــــــــــي ..

طعم طعم رهيب ..

وانا هنا استخدمت عجينة السنبلة ..

ولا أعلم هل هناكـ عجينة أخرى .. أو أنواع أخرى ..

وأخيراً ..

أستودعكم الله ..

من خلف الكواليس ..

الشيفـ ( الشيفه )

أبوفهد