 |
|
|
|
|
|
||
| ســاحـة مــفــتــوحـــة المواضيع الجادة ، والنقاشات الهادفة -- يمنع المنقول |
|
|
أدوات الموضوع | طريقة العرض |
24-02-2007, 02:55 PM
|
#1 |
|
عـضـو
تاريخ التسجيل: May 2002
البلد: في بلاد تسأل الله العزة والتمكين
المشاركات: 62
|
. . . : : : وليتنا ما ضغطنا , , جت المضيفة اللي معها صحن السكري : : : . . .
انتهينا من الحج أنا والوالدة (أطال الله بعمرها على الطاعة )
ورحنا للمطار وكان معنا حجز مؤكد من جدة إلى الرياض وقال لنا موظف الحجز: ما فيه إلا درجة الأفق من الرياض إلى الدمام تبوووووووون ولا أشوف غيركم ؟؟! طبعاً أخوكم داخل بقوة على الأفق والله ما كنت أدري وشي !! آخر شي كنت أشوفه بالطيارة إذا ركبتها الستاير اللي قدام بين السياحية (الضيافة) وبين الدرجة الأولى .. طبعاً أبعطيكم نبذة بسيطة جداً عن الوضع للواحد اللي توه مخلص من الحج ّ الحال ما يعلم بها إلا الله الثياب دردبيس *(يعني حوسة الحوسات) والصلعة طالعة بدون طاقية وكانت كبوس مطار الملك خالد تلمع على الصلعة المباركة وتنور على السقف الملمع مما يساعد على اكتشاف تواجدي في أي متر مربع في المطار ..هذا من جهة!! من جهة أخرى . . (كأني باستديوا الأخبار) تعرفون اللي حج منكم أو يبي يحج أعزكم الله ما أحد يضمن سياراته يتقطعن بالجمرات أو يضيعن أو يسرقن ... أنا فاقدهن قبل السفرة بيوم أو يومين وطبعاً ما فيه بديل إلا أبو خمس ريالات موديل الترك (على وزن صوتها إذا لحطت بالأرض ) عاد وصارت برجلي (أعزكم الله ) ما تسمع بالمطار الا ترررراااك . . . . . . . ترررراااك وطياراااااااااااااان لمْ الكونتر الخاص بدرجة الأفق (اللي ما كيد شفتها) وأمسك سرى ,, ولا فيه واحد قدامي يا ساتر استر ,, ما عرفت معنى الكشخة الا يوم شفته وكان طبعاً طويل (بحكم إني بثالث متوسط ) وكان يناظرني بثمن عين وحدة كان شكله يظن إني سأسأل عن القسم الخاص بالطرود أو عن كونتر الانتظار (هذا إذا غلبت الروم ) ما يدري إني أبصير معه في نفس الدرجة بس ما أدري وشي وجهته . عموماً كان هو قدام في الترتيب فستراً له ما كان يدري عني شيْء (خسارة) أخذنا البردنق ودخلنا صالة المغادرة أنا والوالدة الغالية ولم البوابة رقم 36 إذا ما خانتني الذاكرة , وحنا داخلين في الممر الناقل للطائرة في لفه لفينا معها وكانت مخصصة للدرجة الأولى ودرجتنا الأفق احم (قولوا ما شاء الله ) طبعاً كان في استقباله حفظه الله ورعاه في حله وترحاله جمع غفير من الملاحين والملاحات لاستقبال سموه (وأي واحد أشوفه مهب مرتاح أكبس عليه بالصلعة المباركة ) أخذ منا الكروت الباقية من البردنق وقال تروح إلى آخر الممر هذا (طبعاً الممر اللي في الدرجة الأولى ) تلقى فيه درج تطلع معاه فوق وفيه واحد بيوصلك لمكانك المخصص أوكيه طبعاً عيوني بوجهه لو يقولي عيد علي اللي قلته ما أدري وش قال من اللباقة وسلالة الأحرف من