[أبو رياض]

السلام عليكم ورحمة الله وبركاته ..


تحية طيبة وبعد ..


في الجنوب من مدينة بريدة وتحديداً في الحي الـذي يقع غربــاً من مصـرف الراجحي
المـوجـود بطـريق عنـيزة وأنـت باتجــاه جامعة القصــيم ..


كانت لنا هناكـ قصـة
.
.
.
.
.
.
.
طبعاً أنا من سكان ذلك الحـي الراقـي >>> حقدوا بعض ناس :D

في أغلب الليالي إن لم تكن كل ليلة ..

تتكرر أمامي جريمة ..

كان بودي لو أحضرت لكم صوراً لمسرح هذه الجريمة ..

لنجمع معاً على من تقع المسؤلية ..

حيث أن المسؤول ليس شخصاً واحـداً !!

لعلي لا أطيل عليكم بفلسفتي ولأدخل بالموضوع مباشرة ..

ولكن !!

بعد أن أخلع ثوب اللغةالعربية وأرتدي قميص لغتنا المفهومة العامية >>> حقت بريماكس..




كان يوم جمعه خرجت >>> ولا فاصخين ثوب العربية خلاص أمزح ..

كنت طالع مع بعض الزملاء وكان يوم جمعه ..

المهم وأنا راجع للبيت كانت الساعة 11,30 م تقريباً ..

المهم أول مادخلت للحـي الـراقي إلا والله ذاك الغبار تقل الي جانا أمس .. صيغة مبالغة

وش السالفة ياولـد ..

والله العظيم لو تشوفون الي شفته ..

كان تقولون أبد ماحنا بوسط حـي ..

يمكن بالدائري لا بالدائري مايسوون كذا .. بالمقطوع لا لا .. بأشهر أماكن التفحيط بالرياض يمكن ولو إني ماني مقتـنع ..


تفحيط مهوب لم جادة أبد ..

والمشكلة إنك تدور وتلفت وين المرور.. وين الشرطة... وين الدفاع المدني .. وين أي سيارة للأمن ..

والله تقل قاعدين بالربع الخالي ..

وتتصل وتبلغ .. يمكن مشغولين بأمور ثانية .. يمكن عندهم مهمة .. يمكن .. يمكن
وتقعد تعذر وتلعب على نفسك ..

وفي الأخير تتصل .. وتتفاجأ بالرد ..

كم رقم اللوحة ..

ياأخي أي لوحة أقولك مستلمين الشباب وتفحيط وتقولي لوحة ..

الحين أعلمكم ليشششش ؟؟

طبعاً مسلسل التفحيط عندنا اعتدنا عليه كل ليلة ..

بل إني آخذ معي بطاطس ليز وببسي وأقعد أتابع ..

بس أنتظر الحلقة الأخيرة من هالمسلسل الي كلنا ننتظرها ..

وشكلها بتطول ..

في يوم من الأيام كالعادة المسلسل يشتغل والجريمة تمارس ..

قعدت أدور شوي داخل الحـي ..

بغية أن تمر دورية ولو رايح لحادث بالخضر ولا قصيعا ..

أو حتى يكون منتهي دوامه وراجع على سيارته المدنية وعليه البدله
بس نشعر بأمان شوي ...

يوم بلغ الإحباط فيني أشده ..

إلا والله أشوف ذاك الجيب من بعيد لمحت شيء من بعيد فوق التنده ..

دوريات .. دوريات .. دوريات

الله أكبر ..

بدأ يقترب أكثر ..

لاتخافون تظنون أبقول جيب بلدية ولا دفاع مدني ..

لا جيب دوريات فعلاً ..

لكن لو تهج على سيكل أتحداه يلحقك ..

الحمدلله أهم شيء جاء ..

كبست لراعي الجيب الدوريات ..

ماوقف ماأدري خايف ولا ملحوق ولا ... سبحان الله ..

ومن أول السالميةإلى آخره وأنا وراه وتكبيس وأشارات .. عيا يوقف ..

صرنا تقل فيلم أمريكي ..

المهم مادري وش الي جاه ويوقف طبعاً صفطت وراه .... أحلى موقف دوريات ..:D

السلام ..
وعليكم السلام..
كيف حالك يالطيب ..
الحمدلله ..
فيه عندنا بالحارة إزعاج كل ليلة وتفحيط ..
طيب عطني رقم لوحةالي يفحط ونوع سيارته..
سم تفضل ح ر م ؟ ؟ ؟


تدرون وش سوى!!





-الرجال أخذ كرتون الفاين واضح إنه إذا تعدان بيجدعه لأن مافيه ألا منديلين بس -
ويسجل رقم اللوحة ..



خلاص ماقصرت ..
شكراً ..



جاء بكرا .. جاء بعده .. جاء بعده .. وبعده وبعده وبعده .. وجريمة كل يوم تكرر ..


لا بل طالت وزادت ..

أصبح المسلسل يجي بالليل ويعاد الظهر .. والله ماقصروا ما ودهم يفوت أحد ..

بدينا نشوف تفحيط بالليل والظهر عند خروج الطلاب ..

ووينك يالمرور ... ماأدري ..


خلصت قصتـنا ومعاناتنا ..
اللي أتمنى إنها تصل إلى المسؤولين ..

وقريباً سوف يبعث خطاب إلى أمير المنطقة لتوضيح المعاناة ..
بعد أن تفاقمت المشكلة ..


لكن على من يقع اللوم !!!؟؟؟

::: ساحة التفحيط :::

حيث أن المكان واحد ..

المسافة بين المطب الصناعي الي قبل الساحة والي بعدها يمكن تكون 700 متر أو أكثر ..

بينما المطبات الأخرى لا تتجاوز 200 متر - أعني داخل الحي -


آمل أن لا يطول بنا الإنتظار فلقد مللنا من المشهد ..
وبدأنا ننام على أصوات العجلات ..


شكراً لكم ..

أبو رياض
الثلاثاء 29-3-1427هـ
1,11 مساءً