فمه هاه أوكيه وطبعاً المكان الهادي تتبين فيه اللمسات الموسيقية الكلاسيكية تررراااااك . . . . . . . ترررااااك ومع الدرج خويك تحسبه وفر ها لصوت ما فيه الا ضرب بها الأرض وصلنا فوق وجانا واحد وصلنا للكراسي الخاصة بنا وأنا بس أبحلق بالأفق أناظر تقول موظف بـCIA من التدقيق والإمعان في النظر الكراسي تقول كأنها كراسي التدليك الفخمة وحجمها كبير والعدد ما كان فيه كثرة بالحيل والناس اللي راكبة معنا (كأني أنا اللي أبوصلهم) ناس هاي هاي وحتى وصولنا إلى كراسينا كان للمسات الفنية التي لو جاء أكبر المبدعين للسيمفونيات العالمية لطالب بإلغاء حجزه مباشرة وبدون استرداد تذاكر أيضاً طبعاً صار مكاننا عند باب للطوارئ يعني الكرسي اللي قدامك بعيد وطارت الطيارة بسلامتها ثم أعلن عن فك الأحزمة والسماح بالتجول السماح بالتجول قال والله ما فكرة أقوم من الكرسي اللي أنا فيه من فخامة فيه طبعاً جت بنت السيف (دلة قهوة) وتسمع صكة الفناجيل وكأننا بخيمة ويصب لنا ذاك الفنجال اللي عدل المزاج ومن بعدها جت التميرات من السكري الطيب وفعلاً كان طيب (أكيد طيب من دراهمنا) والعجيب انهم فارشين التمر على صينية وكل تمرة فيها عود أسنان يعني تأخذ ها لعود وما تعود وها لمضيفة تدور بالصحن علينا مع القهوة ,,, تذكرت مجلة أهلاً وسهلاً وطبعاً تعرفون مكانها تكون بالكرسي اللي قدامك والكنبة اللي قدامي بعيدة ,وقمت أشوف ما لقيتها طبعاً اضغط الزر يجيك المطلوب ضغطنا ...اييييييييييه وليتنا ما ضغطنا جت المضيفة اللي معها صحن السكري Yes طبعاً باللغة ما يحتاج عندي التفاهم بالبنقا والهندي وأبو فلبن (بليس مجلت أهلاً وسهلاً) طبعاً مع شد الخدود علشان تضبط اللغة أخاف أغير بمخارج الحروف وبعدين تصير غلط قالت : أوكيه . وبعدين حركة صنم مدت لي صحن السكري ونطقت بجمل الله أعلم بها هي كانت تقصد خذ تمرة !! طبعاً ههههههههههه هذي الأمور ما تعدي علينا (أقصد أمور القرامة والشهامة) :: خويكم فهم شي ثاني :: أحسبها تقصد ::::: امسك الصحن حتى أجيبلك المجلة ::::: وخذ سحب للصحن بإخلاص ولا سكري بعد المسكينة جاها ملع بكتوفها من السحب طبعاً المسكينة طلعت عيونها والوضع عندها أكون أو لا أكون بدت تصارخ وتقول ون . . ون بليز وأنا أقولها خلاص جيبي المجلة وانأ أمسكلك الصحن لين ترجعين الله يحفظ الوالدة قالت لي مباشرة يا وليدي خذ وحدة بس الحقيقة في هذه اللحظة أصبت بصدمة عنيفة لان لغتي تزعزعت في نفسي وقمت بأخذ واحدة فقط وتنفست المضيفة الصعداء بعد تلك السحبة وذهبت . . وجاءت المجلة مع أحد المضيفين الرجال ومعه بعض الجرائد والشرهة تملى وجهه , وكل ما مر من جنبنا أحد من المضيفين بدا يقز علي الله أعلم إن السمعة راحت فيها ولفيت وجهي للدريشة أناظر الليل من الفشلة ... ::: وسلامتكم ::: |
|
| الإشارات المرجعية |
| أدوات الموضوع | |
| طريقة العرض | |
|
|
النمط الأحادي